Oliakunit akuutissanillu eqqagassat pillugit Namminersornerullutik Oqartussat nalunaarutaat nr. 29, 17. september 1993-imeersoq

Avatangiisit inaarlitsaaliorneqarnissaat pillugu Inatsisartut peqqussutaanni nr. 12-imi 22 december 1988-imeersumi Inatsisartut peqqussutaatigut nr. 7-ikkut 13. maj 1993-immersukkut allanngortinneqartumi § 1, imm. 1, nr. 4, § 8, imm. 1 aamma 2, § 9, imm. 3, § 15 aamma § 46, imm. 2 tunngavigalugit makku aalajangersarneqarput:

 

Kapitali 1.
Nalunaarummi pineqartut il.il.

§ 1. Suliffeqarfissuarnit, matumani suliffeqarfinnit mikinerusunit, umiarsualivinnit il.il. angerlarsimaffinnillu oliakut akuutissanillu igitassat passunneqartarnerat eqqarneqartarnerallu nalunaarummi matumani pineqarput.

§ 2. Eqqaasarneq nalunaarummi matumani pineqartoq tassaavoq suujunnaarsitsineq, ikuallaaneq atueqqinnerlu.
Imm. 2. Oliakutut igitassat nalunaarummi matunami pineqartut tassaapput atortussiat siunertarpiaminnut atorneqarunnaarsimasut, ilanngussamilu 1-imi nalunaarsorsimasut.
Imm. 3. Akuutissanit igitassat nalunaarummi matumani pineqartut tassapput atortussiat siunertarpiaminnut atorneqarunnaarsimasut, ilanngussamilu 2-mi nalunaarsorsimasut.
Imm.4. Passussineq nalunaarummi matumani pineqartoq tassaavoq oliakunit akuutissanillu igitassanik katersuinerit, assartuinerit, immikkoortiterinerit, allanik poortuinerit uninngatinneqartarnerallu.

§ 3. Oliakut akuutissanillu igitassat ulorianartutut nalunaarsorneqarsimasut assartugassat uloriarnartut assartorneqartarneri pillugit malittarisassat sukkulluunniit atuuttut malillugit uninngatinneqarlutillu assartorneqartarssapput.
Imm. 2. Oliakut akuutissanillu igitassat uninngatinneqarnerini assartorneqarnerinilu pooqartinneqassapput inissinneqarnermikkut, ilusiligaanermikkut ussissutsimikkullu silaannarmik, nunamik, imermik sikumillu mingutsitsisinnaanermik ulorianartorsiortitsisoqannginnissaa qulakkkeerlugu.
Imm. 3. Uninngatitsineq assartuinerlu illersorneqarsinnaasut qulakkeerniarlugit kommunalbestyrelsi naalakkiuteqarsinnaavoq.

 

Kapitali 2.
Ilisimatitsineq nalunaaruteqartarnerlu.

§ 4. Suliffeqarfiit oliakunik akuutissanillu igitassaqartartut tamarmik tamanna kommunalbestyrelsimut nalunaarutigisassavaat.
Imm.2. Nalunaaruteqarnermi suliffeqarfiup qanoq ittunik igitassaateqassanganerluni, poortuuteqassanganerluni ukiumullu qanoq amerlatigisunik igitassaateqassanganerluni ilannguttassavai.
Imm. 3. Oliakunik akuutissanillu igitassanik kommunit tigooqqaavii suliffiilu eqqaaviusut imm. 1-imi aalajangersakkani ilaatinneqanngillat.

§ 5. Suliffeqarfiit oliakunik akuutissanillu igitassanik kommunip avataaniit kommunimut eqqussiniartut tamanna kommunalbestyrelsimut ilisimatitsissutigissavaat § 4-mi aalajangersakkat malillugit eqqussinissaq sap. akunnerinik arfineq pingasunik sioqqullugu.
Imm. 2. Eqqussiniarneq kommunalbestyrelsip itigartissinnaavaa eqqaanissaq kommunip eqqaaviani ingerlanneqassappat, eqqussuinerluunniit kommunimi oliakunik akuutissanillu igitassaareersunik eqqaanermut akornutaassangatinneqarpat.
Imm. 3. Imm. 2 tunngavigalugu itigartitsineq ilisimatitsissutigineqassaaq nalunaaruteqarneq kingusinnerpaamik sap. ak. tallimanik kingoqqullugu.

 

Kapitali 3.
Innersuussisussaatitaanneq tunniussisussaatitaanerlu.

§ 6. Oliakunik akuutissanillu igitassanut eqqaaviusinnaasumik qinnuteqartoqarneratigut kommuni innersuussissaaq. Eqqaaviusinnaasutut innersuunneqartoq atorneqassaaq.

§ 7. Kommunalbestyrelsi kommunip illoqarfittaani nunaqarfittaanilu oliakunik akuutissanillu igitassanik tigooraanermik aaqqissuussisinnaavoq. Aaqqissuussinermi suliffeqarfinnit, sullivinnit, umiarsualivinnit il.il. angerlarsimaffinnillu oliakunik akuutissanillu igitassat ilaatinneqassapput.
Imm. 2. Oliakut akuutissallu igitassat tigooqqaavinni pilersinneqartuni tigooqarneqartut eqqarneqarnissaat kommunalbestyrelsip qulakkiissavaa.
Imm. 3. Tigooraanerit eqqaanerullu ingerlanneqarnerat tamarmi ilaannaaluunniit suliffeqarfinnut taamatut suliaqarnissamut piukkunnartunut tunniunneqarsinnaavoq.
Imm. 4. Oliakunik akuutissanillu tigooraanermut eqqaanermullu atatillugu aningaasartuutini tunngavigalugit kommunalbestyrelsi akiliutissamik aalajangersaassaaq.

§ 8. Kommunip tigooraavia pilersinneqarpat, tak. §7, suliffeqarfiit § 4-mi nalunaaruteqartussaatitaasutut taaneqartut aaqqissuussinermik atuissapput, tamatumunngalu kommunalbestyrelsip aalajangersagai malillugit akiliuteqartinneqartassallutik.

§ 9. § 7 malillugu tigooraanermik aaqqissuussinerit oliakunik akuutissanillu igitassanik umiarsuarneersunit oliamillu qillerivissuarneersunit toqqaannartumik tigooraanissaminnut pisussaatitaanngillat.
Imm. 2. Immikkulli ittumik aaqqiinissamut periarfissat § 17, imm. 2-mi taaneqartut tunngavigalugit igitassat umiarsualivimmeersut tigoorarnissaat eqqarnissaallu aaqqissuussinermi qu-lakkeerneqarsinnaasariaqarput.

 

Kapitali 4.
Tunniussisussaatitaanermut ilaatinneqannginneq.

§ 10. Qinnuteqartoqarneratigut kommunalbestyrelsilu isumaqatiginiareerlugu suliffeqarfinnut, matumani umiarsualiviit ilanngullugit, § 8 malillugu tunniussisussaatitaanermik Naalakkersuisut atortitsinngitsoorsinnaapput. Taamatut ilaatinneqannginneq sivisunerpaamik ukiut tallimakkaarlugit atuussinnaavoq, piumasarineqarporlu:
1) suliffeqarfiup uppernarsassagaa igitassat avatangiisit eqqarsaatigalugit illersorneqarsinnaasumik passunneqarlutillu eqqarneqassasut, aamma
2) peqataatinneqanngitsoorneq kommunini tigooraasarnermik aamma eqqaasarnermik aaqqissuussinerit annertussusilerneqarnerisa tunngavigisaannut sunniuteqassanngitsoq tamakku ingerlanneqarnerinut ajornakusoortitsilersinnaalluni.

 

Kapitali 5.
Akisussaatitaaneq paasissutissiîsussaatitaanerlu.

§ 11. Kinaluunniit oliakunik akuutissanilluunniit igitassanik § 7 malillugu tigooraavimmut tunniussisoq nakkutilliisoqarfimmit imaluunniit tigooraavimmit piumaffigineqaruni igitassat sumit pinngorsimanersut tunniunneqarnerminnilu ka-tigaanerat pillugu tamakkiisumik paasissutissiissaaq.

§ 12. Kinaluunniit oliakunik akuutissanillu igitassanik passussisoq taamaaliornikkut silannaap, nunap, erngup sikulluunniit mingutsinneqannginnissanut akisussaavoq.

§ 13. Kinaluunniit oliakunik akuutissanilluunniit igitassalerinermigut mingutsitsisoq tamanna pillugu kommunalbestyrelsimut erniinnaartumik ilisimatitsissuteqassaaq.
Imm. 2. Mingutsitsinermut akisussaasup mingutsitsinerup kingunerisinnaasai pinaveersimatinniassavai, imm. 1 malillugu ilisimatitsissuteqareersimagaluaruniluunniit.

 

Kapitali 6.
Nakkutilliineq il.il.

§ 14. Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqarsimasumi § 9-mi malittarisassat malillugit suliffeqarfinnik, umiarsualivimmik, suliffinnik, namminersortunik il.il. nakkutilliineq Naalakkersuisunit kommunalbestyrelsimillu ingerlanneqarpoq.
Imm. 2. Oliakunik akuutissanillu igitassanik kikkulluunniit aqqutigisinnaasaasigut assartuinermik nakkutilliineq kommunimit ingerlanneqarpoq, inatsisiliornikkut allakkut allanik aalajangersaasoqarsimatinnagu. Kommunalbestyrelsittaarlu pisinnaatinneqarpoq suliffeqarfinni tamani oliakunik akuutissianillu igitassat assartorneqarnerinut atatillugu passussinernik sunilluunniit nakkutilliinissaminut.
Imm. 3. Nakkutilliinermi malittarisassanillu atortitsinermi Avatangiisit innarlitsaalineqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqartumi kap. 4-mi aamma § 44, imm. 2-mi malittarisassat atuupputtaaq.

§ 15. Oliakunik akuutissanillu igitassat nalunaarummi matumani aalajangersakkat malillugit avatangiisillu eqqarsaatigalugit illersorneqarsinnaasumik passunneqarlutillu eqqarneqarnissaat qulakkeerniarlugu kommunalbestyrelsi naalakkiuteqarsinnaallunilu inerteqquteqarsinnaavoq.
Imm. 2. Mingutsitsisinnaanerup pinaaveersaartinneqarnissaa immikkut siunertaralugu kommunalbestyrelsinaalakkiuteqarsinnaallunilu inerteqquteqarsinnaavoq, matumani oliakunik akuu-tissanillu igitassat akuttunngitsumik tunniunneqartarnissaat eqqarneqartarnissaallu ilanngullugit, taamaaliornikkut suliffeqarfimmi ataatsimi igitassanik eqiteruttuulernissaq pinngitsoorsimatinniarlugu, tak. § 17, imm. 2.

§ 16. Nalunaarut manna malittarisassalluunniit allat taassuminnga tunngavillit tunngavigalugit aalajangiinerit tamarmik Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allan-ngortinneqarsimasumi kap. 10-mi malittarisassat tunngavigalugit naammagittaalliuutigineqarsinnaapput.

 

Kapitali 7.
Aalajangersakkat allat.

§ 17. Kommunip illoqarfiani nunaqarfiinilu oliakunik akuutissianillu igitassanik tigooraasarnermi aaqqissuussinerit pilersinneqartut pillugit kommunalbestyrelsi maleruaqqusanik aalajangersaassaaq. Maleruaqqusat paasissutissanik makkuninnga imaqassapput:
1) suliffeqarfiit § 4-mi taaneqartut sumi qanorlu iliorlutik oliakunik akuutissianillu igitassanik tunniussisassasut,
2) namminersortut sumi qanorlu iliorlutik oliakunik akuutissanillu igitassanik tunniussisassasut, aamma
3) kommunit tigooraanermik aaqqissuussaannik atuinermut akiliutit.
Imm.2. Suliffeqarfiit igitassaataat pillugit maleruaqqusat malittarisassanik makkuninnga imaqassapput:
1) § 4 malillugu oliakunik akuutissanillu igitassanik nalunaaruteqartarneq,
2) oliakunik akuutissanillu igitassat tunniunneqarnerinut atatillugu paasissutissiisussaatitaaneq, tak. § 11,
3) suliffeqarfinni ataasiakkaani igitassat eqiteruttuulernissaat pinngitsoorsimatinniarlugu piffissani aalajangersimasuni pinngitsoorani tunniussisarnissami piffissarititaasut, tak. § 15, imm.2 kiisalu
4) piffissat tigooraasarfiillu pinngitsoorani tunniussivissat, tigooraanermik aaqqissuussinermi passusinissamut periarfissanik ukiuuneranilu immikkut ajornartorsiutaasinnaasunik sillimmaassisut.
Imm. 3. Imm. 1-mi maleruaqqusat taaneqartut akuerineqarneri kingusinnerusukkullu allanngortinneqarneri pillugit kommunalbestyrelsip Naalakkersuisut innuttaasullu ilisimatittassavai.

 

Kapitali 8.
Pineqaatissiinermut atortuulersitsinermullu aalajangersakkat.

§ 18. Akiilisinneqarsinnaapput:
1) §3, imm. 2-mik, § 4, imm. 1-imik aamma 2-mik, § 5, imm. 1-imik aamma 2-mik, § 7, imm. 4-mik, § 8-mik, § 10-mik, § 12-imik kiisalu § 13, imm. 1-imik aamma 2-mik unioqqutitsisut,
2) § 3, imm. 3, § 11, § 15, imm. 1 aamma 2 malillugit piumasaqaatinik, naalakkiutinik inerteqqutinilluunniit sumiginnaasut, imaluunniit
3) § 17, imm. 1 aamma 2 tunngavigalugit malittarisassanik aalajangersarneqartunik unioqqutitsisut.

§ 19. Aktieselskabi, anpartsselskabi, andelsselskabi assigisaalluunniit unioqqutitsisuuppat selskabi akiliisitaasinnaavoq. Namminersornerullutik Oqartussat , kommuni kommunilluunniit ataatsimut ingerlatseqatigiiffiat unioqqutitsisuuppat Namminersornerullutik Oqartussat, kommuni kommunilluunniit ataatsimoorlutik ingerlatseqatigiiffiat akiliisitaasinnaavoq.

§ 20. Nalunaarut manna 1. januar 1994 aallarnerfigalugu atortuulersinneqarpoq.
Imm. 2. § 7 malillugu tigooraanermik aaqqissuussineq pilersinneqarpat kommunalbestyrelsip Naalakkersuisut innuttaasullu tamanna pillugu nalunaaruteqarfigissavai.




Namminersornerullutik Oqartussat, ulloq 17. september 1993




Ove Rosing Olsen

/

Torben Cordtz


Ilanngussaq 1

Ilanngussaq 2

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk