Nuna tamakkerlugu killilersuinerit pillugit Namminersorlutik Oqartussat nalunaarutaat nr. 72, 5. december 2021-mersooq Atuussimasoq (Historisk)

Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi §§ 2 a, 6, 6 a, 12 b, 21 b aamma § 29 imm. 2 aamma 3 naapertorlugit aalajangersarneqarput:

 

Atuuffia

 

  § 1.  Nalunaarut Kalaallit Nunaat tamakkerlugu atuuppoq nappaatit tunillaassortut akiorniarlugit iliuutsit pillugit Inatsisartut peqqussutaani, kingorna allanngortitami, sammisani erseqqinnerusumik malittarisassamik nassuiaasoqariinngippat.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4. Nalunaarut eqqartuussivinnut atuutinngilaq.
  Imm. 5.  Nalunaarut namminersortunut pisortaniillu ulluunerani neqeroorutinut, atuarfinnut, ilinniarfeqarfinnut il.il. nappaatit tunillaassortut akiorniarlugit iliuutsit pillugit Inatsisartut peqqussutaanni § 22 naapertorlugu atuutsinngilaq.
  Imm. 6.  Nalunaarut angerlarsimaffinni aaqqissuussanut il.il. atuutinngilaq.
  Imm. 7.  Nunatsinni Nakorsaaneqarfik nalunaarummit immikkut akuersissuteqarsinnaavoq.

 

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq.
  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.
  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.
  Imm. 4.  Inunnut Peqqinnissaqarfimmi sulisunut Nunatta Nakorsaaneqarfia imm. 1 naapertorlugu aalajangiisassaaq.
  Imm. 5.  Inunnut imm. 2-4-mi taaneqanngitsuni sulisunut, Nunatta Nakorsaaneqarfia imm. 1 naapertorlugu aalajangiisassaaq. Tamatuma saniatigut Nunatta Nakorsaaneqarfia qinnuteqarnikkut inunnut inuiaqatigiinnut pingaarutilimmik suliaqanngitsunut immikkut akuersissuteqarsinnaavoq.

 

Init ilaannut kikkunnilluunniit iserfigineqarsinnaasunut tunngatillugu piumasaqaatit

 

  § 3.  Inuit Covid-19-imut tamakkiisumik akiuussuserneqarsimanermut imaluunniit Covid-19-imut tunillatsissimannginnermut uppernarsaammik takutitsisinnaanngikkunik imm. 2-mi taaneqartuni inineeqqusaanngillat.
  Imm. 2.  Init kikkunnilluunniit iserfigineqarsinnaasut aamma nalinginnaasumik inunnit sivikitsuinnaanngitsumik isersimaffigineqarsinnaasut imm. 1-imut ilaatinneqarput, assersuutigalugu:
1)  Sutorniartarfiit, cafiit, imerniartarfiit, diskotekit assigisaallu.
2)  Kulturikkut suliffeqarfiit - tassunga ilanngullugit ilaatigut Kulturikkut Illorsuit, filmeriartarfiit, katersugaasiviit inersuillu saqqummersitsiviit.
3)  Innuttaasut Illui assigisaallu.
4)  Atuakkanik atorniartarfiit.
5)  Illut iluini timersornermut atorneqartartut - tassunga ilaatigut ilanngullugit init timersortarfiit aamma Illorsuit Timersortarfiit, naluttarfiit, timigissartarfiit.
6)  Nujalerisut, tagiartuisartut, pinnersartittarfiit assigisaallu.
  Imm. 3.  Init tullinnguuttut makku imm. 1-imi piumasaqaatinut ilaatinneqanngillat:
1)  Init niuertarfittut atorneqartut.
2)  Allakkeriviit.
3)  Mittarfiit.
4)  Pisortatut oqartussani pilersuiffiusunilu init sullissiviit, saaffiginnittarfiit il.il. 
5)  Pisortat angallassissutaannut tunngatillugit utaqqisarfiit.
  Imm. 4.  Inuit tullinnguuttut makku imm. 1-imi piumasaqaatinut ilaatinneqanngillat:
1)  Inuit aqqaneq marluk inorlugit ukiullit.
2)  Inuit Covid-19-imut illoqarfinni nunaqarfinniluunniit aallannginnerminni misissortinnissamut periarfissaqanngitsuniittut, aamma ullut 14-it kingulliit Covid-19-imik ilisimaneqanngitsumik tuniluuttoqarsimanngippat.

 

  § 4. Inuit inatsisitigullu pisussaatitaasut pisinnaatitaasullu, tassunga ilanngullugit pisortani oqartussat suliffeqarfiillu, ininik § 3, imm. 2-mi pineqartunik pigisallit akiuussuserneqarsimanermut uppernarsaammik imaluunniit Covid-19-imut misissortinnermi uppernarsaatitut akuerisaq qinnuiginnissinnaapput.
  Imm. 2  Imm. 1 malillugu uppernarsaat takutinneqarsinnaanngikkuni, anisitsisoqarsinnaavoq.

 

  § 5.  Inuit inatsisitigullu pisussaatitaasut pisinnaatitaasullu, ininik § 3, imm. 2-mi ilaatinneqartunik pigisallit piumasaqaatinik makkuninnga naammassinnissimassapput:
1) Taamaallaat § 3 malillugu pisiniat, isersimasut assigisaalluunniit iseqqusaapput. Naalakkersuisut nakkutilliineq ingerlassanersoq siunnersuut saqqummiutissavaat.

 

  § 6.  Inuit inatsisitigut pisussaatitaasut pisinnaatitaasullu politiit naliliinerat malillugu § 5-imik unioqqutitsisimappat, inuit inatsisitigut pisussaatitaasut pisinnaatitaasullu § 5-imik malinninnissaa ilimagineqanngippat, pineqartoq inip piffissami aalajangersimasumi tamanut matoqqatinnissaanik politiinit peqquneqarsinnaavoq.

 

  § 7.  Inuk tamakkiisumik akiuussuserneqarnerata kingunitsianngua tamakkiisumillu akiuussuserneqarsimanermik uppernarsaasinnaappat inuk Covid-19-imut tamakkiisumik akiuussuserneqarsimasutut isigineqassaaq.
  Imm. 2.  Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

 

  § 8.  Covid-19-imut uppernarsaatitut akuerisaq PCR - imaluunnit antigentest atorlugu tunillatsissimannginnermut uppernarsaatitut paasineqassaaq, tamanna peqqinnissaqarfimmiit imaluunniit peqqinnissaqarfik sinnerlugu imaluunniit inuit inatsisitigullu pisussaatitaasut pisinnaatitaasullu Nunatta Nakorsaaneqarfianit akuersissummik tigusaqarnikumit misissorneqarsimassaaq, annerpaamillu 48 tiiminik pisoqaassuseqassalluni..

 

Qanermut imaluunniit kiinnamut assiaquteqarnissamut piumasaqaat

 

  § 9.  Illoqarfinni aamma nunaqarfinni ulluni 14-ini kingullerni Covid-19-imik ilisimaneqanngitsumit tunillatsissimasoqarpat, inuit aqqaneq-marlunnik sinnerlugillu ukiullit qanermut imaluunniit kiinnamut assiaquteqassapput:
1)  inini kikkunnit tamanit iserfigineqarsinnaasuni isersimagunik.
2)  pisiniarfinni kiffartuussinermillu ingerlatsivinni sulisut pisisartunik attaveqarnerminni, imaluunniit
3)  assartuutini kikkunnit tamanit ilaaffigineqarsinnaasuni, tassunga ilanngullugit bussini taxanilu ilaagunik.
  Imm. 2.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
  Imm. 3.  Pisiniarfinni kiffartuussivinnilu sulisut qanermut kiinnamulluunniit assiaqutit atunngikkaluarlugit pisiniat sulisullu akornanni plastikimik assiaqutit atorsinnaavaat.
  Imm. 4. Imm. 1-imi allassimasut apeqqutaatinnagit qanermut kiinnamulluunniit assiaqutit tamakkiisumik ilaannakortumilluunniit peeqqaneqarallarsinnaapput, tamanna peqqutissaqarluarpat, tassunga ilanngullugu ima pisoqarnerani:
1)  Piffissami sivikitsumi nerinermi imernermilu.
2)  Nakorsaatitornermi.
3)  Qarngit aalaneratigut atuaasartumik oqaloqateqarnermi.
4)  Qanermut kiinnamulluunniit assiaqutit anersaartorniarnermut ajoqutaappata ipianngulersitsippataluunniit.
5)  Politiit kinaassutsimik uppernarsaaneranni.
6)  Timersortarfinni, timigissartarfinni naluttarfinni assigisaanilu timersoraanni.

 

  § 10. Qanermut assiaqutitut taaneqartut tassaapput qanermut qinngamullu assiaqutit ataasiartakkat imaluunniit annoraaminermit sanaat allunaasamillu tasisartumilluunniit siutinut ikkuttartut imaluunniit niaqqup tunuatungaani qilertartoq kiinnamullu attuumasoq.
  Imm. 2. Kiinnamut assiaqutitut tassaapput isinut, qanermut qinngamullu assiaqutit plastikimik sanaat kiinnamut attuumanngitsut

 

Illoqarfiit aamma nunaqarfiit ilisimaneqanngitsumik tunillaassuuffiusut saqqummiunneqarneri

 

  § 11.  Illoqarfiit aamma nunaqarfiit ulluni kingullerni 14-ini Covid 19-imik ilisimaneqanngitsumik tunillaassuuffiusuni, Nunatta Nakorsaaneqarfianit corona.nun.gl.-imi saqqummiunneqassapput, takuuk § 3, imm. 4, nr. 2 aamma § 9, imm. 1. 
  Imm. 2.  § 3 aamma § 9 malillugit piumasaqaatit saqqummiunneqarnermiit 2 tiimit qaangiuppata malinnneqassapput. Saqqummiunneqarnermiit sivisunerusumik piffissaliisoqarsinnaavoq.

 

Pingaartumik inunnut Covid-19-imik siusinnerusukkut tunillatsinnikunut

 

  § 12.  Inunnut siusinnerusukkut Covid-19-imik tunillatsinnikuusimasunut PCR-ilu atorlugu misissortinnikkut Covid-19-imik tunillatsissimanerminnik uppernarsaasinnaasunut, piffissami uppernarsaatip atorneqarnerani minnerpaamik ullunik 14-inik annerpaamillu sapaatit akunnerinik aqqaneq-marlunnik pisoqaassusilimmik uppernarsaasinnaasunut tamakkiisumik akiuussuserneqarsimasunut malittarisassat atuuttut assingi atuutsinneqarput.
  Imm. 2.  Uppernarsaat suna uppernarsaatitut akuerisatut atorneqassanersoq Nunatta Nakorsaaneqarfiata aalajangissavaa.

 

Inuit pillugit paasissutissanik suliarinninnerit

 

  § 13.  Nalunaarut una naapertorlugu inuup akiuussuserneqarsimaneranut inissisimaffia uppernarsarniarlugu inuit pillugit paasissutissanik, peqqissutsimut paasissutissat ilanngullugit, suliarinnittoqarsinnaavoq.

 

Pineqaatissiissutit

  § 14.  § 3, imm. 1-imik,§§ 4-6 aamma § 9, imm. 1-inik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 2. Ingerlatseqatigiiffiit il.il. (inatsisitigut pisussaatitaasut pisinnaatitaasullu) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

 

Atuutilersitsineq aamma atuunneranut piffissaliussaq

 

  § 15.  Nalunaarut ulloq 6. december 2021-mi atuutilissaaq.
  Imm. 2.  Nalunaarut malillugu killilersuinerit, inerteqqutit, peqqusinerit il.il. 6. marts 2022 tikillugu atuutissapput.

 

 

Namminersorlutik Oqartussat, ulloq 4. december 2021

 

 

Kirsten Fencker
Peqqinnissamut Naalakkersuisoq

 

 

/ Aka Olesen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk