Namminersorlutik Oqartussat Missingersuutinut Naatsorsuusianullu siunnersuisoqatigiinnut suleriaasiat pillugu nalunaarutaat nr. 4, 6. juni 2019-imeersoq

Kommunit aamma Namminersorlutik Oqartussat missingersuutaat naatsorsuutaallu pillugit Inatsisartut inatsisaat nr. 26, 28. november 2016-imeersumi § 34, imm. 3, § 36 aamma § 45, imm. 2 naapertorlugu, aalajangersarneqarpoq:

 

Kapitali 1

Missingersuutinut Naatsorsuutinullu siunnersuisoqatigiit aaqqissuussaanerat

 

  § 1. Missingersuutinut Naatsorsuutinullu siunnersuisoqatigiit tassaapput kommunit tamarmik immikkut sulisoq 1 toqqaqaat, kommunit aningaasaqarnikkut pissusiinik annertuumik ilisimasaqartoq, sulisoq 1, Aningaasaqarnermut Naalakkersuisumit toqqarneqartoq, Kalaallit Nunaata aningaasaqarneranik annertuumik ilisimasaqartoq siunnersuisoqatigiinnilu siulittaasuusoq, aamma Namminersorlutik Oqartussani naatsorsuuserinermut pisortaq.

  Imm. 2.  Missingersuutinut Naatsorsuusianullu siunnersuisoqatigiit akuersaarsinnaavaa siunnersuisoqatigiit ataatsimiittarneranni ataatsimeeqataasartussaatitaasumik peqataasoqartarnissaa. Peqataasartussaatitaasut oqaaseqarsinnaatitaapput, kisiannili taaseqataasinnaanatik.

 

  § 2. Aningaasaqarnermut Naalakkersuisoqarfiup Missingersuutinut Naatsorsuutinullu siunnersuisoqatigiit allattoqarfia isumagissavaa.

 

  § 3.  Kommunit aamma Naalakkersuisut Missingersuutinut Naatsorsuutinullu siunnersuisoqatigiinni ilaasortaatitamik sulinerannut namminneq aningaasartuutitik akilertassavaat.

 

Kapitali 2

Missingersuutinut Naatsorsuutinullu siunnersuisoqatigiit suliassaat ataatsimiittarnissaallu

 

  § 4.  Missingersuutinut Naatsorsuutinullu siunnersuisoqatigiit missingersuutit naatsorsuutillu pillugit pisortatigoortumik ataatsimut soqutigisaat pillugit apeqqutini ilitsersuisuusassapput siunnersuisassallutillu.

  Imm. 2.  Missingersuutinut Naatsorsuutinullu siunnersuisoqatigiit pisortanut kontonut pilersaarutit aamma kontolersuinermut ilitsersuutit pillugit aalajangersakkanik aalajangiisinnaapput. Missingersuutinut Naatsorsuutinullu siunnersuisoqatigiit matumani nalunaarsuisarnermi ataatsimut atugassarititaasut aalajangersorsinnaavaat aamma paasissutissat kisitsisillu pingaarnerit taakkununnga tunngasut nalunaarsuinermi atugassat nalunaarsorneqarneranni ataatsimut ilitsersuusiat akuersissutigisinnaallugit.

 

  § 5.  Missingersuutinut Naatsorsuutinullu siunnersuisoqatigiit kommuninut aamma Namminersorlutik Oqartussanut inassutigisinnaavaat ukiut ataatsip arlallilluunniit ingerlaneranni susassaqarfiit erseqqinnerusumik aalajangersarneqarsimasut ataaseq arlallilluunniit pillugit aqutsinikkut kukkunersiorneqassasut.

 

  § 6.  Missingersuutinut Naatsorsuutinullu siunnersuisoqatigiit piffissat sumilu ataatsimiittarnissat namminneq aalajangersorsinnaavaat. Allattoqarfik siunnersuisoqatigiinnut ataatsimiigiaqqusisassaaq kingusinnerpaamik ataatsimiinnissaq sapaatip akunneranik sioqqullugu.

  Imm. 2. Oqaluuserisassatut siunnersuutit aamma allakkatigut atortussat Missingersuutinut Naatsorsuutinullu siunnersuisoqatigiit oqaluuserinninnissaannut pisariaqartinneqartut siunnersuisoqatigiit allattoqarfiannut nassiunneqartassapput ataatsimiinnissaq kingusinnerpaamik sapaatit akunnerini marluk sioqqullugu. Missingersuutinut Naatsorsuutinullu siunnersuisoqatigiit siulittaasuata tamatumunnga immikkut ittunik pissutissaqartillugu ulloq killiliussap allannguuteqarnissaa immikkut ittumik akuersissutigisinnaavaa.

  § 7.  Missingersuutinut Naatsorsuutinullu siunnersuisoqatigiit siulittaasuata siunnersuisoqatigiit suliassaat pilersaarusiortassavai siunnersuisoqatigiillu ataatsimiittarnerini oqallinnerit siulersortassallugit.

  § 8.  Missingersuutinut Naatsorsuutinullu siunnersuisoqatigiit aalajangiisinnaassuseqarput ilaasortat affaat sinnerlugit najuuppata.
  Imm. 2. Taassisut nalinginnaasumik amerlanerussuteqarnerisigut aalajangiisoqartassaaq. Taasinerit naligiippata siulittaasup taasinera aalajangiisuusassaaq.
  Imm. 3.  Suliassat kinguartinneqarnissaannik utaqqissunneqarsinnaanngippata siunnersuisoqatigiit sinnerlugit siulittaasoq aalajangiisinnaavoq, ilaasortat allat ataatsimiigiaqqunissat ajornavissappat.
  Imm. 4. Imm. 3 malillugu aalajangersimasaa pillugu Missingersuutinut Naatsorsuutinullu siunnersuisoqatigiit piaartumik ilisimatinneqassapput.

 

  § 9.  Missingersuutinut Naatsorsuutinullu siunnersuisoqatigiit siulittaasuata nakkutigissavaa, siunnersuisoqatigiit oqallinneri aalajangiinerilu pillugit imaqarniliortoqartarnissaa.
  Imm. 2. Ilaasortaq aalajangiinermut isumaqataanngitsoq piginnaatitaavoq isummami imaqarniliamut allatsissallugu. Ilaasortaq ataaseq aalajangiinermut isumaqataanngippat, tamanna aalajangiinermi allassimassaaq.
  Imm. 3.  Imaqarniliatut missingiut ilaasortat akuerisassaat siulittaasumut saqqummiutereerneratigut allattoqarfiup ilaasortanut nassiutissavaa.
  Imm. 4. Imaqarniliaq akuerineqartutut naatsorsuunneqartassaaq, nassiutereerneranit sapaatip akunneri 2-t qaangiutsinnagit missingiummut akerliliinerit tiguneqarsimanngippata.
  Imm. 5. Imaqarniliamut akerliliinerit takkuppata, taakku kingusinnerpaamik ataatsimiinnissap tulliani oqaluuserineqassapput.

 

Kapitali 3

Atuutilerfia

 

  § 10. Nalunaarut ulloq 15. juni 2019 atuutilerpoq.

 

 

 

Namminersorlutik Oqartussat, ulloq 6. juni 2019

 

 

 

Vittus Qujaukitsoq

/

Nikolai S. Christensen


Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk