Sananeqaatit ozonimik aseruisartut ilaasa atorneqarnerannut inerteqqut pillugu Namminersornerullutik Oqartussat nalunaarutaat nr. 30, 10. august 2001-imeersoq

Avatangiisit innarlitsaaliorneqarnissaannik Inatsisartut peqqussutaanni nr. 12-imi, 22. december 1988-imeersumi, Inatsisartut peqqussutaatigut nr. 7, 13. maj 1993-imeersukkut allanngortinneqartumi, § 7, imm. 1, nr. 10) aamma § 46, imm. 2 naapertorlugit aalajangersarneqarput:

 

Kapitali 1.
Nalunaarutip atuuffia

§ 1. Nalunaarut manna akuutissanut taakkulu sananeqaatimikkut asserluinnangajaannut, akuneqanngitsunut allanillu akusanut, akusaatillutik akusap oqimaassusiata 1 procentia sinnerlugu oqimaassuseqartunut atuuppoq:
1) CFC-nut tamanut (chlorfluorcarboninut tamakkiisumik tarajunngortitsisartunut), taakkununnga ilannngullugit:
    a) trichlorfluorethan (CFC-11),
    b) dichlordifluorethan (CFC-12),
    c) trichlortrifluorethan (CFC-113),
    d) dichlortetrafluorethan (CFC-114) aamma
    e) chlorpentafluorethan (CFC-115)
2) Tetrachlormethan
3) Trichlorethan
4) Tarajunngortitsisartut tamarmik (tamakkiisumik tarajunngortitsisartut bromfluorcarbonit, bromchlorcarbonit og bromchlorfluorcarbonit), taakkununnga ilanngullugit:
    a) bromchlorfluormethan (halon-1211) og
    b) bromtrifluormethan (halon-2402)
5) HBFC-t tamarmik (hydrobromfluorcarbonit)
6) HCFC-t tamarmik (hydrochlorfluorcarbonit), tassunga ilanngullugit
    a) chlordifluormethan (HCFC-22),
    b) dichlortrifluorethan (HCFC-123),
    c) dichlorfluorethan (HCFC-141) og
    d) chlordifluorethan (HCFC-142)
7) Methylbromid

§ 2. Nalunaarut makkununnga atuutinngilaq:
1) § 1-imi, nr. 1, 2, 3, 6, aamma 7-imi sananeqaatit taaneqartut imaannik atueqqinneq, imaarsinikkut atoqqitanik tuniniaaneq, atoqqinneqarneri aserorterneqarneriluunniit,
2) § 1-imi, nr. 4, 5 imaarsinikkut atoqqiineq, imaarsinikkut atoqqitanik tuniniaaneq, atoqqinneqarneri aserorterneqarneriluunniit,
3) Kissarnermik nuussinermut atortut ingerlanerisa nanginneqarneri immeqqinneqartarnerilu, tassa sananeqaatinik allanit peerlugit atoqqitanik immeqqinneqartaraangata,
4) seqqittaatit nakorsaatinut atortut,
5) akuutissanik, nalunaarummi maani pineqanngitsunik, sananermi atortussiassatut atorneqaraangata, aamma
6) Kalaallit Nunaanni tuniniaaqqinneq, tassa tunisassiat tunineqaqqaarnerminni Danmarkimi/Kalaallit Nunaanni piumasaqaatinik imaluunniit tunineqaqqaarnerminni nunani allani piumasaqaatinik sananeqaatit ozonimik aseruisartut eqqarsaatigalugit assingusunik illersuiniutaasunik naammassinnissimasaraangata.

 

Kapitali 2.
Atornissaannut killiliussat

§ 3. Sananeqaatinik § 1-imi taaneqartunik inuussutissarsiutigalugu atuineq inerteqqutaavoq. Nioqqutissianik § 1-imi inuussutissarsiutigalugu sananeq, avammut tuniniaaneq tuniniaanerlu inerteqqutaapput.
Imm. 2. Imm. 1-imi inerteqqut apeqqutaatinnagu sananeqaatit § 1-imi taaneqartut nioqqutissianut ilanngussami taaneqartunut atorneqaannarsinnaapput kiisalu ullut ilanngussami taaneqartut tikillugit.

 

Kapitali 3.
Malittarisassat malinneqarnerinik misissuineq immikkullu akuersissuteqarneq

§ 4. Nakkutilliineq kiisalu malittarisassat malinneqarnerinik misissuineq kommunalbestyrelsinit isumagineqassaaq.
Imm. 2. Naalakkersuisulli suliffeqarfinnik Avatangiisit innarlitsaaliorneqarnissaannik Inatsisartut peqqussutaat nr. 12, 22. december 1988-imeersoq, Inatsisartut peqqussutaatigut nr. 7, 13. maj 1993-imeersukkut allanngortinneqartoq naapertorlugu akuersissuteqarfigineqartariaqartunik nakkutilliissapput.
Imm. 3. Nakkutilliinermut atortitsinermullu tunngatillugu aammattaaq Avatangiisit innarlitsaaliorneqarnissaannik Inatsisartut peqqussutaanni, Inatsisartut peqqussutaatigut nr. 7, 13. maj 1993-imeersukkut allanngortinneqartumi kap. 4-imi aamma § 44, imm. 2-imi malittarisassat atuupput.
Imm. 4. Immikkorluinnaq ittunik pisoqartillugu nalunaarummi malittarisassat atuutsinneqannginnissaannik naalakkersuisut immikkut akuersissuteqarsinnaapput. Tamakkununnga assersuutaasinnaapput sananeqaatit atorneqarneri sananeqaatit ozonimik aseruisartut pillugit nunat tamalaat malittarisassarititaanni "pingaaruteqarluinnartutut" isigineqartut.

§ 5. Nalunaarut manna naapertorlugu aalajangikkat tamarmik Avatangiisit innarlitsaaliorneqarnissaannik Inatsisartut peqqussutaanni kap. 10-mi malittarisassat naapertorlugit naammagittaalliutigineqarsinnaapput.

 

Kapitali 4.
Pineqaatissiinerit atuutilerfialu pillugit aalajangersakkat

§ 6. Nalunaarummi § 3-imik unioqqutitsineq akiliisitaanermik kinguneqarsinnaavoq.
Imm. 2. Aktiaateqarluni imaluunniit piginneqataassuteqarluni ingerlatseqatigiiffik, piginneqatigiilluni ingerlatseqatigiiffik assigisaaluunniit unioqqutitsisuuppat ingerlatseqatigiiffik taamaannermisut akiliisitassanngortinneqarsinnaavoq. Namminersornerullutik Oqartussat, kommuni imaluunniit kommunit suleqatigiiffiat unioqqutitsissuuppata Namminersornerullutik Oqartussat, kommuni imaluunniit kommunit suleqatigiiffiat taammanermisut akiliisitassanngortinneqarsinnaavoq.

§ 7. Nalunaarut 1. september 2001 atuutilerpoq.




Namminersornerullutik Oqartussat, 10. august 2001.




Alfred Jakobsen

/

Hans J. Høyer

 

 


Sananeqaatit ozonimik aseruisartut ilaasa atorneqarnerannut inerteqqut pillugu Namminersornerullutik Oqartussat nalunaarutaannut nr. 30, 10. august 2001-imeersumut ilanngussaq.

 

Sananeqaatit § 1-imi taaneqartut suli atorneqarsinnaaffii, kiisalu § 3, imm. 1-imi inerteqqut apeqqutaatinnagu ulloq taasaq tikillugu nioqqutissiat § 1-imi taaneqartut suli sananeqarsinnaasut, avammut tunineqarsinnaasut tuniniarneqarsinnaasullu pillugit allattorsimaffik.

 

Tarajunngortitsisartut tamarmik
1. Allat imakuinik peersilluni qatserutinik 1.1. 1993 ikkutanik atavissunik immiineq, imm. 3-li pineqanngilaq.   1.1.2002
2. Qatserutit angallattakkat atavissullu, imm. 3-li pineqanngilaq, peerneqassapput suujunnaarsinneqarlutillu kingusinnerpaamik   1.1.2002
3. Sananeqaatit allanit peerlugit atoqqitat umiarsuarni, timmisartuni, timmisartortunik aqutsivinni sakkutooqarfinnilu qatserinermut atugassat inuunermut pisariaqavissut, tassa akuerisaasunik tamatumunnga atortussaqanngippat   allamik aalajangiisoqarnissaata tungaanut
 
HCFC-t tamarmik
4. Atortuni matoqqasuni, atortunilu taakkununnga atasuni imminnut isumagisuni 31.12.2001 kingorna sanaasuni sananeqaatit kissamik nuussinermut atortartut   1.1.2002
5. Atortuni pioreersuni taakkununngalu atasuni atortuni imminnut isumagisuni sananeqaatit kissamik nuussinermut atortartut   1.1.2004
6. Kiassaatit ruujorerinngissaannut ussissaatit qapuusat plastiusut qeratasuut   1.1.2002
7. Ilisimatusarnermut, ineriartortitsinermut laboratoriamullu atugassat   1.1.2002
 
Methylbromid
8. Karrinut, qajuusanut assigisaanullu toqqorsivinnut toqunartuiaanneq   1.9.2001
9. Tomatiunngitsunik naatitsivinni issumut toqunartuiaaneq 1.9.2001
10. Amernik toqunartuiaaneq 1.9.2001
11. Naasunik toqunartuiaaneq 1.9.2001
12. Kingunissanik, qaqqortarissanik inerittunillu panertunik avataaniit eqqussanik toqunartuiaaneq 1.9.2001
13. Timmisartunik toqunartuiaaneq 1.9.2001
14. Umiarsuarni teriarsuaajaaneq 1.9.2001
15. Siutisiortukkunik qisuttortartunik akiuiniut 1.9.2001
16. Katersugaatinik illunillu oqaluttuarisaanikkut pingaaruteqartunik toqunartuiaaneq 1.9.2001
Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk