Inunnut annertuumik innarluutilinnut ulloq unnuarlu paaqqinniffiit il.il. pillugit Namminersorlutik Oqartussat nalunaarutaat nr. 8, 6. december 2018-imeersoq

Annertuumik innarluutillit ikiorserneqartarnerat pillugu Inatsisartut peqqussutaat nr. 7, 3. november 1994-imeersumi, kingullermik Inatsisartut peqqussutaanni nr. 10, 31. maj 2010-imeersumi allanngortinneqartumi, § 11, imm. 4, § 12, imm. 4, §15, § 17, imm. 1 aamma § 20, imm. 2 naapertorlugit makku aalajangersarneqarput:

 

Kapitali 1

Aalajangersakkat nalinginnaasut

 

  § 1.  Inunnut annertuumik innarluutilinnut ulloq unnuarlu paaqqinniffik najugaqartut nalinginnaasumik inuunermut sapinngisamik qaninnerpaamik inuuneqarsinnaalersillugit aaqqissuunneqassaaq ingerlanneqarlunilu.

  Imm. 2.  Ulloq unnuarlu paaqqinniffimmi perorsaaneq najugaqartut ukiui innarluutigisinnaasaallu eqqarsaatigalugit aaqqissuunneqassaaq.

  Imm. 3.  Ulloq unnuarlu paaqqinniffinni tamani siunertaq pillugu aalajangersagaliortoqarlunilu illumi torersumik pissusilersornissaq pillugu malittarisassaliortoqassaaq, taakkunanilu ulloq unnuarlu paaqqinniffiup perorsaanikkut siunertaa kikkullu sullinneqarnissaat takuneqarsinnaassaaq. Siunertaq pillugu aalajangersagaq Naalakkersuisunit akuerineqassaaq.

  Imm. 4.  Ulloq unnuarlu paaqqinniffiit nalunaarut manna naapertorlugu naleqqussarneqarsimasut nalinginnaasumik inunnit utoqqalinersiuteqarnissamut utoqqaassusissaq sinnerlugu ukiulinnit najugaqarfigineqarsinnaanngillat.

 

  § 2.  Ulloq unnuarlu paaqqinniffiit najukkami maleruagassiaminni piffissat ulloq unnuarlu paaqqinniffimmut pulaarfiusinnaasut killilersinnaavaat. Killiliinerli taanna paaqqinniffiup iluani eqqissisimanissaq torersumillu pissusilersornissaq eqqarsaatigalugit pisariaqartumit ingasannerussanngilaq.

 

  § 3.  Najugaqaqatigiiffimmik imaluunniit najugaqarfinni illersugaasuni ingerlatsinermut kommunalbestyrelse isumaginnittuusoq, najugaqartut suleqatigalugit najugaqarfimmi malittarisassaliussaaq.
  Imm. 2.  Najugaqarfimmi malittarisassat najugaqarfiup siunertaanut naleqqussarsimassapput aamma najugaqartut ataatsimoorlutik kissaataannut ulluinnarnilu ingerlatsinermi pisariaqartinneqartunut akerliliisuussanatik.

 

  § 4.  Naalakkersuisut ulloq unnuarlu paaqqinniffinni, najugaqaqatigiiffinni imaluunniit najugaqarfinni illersugaasuni tunillaassuuttumik nappaalasoqartillugu iliuusissanut najoqqutassiussapput.

 

  § 5.  Naalakkersuisut ulloq unnuarlu paaqqinniffiit, najugaqaqatigiiffiit aamma  najugaqarfinni illersugaasuni missingersuutinut aamma naatsorsuutinut pisussaaffiit pillugit najoqqutassiussapput.

 

Kapitali 2

Ingerlatsinermut aalajangersakkat

 

  § 6.  Ulloq unnuarlu paaqqinniffiit Naalakkersuisunit pigineqarput ingerlanneqarlutillu.

  Imm. 2.  Ulloq unnuarlu paaqqinniffinni ataasiakkaani pisortat Naalakkersuisunit atorfinitsinneqassapput, taakkulu Naalakkersuisunit najoqqutassiarineqarsimasut malillugit ulloq unnuarlu paaqqinniffiup ulluinnarni ingerlanneqarneranik isumaginnittuussapput.

 

  § 7.  Najugaqaqatigiiffinnut aamma najugaqarfinnut illersugaasunut ataasiakkaanut ingerlatsinermut malittarisassanik kommunalbestyrelse immikkut aalajangersaasassaaq.

  Imm. 2.  Kommunalbestyrelse najugaqarfimmik illersugaasumik ingerlatsisuusoq, imm 1-imi aalajangersakkat naapertorlugit ulluinnarni ingerlatsinermik isumaginnittussamik najugaqarfiup pisortaanik atorfinitsitsisinnaavoq.

 

Kapitali 3

Ulloq unnuarlu paaqqinniffiit aaqqissugaanerat pillugu aalajangersakkat

 

  § 8.  Ulloq unnuarlu paaqqinniffik sapinngisaq malillugu najugaqartut tamarmik immikkut ineqarsinnaalersillugit aaqqissuunneqassaaq.

 

  § 9.  Najugaqartut uffarfimmut, perusuersartarfimmut, igaffimmut kiisalu inimut isersimaartarfimmut isersinnaassapput.

  Imm. 2.  Ulloq unnuarlu paaqqinniffik najugaqartut sunngiffimminni sammisaqarnissamut periarfissaqartillugit aaqqissuunneqassaaq.

  Imm. 3.  Ulloq unnuarlu paaqqinniffik sulisunut immikkut allaffeqarlunilu atortorissaarutinik peqassaaq.

  Imm. 4.  Ulloq unnuarlu paaqqinniffimmi unnuakkut pigaartoqartarpat sulisunut qasuersaarfiusinnaasumik ineqartitsisoqassaaq.

 

  § 10.  Ulloq unnuarlu paaqqinniffik qaqugukkulluunniit sanaartornermut oqartussaasunit qatserisartoqarfimmit Sullivinnillu Nakkutilliisoqarfimmit akuerineqarsinnaasumik ilusilersorneqarsimassaaq.

 

  § 11.  Najugaqartut inaasa aaqqissuunneqarnerat sapinngisamik najugaqartoq suleqatigalugu aaqqissuunneqassapput, najugaqartullu ukiuinut innarluuteqarnerannullu naleqquttunik pequteqassalluni.

 

  § 12.  Ini ataatsimoorfik imatut aaqqissuunneqassaaq, innarluuteqarneq apeqqutaatinnagu, najugaqartunit tamanit atorneqarsinnaalluni.

 

Kapitali 4

Inissinneqarnissamik innersuunneqartarneq aamma inissiisarnermut ataatsimiititaliaq

 

  § 13.  Ulloq unnuarlu paaqqinniffiit tamarmik immikkut inissiisarnermut ataatsimiititaqassapput. Paaqqinniffiup pisortaa ataatsimiititaliami siulittaasuussaaq, aamma ulloq unnuarlu paaqqinniffik ataatsimiititaliamut allatseqarfiussaaq. Ulloq unnuarlu paaqqinniffinni ataasiakkaani inissiisarnermut ataatsimiititaliat ilaasortaasa katitigaanerat Naalakkersuisut aalajangertassavaat.

  Imm. 2.  Inissiisarnermut ataatsimiititaliap suleriaasissani nammineq aalajangertassavaa, taanna Naalakkersuisunit akuerineqartassaaq.

 

  § 14.  Ulloq unnuarlu paaqqinniffimmut inissiinissamik paaqqinniffimmiillu angerlartitsiniarluni qinnuteqaatit tamaasa inissiisarnermut ataatsimiititaliap suliarisassavai.

 

  § 15.  Inissiinerni tamani inissiineq inissinneqartumut iluaqutaanerusussaq anguniarlugu pissammat, inissiinerlu paaqqinniffiup siunertaanut naapertuuttuunersoq inissiisarnermut ataatsimiititaliap nakkutigissavaa.

 

  § 16.  Najugaqaqatigiiffinni aamma najugaqarfinni illersugaasuni tamani inissiisarnermut ataatsimiititamik kommunalbestyrelse pilersitsissaaq. Inissiisarnermut ataatsimiititaq kommunalbestyrelsip sinniisuanit, najugaqarfiup pisortaanit sapinngisamillu najugaqartunit tamanit inuttaqartinneqassaaq.

  Imm. 2.  Kommunalbestyrelsip sinniisua ataatsimiititaliami siulittaasuuvoq ataatsimiititaliallu allatseqartinneqarnissaa isumagissallugu.

  Imm. 3.  Inissiisarnermut ataatsimiititaliap suleriaasissani nammineq aalajangersassavaa.

  Imm. 4.  Inissiisarnermut ataatsimiititaliap aalajangiineri aalajangiinermit sapaatit akunneri 4 qaangiutsinnagit kommunalbestyrelsimut naammagittaalliuutigineqarsinnaapput.

 

Kapitali 5

Ineriartortitsinissamut pilersaarutit

 

  § 17.  Inuup annertuumik innarluutillip ulloq unnuarlu paaqqinniffimmut inissinneqarneranut atatillugu, ineriartortitsinissamut pilersaarut suliarineqassaaq.

  Imm. 2.  Ineriartortitsinissamut pilersaarut inuit annertuumik innarluutillit pillugit siunnersorti immikkut ilisimasalik aamma Naalakkersuisut suleqatigalugit ulloq unnuarlu paaqqinniffimmit kommunitullu najugarisami kommunalbestyrelsemit suliarineqassaaq.

  Imm. 3.  Ineriartortitsinissamut pilersaarut pineqartumit namminermit sapinngisamik akuerineqassaaq, imaluunniit meeraq pineqarpat angajoqqaatut akisussaassuseqartunit akuerineqassalluni. Pineqartoq nammineersinnaassusiiagaasimappat ineriartortitsinissamut pilersaarut pineqartup angajoqqaatut sinniisuanit aamma akuerineqassaaq.

 

Kapitali 6

Paaqqinniffimmi katsorsaaviusumiinneq immikkut eqqarsaatigalugu

 

  § 18.  Paaqqinniffinnut katsorsaaviusunut inissiinermut atatillugu katsorsaanissamut pilersaarutip suliarineqarnerani pineqartup katsorsarneqarnermi kingorna sumi ineqarnissaanik neqerooruteqartoqarnissaa aalajangiivigineqassaaq.

  Imm. 2.  Pineqartup katsorsarneqarnera naammassisimappat, taassungalu inissamik neqeroorummik naleqquttumik tunniussisoqarsinnaanani, pineqartup paaqqinniffimmi ineqarallarneranut katsorsaaviusup kommune angerlarsimaffigisaq akiliitissinnaavaa.  

 

Kapitali 7 

Sulisut qassiussusissaat immikkut eqqarsaatigalugu

 

  § 19.  Ulloq unnuarlu paaqqinniffinni tamani sulisut qassiussusissaat Naalakkersuisunit aalajangersarneqassapput. 

 

Kapitali 8

Ulloq unnuarlu paaqqinniffinnut il.il. akigititat

 

  § 20.  Inuit annertuumik innarluutillit ulloq unnuarlu paaqqinniffimmi najugaqarneri, ullormut unnuamullu ataatsimut akigititaq kommunalbestyrelsimit akilerneqassaaq, Inuit annertuumik innarluutillit ikiorserneqartarnerat pillugu Inatsisartut peqqussutaat § 16 a naapertorlugu aalajangersarneqartumi.

 

  § 21.  Pineqartoq ullup unnuallu ilaannaani paaqqinniffimmiittarpat akigititat ilanngarlugit akiliutigitinneqassapput, akigititallu taakku kommunalbestyrelsip paaqqinniffiullu akornanni ataasiakkaarlugit isumaqatigiinniutigineqartassapput.

  Imm. 2.  Ulloq unnuarlu paaqqinniffimmi najugaqartoq sulinngiffeqarneq, napparsimaneq assigisaanilluunniit pissutigalugu sapaatip akunneri 2 sinnerlugit paaqqinniffiup avataani najugaqarsimappat pineqartoq ulloq unnuarlu paaqqinniffimmi suli najugaqartutut isigineqassaaq, piffissamili tassani § 20 naapertorlugu akigititat nalinginnaasut 85%-ii tikillugit ikilineqarsinnaallutik.

  Imm. 3.  Paaqqinniffik najugaqarallartussamik inissiivigineqarpat, assersuutigalugu najugaqartup taassumaluunniit ilaqutaasa oqilisaanneqarnissaat siunertaralugu imaluunniit najugaqartup sulinngiffeqarneranut atatillugu, § 20 naapertorlugu najugaqarnerup nalaani ulloq unnuarlu akigititat nalinginnaasut akiliutigineqartassapput.

 

  § 22.  Najugaqartoq najugaqarnermi nalaani namminerisaminik isertitaqartaruni isertitami 60%-ii tikillugit akiliutigisassavai, taamaattorli amerlanerpaamik § 20 naapertorlugu akigititat taaneqartut amerlaqataannik. Kommunalbestyrelsip akigititanut akiliutai taakku amerlaqataannik ikilineqartassapput.

 

  § 23.  Najugaqartoq siusinaartumik utoqqalinersiaqartoq siusinaartumik utoqqalinersiat tunniunneqartarnerat pillugu aalajangersarneqarsimasut malillugit ineqarnerminut akiliuteqartinneqassaaq.

 

  § 24.  Ulloq unnuarlu paaqqinniffik kommunalbestyrelsimut immikkut ittumik sullissisarpat, Naalakkersuisut kommunalbestyrelse isumaqatigalugu tamanna akilertissinnaavaat.

 

Kapitali 9

Atuutilerfia

 

  § 25.  Nalunaarut manna atuutilissaaq ulloq 1. januaari 2019.

  Imm. 2.  Peqatigisaanik Meeqqanut inuusuttunullu kiisalu annertuumik innarluutilinnut ulloq unnuarlu paaqqinniffiit pillugit Namminersornerullutik Oqartussat nalunaarutaat nr. 64, 29. december 1994-imeersoq atorunnaarsinneqarpoq.

 

 

 

Namminersorlutik Oqartussat, ulloq 6. december 2018

 

 

 

Martha Abelsen

/

Julie Præst Wilche

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk