Kalaallit Nunaanni teriannissat eqqissisimatitaanerat pillugu Namminersornerullutik Oqartussat nalunaarutaat nr. 20 ulloq 17. maj 1989-imeersoq

Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi ulloq 12. november 1980-imeersumi § 2 aamma § 19 naapertorlugit makku aalajangersarneqarput:

 

§ 1. Terianniaq (Alopex lagopus) Kalaallit Nunaanni inunnit akuerisaasumik aallaaniarnermut allagartalinnit kiisalu Kalaallit Nunaanni najugaqavissunit piniaqqusaavoq.

§ 2. Teriannissat piffissami 15. maj - 15. september eqqissisimatitaapput.

§ 3. Timmiarsiutit, qoorortuuaqqat aamma qoorortuut nalinginnaat teriannianik piniarnermi atoqqusaapput. Sakkut eqqarasuartaatit eqittaannartakkallu atoqqusaanngillat.
Imm. 2. Taamaallaat piniutit (pullatit il. il.) ingerlaannarlutik teriannianik toqutsisussanngorlugit sanaat atoqqusaapput.
Imm. 3. Pullatit il. il. narajaat timmissanit tigutsisilinnit imaaliallaannaq mikinneqarsinnaajunnaarlugit inissinneqarlutillu taluneqartassapput.

§ 4. Piniutit il. il. piffissap eqqissisimatitsiviup nalaani atorsinnaassanngillat.

§ 5. Qamutit motorillit snescooterit ilanngullugit teriannissanik piniarnermi atoqqusaanngillat.

§ 6. Siunertanut ilisimatusarnermut allanullu tunngasunut atatillugu Naalakkersuisut immikkut akuersissutigisinnaavaat nalunaarummi matumani aalajangersakkat sanioqqunneqassasut.

§ 7. §-ini 1-imiit 5 ilanngullugu aalajangersakkat unioqqutinneqarunik akiliisitaassutaasinnaapput kiisalu pisanik piniutinillu arsaarinnissutaasinnaallutik.

§ 8. Kommunalbestyrelsep aamma kommunemi nakorsaanerup inassuteqarneratigut Naalakkersuisut aalajangersinnaavaat kommunemi piffissaq eqqissisimatitsivik atorunnaarsinneqassasoq.
Imm. 2. Kommunet ileqqoreqqusaat nalunaarut una tunngavigalugu akuersissutigineqartut Naalakkersuisunit atortussanngortinneqartassapput.

§ 9. Nalunaarut ernerluni atortuulerpoq, peqatigitillugulu makku atorunnaarsinneqarput:
1) Terianniat eqqissisimatinneqarnissaannik landsrådip ileqqoreqqusanngortitaa ulloq 12. februar 1960-imeersoq.
2) Teriannianut nerlersuiffiuteqarnermut atatillugu teriannianik kisermaassilluni piniarsinnaatitaanermik landsrådip ileqqoreqqusaliaa ulloq 23. oktober 1961-imeersoq.
3) Terianniat eqqissisimatitaanerata atorunnaarsitaanissaanik landsrådip ileqqoreqqusaa ulloq 13. juni 1967-imeersoq.
4) Kalaallit Nunaanni terianniarniarnermi kiisartunik atuineq pillugu aalajangersagaq ulloq 9. februar 1938-imeersoq.
5) Scoresbysundip Ammassallullu pigisaanni piniarnerup aallaaniarnerullu killilersugaanissaannik nalunaarummi ulloq 23. juni 1958-imeersumi ulloq 1. april 1965 allannguuteqartinneqartumi § 2, § 7 aamma § 9.
6) Thulep pigisaani terianniat eqqissisimatitaanerannik landsrådip ileqqoreqqusassiaa ulloq 25. marts 1966-imeersoq ulloq 15. maj 1979 allannguuteqartinneqartoq, aamma
7) Daneborgip Danmarkshavnillu eqqaanni terianniarniarneq pillugu nalunaarut ulloq 3. juni 1948-meersoq.
8) Thulep timmisartunut mittarfiata eqqaani piniartarnissamik nalunaarut ulloq 14. april 1958-imeersoq.
Imm. 2. Kommunet ileqqoreqqusaliaat allakkialluunniit saqqummiussimasat terianniat eqqissisimatinneqarnissaannik landsrådip ileqqoreqqusanngortitaa ulloq 12. februar 1960-imeersoq aamma terianniat eqqissisimatitaanerata atorunnaarsitaanissaanik landsrådip ileqqoreqqusaa 13. juni 1967-imeersoq naapertorlugit atortuulersinneqarsimasut nalunaarut una naapertorlugu allanngortinneqarnissamik atorunnaarsinneqarnissamilluunniit tungaanut atortuuinnassapput.




Namminersornerullutik Oqartussat, ulloq 17. maj 1989.




Jonathan Motzfeldt

/

Aqigssiaq Møller

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk