Nakkutilliinermut atortunut il.il. piumasaqaatit pillugit Namminersornerullutik Oqartussat nalunaarutaat nr. 27, 22. december 2000-imeersoq

Nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi, kingullermik Inatsisartut inatsisaatigut nr. 10, 11. november 2000-imeersukkut allanngortinneqartumi § 1, imm. 1, nr. 26 h naapertorlugu makku aalajangersarneqarput:

 

§ 1. Biilit inunnik angallassissutit Kalaallit Nunaannut eqqunneqarneranni nioqqutissanik eqqussuinermi akitsuutit pillugit Inatsisartut inatsisaanni § 1, imm. 1, nr. 26 naapertorlugu akitsuuserneqarnissaat kissaatigineqarpat, biilit inunnik angallassissutit ingerlaarnerminni ilaasoqarsimanerannik (kilometerinik ilaasoqarfiusunik) nalunaarsuisinnaasumik nakkutilliinermut atortulerneqarsimanerat, nakkutilliinermullu atortup taxameterip kilometerinut ilaasoqarfiusimasunut kisitsissutaanut naapertuuttuunera kiisalu nakkutilliinermut atortup taxameterimut, biilit aallakaatitsissutaannut, ledningit katiffiinut ikkuffinnullu atassutai ima aqerlorterneqarsimasut, aqerlortigaq ataaseq arlallilluunniit peeqqaarlugit aatsaat nakkutilliinermut atortoq innarlerneqarsinnaanngorlugu, pillugit uppernarsaat biilinik iluarsaassisarfimmit akuerisaasumeersoq piginnittup nassiutissavaa, takuuk ilanngussaq 1.
Imm. 2. Biilinik inunnik angallassissutinik piginnittup ullut 1. januar aamma 1. juli tamaasa, nakkutilliinermut atortup piumasaqaatinut imm. 1-imi pineqartunut suli naapertuuttuuneranik kiisalu aqerlortigaq ataaseq arlallilluunniit peerneqarsimanerannik takussutissaqannginneranik uppernarsaat biilinik iluarsaassisarfimmit akuerisaasumeersoq nassiuttassavaa.
Imm. 3. Uppernarsaatinut imm. 1-imi 2-milu pineqartunut aningaasartuutit biilinik inunnik angallassissutinik piginnittup nammineq akiligassarai. Uppernarsaatit immersugassartaat Akileraartarnermi Pisortaqarfimmit ilusilerneqassapput.

§ 2. Biilinik inunnik angallassissutinik piginnittoq pisussaavoq, nakkutilliinermut atortup § 1, imm. 1-imi piumasaqaatinut suli naapertuuttuuneranik Akileraartarnermi Pisortaqarfik, Akileraartarnermiluunniit Pisortaqarfiup tamatumunnga piginnaatitaa, qaqugukkulluunniit sumiluunniillu misissuisinnaatissallugu.
Imm. 2. § 1, imm. 1-imi piumasaqaatit suli malinneqarnersut misissuisup qularutigippagu, piginnittoq misissuisumit peqquneqarsinnaavoq uppernarsaammik § 1, imm. 2-mi pineqartumik piaartumik piniaqqullugu nassiusseqqullugulu. Uppernarsaammut tassunga aningaasartuutit biilinik inunnik angallassissutinik piginnittup nammineq akiligassarai.

§ 3. Biilit inunnik angallassisutit, nioqqutissanik eqqussuinermi akitsuutit pillugit Inatsisartut inatsisaanni § 1, imm. 1, nr. 26-imi maleruagassat naapertorlugit akitsuuserneqarsimasut piginnittuata qulakkiigassaraa angallannermi allattuivimmik akuerisaasumik, piumaffigineqarnikkullu Akileraartarnermi Pisortaqarfimmut, Akileraartarnermiluunniit Pisortaqarfiup tamatumunnga piginnaatitaanut, takutinneqartartussamik aammalu pisariaqassappat atukkiunneqartartussamik biilini inunnik angallassissutiniittoqarnissaa. Biilit arlalinnik ingerlatitsisoqaraluarpataluunniit angallannermi allattuiviit ataasiakkaarlugit atorneqartassapput.
Imm. 2. Angallannermi allattuivik paasissutissanik ilanngussaq 2-mi allassimasunik imaqassaaq. Ingerlatitsisut nikinneranni/ingerlaarnerup aallartinnerani angallannermi allattuivimmut ingerlaannaq allanneqassapput ingerlatitsisup aqqa, nalunaaqutaq ingerlatitsisup ingerlaalerfia - 4-nik kisitsisitalerlugu -, ulloq ingerlaarfik, kiisalu ingerlatitsisut nikinneranni nakkutilliinermut atortup killiffia. Ilaasorisaq, inunnik angallassinermi akinit atuuttunit appasinnerusumik akiliisillugu utimut ilaasoreqqinneqassappat, tamanna ilaasoqarnerup aallartinnerani naaneranilu ingerlaannaq allanneqassaaq. Akiliutissaq taxameteri atorlugu akilersuisitsisarnermit allaasumik naatsorsorneqarpat, piffissaq ilaasoqarnerup aallartiffia ilaasoqarnerup naammassinerani angallannermi allattuivimmut ingerlaannaq allanneqassaaq. Taxanik piniartut takkutinngitsoorpata tamanna paasineqarniariartoq paasissutissat allanneqassapput, biilillu taxanik piniartarfimmut atassuteqarpata tamanna tassunga nalunaarutigineqarluni. Nalunaarsugassat allat ingerlatitsisut nikinneranni/ingerlaarnerup naammassinerani allattorneqassapput. Qaammatit naaneri tamaasa biilit kilometerilersuutaata killiffia allanneqartassaaq.
Imm. 3. Angallannermi allattuivik tulleriiaartumik erseqqissumillu allattuiffigineqassaaq, qupperneq siulleq nuutinnerilu ataatsikkut allaffigalugit. Allariikkat allanngortiterlugit iluarsaanneqassanngillat. Quppernermi kukkusimagaanni quppernerluunniit ataaseq allortoorsimagaanni qupperneq taanna uingasumik titarneqassaaq atugassaajunnaarlugu. Allattuiviit pingasunik quppernillit siullersaat angallannermi allattuivimmiitinneqassaaq, nuutinnerisalu aappaat ingerlatitsisut nikinneranni/ingerlaarnerup naanerani inunnik angallassisinnaanermut akuersissummik piginnittumut tunniunneqassalluni. Angallannermi allattuivik kingullermik allattuiffigineqarneraniit sivikinnerpaamik ukiuni tallimani angallassisinnaanermut akuersissummik piginnittumit toqqortarineqassaaq, piumaffigineqarnikkullu Akileraartarnermi Pisortaqarfimmut atukkiunneqassalluni. Tamanna aamma angallannermi allattuivinnut atorneqanngitsunut atuuppoq.

§ 4. Qaammatip ingerlanerani ingerlaarsimaneq pillugu qaammammoortumik immersugassaq qaammatit naaneri tamaasa piginnittup immersortassavaa, nalunaarlugit biilit inunnik angallassissutit kiap ingerlassimanerai, kisitsissut qassinik nikissimanersoq, qasseriarluni ilaasoqarsimaneq, kilometerit ingerlaarfiit katillugit qassiuneri, kilometerit ilaasoqarfiit qassiuneri kiisalu nakkutilliinermut atortup kisitsisitai. Qaammammoortumik immersugassaq kingusinnerpaamik qaammatip tulliata 10-ani Akileraartarnermi Pisortaqarfimmut nassiunneqartassaaq.

§ 5. Nalunaarut atuutilissaaq ullormi 1. januar 2001-imi.




Namminersornerullutik Oqartussat, ulloq 22. december 2000




Josef Motzfeldt

/

Kaare Hagemann


Ilanngussaq 1

Ilanngussaq 2

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk