Biskoppimik qinersineq pillugu Namminersornerullutik Oqartussat nalunaarutaat nr. 5, 16. februar 1995-imeersoq

Ilageeqarneq pillugu Inatsisartut peqqussutaanni nr. 15-imi, 28. oktober 1993-imeersumi § 5, imm. 2 naapertorlugu aalajangersarneqarput:

 

Kapitali 1.
Qinersinissamut piareersarneq.

§ 1. Ilageeqarnermut Naalakkersuisup Kalaallit Nunaata Biskoppeqarfiani biskoppissamik ulloq suna qinersisoqarnissaa aalajangissavaa nalunaarutigalugulu, aamma qinigassanngortinniarluni nalunaaruteqarnissamut killiliussaq ilanngullugu. Ilageeqarnermut Naalakkersuisup aammattaaq aalajangissavaa nalunaarutigalugulu ullormi qinersivimmi piffissami sumi qinersisoqassanersoq, tak. § 12.

§ 2. Qinersinermut ataatsimiititaliamik qinersinermi siulersuisussamik pilersitsisoqassaaq.
Imm. 2. Qinersinermut ataatsimiititaliaq inuttalersorneqassaaq Namminersornerullutik Oqartussani qullersaalluni pisortamik, Kalaallit Nunaanni Kommuneqarfiit Kattuffianni pisortamik kiisalu Inatsisartut Allattoqarfianni pisortamik taakkualuunniit sinniisussaannik.
Imm. 3. Namminersornerullutik Oqartusssani qullersaalluni pisortaq qinersinermut ataatsimiititaliamut siulittaasuussaaq.
Imm. 4. Qinersinermut ataatsimiititaliaq sulinini pillugu allattaaveqassaaq.
Imm. 5. Ilageeqarneq pillugu Pisortaqarfik qinersinermut ataatsimiititaliamut allattoqarfiussaaq.

§ 3. Ilagiit sinniisoqarfiini tamani qinersinissaq piareersarneqarlunilu siulersorneqassaaq ilagiit sinniisuinut siulittaasumit imalunniit ilagiit sinniisaanni ilaasortamit taamaasiornissamut piginnaatitaaffilerneqarsimasumit.

§ 4. Qinersinermi ataatsimiititaliap qinersinermi taasisinnaasutut isigineqartut allattorsimaffiat suliarissavaa, tak. § 10.
Imm. 2. Qinersisinnaasut allattorsimaffiat palaseqarfinnit paasissutissat tunngavigalugit suliarineqassapput imarissallugillu ateq, ulloq ukiorlu inuuik qinersisinnaatitaasullu najugaa pillugit paasissutissat.
Imm. 3. Ulloq qinersiviusussaq tikitsinnagu inuup qinersisinnaatitaanermini piumasaqaatit naammassisinnaajunnaarpagit, qinersisinnaasut allattorsimaffiannit peerneqassaaq.
Imm. 4. Nalornisoortoqartillugu qinersinermut ataatsimiititaliap inuk qinersisinnaasut allattorsimaffiannut ilanngunneqassanersoq tassanngaluunniit peerneqassanersoq aalajangiiffigisassavaa.  Qinersinermut ataatsimiititaliap aalajangiinera inaarutaasumik aalajangiineruvoq.

§ 5. Biskoppissatut taamaallaat toqqarneqarsinnaavoq inuk ilagiinni kalaallini palasitut atorfeqartoq imaluunniit atorfeqareersimasoq aammalu
1) upperisarsiornermut tunngasunik palasitut atorfinissutissamik Danmarkimi universitetimi soraarummeernermik naammassinnissimasoq imaluunniit
2) Danmarkimi ilagiinni palasiusimasoq imalunniit palasinngornissamut piumasaqaatinik naammassinnissimasoq imaluunniit
3) ilinniagaqarsimasoq nalinginnaasumik ilisimasassanut tunngasutigut Danmarkimi ilinniartitsisutut, ilanngullugu Nuummi Ilinniarfissuarmi ilinniartitsisutut, ilinniagaqarsimanermut sanilliunneqarsinnaasunik tamatumalu saniatigut kristumiussutsimut tunngasunik annertunerusumik ilinniagaqarsimasoq imaluunniit
4)Kalaallit Nunaanni Namminersornerullutik Oqartussat peqqussutigisaasa ilaannik upperisarsiornermut tunngasutigut palasissatut ilinniarsimasoq ilagiinni kalaallini atorfininnissaq siunertaralugu.

§ 6. Qinigassanngortinniarluni nalunaarut qinersinermut ataatsimiititaliameeriissaaq qinigassanngortinniarluni nalunaarfissarititaasup qaangiutinnginnerani.

§ 7. Qinigassanngortinniarluni nalunaarut qinersisartut ilaannit ikinnerpaamik 20-nit amerlanerpaamillu 30-nit qinigassanngortitsisunik atsiorneqarsimassaaq § 10 naapertorlugu. Atsiuinerit nalunaarummi namminermi taassumaluunniit nuutinnerani allanneqarsimassapput.
Imm. 2. Qinigassanngortittup atsiornermigut qinigassanngortinneqarnini uppernarsassavaa.
Imm. 3. Qinersisinnaasoq ataaseq qinigassanngortittunut arlalinnut qinigassanngortitsisuusinnaanngilaq.
Imm. 4. Qinigassanngortitsivimmi allassimassapput qinigassanngortitsisut ataasiakkaarlutik aqqi, ulloq ukiorlu inuuiat aamma najugaat.

§ 8. Qinersinermut ataatsimiititaliap qinigassangortinniarluni immersukkat tunniunneqarnissaannut killiliussap qaangiunnerani piaarnerpaamik aalajangersassavaa, qinigassanngortinniarlutik nalunaarutit takkussimasut atorsinnaasutut isigineqassanersut. Qinigassangortitsinermi kukkusoqarsimappat, qinersinermut ataatsimiititaliaq ullunik marlunnik piffisaliisinnaavoq kukkunerup iluarsineqarnissaanut.
Imm. 2. Qinigassanngortittutut akuersissutigineqartut aqqi tamatuma kingorna ilagiit sinniisoqarfiini tamani siulittaasumut erniinnaq nalunaarutigineqassapput.

 

Kapitali 2.
Taasineq

§ 9. Ilagiit sinniisuini siulittaasup taasiviit aamma qinersisinnaasut allattorsimaffii tigugunigit misissussavai, taasiviit allakkap poortallit amerlassusissaat naammattut kiisalu qinersisinnaasut allattorsimaffiat ilagiit sinniisoqarfiani qinersisinnaasunik tamanik imalik tiguneqarsimanersut.

§ 10. Qinersinermi taasisinnaapput Kalaallit Nunaata biskoppeqarfiani ilagiit sinniisuini ilaasortat tamarmik, palasit allani suliffeqartut palasillu taasinerup nalaani sulinngiffeqartut.

§ 11. Taasineq ilagiit sinniisuisa ataatsimiinneranni pissaaq.
Imm. 2. Biskoppissarsiornermut taasisinnaasut kisimik ataatsimiinnermi peqataasinnaapput.

§ 12. Ilagiit sinniisuini siulittaasup ataatsimiinnissamut piffissaq aalajangissavaa ilagiillu sinniisui ataatsimiigiaqqussallugit.

§ 13. Ataatsimiinnermi ilagiit sinniisuini siulittaasup nalunaarut nassiunneqarsimasoq atorlugu qinigassanngortissimasut aqqi ilisimatitsissutigissavai.
Imm. 2. Ilagiit sinniisuinut siulittaasoq taasivimmit tassungalu atasumik allakkat puuanik tunniussinermi qinersisinnaasut allattorsimaffiannut qinersisinnaatitaasup pineqartup nalaatigut krydsiliisassaaq.
Imm. 3. Taasinissami atorneqassaaq taasivissaq immikkut ittoq kalaallisut qallunaatullu ima allannilik: "biskoppimik qinersineq".
Imm. 4. Qinersisup pappiara taasivigissavaa qinigassanngortittup qinerusutami aqqa allallugu. Tamatuma kingorna taasivik allakkat puuannut tassunga atasumut ikissavaa, ilagiillu sinniisaasa siuliuttaasuannut tunniutissallugu.
Imm. 5. Taasineq naammassiniariarpat qinersinermi siulersuisup allakkat puui imm. 4-imi taaneqartut aamma qinersinermi atortussat atorneqarsimanngitsut ataatsimut puussaannut ikissavai. Allakkat puuat taanna kiisalu qinersisinnaasut allattorsimaffiat qinersinermut ataatsimiititaliamut kingusinnerpaamik ullup tulliani nassiunneqassapput.

§ 14. Qinersisinnaasoq taasisimasoq kina taasimanerlugu oqaatigissallugu pisussaanngilaq.

 

Kapitali 3.
Qinersinerup nalunaarsuusiorneqarnera.

§ 15. Pappiara taasivik atortussaassanngilaq:
1) qinigassanngortittup ataatsip aqqata saniatigut allamik allaffigineqarsimaguni,
2) erseqqissumik aalajangerneqarsinnaanngippat qinigassanngortittoq sorleq qinersisup taaniaraluarsimaneraa,
3) allakkap puua matoqqasoq taasivissamik ataasiinnaanngitsumik imaqassagaluarpat, imaluunniit
4) isumaqarnassagaluarpat pappiara taasiviusimasoq peqqussutit malillugit suliarineqarsimanngitsoq.

§ 16. Qinersinermut ataatsimiititaliap nalunaarsuusiussavaa inerneralu naalakkersuisunut nalunaarutigissallugu kiisalu tamanut tusagassanngorlugu nalunaarutigissallugu.

 

Kapitali 4.
Ralajangersakkat assigiinngitsut.

§ 17. Qinersinermut ataatsimiititaliap allattoqarfiata qinersinermi atortussat suliarinissaat nassiunnissaallu pisortaaffigaa.

§ 18. Qinersinermut ataatsimititaliap qinersinerup piareersarneqarnerani ingerlanneqarneranilu piginnaatinneqarpoq nalunaarummi aalajangersarneqarsimasunik allanngortitsisarnissamut, taamaaliornissaq pissutsit, ilaatigut silap qanoq innera, pissutigalugit pisariaqarsorinaraangat, tamatumani qinersinerup isertuussaanera ingerlanneqarneratalu tamakkiisumik nakkutigineqarnera qulakkeersimajuarneqarsinnaappata.

§ 19. Nalunaarut atortuulerpoq ulloq 17. februar 1995. Ulloq taanna atorunnaassaaq Kalaallit Nunaanni vicebiskoppissamik qinersisarneq pillugu Namminersor-nerullutik Oqartussat nalunaarutaat nr. 1 27. januar 1984-imeersoq.




Namminersornerullutik Oqartussat , ulloq 16. februar 1995.




Marianne Jensen

/

Ejvind Christoffersen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk