Tarnimikkut nappaatilinnik kiffaanngissusiiaaneq allatigullu pinngitsaaliissummik iliuuseqarneq pillugu Inatsisartut Inatsisaata allanngortinnera pillugu Inatsisartut inatsisaat nr. 12, 3. juni 2015-imeersoq (Pinngitsaaliissummik katsorsarneqarnermi eqqarsarfissinneqarneq, Napparsimasunut siunnersortinik atorfinitsitsisarnermi aalajangiinissamut pisinnaatitsineq, Maalaaruteqartarneq aamma eqqartuussivilersuussisinnaaneq)

§ 1

Tarnimikkut nappaatilinnik kiffaanngissusiiaaneq allatigullu pinngitsaaliissummik iliuuseqarneq pillugu Inatsisartut Inatsisaanni nr. 24-mi, 3. december 2012-imeersumi makku allanngortinneqarput:


1
§ 12, imm. 6 imatut oqaasertalerneqarpoq:
Imm. 6.  Pinngitsaaliissumik iliuuseqartoqarnissaa pillugu nakorsaanerup aalajangiinissaa sioqqullugu imm. 5 malillugu, napparsimasoq naammaginartumik piffissalerlugu, katsorsartinnissamut akuersissuteqarnissamut napparsimasoq qanoq kisaateqarnerluni eqqarsarfissinneqassaaq. Eqqarsarfissiinneqarneq naleqquttumik sivisussuseqassaaq, ullulli pingasut sinnernagit napparsimasoq eqqarsarfissinneqassaaq.”

2§ 30, imm. 1. imatut oqaasertalerneqarpoq:
”Pinngitsaaliilluni iliuuseqarnerit tamaasa pillugit paasissutissiineq, takuuk. §§ 5- 10, § 12, § 17, §§ 19 – 22,  malillugit pinngitsaaliissuteqarnerup malitseqartinneqarnera, § 23 naapertorlugu nakorsaatissamik innersuussinerni tamani, § 24  nalunaaquttap akunnerinik 24-nik sivisunerusumik ataannartumik inummut namminermut immikkut nakkutilliinermut tunngatillugu aamma § 26 , akuliunnerup erseqqinnerusumik imarisaa tunngavilersuutigineqartorlu oqaatigalugit immikkoortortaqarfiup pinngitsaaliinikkut iliuutsinik nalunaarsuiffiinut ilanngunneqassaaq. Pinngitsaaliilluni iliuutsit immikkoortortami nalunaarsuivimmut allattorneqartut assilineqarneri taamaalilluni aamma napparsimasoq pillugu allattugaatinut ilanngunneqassapput.”

3.  § 33, imm. 3-4 imatut oqaasertalerneqarput:
"Imm.3.  Siunnersortinngortinniagaq pillugu oqaaseqaateqarnissamut napparsimasoq periarfissinneqassaaq. Nalunaarsuiffimmi allassimasumik allamik siunnersorteqarnissaq napparsimasup kissaatigippagu, sapinngisaq naapertorlu kissaataa akuerineqassaaq. Aalajangiineq Kalaallit Nunaanni Eqqartuussivimmi Eqqartuussisumut naammagittaalliutigineqarsinnaavoq.
Imm. 4.  Napparsimasunut siunnersortit nalunaarsorsimaffianni allassimanngitsumik siunnersorteqarnissi napparsimasup kissaatigippagu, imm. 2 naapertorlugu nalunaarsuiffimmi tullinnguuttoq utaqqiisaasumik siunnersortinngortinneqassaq. Napparsimasup toqqagaata siunnersortinngorsinnaanera Kalaallit Nunaanni Eqqartuussivimmi Eqqartuussisup aalajangiivigissavaa. Napparsimasup kissaataa akornutissaqanngippat akuerineqassaaq.”

4§ 43, imm. 3 imatut oqaasertalerneqarpoq:
"Imm. 3. Maalaarutit § 39, imm. 3 naapertorlugu, Tarnimikkut Nappaatillit Maalaarutaannik Aalajangiisartut naliliinissaasa tungaannut pinngitsaaliilluni iliuuseqarnermut kinguartitsissutaasinnaasut, maalaarutip tiguneraniit ullut arfineq marluk qaangiutsinnagit Tarnimikkut Nappaatillit Maalaarutaannik Aalajangiisartut aalajangiivigissavaat. Maalaarutit allat Tarnimikkut Nappaatillit Maalaarutaannik Aalajangiisartut sapinngisamik piaarnerpaamik aalajangiivigissavaat. Maalaarutip tiguneraniit ullut 14-it qaangiutsinnagit  aalajangiisoqarsimanngippat, Aalajangiisartut tamatumunnga patsisaasoq kiisalu qaqugu aalajangiisoqarnissaa naatsorsuutigineqarnersoq pillugit, napparsimasumut siunnersortaanullu ilisimatitsissutigissavaat.”

5.   § 44, imm. 1 imatut oqaasertalerneqarpoq:
Imm. 1.  Napparsimasup siunnersortaataluunniit noqqaassuteqarneragut, pinngitsaaliissummik unitsitaaneq, pinngitsaaliissummik tigummigallagassanngortitsineq, uninngavimmut utinngitsoortumik pinngitsaaliissummik utertitsineq, pinngitsaaliissummik katsorsaaneq, § 17 naapertorlugu angerlartitaareersumik pinngitsaaliissummik malittarinninneq, nukersorfiginninneq, napparsimasoq illersorniarlugu pinngitsaaliissummik aalaakkiineq, nal. ak. 24-t sinnerlugit ataannartumik immikkut nakkutilliineq, matunillu parnaarsineq pillugit aalajangikkat, Tarnimikkut Nappaatillit Maalaarutaannik Aalajangiisartut aalajangiussatik Kalaallit Nunaanni Eqqartuussivimmi Eqqartuussisumut tunniutissavaat. Suliap Tarnimikkut Nappaatillit Maalaarutaannik Aalajangiisartunit aalajangiivigineqarneraniit sap.ak. 4 qaangiutsinnagit Kalaallit Nunaanni Eqqartuussivimmi Eqqartuussisumut suliap tunniunneqarnissaanik kissaateqarneq saqqummiunneqassaaq. Kissaateqarneq kingusinnerusukkut saqqummiunneqarpat, suliap Tarnimikkut Nappaatillit Maalaarutaannik Aalajangiisartunit aalajangiivigineqarneraniit qaammatit 6 tikillugit Kalaallit Nunaanni Eqqartuussivimmi Eqqartuussisumit immikkut ittumik akuerineqarsinnaavoq, piffissaliussap unioqqutinnissaanut immikkut ittumik pissutissaqarpat.”


§ 2

Inatsisartut Inatsisaat atuutilersinneqarpoq ulloq 01. september 2015.
Imm. 2.  § 33, imm. 3, naapertorlugu maalaarutit aalajangiiffigineqarneri inatsisissatullu allannguutip atuutilernissaa sioqqullugu kredsrettimut qinnuteqaatit tunniunneqartut aamma § 33, imm. 4, naapertorlugu saqqummiunneqartut inatsisitullu allannguutip atuutilernerani suliaralugit naammassineqanngitsut, Kredsrettimi naammassillugit suliarineqassapput.  



Namminersorlutik Oqartussat, ulloq 3. juni 2015



Kim Kielsen 

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk