Kommunit missingersuusiortarnerat, aningaasanik tigoriaannaateqarnerat, naatsorsuutaat, kukkunersiuisoqarnerat kiisalu karseqarnerat naatsorsuuseriveqarnerallu pillugit Namminersorlutik Oqartussat nalunaarutaat nr. 3, 3. februar 2012-imeersoq

Kommunit aqunneqarnerat pillugu Inatsisartut inatsisaat nr. 22, 18. november 2010-meersumi § 41, imm. 5, § 42, imm. 3, § 47, imm. 3, aamma § 50, imm. 2 malillugit aalajangersarneqarpoq:


Missingersuusiortarneq

§ 1.  Kommunit missingersuutaat ukiunut arlalinnut missingersuutitallit isertitanit akileraarutit pillugit Inatsisartut inatsisaanni kommuninut procentimik annertussusiliinissap aalajangiivigineqarnissaanut killiliussaq naatinnagu akuersissutigineqartassapput.
Imm. 2.  Aningaasaqarnermut ataatsimiititaliami missingersuutinut siunnersuummi ikinnerussuteqartut oqaaseqaataanni § 2, imm. 1 aamma 4-mi piumasaqaatit naammassineqarsimassapput.

§ 2.  Aningaasaqarnermut ataatsimiititaliap missingersuutinut siunnersuutaa kommunip isertitassaanut aningaasartuutissaanullu tamanut taamatuttaaq kommunip aningaasanik tigoriaannaataani aningaasaataasalu inissisimaffiini nikerarnernut tunngasuussaaq.
Imm. 2.  Aningaasaqarnermut ataatsimiititaliap missingersuutinut siunnersuutaa missingersuusioriaatsimik missingersuutinillu immikkoortiterinerup annertussusianik toqqaanermut nassuiaammik ilaqartinneqassaaq.
Imm. 3.  Missingersuutinut siunnersuut taamatuttaaq aningaasaliissutinut siunnersuutinut ataasiakkaanut nassuiaalluni oqaaseqaatinik ilaqartinneqassaaq taamaalilluni tunngaviusumik aningaasaliinerni taaneqassalluni, qanoq ittunik piumasaqaateqarluni aningaasaliissutit atugassanngortinneqassanersut, aningaasaliissutinilu allani, isertitassatut aningaasartuutissatut aningaasaliissutini killiffimmi aningaasaliissutini, suliassat aningaasaliivigineqartussat sukumiisumik allaaserineqassallutik.
Imm. 4.  Missingersuutinut siunnersuut aningaasaliissutissanut siunnersuutinut tamanut minnerpaamik ukiunut pingasunut missingersuusiaagallartunik ilaqartinneqartassaaq, suliassaqarfimmi pineqartumi kommunip allanngoriartortoqarnissaanik ilimagisai tassani taaneqarlutik. Missingersuutinut oqaasertaliussani ukiuni missingersuusiorfiugallartuni allanngoriartornissaq allaaserineqassaaq.

§ 3.  Kommunit aningaasat atoriaannaat nikerarnerinik missingersuusiorneri pissapput aningaasanut tigoriaannarnut missingersuusiatut isikkulerlugit, missingersuusianut tamarmiusunut ilanngullugit akuersissutigineqartartussatut.
Imm. 2.  Aningaasanik tigoriaannaateqarnermut missingersuutini kommunip missingersuutini aningaasaliissutinik tamanik ingerlaavartumik atuinera allassimassaaq, taamatuttaaq killiffimmi aningaasaliissutit aningaasallu nikerarneri.
Imm. 3.  Aningaasanik tigoriaannaateqarnermut missingersuutit nassuiaatinik allakkianik oqaaseqaatinilluunniit ilaqartinneqassapput. Missingersuutit aalajangersarnerini ukiumut aggersumut ukiumut missingersuusiorfiusumi aningaasat tigoriaannaat pillugit kommunalbestyrelsi sukumiinerusumik aalajangersaassaaq
Imm. 4.  Kommunit sukkulluunniit aningaasanik tigoriaannaateqassapput ingerlaavartumik pisussaaffiit akilerneqartarnissaannut naammattumik. Missingersuutit aalajangersarnerini ukiumut aggersumut ukiumut missingersuusiorfiusumi aningaasat tigoriaannaat pillugit kommunalbestyrelsi sukumiinerusumik aalajangersaassaaq.

§ 4.  Kommunip killiffimmi naatsorsuutiniittunik missingersuusiaani aningaasat tigoriaannaat uninngasuutit, pisassat akiitsullu sivikitsumik piffissalikkat, pisassat akiitsullu sivisuumik piffissalikkat kiisalu pigisat nalillit tunineqarsinnaanngitsut akiitsullu kommunimi allanngoriartornerat taaneqassapput.

§ 5.  Ilassutitut aningaasaliissutinut siunnersuummi allassimassapput ilassutitut aningaasaliissutit aningaasalersornissaannut siunnersuut aamma ilassutitut aningaasaliissutit aningaasatigut kingunerisassaat. § 2, imm. 3 aamma imm. 4, taamatuttaaq ilassutinut aningaasaliissutini atorneqassapput.
Imm. 2.  Aqutsinermut inatsimmi § 44, imm. 2 inatsisitigut tunngavigalugu missingersuutinik nikisiterinerit aningaasaqarnermut ataatsimiititaliamit suliarineqartut kommunalbestyrelsimut ilisimatitsissutigalugit saqqummiunneqassapput.
Imm. 3.  Ilassutitut aningaasaliissutissanut siunnersuutit kommunalbestyrelsimut saqqummiunneqarnerminni aningaasaqarnermut ataatsimiititaliamit inassuteqaammik ilaqartinneqartassapput, ilassutitut aningaasaliissutit ataatsimiititaliap ataavartup suliassaqarfianut tunngasuuppata taamatuttaaq ataatsimiititaliamit pineqartumiit.


Aningaasaqarnermik aqutsineq

§ 6.  Kommunalbestyrelsi kommunip aningaasaqarnermut aqutsineranut aalajangersakkanik aalajangersaassaaq.
Imm. 2.  Missingersuutit akuersissutigineqarnerannut atatillugu kommunalbestyrelsip ukiumi tulliuttumi aningaasaliissutinik nakkutilliinissamut piffissaliussat aalajangersassavai. Aningaasaliissutinik nakkutigineqartunut ilaassapput ingerlatsineq, sanaartukkat aamma aningaasaatini nikerarnerit aningaasanillu tigoriaannaatinut missingersuutit. Aningaasaliissutinik nakkutilliineq ingerlaavartumik suliarineqartassaaq ikinnerpaamillu ukiumut pingasoriarluni kommunalbestyrelsimut saqqummiunneqartassalluni.
Imm. 3.  Aningaasaliissutinik nakkutilliinermi saqqummiunneqartut borgmesterip Nunamut Namminermut, Pinngortitamut Avatangiisimullu Naalakkersuisoqarfimmut nassiuttassavai.


Naatsorsuutit

§ 7.  Kommunip naatsorsuutai ukiup naatsorsuuteqarfiusup kingornatigut ukiumi apriilip qaammataa naatinnagu aningaasaqarnermut ataatsimiititaliamit saqqummiunneqartassapput.
Imm. 2.  Kommunalbestyrelsip naatsorsuutinik suliaqarnera, takuuk aqutsinermut inatsimmi § 47, imm. 2, kingusinnerpaamik pissaaq naatsorsuutit aningaasaqarnermut ataatsimiititaliamit saqqummiunneqarnerisa kingornatigut kommunalbestyrelsip pisarnertut ataatsimiinnerani siullermi.
Imm. 3.  Kommunip naatsorsuutaanut ilaassapput ukiup naatsorsuuteqarfiusup kingornatigut februaarip qaammataata naanissaa tikillugu ukioq naatsorsuuteqarfiusoq pillugu atukkat isertitallu tamarmik.
Imm. 4.  Ukiuni arlalinni sanaartugassanut tunngatillugu naatsorsuutinut oqaaseqaatini missingersuutinit atukkat nassuiarneqassapput, taamatuttaaq utertillugit akilikkanik tiguneqarsimasinnaasut sanaartukkap inaarsarneqarnissaanut piffissalersuinermut tunngatillugu.  Kommunip sanaartukkamut ataatsimut aningaasartuutissaanut killiliussanut tunngatillugu atussamaakkanik ilimagisat imatut annertussusilerneqassapput oqaaseqaatit missingersuutinut tunngatillugu iluarsineqartariaqartunut tunngavigineqarsinnaanngorlugit.
Imm. 5.  Aningaasat atorneqanngitsut naatsorsuutini aningaasartuutitut allanneqarsinnaanngillat, aningaasat ukiumi naatsorsuuteqarfiusussami aningaasaliissutigineqaqqikkaluarpataluunniit.
Imm. 6.  Naatsorsuutinut oqaaseqaatinut ilaassapputtaaq kommunip killiffimmik kontuini nikerarnerit immikkut pingaaruteqartut.

§ 8.  Naatsorsuutit kommunalbestyrelsip oqaaseqaataanik ilallit, takuuk aqutsinermut inatsimmi § 47, imm. 2, kommunalbestyrelsip suliarinninnera kingusinnerpaamik qaammammik ataatsimik kingoqqullugu Naalakkersuisunut nassiunneqassapput.


Kukkunersiuineq

§ 9.  Kukkunersiuisut ukiumoortumik naatsorsuutit kukkunersiorneqarnerat pillugu ukiumoortumik nalunaarusiamik tunniussaqartassapput. Kukkunersiuisut taamatuttaaq ukiup ingerlanerani ilaannakortumik nalunaarusiamik tunniussaqartassapput tamanna piumasarineqarsimappat kukkunersiuisulluunniit tamanna pisariaqartissimassappassuk.
Imm. 2.  Ilaannakuusumik nalunaarusiami kukkunersiuisimaneq nassuiarneqassaaq, taamatuttaaq pissutsit kukkunersiuisut saqqummiutissallugit pissutissaqartissimasaat. Kukkunersiuisut oqaaseqaateqassapput isumaqarunik naatsorsuutini pineqartut kommunalbestyrelsip aalajangiinerinut naapertuutinngitsut imaluunniit iliuuseqartoqarsimasoq malittarisassanut atuuttunut akerliusumik.

§ 10.  Kommunalbestyrelsip kukkunersiuisut nalunaarusiaata kalaallisuuata kommunimit tiguneqareerneratigut kukkunersiuisut nalunaarusiaat suliarissavaa.
Imm. 2.  Kukkunersiuisut nalunaarusiaannik kommunalbestyrelsip suliarinninnera kingusinnerpaamik ullunik 14-inik kingoqqullugu kommunalbestyrelsip kukkunersiuisut oqaaseqaataannut akissuteqarnera Naalakkersuisunut nassiunneqassaaq.

§ 11.  Kommunalbestyrelsip kukkunersiuisut nalunaarusiaannik akissuteqarnermini makku sianiginiassavai:
1) Kukkunersiuisut sulianik ingerlatsinerup suliallu ingerlaartarfiisa allanngortinneqarnissaannik pitsanngoriaateqarnissaannilluunniit kaammattuuteqarsimappata, kommunalbestyrelsip oqaatigissavaa qanoq iliorluni piffissallu qanoq ilinerani allanngortitsisoqassanersoq pitsanngorsaasoqarluniluunniit,
2) kukkunersiuisut kommunip suliamik ingerlatsinerani kukkunernik aalajangersimasunik tikkuagaqarsimappata kommunalbestyrelsip ilisimatitsissutigissavaa qaqugu kukkuneq iluarsineqassanersoq oqaatigissallugulu kukkusimaneq suliat ingerlaartarfiini imaluunniit suliassani allani allanngortitsinissamut pisariaqartitsinersoq siunissami kukkusoqartannginniassammat,
3) kommunalbestyrelsip kukkunersiuisut oqaaseqaataat akuerisinnaanngippagu tamatumunnga pissutaasoq akissuteqarnermi taaneqassaaq. 


Karseqarneq naatsorsuuseriveqarnerlu

§ 12.  Kommunip karseqarneranik  naatsorsuuseriveqarneranillu aaqqissuussinermut suliallu ingerlaartarfiinut malittarisassat erseqqinnerusut aqutsinermut inatsimmi § 50, imm. 1 naapertorlugu kommunalbestyrelsimit aalajangersarneqassapput.
Imm. 2.  Malittarisassat imm. 1-imi taakkartorneqartut imarisaat kukkunersiuisut kommunalbestyrelsillu isumaqatigiinngissutigissappatigit Naalakkersuisut aalajangiissapput.


Atuutilerfia

§ 13.  Nalunaarut manna atuutilerpoq 1. april 2012-mi. Peqatigitillugu atorunnaarsinneqarpoq kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit Namminersorlutik Oqartussat nalunaarutaat nr. 13, 26. juli 2010-meersoq.



Namminersorlutik Oqartussat, ulloq 3. februar 2012.



Anthon Frederiksen

/

Hans-Erik Bresson

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk