Nipisanniarneq pillugu Namminersorlutik Oqartussat nalunaarutaat nr. 2, 2. februar 2016-imeersoq

Inatsisartut inatsisaat nr. 18, 3. juni 2015-imeersoq aqqutigalugu kingullermik allanngortinneqartumi Aalisarneq pillugu inatsisartut inatsisaanni nr. 18, 31. oktober 1996-imeersumi § 10 b, § 13, imm. 2, § 23, imm. 1, § 33, imm. 2 aamma § 34, imm. 3 naapertorlugit aalajangersarneqarput:


Atuuffia

  § 1.  Nalunaarummi pineqarpoq tunngaviusumik killeqarfiup avataani 3 sømilimiittup sineriaallu akornanni Kalaallit Nunaata aalisarnikkut oqartussaaffigisaani nipisanniarneq.

Nassuiaatit

  § 2.  Nalunaarummi matumani Kalaallit Nunaata imartaq aalisarnikkut oqartussaaffigisaa tassaavoq Kalaallit Nunaanni aalisarnikkut oqartussaaffigisassaq pillugu kunngip peqqusineratigut Statsministeriaqarfiup nalunaarutaani aalajangersagaasoq.

  § 3. Nalunaarummi matumani inuussutissarsiutigalugu aalisarneq pisat tamarmiusut taakkualuunniit ilaasa tunineqarnissaat siunertaralugu aalisarnertut paasineqassaaq.

  § 4.  Nalunaarummi matumani inuussutissarsiutiginagu aalisarneq nammineq pisat atornissaat siunertaralugu aalisarnertut paasineqassaaq.

Inuussutissarsiutigalugu nipisanniarnissamut piumasaqaatit

  § 5.  Inuussutissarsiutigalugu nipisanniarniaraanni akuersissuteqartariaqarpoq, taanna Aalisarnermut, Piniarnermut Nunalerinermullu Naalakkersuisoqarfimmut qinnuteqaateqarnikkut tunniunneqassaaq.

  § 6.Aalisarsinnaanermut akuersissutit sivisunerpaamik ukiunut marlunnut atuuttussanngorlugit tunniunneqartarput.
  Imm. 2. Akuersissutip aalajangersakkat makku imarisinnaavai, qassutit qassit akuersissummi ataatsimi atorneqarsinnaanerat, aqutsiveqarfimmi sorlermi aalisartoqarsinnaanersoq aamma aqutsiveqarfinni ataasiakkaani piffissap qanoq ilinerani aalisartoqarsinnaanersoq. 

  § 7.   Piffissaq 16. juli - 28. februar inuussutissarsiutigalugu nipisanniarnissaq inerteqqutaavoq.


Pisassiissutit aamma piffissat aalisarfiusut
.

  § 8. Inuussutissarsiutigalugu nipisanniarneq pisassiissutinik tunngaveqartumik aamma ullunik aalisarfissanik tunngaveqartumik ingerlanneqassaaq, tassa ukiunut ataasiakkaanut ullut aalisarfissat amerlassusissaat pisassiissutillu aalisarnermik ingerlatsinissaq pillugu Naalakkersuisut akuersissutaat naapertorlugu aalajangersarneqartarmata.

  § 9. Aqutsiveqarfinnut ataasiakkaanut tunngatillugu, tak. Ilanngussaq 1, najukkani tunisaqarnissamut sinniisuutitat aamma aalisartut kattuffiat isumaqatigiissuteqartarput qaqugukkut inuussutissarsiutigalugu nipisanniarneq aallartinneqassanersoq.
  Imm. 2.  Imm. 1 malillugu aqutsiveqarfimmi pineqartumi kingusinnerpaamik sapaatip akunnera ataaseq sioqqullugu nipisanniarnissap aallartinnginnerani Aalisarnermut, Piniarnermut Nunalerinermullu Naalakkersuisoqarfimmut nalunaarutigineqassapput.
  Imm. 3. Piffissap aalajangersimasup § 9, imm. 1 naapertorlugu aalajangersarneqartup avataatigut inuussutissarsiutigalugu nipisanniarneq inerteqqutaavoq.

  § 10. Aqutsiveqarfinni ataasiakkaani piffissani aalajangersimasuni aalisarfissat aqutsiveqarfinnilu ataasiakkaani pisassiissutit tusagassiorfiit aqqutigalugit aamma Namminersorlutik Oqartussat nittartagaat aqqutigalugu nalunaarutigineqassapput. Pisassattaaq tamarmik pisarineqarnerat nalunaarutigineqartassaaq.
  Imm. 2.   Piffissarititap § 6, imm. 1-imi oqaatigineqartup ingerlanerani allannguisoqarsinnaavoq, tak. aalisarneq pillugu inatsisartut inatsisaanni § 10.
  Imm. 3. Aalisarnermut, Piniarnermut Nunalerinermullu Naalakkersuisoqarfiup aqutsiveqarfimmi piffissap aalisarfiusussap qaangiunnerani pisassiissutit pisarineqanngitsut aqutsiveqarfimmut allamut nuussinnaavai.

 
Inuussutissarsiutigalugu nipisanniarnerup unitsinneqarnera.

  § 11. Aalisarneq unitsinneqarpat nammineq aalisarnermi atortut tunngavilersuutitaqanngitsumik qaqinneqassapput.

  § 12. Ullut aalisarfissat pisassallu naammatsippata § 8 eqqarsaatiginagu nipisanniarneq ingerlaannaq unitsinneqassaaq.


Inuussutissarsiutiginagu nipisanniarneq.

  § 13.  Piffissaq 16. juli – 28. februar inuussutissarsiutiginagu nipisanniarnissaq inerteqqutaavoq.
  Imm. 2. Piffissap inuussutissarsiutigalugu aalisarfissatut aalajangersarneqartup avataani inuussutissarsiutiginagu aalisarnissaq inerteqqutaavoq.
  Imm. 3. Nammineq atugassatut nipisanniarneq danskit naalagaaffianni innuttaassusilinnut Kalaallit Nunaanni najugaqavissunut tamanut akuerisaavoq. Nunani allani innuttaassuseqartut Danmarkimeersuunngitsut Kalaallit Nunaanni najugaqavissut aammalu ukiuni marlunni ataannartumik najugaqareersut danskit naalagaaffianni innuttaassuseqartunut naligitinneqassapput.
  Imm. 4. Inuussutissarsiutiginagu nipisanniarnermut atatillugu annerpaamik qassutit marluk atorneqassapput. 


Pineqaatissiinerit.

  § 14.  § 5, § 6, imm. 2, § 7, § 9, imm. 3 § 12 aamma § 13 unioqqutinneqarpata akiliisitsinermik kinguneqarsinnaapput.
  Imm.  2.  Aktieselskabi, anpartsselskabi, andelsselskabi imaluunniit umiarsuaatileqatigiiffik unioqqutitsisimappat ingerlatseqatigiiffik pineqartoq taannaatillugu akiliisussanngortinneqarsinnaavoq.
  Imm. 3.  Pinerluttulerinermi inatsimmi arsaarinnittarneq pillugu malittarisassat taamatuttaaq atorneqarsinnaapput.


Atuutilersitsineq.

  § 15. Nalunaarut ulloq 15. februar 2016-imi atuutilerpoq.
  Imm. 2. Ilutigalugu Nipisanniarneq pillugu Namminersorlutik Oqartussat nalunaarutaat nr. 6, 21. maj 2014-imeersoq atorunnaarsinneqarpoq. 



Namminersorlutik Oqartussat, ulloq 2. februar 2016.


Karl-Kristian Kruse

/

Jørgen Isak Olsen 

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk