Timmissanik illersuineq piniarnerlu pillugit Namminersorlutik Oqartussat nalunaarutaat nr. 1, 5. januar 2017-imeersoq

Piniarneq aallaaniarnerlu pillugit Inatsisartut inatsisaanni nr. 12, 29. oktober 1999-imeersumi § 8, § 13, imm. 3 aamma § 17, imm. 2, kingullermik Inatsisartut inatsisaat nr. 1, 16. maj 2008-meersukkut allanngor­tinneqartukkut aamma Pinngortitamik illersuineq pillugu Inatsisartut inatsisaanni nr. 29, 18. december 2003-meersumi § 5, § 35, § 36, imm. 2 aamma § 60, imm. 2 naapertorlugit aalajangersarneqarput:

 

Atuuffia

  § 1.  Nalunaarut nunami aalisarnikkullu Kalaallit Nunaata oqartussaaffigisaani atuuppoq.


Piniarnermi mannissarnermilu tunngaviusumik piumasaqaatit

  § 2.  Piniarnermut allagartamik imaluunniit akiliuteqarluni aallaaniarnissamut atuuttumik akuersissuteqartut kisimik timmiarniarsinnaapput mannissarniarsinnaatitaallutillu.

  § 3.  Timmissat piffissami aalajangersimasumi piniaqqusaasut kisimik piniarneqarsinnaapput, aamma timmissamut aalajangersimasumut piffissaq piniarfigeqqusaasoq kisimi piniarfiusinnaalluni.
  Imm. 2.  Piffissami aalajangerneqarsimasumi taamaallaat timmissat mannissarfigineqarsinnaapput, aamma timmissanut aalajangersimasunut piffissami mannissarniarfigeqqusaasumi manniliartoqarsinnaalluni.


Aqutsiveqarfiit

   § 4.  Aqutsiveqarfiit tassaapput, ilanngussat 2-6 takukkit:
Nunap immikkoortua, zone 1: Petermann Fjordimiit Hammer Ømut: naleraq Avannarpasissuseq 81o25’20.4” Kippasissuseq V64o25’23.3”-miit Avannarpasissuseq N74o49’11.5” Kippasissuseq 59o40’43.0”-imut.
Nunap immikkoortua, zone 2: Hammer Ømiit Maligaanut: Avannarpasissuseq N74o49’11.5” Kippasissuseq V59o40’43.0”-imiit Avannarpasissuseq N70o17’4.66” Kippasissuseq V56o57’26.7”-imut.
Nunap immikkoortua zone 3: Maligaaniit Kanajoorartuumut: Avannarpasissuseq N70o17’4.66” Kippasissuseq V56o57’26.7”-imiit Avannarpasissuseq N60o22’46.5” Kippasissuseq V44o59’49.8”-mut.
Nunap immikkoortua, zone 4: Kanajoorartuuniit Kap Biotimut: Avannarpasissuseq N60o22’46.5” Kippasissuseq V44o59’49.8”-miit N71o52’49.9 Kippasissuseq V22o39’19.6”-imut.


Nassuiaatit

  § 5.  Ulloq aallaaniarfik nalunaarummi matumani paasineqassaaq ulloq unnuarllu  aallaaniarfigineqartoq.
  Imm. 2.  Ullormut pisassat nalunaarummi matumani paasineqassaaq, ullormi piniarfiusumi pisassat. Pisassiissutit inuup nammineerluni pisassarai allamut pisassiissutigisinnaanagit ullulluunniit tulliani piniarsinnaanagit.
  Imm. 3.  Nalunaarummi matumani paasineqassaaq pisarineqartut nammineerluni aamma inoqutigiinni atugassatut pineqartut.
  Imm. 4.  Nalunaarummi matumani paasineqassaaq timmissat piaraat ileqqutoqqat naapertorlugit  aallaasersornani piniarneqarsinnaasut, piaqqat imaani timmiarpaat ineqarfiinit meterinik 1000-nit ungasinnerusumiippata.
  Imm. 5.  Nalunaarummi matumani  paasineqassaaq timmiarpaat inaat tassaasoq timmissat imarmiut aappariikkuutaat ikinnerpaamik qulit piaqqiorfigisaat.


Eqqissisimatitsineq

  § 6.  Timmissat tamarmik eqqissisimatitaapput.
  Imm. 2.  Timmissat ilanngussaq 1-imi nalunaarsorsimasut nalunaarummi matumani imm. 1-imi aalajangersakkami ilaatinneqanngillat.
  Imm. 3.  Ilulissat eqqaaniittoq Innaq (Ritenbenk) tamakkiisumik piniarfigineqarnissaanut eqqissisimatitaavoq. Innamut ikaarneq Innamiinnissarlu inerteqqutaavoq, Innarlu meterinik 500-t angullugit qanilleqqusaanani. Innaq (Ritenbenk) ilanngussami 7-imi nunallu assingani ilanngussami 8-mi takuneqarsinnaavoq.


Timmissat pisassiissutigineqartut

  § 7.  Miteq siorartooq (Somateria mollissima) aamma miteq siorakitsoq (Somateria spectabillis) aqutsiveqarfimmi pineqartumi piffissami piniarfiusumi piniarneqarsinnaapput, takuuk imm. 2, ilanngussat 2-6 naapertorlugit, taamaattorli § 6, imm. 3 takuuk.
  Imm.  2. Nunap immikkoortuini zone-ni, ukunani piffissat piniarfiusinnaasut ukuupput:
1) Nunap immikkoortua, zone 1: 15.10 – 30.04 aamma 01.05 – 31.05
2) Nunap immikkoortua, zone 2: 15.10 – 30.04
3) Nunap immikkoortua, zone 3: 15.10 – 31.03
4) Nunap immikkoortua, zone 4: 15.10 – 30.04.
  Imm. 3.  Inuussutissarsiutigalugu piniarnermut allagartallit piffissami piniarfiusumi 15.10-miit 30.04-mut, takuuk § 7, imm. 2, nr. 1, 2 aamma 4, ullormi aallaaniarfiusumi miternik siorartuunik miternillu siorakitsunik amerlanerpaamik ataatsimut, nunap immikkoortuani, zone-ni 1, 2 aamma 4, katillugit 40-nik pisaqarsinnaapput. Inuussutissarsiutigalugu piniarnermut allagartallit piffissami piniarfiusumi 15.10-miit 30.03-mut, takuuk § 7, imm. 2, nr. 3 ullormi aallaaniarfiusumi miternik siorartuunik miternillu siorakitsunik amerlanerpaamik ataatsimut, nunap immikkoortuani, zone 3-mi, katillugit 40-nik pisaqarsinnaapput.
  Imm. 4.  Sunngiffimmi aallaaniarsinnaanermut allagartallit piniarfiusumi 15.10-miit 30.04-mut ullormi aallaaniarfiusumi ataatsimi miternik siorartuunik miternillu siorakitsunik amerlanerpaamik ataatsimut katillugit 10-nik, nunap immikkoortuani, zone-ni 1, 2 aamma 4-mi pisaqarsinnaapput. Sunngiffimmi aallaaniarsinnaanermut allagartallit piffissami piniarfiusumi 15.10-miit 30.03-mut ullormi aallaaniarfiusumi ataatsimi miternik siorartuunik miternillu siorakitsunik amerlanerpaamik ataatsimut katillugit 10-nik, nunap immikkoortuani, zone 3-mi pisaqarsinnaapput.
  Imm. 5.  Inuussutissarsiutigalugu piniarnermut allagartallit imaluunniit sunngiffimmi aallaaniarsinnaanermut allagartallit piffissami piniarfiusumi 01.05–imiit 31.05-imut, takuuk § 7, imm. 2 nr. 1, ullormi aallaaniarfiusumi ataatsimi miternik siorartuunik miternillu siorakitsunik nammineq atugassatut amerlanerpaamik ataatsimut katillugit 20-nik pisaqarsinnaapput.
  Imm. 6.  Ullormut pisassiissutit ulluni allani piniarneqarsinnaanngillat. Ullormut pisassiissutit nammineq atugassatut pisassiissutaammata allanut pisassiissutigineqarsinnaanngillat.

  § 8.  Appanik sigguttuunik (Uria lomvia), appanik (Uria aalge) piffissami piniarfiusumi piniarneqassapput, takuuk imm. 2, aqutsiveqarfimmut pineqartumi piniarneqarsinnaallutik, takuuk ilanngussat 2-6, taamaattorli takuuk § 6, imm. 3.
  Imm. 2.  Nunap immikkoortuini, zone-ni, ukunani piffissat piniarfiusinnaasut ukuupput:
1) Nunap immikkoortua, zone 1: 15.10-29.02
2) Nunap immikkoortua, zone 2: 15.09-15.11
3) Nunap immikkoortua, zone 3: 01.11-15.12
4) Nunap immikkoortua, zone 4: 01.11-31.12.
  Imm. 3.  Inuussutissarsiutigalugu piniarnermut allagartallit piffissani imm. 2-mi oqaatigineqartuni ullormi aallaaniarfiusumi appanik aamma appanik sigguttuunik amerlanerpaamik ataatsimut katillugit 20-nik pisaqarsinnaapput.
  Imm. 4.  Sunngiffimmi aallaaniarsinnaanermut allagartallit imm. 2-mi piffissami oqaatigineqartuni appanik aamma appanik sigguttuunik amerlanerpaamik ataatsimut katillugit 3-nik pisaqarsinnaapput.
  Imm. 5.  Nunap immikkoortuani, zone 1-imi, takuuk § 8, imm. 2 piffissat piniarfiusut saniatigut aamma appat sigguttuut aamma appat piffissami 01.03-miit 15.06-imut  piniarneqarsinnaapput. Piniarnermut allagartallit piffissami taaneqartumi ullormi aallaaniarfiusumi appanik sigguttuunik aamma appanik nammineq atugassanik amerlanerpaamik ataatsimut katillugit 5-inik pisaqarsinnaapput.
  Imm. 6.  Nunap immikkoortuani, zone 2-mi appat sigguttuut aamma appat piffissami 15.04-miit 15.05-imut piniarneqarsinnaapput. Piniarnermut allagartallit piffissami taaneqartumi ullormi aallaaniarfiusumi appanik sigguttuunik aamma appanik nammineq atugassanik katillugit 3-nik pisaqarsinnaapput, tamanna inuussutissarsiutigalugu piniarnermut allagartalinnut aamma sunngiffimmi aallaarniartartunut atuuppoq.

  § 9.  Taateraat (Rissa tridactyla) piffissani pineqartuni aamma sumi piniarneqarsinnaanissaannik allassimasumi piniarneqarsinnaapput, takuuk ilanngussat 2-6:
1) Nunap immikkoortuani, zone 1-mi aamma nunap immikkoortuani, zone 2-mi: 01.09-31.10 aamma 01.03-31.03
2) Nunap immikkoortuani, zone 3-mi aamma nunap immikkoortuani, zone 4-mi: 01.09-31.03.
  Imm. 2.  Piniarnermut allagartallit imm. 2-mi piffissani taaneqartuni ullormi aallaaniarfiusumi taateraanik amerlanerpaamik 10-nik nammineq atugassanik pisaqarsinnaapput, tamanna inuussutissarsiutigalugu piniarnermut allagartalinnut aamma sunngiffimmi aallaarniartartunut atuuppoq.


Timmissat pisassiissutitaqanngitsut piniagaaffissaat

  § 10.  Timmissat allanneqarsimasut piffissani pineqartuni piniarneqarsinnaapput:
1)  Appaliarsuk/Appaaraq (Alle alle): 01.09 - 30.04
2)  Qeerlutooq (Anas platyrhynchos): 01.09 – 29.02
3)  Nerleq siggukitsoq (Anser brachyrhynchus): 01.09 - 30.04
4)  Kangoq (Anser caerulescens): 01.09 - 15.10
5)  Nerlernaarsuk (Branta Canadensis): 01.08 - 15.10
6)  Nerlernarnaq (Branta leucopsis): 01.09 - 30.04
7)  Serfaq (Cepphus grylle): 01.09 - 31.03
8)  Alleq (Clangula hyemalis): 01.09 – 29.02
9)  Tulugaq (Corvus corax): 01.09 – 29.02
10) Qaqulluk (Fulmarus glacialis): 01.09 - 31.10
11) Tuullik (Gavia immer): 01.09 - 15.10
12) Aqisseq (Lagopus mutus): 01.09 - 30.04
13) Naajaannaq (Larus glaucoides): 01.09 - 30.04
14) Naajarujussuaq (Larus hyperboreus): 01.09 - 30.04
15) Naajarluk (Larus marinus): 01.09 - 30.04
16) Oqaatsoq (Phalacrocorax carbo): 01.09 - 31.03.
  Imm. 2.  Nunap immikkoortuani, zone 2-mi, ilanngussaq 4 takuuk, qaqulluit piaraannik ileqqutoqqat naapertorlugit 15.08-mit piniarneqarsinnaapput.
  Imm. 3.  Nunap immikkoortuani, zone 1-mi aamma 4-mi, ilanngussaq 3 aamma 6 takuuk, appaliarsunnik piaraannillu ukioq kaajallallugu piniartoqarsinnaavoq.
  Imm. 4.  Nunap immikkoortuani, zone 4-mi, ilanngussaq 6 takuuk, nerleq siggukitsoq aamma nerlernarnaq piffissami 01.09-miit 31.05-imut piniarneqarsinnaapput.
  Imm. 5.  Nunap immikkoortuani, zone 2-mi, ilanngussaq 4 takuuk, aqissit piffissami 01.09-miit 31.05-imut piniarneqarsinnaapput.


Mannissarneq

  § 11.  Mannissarneq inerteqqutaavoq, taamaattorli takuuk imm. 2-4 aamma imm. 7.
  Imm. 2.  Sunngiffimmi aallaaniarsinnaanermut allagartallit  nammineq atugassanik qaqulluit, naajarluit, naajarujussuit aamma naajaannaat manniinik piffissami 01.01-imiit 15.06-imut mannissarsinnaapput.
  Imm. 3.  Inuussutissarsiutigalugu piniarnermut allagartallit  qaqulluit, naajarluit, naajarujussuit aamma naajaannaat manniinik piffissami 01.01-imiit – 15.06-imut mannissarsinnaapput.
  Imm. 4.  Mittarfiit, eqqaaviit eqqaavissuillu eqqaanni tulukkat naajallu akornutaappata Mittarfeqarfiit kommunelluunniit Aalisarnermut Piniarnermullu Naalakkersuisup, timmissat pineqartut manniinik katersinissamut aamma manniit uuliamik tukersinnaajunnaartussanngorlugit serpartarneqarnissaannut akuersissuteqassaaq.
  Imm. 5.  Naajat mannii imm. 4 naapertorlugu katersorneqartut, ullormi katersorneqarfianni pisortat suliffeqarfiutaasa nerisitsisarfiinut tunniunneqarsinnaapput. Manniilli eqqaaviit eqqaavissuillu eqqaanni katersorneqartut, imm. 4 naapertorlugu, aserorterneqassapput.
  Imm. 6.  Mannissarniarnermi allunaasat, majuartarfiit, allunaasat innartornermi atortartut innartornermilu atortut allat atornissaat inerteqqutaavoq.
  Imm. 7.  Nunap immikkoortuani, zone 1-mi aamma 4-mi, takuuk ilanngussaq 3 aamma 6, appaliarsuup/appaaqqap manniinik ukioq kaajallallugu mannissarnissaq akuerisaavoq.


Timmissat piaqqiorfii

  § 12.  Timmiarpaat inaasa eqqaanni aallaammik  eqqarneq allatulluunniit ajoqusersuineq angallammillu knob-inik 3-nik sukkanerulluni angalaneq piffissami 15.04-miit – 15.09-mut inerteqqutaavoq, timmiarpaat inaat ima ungasitsigalugit:
1) 1000 meterit, timmiarpaat inaat appanit, appanik sigguttuunik, apparlunnik, appaliarsunnik, taateraanik, qaqullunnik oqaatsunilluunniit najorneqarpat, aamma
2) 200 meterit, timmiarpaat inaat qeqertaappat qeqertaasaalluniluunniit miternik siorartuunik, miternik siorakitsunik, serfanit, qilannganik, imeqqutaallanit, naajanillu allanik taateraajunngitsunit, najorneqartoq.
  Imm. 2.  Imm. 1-imi aalajangersagaq tunngaviginagu angallammik knob-inik 3-nik sukkaannerusumik angalasoqarsinnaavoq, tamanna pisariaqanngitsumik akornusersuinermik pilersitsinngippat.
  Imm. 3.  Timmisartunik suluusalinnik helikopterinilluunniit qummut napparissumik sanimullu narlorissumik uuttorlugu 3000 meterinit qaninnerullugit timmiffiginissaat inerteqqutaavoq, taamaattorli Kitsissunnguit eqqissisimatitaanerat pillugu nalunaarut takuuk.
  Imm. 4.  Timmisartuaraasanik (drone) qummut napparissumik sanimullu narlorissumik  100 meterinit qaninnerutillugit timmiffiginissaat inerteqqutaavoq.
  Imm. 5.  Imm. 1-imi, nr. 2-mi aalajangersagaq tunngaviginagu § 11 naapertorlugu mannissartoqarsinnaavoq.
  Imm. 6.  Imm. 1-imi, nr. 1-imi aalajangersagaq tunngaviginagu appaliarsuit piaraanik mannii­nillu katersisoqarsinnaavoq, takuuk § 11, imm. 3 aamma § 11, imm. 7.
  Imm. 7.  Imm. 1-imi aalajangersagaq tunngaviginagu angallatit nalunaaqutaat atuarlugit angalasoqarsinnaavoq.


Sumiiffiit timmissanik illersuiffiit

   § 13.  Sumiiffiit ilanngussaq 7-imi aamma 8-mi allassimasuni piffissami 01.05-miit 31.08-mut ikaarfigeqqusaanngillat angallavigeqqusaanatillu, taakkulu 500 meteri killigalugu qanilleqqusaanngillat.
  Imm. 2.  Imm. 1-imi aalajangersakkat tunngaviginagit angallatit nalunaaqutaat atuarlugit angalasoqarsinnaavoq.


Ullunik, manninnik piaqqanillu illersuineq

  § 14.  Timmiarpaat inaasa eqqissisimatitaanissaannut aamma sumiiffinni timmissat illersuiffiinut immikkut aalajangersakkat §§-ini 12-13 saniatigut, Kalaallit Nunaanni tamarmi timmissat ullui nutaat inigineqartulluunniit, kiisalu manniit timmissallu nujuartat piaraasa ajoqusernissaat akornusersorneqarnissaalluunniit inerteqqutaavoq.
  Imm. 2.  Imm. 1-imi appaliarsuit piarai aamma qaqulluit mannii pineqanngillat, takuuk § 11, imm. 2-3, aamma mannissarnermi, takuuk § 11, imm. 7.


Timmiarniarneq

   § 15.  Timmissat timmisut angallatinik malersoqqusaanngillat, malersorlugillu piniaqqusaanatik.
  Imm. 2.  Qeerlutuut nerlerillu isasut ungoorlugit piniaqqusaanngillat.
  Imm. 3.  Timmisartunik, qamutinik motoorilinnik qamuteralanniillu  timmiarniarneq inerteqqutaavoq.

  § 16.  Timmissanik piniarnermi  taamaallaat aallaasit piniutillu uku atorneqarsinnaapput:
  1) Timmiarsiutit sullua annerpaamik 12-iussaaq, kaliber 12, qoorortuuaraaqqallu sullua minnerpaamik 0.17-iussalluni, kaliber 0.17,
  2) Timmiarsiutit singissaartullit ("Pump gun") eqittaannartakkallu taamaallaat amerlanerpaamik marlunnik imassaqarsinnaasut,
  3) Saaqqutit nuffisilluunniit, aamma
  4) Nunap immikkoortuani, zone 1-imi aamma 4-mi appaliarsunniarnermi qalut aamma naperniu­tit ipullit aamma qaqulluit piaraannik ileqquusumik piniartoqarsinnaalluni § 10, imm. 2 naapertorlugu.


Akiliuteqarluni piniarnermut piumasaqaatit

  § 17.  Akiliuteqarluni timmiarniarsinnaatitaanermut timmissat assigiinngitsut pillugit matumani nalunaarummi pineqartut,  sunngiffimmi aallaaniarsinnaanermut piumasaqaatit assigai, takuuk § 7, imm. 4, § 8, imm. 4, § 9, imm. 2. Timmissat akiliuteqarluni piniarnissamut akuersissuteqarluni pisat taamaallaat nammineq atugassaapput.
  Imm. 2.  Akiliuteqarluni piniartitsinermik aaqqissuisut Aalisarnermut Piniarnermullu Naalakkersuisoqarfimmut nalunaarusiortassapput.
  Imm. 3.  Timmissat akiliuteqarluni timmiarniarsinnaatitaaneq tunngavigalugu  pisarineqartut, Aalisarnermut Piniarnermullu Naalakkersuisoqarfimmut ukiumoortumik akiliuteqarluni piniartitsinermik aaqqissuisumit nalunaarutigineqartassapput imminut kiffartuunnikkut www.sullissivik.gl-kut imaluunniit pisanik nalunaarsuiffik immersugassap immersorneratigut nassiunneratigullu, taanna Piniarneq-mut ilanngullugu nassiunneqarnikuuvoq.


Timmissanik manninnillu tuniniaaneq

  § 18.  Taamaallaat inuussutissarsiutigalugu piniarnermut allagartallit timmiartaminnik tuniniaasinnaapput suliarineqanngitsunik, erisakkanik atoriaannanngorlugilluunniit saleriikkanik nammineq angerlarsimaffigisap aqutsiveqarfiata iluani, takuuk ilanngussaq 2.
  Imm. 2.  Timmissat qassutinik ningittakkanilluunniit aalisarnermi saniatigut pisarisuukkat tuniniaqqusaanngillat.
  Imm. 3.  Tuniniaasoqarsinnaavoq, takuuk imm. 1, taamaallaat appanik, appanik sigguttuunik, miternik siorartuunik aamma miternik siorakitsunik § 7, imm. 2-mi aamma § 8, imm. 2-mi piffissani piniarfiusussatut aalajangersakkat tunngavigalugit, aqutsiveqarfinni pineqartumi taamaallaat tuniniaavinni, taassuma ataani kalaalimineerniarfinni uumasut nakorsaannit akuerisani. Timmissanik allanik pisassiissutitaqanngitsunik tunisineq pisinnaavoq timmissat pineqartut piffissatigut piniarfigeqqusaasup iluini tamani, aqutsisoqarfimmi najugarisami, takuuk § 10.
  Imm. 4.  Taamaallaat inuussutissarsiutigalugu piniarnermut allagartallit naajat manniinik suliarineqanngitsunik pisisartunut tuniniaasinnaapput, aqutsiveqarfiup najugarisap  iluani taamaallaat, takuuk § 11, imm. 3.
  Imm. 5.  Timmissat pisat inuussutissarsiutigalugu nioqqutissiarineqassanngillat, suliarineqaratik qeritinneqaratilluunniit Aalisarnermut Piniarnermullu Naalakkersuisumit akuersissummik pereersimatinnani.
  Imm. 6.  Imm. 5 naapertorlugu akuersissummi najukkami timmissat illersorniarlugit piffissamut aamma sumiiffimmut tunisinermilu amerlassutsinut piumasaqaatinik aalajangersaa­soqarsinnaavoq.  Akuersissummi aammattaaq tuniniaanermi piumasaqaatinik aalajangersaasoqarsinnaavoq, tamanna najukkami timmissat illersorneqarnissaannut sunniuteqaqataasinnaappat.


Nalunaaqutsersuutit, nalunaaquttat nassitsissutillu timmissaniittut nassaarineqartut

  § 19.  Nalunaaqutsersuutit, nalunaaquttat, radiukkut aamma qaammataasakkoortumik nassitsissutit sumi qangalu timmissap pisarineqarsimaneranik imaluunniit nassaarineqarsimaneranik paasissutissartalerlugit uunga nassiunneqassapput: Pinngortitaleriffik Postbox 570, 3900 Nuuk.


Najukkami ingerlatsineq

  § 20.  Piniarneq pillugu Siunnersuisoqatigiinnik allanillu kattuffinnik suliamut attuumassutilinnik tusarniaareernerup kingornatigut Aalisarnermut Piniarnermullu Naalakkersuisoq nunap ilaani su­miif­­finni killilikkami tamarmiusumik imaluunniit ilaannakuusumik, sumiiffinnut ingerlatsiviusunut, uumassusilerisut pingaarnertut siunnersuinerannut piumasaqaatinullu aalajangersakkanut malinnittunut, ingerlatsinermik piginnaatitsisinnaavoq.
  Imm. 2.  Tamatumani piumasaqaatit Aalisarnermut Piniarnermullu Naalakkersuisup aamma najukkami kommunit oqartussaasuisa akornanni allaganngorlugit isumaqatigiissutigineqassapput kommunimi ileqqoreqqusakkut.
  Imm. 3.  Kommunip ileqqoreqqusassaa Aalisarnermut Piniarnermullu Naalakkersuisoqarfimmit aalajangersarneqassaaq.


Piniarneq, pisanik mannittanillu nalunaaruteqartarneq

  § 21.  Timmissat pisat, matumani aamma timmissat aalisarnermi pisarisuukkat tamarmik, ukiumoortumik Aalisarnermut Piniarnermullu Naalakkersuisoqarfimmut nalunaarutigineqassapput, imminut kiffartuusseriaaseq nittartagaq www.sullissivik.gl-ikkut imaluunniit pisanik nalunaarsuiffissaq immersorlugu nassiunneratigut, immersugassaq quppersakkami Piniarneq-mut ilanngullugu nassiunneqarpoq.
  Imm. 2.  Manniit katersukkat ukiumoortumik Aalisarnermut Piniarnermullu Naalakkersuisoqarfimmut nalunaarutigineqassapput, imminut kiffartuusseriaaseq nittartagaq www.sullissivik.gl-ikkut imaluunniit pisanik nalunaarsuiffissaq immersorlugu nassiunneratigullu, immersugassaq quppersakkami Piniarneq-mut ilanngullugu nassiunneqartarpoq.


Timmissanik taakkunanngalu nioqqutissianik il.il. nioqquteqarneq annissinerlu

  § 22.  Timmissanik eqqissisimatitaasunik uumasunik aamma toqungasunik tassunga ilaallutik timmissat immikkat taakkualu ilaannik taakkunanngalu nioqqutissianik tamanut saqqummiussilluni tuniniaanissaq, tunisinissaq pisinissarlu inerteqqutaavoq, taamaattoq takuuk § 18, imm. 1 aamma imm. 3-4.

  § 23.  Timmissat eqqissisimatitat uumasut toqungasulluunniit, taassumalu ataani immikkat kiisalu tamakku ilamerngi taakkunanngaluunniit nioqqutissiat Kalaallit Nunaanniit anniseqqusaanngillat imaluunniit Kalaallit Nunaannut eqquteqqusaanatik.
  Imm. 2.  Timmissanik eqqissisimatitaasunik kiisalu taakkua ilamernginik nioqqutissianillu nuunnermut atatillugu annissineq Aalisarnermut Piniarnermullu Naalakkersuisoqarfiup akuersissuteqaqqaarsimanissaa piumasaqaataavoq.
  Imm. 3.  Timmissanik nujuartanik kiisalu taakkua ilamernginik taakkuninngalu nioqqutissianik ilisimatusarnermi imaluunniit ilinniartitsinermi siunertanut atorneqartussanik annissisoqassappat Aalisarnermut Piniarnermullu Naalakkersuisoqarfiup akuersissuteqaqqaarsimanissaa piumasaqaataavoq.
  Imm. 4.  Timmissat eqqissisimatitaasut toqungasut nassaat taakkualu ilamerngi pinngortitami qimaannarneqanngippata ingerlaannartumik Pinngortitaleriffimmut imaluunniit piniarnermik aalisarnermillu nakkutilliisunut tunniunneqassapput.


Timmiaateqarneq, taakkunannga anisitsineq nalunaaqutsersuinerlu

   § 24.  Kalaallit Nunaanni nujuartanik timmiaateqarneq inerteqqutaavoq.
  Imm. 2.  Timmissat eqqissisimatitat ikillit Aalisarnermut Piniarnermullu Naalakkersuisoqarfimmut nalunaarutigineqassapput.

  § 25.  Timmissanik Kalaallit Nunaannut eqqunneqartunik tamakkulu piaraannik pinngortitamut anisitsineq inerteqqutaavoq.

  § 26.  Timmissanik nujuartanik nalunaaqutsersuisoqassappat ilisimatusaatigalugu imaluunniit timmissanik nujuartanik aamma taakku manniinik misissugassanik katersisoqassappat Aalisarnermut Piniarnermullu Naalakkersuisoqarfiup akuersissuteqaqqaarsimanissaa piumasaqaataavoq.


Immikkut akuersissuteqarneq

  § 27.  Nalunaarummi matumani aalajangersakkanit Aalisarnermut Piniarnermullu Naalakkersuisoqarfik i­nuus­sutissalerinermik, ilisimatusarnermik atuartitsinermillu siunertanut kiisalu attaveqaqati­giinnikkut pissutsit aamma timmisartukkut umiarsuakkullu angallannerup isumannaatsuunissaata qulakkeernissaat pillugit immikkut akuersissuteqarsinnaavoq.

Kommunit ileqqoreqqusaat

  § 28.  Kommunalbestyrelsi kommunip ileqqoreqqusaatigut timmissanik illersuinermut maleruaqqusaliorsinnaavoq §§ 7-10, § 17 kiisalu § 20-mi aalajangersarneqarsimasunit sukannernerusunik. Kommunip ileqqoreqqusaa Aalisarnermut Piniarnermullu Naalakkersuisumit atuutilersinneqassaaq.


Pineqaatissiinerit

  § 29.  Nalunaarummi matumani § 3, §§ 6-12, § 13, imm. 1, § 14, imm. 1, §§ 15-19, §§ 22-23, § 24, imm. 1 aamma §§ 25-26-mi aalajangersakkanik unioqqutitsinerit akiliisitsinermik aamma arsaarinnissuteqarnermik Kalaallit Nunaanni pinerluttulerinermik inatsit naapertorlugu pineqaatissiissutaasinnaapput.
  Imm. 2.  Nalunaarut malillugu kommunimi ileqqoreqqusanik atortussanngortinneqarsimasunik unioqqutitsisoqartillugu akiliisitsinermik pisamillu arsaarinnissuteqarnermik Kalaallit Nunaanni pinerluttulerinermik inatsit malillugu pineqaatissiisoqarsinnaavoq.
  Imm. 3.  Pisat arsaarinnissutaasut qanoq atorneqarnissai Aalisarnermut Piniarnermullu Naalakkersuisumit isummerfigineqassaaq.
  Imm. 4.  Akiliisitsissutinit isertitat Nunap Karsianut nakkartinneqartassapput.


Atuutilersitsineq ikaarsaariarnerlu

  § 30.  Nalunaarut manna ulloq 6. januar 2017 atuutilerpoq.
  Imm. 2.  Peqatigitillugu Timmissat illersorneqarnerat piniagaanerallu pillugit Namminersornerullutik Oqartussat nalunaarutaat nr. 30, 28. december 2016-imeersoq atorunnaarpoq.
  Imm. 3.  Appanik sigguttuunik appanillu piniarneq takuuk § 8, imm. 2 piffissami piniarfiusumi januaari 6-aniit februaarip 28-a ilanngullugu piniarneqarsinnaapput Nunap immikkoortui 1-4-mi. Taassumalu piffissap kingorna nalunaarummi § 8, imm. 2 atorneqalissaaq.


Namminersorlutik Oqartussat, ulloq 5. januar 2017


Hans Enoksen

/

Jørgen Isak Olsen 

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk