Danmarkimi efterskolimiinnermut tapiissuteqartarneq pillugu Namminersorlutik Oqartussat nalunaarutaat nr. 2, 20. januar 2017-imeersoq

Efterskolit pillugit inatsisartut inatsisaanni nr. 13-imi, 5. december 2008-meersumi § 20, imm. 2 Inatsisartut inatsisaatigut nr. 17, 3. december 2012-imeersukkut allanngortinneqartoq naapertorlugu makku aalajangersarneqarput:

 

Kapitali 1
Tapiissuteqariaatsit tapersiissutillu

  § 1.  Ilinniartitaanermut Naalakkersuisoqarfik tapiissuteqartarpoq makkununnga Danmarkimi efterskolimiinnernut atatillugu:
1)  Angajoqqaat akiliutaannik appaanissamut.
2)  Atuarnerup aallartilerneranut ilinniarunnaarnermullu atasumik Kalaallit Nunaanniit utimullu atuartup angalaneranut.
3)  Atuartup angalanerminut atasumik pisariaqartunik unnuisarnerinut.
4)  Atuartup angalanermini pisariaqartitsineq naapertorlugu nerisaqarneranut.
5)  Qanigisap napparsimarulunneranut toquneranulluunniit atasumik Kalaallit Nunaannut utimullu atuartup angalaneranut.
6)  Angajoqqaatut oqartussaassuseqartut Danmarkimut utimullu angalanerannut, atuartup napparsimarulunnerani toquneraniluunniit.
7)  Misissuiartorluni angalaneq timikkut imaluunniit tarnikkut innarluutilimmit atuartumit aamma taassuma ikiortaanit, tamatumani aamma assersuutigalugu ilaqutaanit, inummit ineqarfimmi attaveqaataasumit, ingerlatsivimmit assigisaanilluunniit, takuuk § 2. 
8)  Atuartunut immikkut pisariaqartitsisunut ikiorsiissutinut, takuuk § 3.
  Imm. 2.  Qanigisatut, takuuk imm. 1, nr. 5, paasineqassapput qatanngutit, aapparisaq, qitornat, angajoqqaat aamma aanaakkut /aataakkut. Pisuni immikkut ittuni Ilinniartitaanermut Naalakkersuisoqarfiup inuit allat aamma ilaquttatut qanigisatut isigineqarsinnaanerat aalajangersinnaavaa.

  § 2.  Misissuiartorluni angalanermut, takuuk § 1, imm. 1, nr. 7, tapiisoqartarpoq, atuartup immikkut ittumik pisariaqartitsisunut efterskolip sorliup naapertuunnerpaaneranik paasiniaanissamut.
  Imm. 2.  Misissuiartorluni angalanermut ilaassaaq ilaqutariinnut attaveqaataasinnaasunut pulaarneq, atuartup efterskolernerani suleqatigiinnissamut tunngatillugit ataatsimoorussamik ilimagisaasut qulaajarnissaat siunertaralugu.
  Imm. 3.  Atuartoq timikkut imaluunniit tarnikkut innarluuteqartoq tassaavoq, inunnut annertuumik innarluutilinnut ikiorsiinermut inatsimmi atuuttumi pineqartoq.

  § 3.  Atuartunut immikkut pisariaqartitsisunut, tak. § 1, imm. 1, nr. 8, ikiorsiissutinut ilaapput ingerlassat atuartup immikkut pisariaqartitaanik aallaaveqarlutik atuartup iluatsitsisumik efterskolimiinnissaanut tapertaasinnaasut. Ikiorsiissutit suussusissaat annertussusissaallu Ilinniartitaanermut Naalakkersuisoqarfimmut qinnuteqartoqareerneratigut aningaasaliiffigineqartassapput.

  § 4.  Aningaasanut inatsimmi aningaasaliissutaasut iluanni Ilinniartitaanermut Naalakkersuisoqarfik atuartut naalakkersuisoqarfiup aaqqissugaanik angalasut Københavnimut apuunnerminni isumagineqarnissaannut, kiisalu efterskolernerup aallartinneranut atasumik ilisarititsilluni piareersaallunilu pikkorissaanernik ingerlatsinernut aningaasartuutinik matussusiisinnaavoq.

  § 5.  Aningaasanut inatsimmi aningaasaliissutaasut iluanni Ilinniartitaanermut Naalakkersuisoqarfik makkununnga akiliussigallarsinnaavoq:
1)  Atuartut efterskolit ammanerisa avataanni ilaqutariinnit attaveqaataasunit allanilluunniit angajoqqaanit taamaaliornissamut pisinnaatinneqarsimasunit isumagineqarsinnaanngitsut inissinneqarallarnerinut.
2)  Taamaatinnermi akiliummut, takuuk § 16, imm. 1, taamaattorli annerpaamik 8.000 kr.­nik.
  Imm. 2.  Imm. 1 malillugu naalakkersuisoqarfiup aningaasartuutai tamatuma kingorna atuartumut angajoqqaatut oqartussaassusilinnut akileeqqusissutikkut akiligassanngortinneqassapput.

  § 6.  Ilinniartitaanermut naalakkersuisoqarfiup aningaasaliissutaasut iluanni Danmarkimi efterskolini atuartut tamarmik ilinniarnissamik ilitsersorneqarnissaannut aningaasartuutit akilissavai.


Kapitali 2
Tapiissutit annertussusaat

Efterskolimiinnerup akilernissaanut tapiissutit

  § 7.  Naalakkersuisut tapiissuteqartarput Danmarkimi efterskolimiinnermut angajoqqaat akiliutissaasa appartinnissaanut. Tapiissutit akilerneqassapput pineqartut Naalakkersuisunut qinnuteqaataat tunngavigalugu.
  Imm. 2.  Isertitat tunngaviusussat tassaapput angajoqqaatut oqartussaassuseqartut ataatsimut akileraarutissatut isertitaat akileraaruteqaataasussanit ilanngaatitaqanngitsut, qinnuteqarnerup nalaani qaammatini kingullerni 12-ineersut (piffissami pineqartumi isertitat), taamaattoq takuuk imm. 6-8 aamma § 32, imm. 1.
  Imm. 3.  Ukiumoortumik aningaasanut inatsisitigut aalajangersarneqartarput annertussusissat isertitat piffissami pineqartumi atuuttut aamma tapiissutitut akiliutaasussat.
  Imm. 4.  Aalajangersaasoqartassaaq isertitat tunngavigineqartussat appartinneqarnissaannik atuartuusumut qatanngutaasut 18-it inorlugit ukiulinnut efterskolerluni aallartinnermi.
  Imm. 5.  Aalajangersarneqarsinnaavoq isertitanut appasissunut tamakkiisumik angajoqqaat akiliutissaasa akilerneqartarnissaat.
  Imm. 6.  Angajoqqaatut oqartussaassuseqartut avissimappata imaluunniit averusersimappata, isertitat tunngavigineqartussat tassaassapput meeqqamut angajoqqaajusup meeqqap najugaqarfigisaata isertitai, tapiissutissat naatsorsorneqarneranni. Tamanna aamma atuutissaaq naak meeraq angajoqqaamini arlariinni piffissami naligiissumi najugaqartaraluarpalluunniit.
  Imm. 7.  Angajoqqaatut oqartussaassuseqartoq atuartup najugaqarfigisaa inummik allamik inooqateqarpat, inooqataasup isertitai isertitat tunngaviusussat naatsorsorneqarneranni ilanngunneqassapput tapiissutissat naatsorsorneqarneranni, inooqatigiinneq aappariinneruppat imaluunniit aappariinnermut assingusuuppat, aammalu piffissami qinnuteqarfiusumi ukioq ataaseq sinnerlugu sivisussuseqarsimappat.
  Imm. 8.  Atuartoq angajoqqaatut oqartussaassuseqartumik peqanngippat, isertitat 0 kr.-inik annertussuseqartinneqassapput, tapiissutissat tunngaviusussat naatsorsorneqarneranni. 
  Imm. 9.  Angajoqqaatut oqartussaassuseqartut isertitaat piffissap tapiissuteqarfiusartup iluani malunnaatilimmik appariarpata, tamatumunnga qinnuteqarneq tunngavigalugu tapiissutissat naatsorsoqqinneqarsinnaapput. Qinnuteqaat uppernarsaaserneqassaaq isertitat appariarsimanerannut tunngaviusunik. Isertitat tunngavigineqartussat tamatuma kingorna naatsorsorneqassapput qaammammut isertitat piffissami pisumi atuuttut nutaat 12-imik gangerlugit. Naatsorsueqqinneq tapiissutit qaffanneqarnerannik kinguneqarpat, tapiissutinik pisartagaqartoq pisussaavoq Ilinniartitaanermut Naalakkersuisoqarfik nalunaarfigissallugu isertitat malunnaatilimmik qaffassimappata. 


Angalanerup akilerneqarnissaanut, ineqarnermut aamma nerisaqarnermut tapiissutit

  § 8.  Atuartup imaluunniit angajoqqaatut oqartussaassuseqartut angalanerannut aningaasartuutinut tapiissutit, takuuk § 1, imm. 1, nr. 2, 5 aamma 6, akilerneqartarput pisortat angallassissutaanni akikinnerpaami aningaasartuutinut tamarmiusunut naapertuuttumik.
  Imm. 2.  Angallassissut alla atorneqarpat aningaasartuutit qaffasinnerpaamik matussuserneqassapput pisortat akikinnerpaamik angallassisarneranni akiusunut naapertuuttumik. Angallaviusumi pineqartumi pisortat angallassissutaannik peqanngippat, taava akiliisoqassaaq qaffasinnerpaamik pisortanit akuerineqartunut angallassissutinut akiusut appasinnerpaat akuerisaasut naapertorlugit.
  Imm. 3.  Angalanermut aningaasartuutit isumaginninnermut oqartussaasunit atuartumut akilerneqartut, inunnut annertuumik innarluutilinnut ikiorsiisarnermut malittarisassat atuuttut naapertorlugit, imaluunniit meeqqanut inuusuttuaqqanullu malittarisassat atuuttut naapertorlugit angerlarsimaffiup avataani inissitaasunut, utertillugit akilerneqassapput imm. 1 aamma 2-mi killiliussat aalajangersarneqartut iluanni.

  § 9.  Misissuiartorlutik angalanernut tapiissutit, takuuk § 1, imm. 1, nr. 7, akilerneqartassapput Danmarkimut utimullu pisortanit aaqqissuussanut akikinnerpaamik angalanernut aamma pulaakkanut tamakkiisumik aningaasartuutaasunut, taamaattoq qaffasinnerpaamik katillugit 30.000 kr.-iusunik timikkut imaluunniit tarnikkut innarluutilimmut atuartumut angalaqataanullu.
  Imm. 2.  Ilinniartitaanermut Naalakkersuisoqarfik aningaasaliissutissanut killiliussaasumik saneqqutsisinnaavoq, pissutsit immikkut ittut tamanna pisariaqartippassuk, tamatumani aamma najugaqarfiup sumiiffiata sumiinnera pissutigalugu angalaneq annertuumik akisunerulersimappat.

  § 10.  Atuartup pisariaqartumik angalanermini unnuisariaqartarneranut aningaasartuutit, takuuk § 1, imm. 1, nr. 3, aningaasartuutinik tamakkiisunik akiliinikkut tapiiffigineqartassapput.
  Imm. 2.  Angalanerup allanngorneratigut atuartumut pissutsinik tunngaveqanngitsumik pisunut, immikkut tassanngaannartumik ineqartinneqarnissaq pisariaqalerpat, Ilinniartitaanermut Naalakkersuisoqarfiup ineqarfigisassaq ineqarnermilu aningaasartuutissat akuerereersimassavai inissiisoqannginnerani.

  § 11.  Atuartup angalaneranut atatillugu pisariaqartumik nerisaqarnissaanut tapiissutit, takuuk § 1, imm. 1, nr. 4, tunniunneqartarput najugaqarfigisami nerinermut allagartatut.
  Imm. 2.  Ineqarfigisaq nerinermut allagartanik tigusineq ajorpat, nerisaqarnermut tapiissutit tunniunneqassapput angalareernermi aningaasartuutigisimasanut uppernarsaatinik tunniussisoqarpat nerinermullu ataatsimut 100 kr.-it tapiissutaassallutik.
  Imm. 3.  Angalanerup ingerlanerani atuartup pisuussutiginngisaanik allannguisoqarneratigut nerinissaq pisariaqalersimappat, nerisaqarnermut tapiissuteqartoqassaaq angalareernermi aningaasartuutigisimasanut uppernarsaatinik tunniussisoqareerpat, nerinermullu ataatsimut 100 kr.-it tapiissutaassallutik.


Kapitali 3
Tapiissutisinissamut piumasaqaatit

  § 12.  Tapiissutisisinnaanermut makkua naammassineqarsimassapput:
1)  Atuartoq aamma angajoqqaatut oqartussaassuseqartut efterskolimiinnerup aallartinnerani Kalaallit Nunaanni najugaqavittuussapput, Kalaallit Nunaannilu minnerpaamik ukioq ataaseq najugaqarsimassallutik efterskolimiinnerup aallartinnginnerani. Kalaallit Nunaata avataani najugaqarnertut naatsorsuutigineqanngillat, taamaallaat ilinniarnissaq isumaginninnerluunniit pissutigalugu Kalaallit Nunaanni oqartussat peqataaffigisaannik najugaqarnerit.
2)  Atuartoq efterskolimiinnerup aallartinnerani ukiuni 8-ni meeqqat atuarfianni atuarnermik naammassisaqarsimassaaq, imaluunniit 14-inik ukioqalereersimassalluni, 18-inilli ukioqalereersimassanani.
3)  Atuartoq efterskolimi Danmarkimi ilinniartitaanermut ministerimit akuerisaasumi ilinniartussatut akuerineqarsimassaaq, takuuk § 13. Atuartoq angerlarsimaffiup avataani inissitaq, takuuk § 17, efterskolimi Danmarkimi oqartussaasut meeqqanik inissitanik ilinniartoqarsinnaasutut akuerisaanni ilinniarsinnaanermut neriorsorneqarsimassaaq, takuuk § 13.
4)  Atuartoq efterskolimiinnermini angajoqqaatut oqartussaassuseqartunit toqqarneqarsimasunik ilaqutariinnik atassuteqarfeqassaaq, takuuk § 14.
5)  Atuartoq siusinnerusukkut efterskolimiinnissamut tapiiffigineqarsimassanngilaq, taamaattoq takukkit imm. 4 aamma 5.
  Imm. 2.  Ilinniartitaanermut Naalakkersuisoqarfiup immikkut ittutigut imm. 1, nr. 1-imi najugaqarnissamik piumasaqaat sanioqqussinnaavaa, tamatumani aamma assersuutigalugu atuartoq aamma angajoqqaatut oqartussaassuseqartut ukiuni arlaqartuni Kalaallit Nunaanni najugaqarsimappata, imaluunniit meeraq Kalaallit Nunaanni najugaqarpat aalajangersimasumik, ukiuni arlaqartuni najugaqarsimalluni, kisiannili angajoqqaatut oqartussaassuseqartut aalajangersimasumik nunami allami najugaqarsimallutik.   
  Imm. 3.  Ilinniartitaanermut Naalakkersuisoqarfiup immikkut ittutigut ukiuni 8-ni atuarsimanissamik piumasaqaat aamma atuartup 18-inik ukioqalersimannginnissaanik piumasaqaat sanioqqussinnaavai, takuuk imm. 1, nr. 2, tamatumunnga ilanngullugu ukiut 8-t ataallugit atuarsimaneq atuartup klassimik alluisimaneranik peqquteqarpat, ukioqqortuallaarnerlu atuartup klassimik uteqqiisimaneranik allamilluunniit peqquteqarluni atuarnermini kinguaattoorsimaneranik peqquteqarpat.
  Imm. 4.  Ilinniartitaanermut Naalakkersuisoqarfiup immikkut ittutigut imm. 1, nr. 5­imi piumasaqaat sanioqqussinnaavaa, tamatumunnga ilanngullugu atuartoq nammineq pisuussutiginngisaminik siusinnerusukkut efterskolernerminik unitsitsiinnarsimappat, imaluunniit naalakkersuisoqarfiup nalilerpagu efterskolernerup nanginnissaa atuartup ilinniaqqinnissamut periarfissaqalernissaanut pingaaruteqarluinnartoq.
  Imm. 5.  Atuartunut inunnut annertuumik innarluutilinnut ikiorsiisarneq pillugu malittarisassanut ilaasunut, imm. 1, nr. 5 apeqqutaatinnagu ukiut pingasut tikillugit tapiisoqarsinnaavoq.
  Imm. 6.  Ilinniartitaanermut Naalakkersuisoqarfik tapiissutinut tunngatillugu atugassarititaasussanik aalajangiisinnaavoq, tamatumani aamma atuartup ilisarititsiviusumik piareersaataasumillu pikkorissarnissaanut, takuuk § 4, imaluunniit atuartoq immikkut perorsaanikkut tapersersorneqarnissamik pisariaqartitsisoq efterskolimiinnerminut atatillugu ikiorsiissutissanik pisinnaalluni, takuuk § 3.

  § 13.  Efterskolimi akuerisaasumi ilinniartussatut akuerisaaneq uppernarsarneqassaaq tamanna pillugu efterskolip atsiukkamik allagaqarneratigut.

  § 14.  Angajoqqaatut oqartussaassusillit ilaqutariinnik atassuteqarfissanik toqqaasimanerat, takuuk § 12, imm. 1, nr. 4, uppernarsarneqarsimassaaq angajoqqaatut oqartussaassuseqartut aamma ilaqutariit atassuteqarfiusussat akornanni immersukkamik atsiukkamik nalunaaruteqarnikkut. Ilinniartitaanermut Naalakkersuisoqarfimmiit tamatumunnga atugassanngorlugu nalunaaruteqarnissamut immersugassiaq atorneqassaaq.

  § 15.  Atuartoq efterskolimi najugaqarnissap aallartinnissaanut takkutinngitsoorpat, tapiissutisisarnissamut pisinnaatitaaffik atorunnaassaaq.
  Imm. 2.  Ilinniartitaanermut Naalakkersuisoqarfiup imm. 1 sanioqqussinnaavaa, atuartup efterskolip aallartinnerani takkutinngitsoornera pissutsinik immikkut ittunik akuerineqarsinnaasunik peqquteqarsimappat, tamatumunnga ilanngullugu tamanna ilaqutariinni peruluttoqarneranik angallannermiluunniit pissutsinik peqquteqarpat.

  § 16.  Efterskolimiinneq maanaannaq taamaatinneqarpat tapiissuteqartarneq ullormit taamaatiffimmiit unitsinneqassaaq. Efterskole taamaatereernerup kingorna piffissami aalajangersimasumi efterskoliimminnerup akilerneqarnissaanik piumasaqarpat (taamaatinnermi akiliut), tapiiffigineqarnissamik pisinnaatitaaffik piffissami tassani pigiinnarneqassaaq, taamaattorli annerpaamik sapaatip-akunnerini 4-ni.
  Imm. 2.  Angerlamut angalanermut aamma pisariaqartumik unnuiffissanut nerisaqarnermullu aningaasartuutinik akiliunneqarsinnaaneq taamaallaat atuutissaaq, atuartoq angerlannginnermini Kalaallit Illuutaannit efterskolimut attuumassuteqartumit aaqqissuunneqartumik oqaloqatigineqaqqaarsimappat. Oqaloqatigiinnermi qularnaarneqassaaq, ajornartorsiutinut uniinnarnermut patsisaasunut aaqqiissutaasinnaasut tamarmik misilinneqarsimanissaat, tamakkununnga ilanngullugit atuartunut ataasiakkaanut ikiorsiissutit, takuuk § 1, imm. 1, nr. 8. Oqaloqatigiinneq atuartup efterskoliani pissaaq, atuartup efterskolernerminik unitsitsiinnarniarluni nalunaaruteqarnerata kinguninnguatigut. Oqaloqatigiinnermut peqataassapput Kalaallit Illuutaanni sulisoq, efterskolimi sulisoq, atuartoq atuartorlu 18-it inorlugit ukioqarpat angajoqqaatut oqartussaatitaasut imaluunniit ilaqutariit atuartumut attaveqaataasut.


Kapitali 4
Qinnuteqarnermi periaatsit

Atuartunut annertuumik innarluutilinnut, aamma atuartunut angerlarsimaffiup avataani inissinneqarsimasunut immikkut ittut

  § 17.  Atuartunut inunnut annertuumik innarluutilinnut ikiorsiisarneq pillugu malittarisassanut atuuttunut ilaasunut aamma atuartunut meeqqanik inuusuttunillu ikiorsiisarneq pillugu malittarisassat atuuttut naapertorlugit angerlarsimaffimmik avataanut inissinneqarsimasunut tapiissutit aatsaat tunniunneqarsinnaapput, efterskolernissaq isumaginninnermi oqartussaasunit susassaqartunit akuerineqarsimappat.


Atuartunut immikkut perorsaanikkut ikorfartorneqarnissamik pisariaqartitsisunut immikkut ittut

  § 18.  Atuartut immikkut perorsaanikkut tapersersorneqarnissamik Danmarkimi efterskolernerminnut atatillugu pisariaqartitsisut, kiisalu atuartunut taakkununnga angajoqqaatut oqartussaassuseqartut ilitsersorneqarnissamik qinnuteqassapput atuartut atuarfigisaanut, efterskolimi tiguneqarnissamut atatillugu, ikiorsiissutinik pisariaqartitsineq qanoq ittuunersoq qularnaarumallugu. 


Atuartunut tamanut nalinginnaasumik atuuttut

  § 19.  Atuartunut § 17­imi pineqanngitsunut tunngatillugu angajoqqaatut oqartussaassuseqartut namminneerlutik efterskolimut akuerisaasumut qinnuteqassapput.
  Imm. 2.  Atuartup efterskolimi akuerisaasumi ilinniartunngorsinnaaneranik nalunaarut aamma ilaqutariinnit attaveqaataasartussanit uppernarsaat pigineqalerpata, Namminersorlutik Oqartussanit tapiiffigineqarnissamik qinnuteqaat Ilinniartitaanermut Naalakkersuisoqarfiup immersugassiaa atorlugu immersugaq nassiunneqassaaq.
  Imm. 3.  Qinnuteqarnermi immersugassaq Naalakkersuisoqarfiup quppersakkami innersuussaani nassaassaavoq. Skema immersugassaq immersorneqassaaq nassiunneqarlunilu atsiorneqarsimalluni angajoqqaatut oqartussaassusilinnit aqutsisumut Naalakkersuisoqarfimmiit toqqakkamut. Qinnuteqaammut ilanngullugit nassiunneqassapput:
1)  Efterskolip atuartup ilinniartunngorsinnaaneranik nalunaarutaa, takuuk § 13.
2)  Ilaqutariinnit attaveqaataasussanit uppernarsaat akuersissut atsiugaq, takuuk § 14.
3)  Piffissap ingerlanerani najugarisimasat uppernarsaataat (historisk bopælsattesti).
4)  Kuisinnermut uppernarsaat imaluunniit uppernarsaat alla angajoqqaatut oqartussaassuseqartut kikkuunerat pillugu. 
5)  Angajoqqaatut oqartussaassuseqartut cpr-normui, isertitat piffissamut atuuttumut paasiniarnissaannut atorneqartussat, taamaattoq takuuk § 32, imm. 2. Inooqataasup cpr-normua ilisimatitsissutigineqassaaq § 7, imm. 4 naapertorlugu qinnuteqarnermi.  
6)  Karakterinut uppernarsaat ukiut arfineq pingajuanni atuarsimanermut uppernarsaatitut, takuuk § 12, imm. 1, nr. 2. 
  Imm. 4.  Atuartoq § 17-imi pineqartunut ilaappat, ilanngullugu nassiunneqassaaq uppernarsaat pisortatut oqartussaasunit susassaqartuniit, atuartoq angerlarsimaffiup avataanut inissinneqarsimanersoq pillugu, meeqqanut inuusuttuaqqanullu annertuumik innarluutilinnut malittarisassat atuuttut naapertorlugit.

  § 20.  Ilinniartitaanermut Naalakkersuisoqarfiup atuartup Danmarkimut angalanissaa aaqqissuuttussaappagu, qinnuteqaat Naalakkersuisoqarfimmit toqqagaalluni allaffissornikkut suliamik ingerlatsisuusussamit tiguneqareersimassaaq 15. marts nallertinnagu, ukiumi efterskolernerup aallartiffigisassaani.
  Imm. 2.  Misissuiartorluni angalanissamut tapiiffigineqarnissamik qinnuteqaat Naalakkersuisoqarfiup toqqagaani allaffissornikkut suliamik ingerlatsisuusumit tiguneqareersimassaaq kingusinnerpaamik ulloq 1. Februar, ukiup efterskolerfiusussap aallartiffissaata siuliani.

  § 21.  Ilinniartitaanermut Naalakkersuisoqarfiup efterskole nalunaarfigissavaa atuartumut tapiissutissat akuersissutigineqartut taakkualu akilerneqartarneranni periaasissat pillugit.
  Imm. 2.  Ilinniartitaanermut Naalakkersuisoqarfiup Danmarkimi Kalaallit Illuutaat sumiiffinni attuumassuteqarfigisaanni efterskolini ilinnialersussat pillugit ilisimatissavai.


Paasissutissiisussaatitaaneq aamma utertitsilluni akiliineq

  § 22.  Angajoqqaatut oqartussaassuseqartut pisussaaffigaat atuartup efterskolernerminik unitsitsinera, ilinniarfimmut allamut nuunnera paasissutissallu allat tapiissutisiuarnissamut pingaaruteqartut pillugit Ilinniartitaanermut Naalakkersuisoqarfimmut nalunaarutigisarnissaat.
  Imm. 2.  Ilinniartitaanermut Naalakkersuisoqarfik pisinnaatitaavoq tapiiffigineqarnissamik qinnuteqaatip nalilernissaanut paasissutissat pisariaqartut tamaasa piniarnissaannut, tamatumani aamma isertitanut tunngasumik pissutsit, aammalu tapiissutisianik pisartagaqaannarnissamut pisinnaatitaanerup nalilersornissaanut. Naalakkersuisoqarfik isertitanut tunngatillugu paasissutissanik nalilersuinermi misiligutissanik misissuisinnaavoq, aamma paasissutissanik allanik, tapiiffigineqartarnermut pingaaruteqartunik, aamma tapiissutit annertussusissaannut.

  § 23.  Naalakkersuisut piumasarisinnaavaat tapiissutit akilerneqarsimasut utertinneqarnissaat, imaattoqarpat:
1) angajoqqaatut oqartussaassuseqartut paasissutissanik eqqunngitsunik nalunaaruteqarsimappata, imaluunniit pissutsini allannguutinik tapiissutisisarnermut pingaaruteqartunik ilisimatitsisimanngippata,
2) tapiissutit pisassarinagit tiguneqarsimappata, 
3) tapiissutit aningaasaliiffigineqartumut atorneqarsimanngippata, 
4) efterskolernissaq aallartinneqarsimanngippat, angalanissaq inniminnerneqarsimappat aammalu akilerneqarsimalluni, imaluunniit
5) atuartup efterskolimiinnera imatut sivisussuseqarsimappat efterskolerneq allartinneqarsimanani, taamaatinnerlu naammattunik tunngavilersorneqarani.


Angalanernik aqutsineq

  § 24.  Ilinniartitaanermut Naalakkersuisoqarfiup atuartumut angajoqqaatut oqartussaassuseqartut isumasiortarlugit atuartup efterskolimut angalanissaa piareersartarpaa, taamaattoq takuuk imm. 3 aamma § 26, imm. 1.
  Imm. 2.  Ilinniartitaanermut Naalakkersuisoqarfiup atuartut Danmarkimut tikittarnerat ataqatigiissaartarpaa.
  Imm. 3.  Atuartunut angerlarsimaffiup avataani inissinneqarsimasunut tunngatillugu, isumaginninnermi oqartussat suliami susassaqartut, atuartumut angajoqqaatut oqartussaassuseqartut isumasiortarlugit atuartup efterskolernissamut angalanissaa Danmarkimullu tikippat isumagineqarnissaa isumagissavaa.

  § 25.  Kalaallit Illuutaata inissisimanermigut atuartup efterskolianut attuumassuteqartup angajoqqaatut oqartussaassuseqartut isumasioqatigalugit atuartup efterskolereernermini angerlamut angalanissaata piareersarnissaa isumagissavaa, taamaattoq takuuk imm. 2 aamma § 26, imm. 2.
   Imm. 2.  Atuartunut angerlarsimaffiup avataanut inissitanut tunngatillugu isumaginninnermi oqartussaasut pisinnaatitaaffeqartup angajoqqaatut oqartussaassuseqartut isumasiorlugit atuartup efterskolimit angerlarnissaa isumagissavaa.

  § 26.  Angajoqqaatut oqartussaassuseqartut kissaateqartut namminneq atuartup efterskoliliarluni angalanissaanik aaqqissuussinissamik, tamatuminnga angalanissaq sioqqullugu piffissaagallartillugu nalunaaruteqassapput, kingusinnerpaamillu 15. marts.
  Imm. 2.
 Angajoqqaatut oqartussaassuseqartut nammineerlutik atuartup efterskolereernermini angerlarnissaanik isumaginninniartut, Kalaallit Illuutaannik tamanna pillugu ilisimatitsissapput, kingusinnerpaamillu angerlarnissaq qaammatinik 5-inik sioqqullugu.


Angalanermut aningaasartuutinik utertitsineq

  § 27.  Angajoqqaatut oqartussaasut atuartup efterskolimut efterskolimiillu angalaneranik isumaginnittut, Ilinniartitaanermut Naalakkersuisoqarfimmit billetimut akikinnerpaamut, allanngortinneqarsinnaanngitsumut sillimatitaqanngitsumullu aningaasartuutitik uppernarsakkat utertillugit akilertissinnaavaat, tamatumani aamma angalanermi pisariaqartumik unnuinernut aningaasartuutit. Aningaasartuutit atuartumut namminermut angerlarsimaffiup Københavnillu akornanni angalanermut, kiisalu Danmarkimi aqqummut akikinnerpaamut aningaasartuutitut naatsorsorneqassapput.
  Imm. 2.  Billeti akikinnerpaaq imaluunniit allanngortinneqarsinnaanngitsoq atorneqanngippat utertoorutigineqarsinnaapput ullormi angalaffimmi billetip allanngortinneqarsinnaanngitsup akia angalanerulluunniit akikinnerpaap nalinga.
  Imm. 3.  Angajoqqaat Kalaallit Nunaanni mittarfeqarfimmut qaninnermut namminneerlutik angallassigunik aningaasartuutitik namminneq akilissavaat.

  § 28.  Timmisartumut billetit suliarereernerisa kingorna allannguinermi aningaasartuutaanerujunnartut angajoqqaatut oqartussaassuseqartunit akilerneqassapput, tamanna angajoqqaatut oqartussaassuseqartut angalanermik allannguinerannik peqquteqarpat.


Tapiissutit akilerneqartarnerat

  § 29.  Efterskolimiinnerup akilernissaanut tapiissutit, takuuk § 7, akilerneqartarput efterskolimut pineqartumut qaammatikkaartumik. Tapiissutit annertussusiat allannguuteqarpat, takuuk § 7, imm. 9, tapiissutit allanngortitat akilerneqartassapput qaammatip isertitat tunngaviusut naatsorsorneqarfiata tullianiit.  
  Imm. 2.  Tapiissutinik akiliisarneq atorunnaassaaq efterskolerneq unitsinneqarpat, taamaattoq takuuk § 16, imm. 1.


Maalaarneq

  § 30.  Tapiissutit pillugit aalajangiinerit oqartussanut allanut maalaarutigineqarsinnaanngillat.

 
Kapitali 5

Atuutilernera,atorunnaarsitsinermi aamma ikaarsaariarnermi aalajangersakkat

  § 31.  Nalunaarut 1. februaari 2017 atuuttuulerpoq, ukiumiillu atuarfiusumit 2017/2018-imi atuuttuulissalluni.
  Imm. 2.  Ilutigisaanik atorunnaarsinneqarpoq Danmarkimi efterskolimiinnermut tapiissuteqartarneq pillugu Namminersorlutik Oqartussat nalunaarutaat nr. 22, 23. december 2013-imeersoq. 

  § 32.  § 7 naapertorlugu ukiumi atuarfiusumi 2017/2018-imi tapiissutissanik naatsorsuinermi isertitat akileraaruserneqartut kingulliit ilisimaneqartut atorneqassapput.
  Imm. 2.  Ukiumi atuarfiusumi 2017/2018-imi tapiissutinik qinnuteqarnermi isertitat akileraaruserneqartut takussutissianngorlugit uppernarsaatitut qinnuteqaammut ilanngunneqassapput.



Namminersorlutik Oqartussat, ulloq 20. januar 2017


Doris Jakobsen                   

/

Lone Nukaaraq Møller

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk