Saattuarniarneq pillugu Namminersornerullutik Oqartussat nalunaarutaat nr. 9, 12. februar 2021-meersoq

Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, kingullermik Inatsisartut inatsisaatigut nr. 28, 28. november 2016-imeersukkut allanngortinneqartumi, § 5, imm. 1, § 10, § 10a, § 10b, § 11, § 13, imm. 2, § 23, imm. 1, § 33, imm. 2 aamma § 34 imm. 3 naapertorlugit aalajangersarneqarpoq:

 

Atuuffia

 

  § 1.  Imartani Kalaallit Nunaata aalisarnikkut oqartussaaffigisaani saattuarniarnermut (Chionoecetes opilio) nalunaarut atuuppoq.

 

Aalisarsinnaanermut akuersissutit, aqutsiveqarfiit pisassiissutillu

 

  § 2.  Inuussutissarsiutigalugu saattuarniarsinnaanissamut akuersissummik, qinnuteqareernikkut Aalisarnermut, Piniarnermut Nunalerinermullu Naalakkersuisoqarfimmit tunniunneqartussamik, peqarnissaq piumasaqaataavoq.
  Imm. 2.  Taamaallaat angallatit 75 BRT/120 BT-mit mikinerusut atorlugit inuussutissarsiutigalugu saattuarniarsinnaanermut akuersissummik tunniussisoqarsinnaavoq.
  Imm. 3.  Angallatinut usiminnik allanut nuussisinnaanermik akuersissutaateqareersunut inuussutissarsiutigalugu saattuarniarsinnaanermut akuersissummik tunniussisoqartassanngilaq.
  Imm. 4.  Aalisarnermut, Piniarnermut Nunalerinermullu Naalakkersuisoqarfik piffissami ukiunik marlunnik sivisutigisumi inuussutissarsiutigalugu saattuarniarnermik ingerlatsilerniartunut nutaanut akuersissutinik tunniussissanngilaq. Piffissaq 2021-imi januaarip ulluisa aallaqqaataanni aallartissaaq 2022-milu decembarip ulluisa 31-ata tungaanut ingerlassallunilu.
  Imm. 5.  Imm. 4 naapertorlugu “ingerlatsilerniartut nutaat” tassaapput aalisartut ukiumi pisassiiviusumi qaangiuttumi aalisarnermut qinnutigineqartumut taamaaqataanik akuersissummik peqarsimanngitsut.

 

  § 3.  Aalisarnermut, Piniarnermut Nunalerinermullu Naalakkersuisoqarfik Kalaallit Nunaata Kitaani aqutsiveqarfinnut arfineq-pingasunut ilanngussami 1-imi nassuiarneqartunut inuussutissarsiutigalugu saattuarniarsinnaanermut akuersissutinik tunniussisinnaavoq. Saattuarniarsinnaanermut akuersissutip piffissaa killiligaavoq, pisarineqarsinnaasulli qummut killilerneqaratik.
  Imm. 2.  Qinnuteqartoq aqutsiveqarfiit pingasut tikillugit inuussutissarsiutigalugu saattuarniarsinnaanermut akuersissummik qinnuteqarsinnaavoq.
  Imm. 3.  Angallat ataaseq qaammatisiutit ukiuanni tassani inuussutissarsiutigalugu saattuarniarnermut aqutsiveqarfinni pingasuniit amerlanerusuni saattuarniarsinnaanermut akuersissutaateqarsinnaanngilaq.

 

  § 4.  Ilanngussaq 1 naapertorlugu aqutsiveqarfinnut arfineq-pingasunut tamanut pisassiissutinik Naalakkersuisut ukiut tamaasa aalajangersaasarput.

 

Inuussutissarsiutigalugu saattuarniarsinnaanermut inerteqqut

 

  § 5.  Piffissami januaarip ulluisa aallaqqaataannit marsip ulluisa 31-at ilanngullugu Kalaallit Nunaata Kitaani 64°15N-ip avannaani inuussutissarsiutigalugu saattuarniarneq inerteqqutaavoq.

 

  § 6.  Inuussutissarsiutigalugu saattuarniarneq unitsinneqartassaaq pullatinik amoornermi pisat 20 %-ii sinnerlugit tunineqarnissaminnut tunisassiarineqarnissaminnulluunniit naleqqutinnginnerat pissutigalugu avalatseqqinneqaannartariaqartut paasinarsippat. Tamatuma kingorna saattuarniarneq Aalisarnermi saniatigut pisat pillugit Namminersorlutik Oqartussat nalunaarutaat naapertorlugu nuunneqassaaq.

 

Aalisarnermi atortut

 

  § 7.  Inuussutissarsiutigalugu saattuarniarnermi pullatit kisimik atorneqaqqusaapput.
  Imm. 2.  Pullatinik nigartaqqortussusissamit Aalisarnermi saniatigut pisat pillugit Namminersorlutik Oqartussat nalunaarutaanni takuneqarsinnaasumit nigartakinnerusunik angallammiittoqaqqusaanngilaq.

 

  § 8.  1. januar 2022-miit atuutilersumik ilanngussaq 2 naapertorlugu pullatit tamarmik allunaasamik bomuld-iusumik sananeqarsimasumik aniffissatut igalaasartaqassapput (escape window).

  § 9.  Pullatit aalisarnermut atorneqanngikkunik imaani kivisimatinneqaqqusaanngillat.

 

Inuussutissarsiutiginagu aalisarneq

 

  § 10.  Inuit danskisut innuttaassusillit tamarmik Kalaallit Nunaanni aalajangersimasumik angerlarsimaffillit namminneq atugassaminnik saattuarniarsinnaatitaapput. Nunani allani Danmarkiunngitsumi innuttaassusillit Kalaallit Nunaanni najugaqavissut ukiullu marluk ataavartumik Kalaallit Nunaanniissimasut danskisut innuttaassuseqartutut isigineqassapput.
  Imm. 2.  Aalisarnermi pullatit amerlanerpaamik pingasut atorneqarsinnaapput.
  Imm. 3.  Tamatuma saniatigut aalisarneq §§ 5-9, kiisalu Piujuartitsineq siunertaralugu aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutaat naapertorlugit ingerlanneqassaaq.

 

Pineqaatissiinerit

 

  § 11.  § 2, imm. 1-imik kiisalu §§ 5 - 10-mik unioqqutitsinerit Kalaallit Nunaanni pinerluttulerinermi inatsimmi malittarisassat malillugit akiliisitaanermik arsaagaanermillu pineqaatissiissutaasinnaapput.
  Imm. 2.  Inatsiseqartitsinermi immikkoortut inuttut isigineqarsinnaasut Kalaallit Nunaanni pinerluttulerinermi inatsimmi malittarisassat malillugit imm. 1 malillugu akiliisussanngortinneqarsinnaapput.
  Imm. 3.  Akiliisitsissutit imm. 1 aamma imm. 2 malillugit aalajangersarneqartut Nunatta Karsianut nakkartarput.

 

Atuutilerfia

 

  § 12.  Nalunaarut 2021-mi februaarip ulluisa 15-ianni atuutilerpoq.
  Imm. 2.  Peqatigitillugu Saattuarniarneq pillugu Namminersornerullutik Oqartussat nalunaarutaat nr. 8, 7. juni 2004-meersoq atuukkunnaarsinneqarpoq.

 

 

 

Namminersorlutik Oqartussat, ulloq 12. februar 2021.

 

 

 

Jens Immanuelsen                    

/

Jørgen Isak Olsen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk