Naalakkersuisut suleriaasiat pillugu Namminersorlutik Oqartussat nalunaarutaat nr. 18, 9, november 2017-imeersoq

Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersumi § 23, imm. 1 naapertorlugu, makkua aalajangersarneqarput:  

 

Kapitali 1
Aaqqissugaaneq allaffissornerlu

  § 1.  Pisinnaatitaaffiit, Naalakkersuisut Inatsisartut inatsisaat malillugu suliassaqartitaapput, imaluunniit naalakkersuisunut ilaasortaq aalajangersimasoq inatsisartut inatsisaatigut, landstingip inatsisaatigut imaluunniit inatsisartut peqqussutaatigut suliassaqartitaavoq, Naalakkersuisut Namminersorlutik Oqartussat inatsisinik atuutsitsineranni oqartussaaffimmik suliassaqartitaasutut isigineqarput.
  Imm. 2.  Kapitali 2-mi malittarisassat naapertorlugit pisinnaatitsissutit imm. 1 malillugu  Naalakkersuisunit aalajangiunneqassapput,  Naalakkersuisunit imaluunniit Naalakkersuisut Siulittaasuannit immikkoortumi aalajangersimasumi erseqqarinnerusumik Naalakkersuisoq nammineerluni aalajangiinissamut piginnaatinneqarsimanngippat, takuuk kapitali 7.

  § 2.  Naalakkersuisut Siulittaasuata Namminersorlutik Oqartussat suliassaqarfiinut akisussaaffimmik Naalakkersuisunut ilaasortanut agguaassinerata nassataraa, Naalakkersuisut ataasiakkaatut akisussaaffimmik iluanni pisussaaffeqarnerat, politikkikkut najoqqutassat, Naalakkersuisunit akuersissutigineqartut, inatsiseqarnikkut aamma Inatsisartunit Naalakkersuisunillu najoqqutassat atuuttut naapertorlugit politikkikkut ineriartornermi suliniuteqassallutik.
  Imm. 2.  Aammattaaq Naalakkersuisut tamarmik immikkut ataasiakkaarlutik Naalakkersuisuni aalajangiinernut isummernissamut tunngavissiat pisariaqartut suliarinissaannut akisussaaffeqarput.

  § 3.  Naalakkersuisut allaffeqarfimmit ingerlatsivimmit immikkoortutut aaqqissugaasumit ikiuuffigineqassapput, Namminersorlutik Oqartussani ataatsimoortutut sulisunit ataasiakkaanik atorfeqartitaasunit. Naalakkersuisup ataani atorfinitsitsinermut oqartussaasup, Naalakkersuisut allaffeqarfiani ingerlatsinerup iluani akisussaasuusup, sulisut atorfinitsitaanerannut atugassarititaasuni suliffiup sumiiffianut il. il. nalunaarutiginissaa pillugu najoqqutassat erseqqarinnerusut aalajangersassavai.
  Imm. 2.  Atorfinitsitsinermut oqartussaasoq, takuuk imm. 1, Namminersorlutik Oqartussat sulisuinik atorfinitsitsinissamut, allamut nuussinissamut soraarsitsinermullu pisinnaatitaaffeqarpoq. Ataasiakkaanut atorfeqarnermi pissutsinik pingaaruteqartunik aalajangiiffiusuni sulisup pineqartup atorfilittut suliffiani  pisortanit oqaaseqaammik atorfinitsitsinermut oqartussaasoq piniassaaq. Naalakkersuisoqarfinni pisortanik pisortanillu atorfinitsitsinerit soraarsitsinerillu pillugit aalajangiinerit kapitali 2-mi aalajangersakkat malillugit Naalakkersuisunit aalajangerneqartassapput.
  Imm. 3.  Sulisunut tunngatillugu Pisortat ingerlatsineranni suliassat suliarineqartarnerat pillugu Inatsisartut inatsisaat allatigut atuuppoq. Paasissutissat, sulisunut pissutsit tunngassuteqartut, ingerlatsinermut oqartussaasumut atorfinitsitsisumut ingerlateqqinneqarsinnaapput, takuuk Inatsisartut Inatsisaanni § 28, imm. 2 aamma 3.
  Imm. 4.  Imm. 1 apeqqutaatinnagu naalakkersuisoqarfiit akornanni imaluunniit naalakkersuisoqarfiup ataatsip taassumalu ataani oqartussaasut allaffigeqatigiinnerit immikkoortortaqarfiit assigiinngitsut oqartussaasup ataatsip iluani allaffigeqatigiinnertut isigineqassanngillat, takuuk Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni § 7.

  § 4.  Naalakkersuisuni aalajangiiffigisassat piareersarnerinut suliaqartussamik ataatsimiititaliamik Naalakkersuisut pilersitsisinnaapput. Tassa Naalakkersuisut aalajangiineri naammassiniarlugit naalakkersuisoqarfiit arlallit suliaannik ataqatigiissaarisussamik imaluunniit ataatsimiititaliamik suliassanut aningaasaqarnikkut pingaaruteqartut suliarinerinut ataqatigiissaarisussamik ataatsimiititaliamik pilersitsisoqarsinnaavoq,

  § 5.  Naalakkersuisut aalajangiisinnaassuseqarput ikinnerpaamik ilaasortat affaat ataatsimiinnermi najuuppata.  Taamatut ataatsimiinnerit pisariaqartitsineq malillugu aaqqissuunneqarsinnaapput, ilaasortaq ataaseq amerlanerusulluunniit oqarasuaatikkut videokkullu ataatsimiinnermut atortut atorlugit peqataallutik.
  Imm. 2.  Taasinermi tamatigut Naalakkersuisut Siulittaasuat taaseqataatinneqassaaq.
  Imm. 3.  Taasisut naligiippata Naalakkersuisut Siulittaasuata taasinera aalajangiisuussaaq.

  § 6  Immikkut ittunik pisoqassagaluarpat, Naalakkersuisut Siulittaasuat, imaluunniit taamatut pisussaaffiligaasoq, Naalakkersuisunut isummernissamut tunngavissiaq tunngavigalugu siulittaasutut aalajangiisinnaavoq.
  Imm. 2.  Siulittaasutut aalajangiinissaq pillugu qinnuteqarsinnaaneq taamaallaat pisinnaavoq Naalakkersuisup suliassaqarfimmut akisussaasuusup tapersiineratigut.

  § 7.  Naalakkersuisut nalinginnaasumik ataatsimiittarput sisamanngornerit tamaasa nal. 10.00.
  Imm. 2.  Inatsisartuni ataatsimiinnerit nalaanni Naalakkersuisut Siulittaasuata aalajangiineratigut Naalakkersuisut akulikinnerusumik ataatsimiittarput.


Kapitali 2
Naalakkersuisuni akuersissutigineqartut

  § 8.  Inatsisartut inatsisissaattut, nalunaarutissatut, akuersissutinut siunnersuutinut missingiutinut kiisalu akuersissuteqarnermut immikkullu akuersissutinut missingiutinut, suleriaatsimi aalajangersariikkami oqaasertaqartinneqanngitsut, naalakkersuisoqarfimmi suliassaqarfimmut akisussaasumit Naalakkersuisumit akisussaasumit aqunneqarlutik suliarineqassapput.
  Imm. 2.  Missingiut Naalakkersuisunut aalajangiiffigisassatut saqqummiunneqassaaq. Aalajangiineq siunissami allaffissornermut najoqqutassanik erseqqarinnerusunik imaqarsinnaavoq. Matuma kingorna Naalakkersuisoq suliassaqarfimmut akisussaasuusoq aalajangiisinnaavoq, takuuk kapitali 7.

  § 9.  Inatsisartut inatsisissaattut nalunaarutissaannullu siunnersuutinut missingiutit kiisalu aalajangiiffigisassanut allanut isummernissamut tunngavissiat naleqquttumik annertussusilerlugit tusarniaassutigalugit Namminersorlutik Oqartussat naalakkersuisoqarfiinut allanut saqqummiunneqartassapput. Aammattaaq missingiut oqartussanut kattuffinnullu siunnersuummut soqutiginnissinnaasunut imaluunniit missingiutip naammassisarnerani pingaarutilimmik ilisimasaqartutut isumaqarfigineqartunut oqaaseqarfigisassatut  nassiunneqassaaq.
  Imm. 2.  Naalakkersuisoqarfik suliassaqarfimmut akisussaasoq tusarniaanermut akissutigineqartuni tiguneqartuni tusarniaanermut akissutini qanoq annertutigisoq Naalakkersuisunut isummernissamut tunngavissiamut tulluarsarlugu ilanngunneqarsimanersoq oqaatigalugu nalunaarsuinermik suliaqassaaq.
  Imm. 3.  Taamatut missingiut suliarineqarsimasoq Aningaasaqarnermut Naalakkersuisoqarfimmit tusarniaanermut akissummik siunnersuutip aningaasatigut kingunerisassaanik naliliinermik imalimmik ilalerlugu Naalakkersuisunut saqqummiunneqassaaq.

  § 10.  Naalakkersuisoqarfiup suliassaqarfimmut akisussaasup naalakkersuisoqarfimmik ataatsimik amerlanerilluunniit akornanni isumaqatigiinngitsoqarpat suliassaq Naalakkersuisuni suliarineqannginnerani Naalakkersuisunut ilaasortat tamarmik immikkut suliamik saqqummiiffigineqassapput.   Suli isumaqatigiinngitsoqarpat, naalakkersuisoqarfik suliassaqarfimmut akisussaasoq ataatsimoorussamik isummernissamut tunngavissiamik, isumaqatigiinngissutip imarisaanik allaaserinnittumik  suliaqassaaq.

  § 11.  Missingiut akuersissutigineqartussatut inassuteqaatitalik, Naalakkersuisut suna isummerfigissaneraat nassuiarlugu, akuersissutigineqartussap imarisai aningaasatigullu kingunerisassai eqqarsaatigalugit, Naalakkersuisunut saqqummiunneqassaaq. Aammattaaq erseqqarissumik takuneqarsinnaassaaq, naalakkersuisoqarfiup suliassaqarfimmut akisussaasup naalakkersuisoqarfiillu tusarneqartut ilaanni suli isumaqatigiinnginneqartoq, taamatullu takuneqarsinnaassaaq, oqartussaasunit, kattuffinnit il. il. malunnartumik akerliliissummik tigusaqartoqarsimappat.
  Imm. 2.  Taassuma saniatigut isummernissamut tunngavissiaq makkuninnga imaqassaaq.
1) Qulequtaq: Naalakkersuisut sumut qanoq isummissanersut ersarissumik nalunaarneqassaaq.
2) Inassuteqaatit: Inassuteqaat tassaavoq imarisamigut aningaasartamigullu tunngaveqartinneqartussaq, Naalakkersuisunit akuersaarneqarnissamik kissaateqarfiusoq. Taamaattumik inassuteqaat imarisamigut aningaasaqarnikkullu tamakkiisuutinneqartassaaq.
3) Aallaqqaasiut: Isummernissamut tunngavissiap siunertaa, tunngavigisaa, imarisaa Naalakkersuisullu politikkiannut ataqatigiissuteqarnera naatsumik allaaserineqassaaq.  Isummernissamut tunngavissiaq aalajangersimasumik missingiummik tunngaveqarpat, tamanna ilisimatitsissutigineqassaaq, suna pillugu suliassaq Naalakkersuisumit suliassaqarfimmut akisussaasumit nammineerluni aalajangiiffigineqarsinnaannginnersoq, soorlu assersuutigalugu pissutigalugu aalajangiineq suliassarpassuarnut allanut pingaaruteqalersussaammat, imaluunniit pissutigalugu allaffeqarfimmi najoqqutassanik aalajangersaasoqarsimanngimmat. 
4) Aningaasaqarnikkut sunniuteqaatissat: Aningaasaqarnikkut sulisorqarnikkullu sunniutaasinnaasut takussutissartaat. Tassannga takuneqarsinnaassaaq, ingerlatsinermut sanaartornermullu qinnuteqaatigineqartut aningaasaliissutit iluanni naammassinnaanersut, imaluunniit ilassutitut aningaasaliisoqarnissaanik qinnuteqartoqassanersoq. Pisumi kingullermi taaneqartumi naalakkersuisoqarfik taarsiullugu sipaarniutissanut siunnersuummik innersuussissaaq. Aammattaaq immikkoortoq taanna pillugu Aningaasaqarnermut Naalakkersuisoqarfiup tusarniaanermut oqaaseqaataata imarisai nalunaarutigineqassapput.
5) Atsiorneq: Isummernissamut tunngavissiaq Naalakkersuisumit pineqartumit naalakkersuisoqarfimmilu pisortamit imaluunniit naalakkersuisoqarfiup pisortaanut sinniisumit atsiorneqassaaq. 

  § 12.  Isummernissamut tunngavissiami inassuteqaat eqqorluartumik oqaasertaliorsimassaaq, imaqarniliami Naalakkersuisut aalajangiinerattut toqqaannartumik oqaluttuareqqinneqarsinnaassalluni.
  Imm. 2.  Aammattaaq nalunaarutigineqassaaq, aalajangerneq pillugu suliffeqarfimmi avataanilu soqutiginnittut atassuteqarfigineqassammata, tusagassiuutaasinnaapput, kiisalu nittartakkami tamanut saqqummiunneqassammat. Taamaattumik inassuteqaat paasissutissanik inunnut paasissutissanik mianersuuttariaqartunik  paasissutissalluunniit allanut oqaatigeqqusaanngitsut pillugit imaluunniit allatut iliorluni tamanut saqqummiussinissamut naleqqutinngitsunik imaqartinneqassanngilaq. Aalajangerneq tamanut saqqummiunneqassanngippat, tamanna isummernissamut tunngavissiami takuneqarsinnaassaaq. Taamaassappat § 21-imi aalajangersakkat malillugit isummernissamut tunngavissiaq ilusilerneqassaaq Naalakkersuisunullu taamaallaat agguaanneqassalluni.

  § 13.  Isummernissamut tunngavissiaq, missingiut Inatsisartut inatsisissaattut imaluunniit nalunaarutissaattut siunnersuummik imalik Naalakkersuisunut saqqummiunneqarnissaa sioqqullugu Inatsisinut Immikkoortortaqarfimmut inatsisinut periutsit atorlugit misissussavaa, tassanilu takuneqarsinnaassaaq, inatsisinut periutsit atorlugit misissuinermit oqaaseqaatit, takuuk aamma § 27, imm. 2.
  Imm. 2.  Nalunaarummut tassunga ilanngussaq isummernissamut tunngavissiap il. il. suliarineranut najoqqutassanik peqqissaarussanik imaqassaaq.

  § 14.  Pisuni immikkut ittuni Naalakkersuisut isummernissaannut tunngavissianut aamma ilisimatitsissutinut suleriaatsit aamma ilusissanut piumasaqaatit, takukkit §§ 11, 12 aamma 13 Naalakkersuisut Siulittaasuata akuersissuteqarneratigut, saneqqunneqarsinnaapput.


Kapitali 3
Aningaasaqarnermut Akileraartarnermullu Ataatsimiititaliamut suliassat

  § 15.  Suliassat, Aningaasaqarnermut Akileraartarnermullu Ataatsimiititaliamut ingerlateqqitassatut inassutigineqartut  suliassaqarfimmut naalakkersuisoqarfimmi Naalakkersuisumit  akuersissutigineqareerneranni piaartumik Aningaasaqarnermut Naalakkersuisoqarfimmut qarasaasiakkut allaganngorlugit nassiunneqassapput.

  § 16.  Isummernissamut tunngavissiaq, malitsigitillugu Aningaasaqarnermut Akileraartarnermullu Ataatsimiititaliamut akuersissutigisassatut saqqummiunneqartoq, missingersuutit pillugit inatsit aamma missingersuusiortarnermut malittarisassat naapertorlugit imatut ilusilersorneqassaaq:
l) Aallarniutitut paasissutissanik imaqartinneqassaaq, susassaqarfiup sorliup siunnersuut saqqummiunneraa, siunnersuutip qanoq iliuuseqarfigineqarnissaata suussusia, aningaasartuutit katinneqarnerat imaluunniit ukiumoortumik aningaasartuutit iliuuseqarfigineqarnissaanut kiisalu ukiumut aningaasaliiffiusussamut aningaasartuutit sunniuteqaatissaat. Aamma isertitani tamanna atorpoq.
2) Suliamik saqqummiussaqarneq atuisinnaanermut siunertarineqartoq pillugu peqqutaasumik atuisinnaanerullu immikkuualuttortaannut nassuiaammik imaqartinneqassaaq. Aammattaaq suliamik saqqummiussaqarneq aningaasartuutinut assigiinngitsunut assigiinngiiaartinneqassaaq kingornalu immikkut paasissutissanik piumasaqaateqartitsissalluni. Pissuseqataa isertitani atorpoq.
3) Aningaasaliissutit allanngortinnissaat pillugit inassuteqaatsinut aningaasanut inatsisissami atuisinnaanermut siunnersuutigineqartumut aningaasaliissuteqarnissap utaqqisinneqarsinnaannginneranut peqqutaasut nassuiaatigineqassapput.

  § 17.  Aningaasaliinissanut nutaanut allannguutinulluunniit suliassat Aningaasaqarnermut Akileraartarnermullu Ataatsimiititaliamut nassiunneqartinnagit tamatigut Naalakkersuisuni suliarineqaqqaartassapput.
  Imm. 2.  Suliaq Aningaasaqarnermut Akileraartarnermullu Ataatsimiititaliamut nassiunneqartussatut aalajangiunneqassappat, Naalakkersuisut Siulittaasuata Naalakkersuisoqarfianit ataatsimiinneq naammassineqarniariartoq allakkatigut nalunaarutigineqartoq tunngavigalugu atortussat kalaallisut danskisullu Aningaasaqarnermut Naalakkersuisoqarfimmut nassiunneqarnerat suliassaqarfiup qinnuteqartup isumagissavaa.   Tamatuma kingorna Aningaasaqarnermut Naalakkersuisup Naalakkersuisut sinnerlugit suliaq Aningaasaqarnermut Akileraartarnermullu Ataatsimiititaliamut nassiutissavaa.

  § 18.  Suliat Aningaasaqarnermut Akileraartarnermullu Ataatsimiititaliami isertuussassatut oqaluuserineqartussat, suliaq isertuussassatut suliarineqarnissaa sooq kissaatigineqarnersoq tassunga  tunngavilersuutigineqartoq allanneqassaaq.
  Imm. 2.  Isummernissamut tunngavissiaq isertuussassatut suliarineqassappat, tamanna Naalakkersuisunut isummernissamut tunngavissiaq qulequttami allanneqassaaq.  


Kapitali 4
Naalakkersuisunut ilisimatitsissutit

  § 19.  Naalakkersuisunut ilisimatitsissutit suliassaqarfimmi pineqartumi Naalakkersuisut ilaasortaannit naalakkersuisoqarfimmilu pisortamit ataatigut atsiorneqartassapput, qulequtserneqartassallutillu erseqqissumik naatsumillu, Naalakkersuisut sunik ilisimatinneqassanersut.  Aammali Naalakkersuisunut isummernissamut tunngavissiap ilusilersorneranut najoqqutassat malinneqassapput, takuuk § 11.
  Imm. 2.  Naalakkersuisut ataatsimiinnerinut oqaluuserisassanut ilisimatitsissutit ilanngunneqassapput ataatsimiinnermilu atortussat allat peqatigalugit agguaanneqassapput. Ataatsimiinnerni ilisimatitsissutit suliarineqassanngillat, kisianni Naalakkersuisut ataatsimiinnerinit imaqarniliani nalunaarutigineqassapput.
  Imm. 3.  Ilisimatitsissulli Naalakkersuisup pineqartup qinnuteqarneratigut imm. 2 apeqqutaatinnagu Naalakkersuisut ataatsimiinnerini suliarineqarsinnaavoq, ilisimatitsissut sammisanik imaattunik imaqassappat:
1) oqartussaaffeqarfik allamut attuumassuteqarpat,
2) naalakkersuinikkut aalajangiinerit pingaarnerit allannguuteqarnerannik imaqarluni,
3) kingusinnerusukkut aalajangiiffigisassatut Naalakkersuisunut saqqummiunneqassappat, imaluunniit
4) sammineqartup oqaluusereqqinneqarnissaanut isummanik atugassanik pissarsiniarnissaq siunertaralugu Naalakkersuisunut oqaluuserineqartussatut soqutiginaateqarpat.
  Imm. 4.  Sulianut ilisimatitsissutini oqaluuserineqartartuni imarisaannut tunngassuteqartuni aalajangiisoqarneq ajorpoq, aalajangiisoqarsinnaavorli suliaq Naalakkersuisunut isummernissamut tunngavissatut kingorna saqqummiunneqassappat.


Kapitali 5
Imaqarniliat

  § 20.  Naalakkersuisuni ataatsimiinnerni imaqarniliat suliami pineqartumi Naalakkersuisut aalajangiiffigisaat taamaallaat oqaatigineqartassapput.
  Imm. 2.  Naalakkersuisunut ilaasortap Naalakkersuisuni aalajangiineq isumaqataaffiginngikkuniuk, Naalakkersuisunut ilaasortap pineqartup tamanna naatsumik tunngavilersuutitalerlugu imaqarniliamut allanneqarnissaa piumasarisinnaavaa.
  Imm. 3.  Naalakkersuisup ataatsip Naalakkersuisut ataatsimiinneranni oqaatsitigut ilisimatitsissuteqarnissani kissaatigissagaluarpagu, taanna kisimi tunngavigineqassaaq, ilisimatitsinerup nalaani suliami paasissutissanik pingaaruteqartunik saqqummersoqassagaluarpat, imaluunniit Naalakkersuisuni suliarineqartariaqalerluni aalajangersimasumillu Naalakkersuisut taamatut imaqarniliornissamik aalajangiippata.
  Imm 4.  Naalakkersuisut Siulittaasuata Naalakkersuisoqarfia Naalakkersuisuni ataatsimeereernerni Naalakkersuisunut ilaasortanut, naalakkersuisut allattaannut, naalakkersuisoqarfinni  pisortanut kiisalu qitiusumik allaffeqarfimmi pisortanut imaqarniliamut missingiummik nassiussissaaq.  Missingiut Naalakkersuisut aalajangiiffigisaannik piviusunngortitsisarnissamut tunngaviliisinnaanngilaq. Imaqarniliamik akuerisaasumik suli saqqummersoqanngitsoq aalajangiinerup piviusunngortinneqarnissaa pisariaqartinneqassappat, imaqarniliamut missingiummi takuneqarsinnaasutut, Naalakkersuisup pineqartup aalajangiineq taamatut paasisimassagaa naalakkersuisoqarfiup pineqartup nakkutigissavaa.  
  Imm. 5.  Naalakkersuisut imaqarniliamik akuersissuteqarnerisa kingorna Naalakkersuisut ataatsimiinneranni imaqarniliaq agguaanneqassaaq.


Kapitali 6
Isertuussassaq

  § 21.  Naalakkersuisut isummernissaannut tunngavissiaq Naalakkersuisunilu ataatsimiinnermit imaqarniliat isertuulluinnarlugit oqaluuserineqartassapput.
  Imm. 2.  Ilanngussat isertuussassaapput, tamanna ilanngussani allassimasutut nalunaarneqarsimappat imaluunniit suliap isummernissamut tunngavissiamut ilisimatitsissummulluunniit atassuteqarnera allatigut takuneqarsinnaappat.
  Imm. 3.  Naalakkersuisunut isummernissamut tunngavissiaq taamaallaat Naalakkersuisuni ilaasortanuinnaq  agguaanneqarnissaa kissaatigineqarpat, tamanna isummernissamut tunngavissiami takuneqarsinnaassaaq. Isummernissamut tunngavissiap taamaallaat Naalakkersuisunut agguaanneqarnissaanut tamanna pingaarutilinnik peqquteqartinneqassaaq. Isummernissamut tunngavissiaq inunnut ataasiakkaanut paasissutissanik mianerisariaqartunik imaqarpat, isummernissamut tunngavissiaq Naalakkersuisuni  ilaasortanut taamaallaat agguaanneqartariaqarpoq.
  Imm. 4.  Isummernissamut tunngavissiat, takuuk imm. 1, ilanngussallu, takuuk imm. 2, paasissutissanik mianernartunik imaqartut, isummernissamut tunngavissiat isumaqatiginninniartarnernut piginnaatitaanermik imaqartut suliassallu assingusut Naalakkersuisunuinnaq kiisalu Naalakkersuisut Siulittaasuata Naalakkersuisoqarfiani allattoqarfimmut taamaallaat agguaanneqassapput. Isummernissamut tunngavissiat allat aamma naalakkersuisoqarfinni pisortaanernut aamma pisortanut kiisalu qiusumik allaffeqarfimmit naalakkersuisut allattaanut agguaanneqassapput, taakkunannga suliassanik tigusisut suliani pineqartuni tamarmik immikkut Naalakkersuisortik siunnersorsinnaassagaat ikiorsinnaassagaallu siunertaralugu.


Kapitali 7
Naalakkersuisunut ilaasortanut oqartussaaffeqarfiit

  § 22.  Naalakkersuisunut ilaasortat namminneq suliassaqarfimmik iluanni suliani aalajangersimasuni tamani Inatsisartut inatsisaat, landstingip inatsisai imaluunniit landstingip peqqussutai, kiisalu Namminersorlutik Oqartussat nalunaarutaat, imaluunniit allaffissornikkut suleriaatsimut najoqqutassatigut aalajangersakkat naapertorlugit aalajangerneqarsinnaasuni, Naalakkersuisut Siulittaasuata tamatumunnga akuersissuteqarneratigut, aalajangiinissamut piginnaatitaapput.
  Imm. 2.  Inatsisini aalajangersakkani aalajangersaasoqarsimapput, malittarisassanit immikkut ittumik akuersinissamut Naalakkersuisut periarfissaannut tapiutaasumik, Naalakkersuisunut ilaasortaq suliami aalajangersimasumi nalinginnaasumilluunniit suliani inatsimmut ilaasuni Naalakkersuisut sinnerlugit immikkut akuersissuteqarnermut aalajangiinissamut piginnaatitaavoq.
  Imm. 3.  Naalakkersuisup nalunaarummit immikkut akuerneqarnissaq pisariaqartikkuniuk, immikkut akuersissuteqarnissamut aalajangersagaq erseqqissumik imaqanngippat, Naalakkersuisoq pineqartoq Naalakkersuisuni aalajangiiffigisassamik  immikkut akuersissuteqarnissamik isummernissamut tunngavissiamik saqqummiussissaaq.
  Imm. 4.  Naalakkersuisoq isumaqaruni, suliaq aalajangersimasoq siunissami sulianut taamaattunut aalajangiinissamut immikkut tunngaviusoq pingaaruteqartoq, soorlu assersuutigalugu pissutigalugu immikkut akuersissuteqarsinnaanerup innuttaasunut allanut naleqqiullugu allaffissornermut sunniuteqarsinnaanera imaluunniit suliassaqarfiup iluani allaffissornikkut suleriaatsimik nutaamik aalajangersaanissamut pisariaqartitsisoqartutut isigineqarpat, imm. 2 apeqqutaatinnagu Naalakkersuisunut saqqummiunneqarsinnaavoq.  Naalakkersuisunut isummernissamut tunngavissiami taamaattunik pisoqaraangat, tunngaviusumik pingaarutilik pineqarpat, imaluunniit periaatsimik nutaamik aalajangersaanissaq kissaatigineqarpat, siunissami suliat assingusut imm. 2 naapertorlugu suliarineqassapput.

  § 23.  Aningaasaliissutinik missingersuutinut sunniuteqanngitsunik kontut pingaarnerit pigisallu tuniniarneqarnissaat pillugit inassuteqaatit akornanni nuussinerit pillugit suliat, aningaasaqarnermut inatsimmi oqaasertaliussat naapertorlugit Naalakkersuisut aalajangiiffigisinnaasaminnik peqarpat, tamanna Naalakkersuisunut saqqummiunneqartassanngilaq, suliassaqarfimmili pineqartumi Naalakkersuisumi Aningaasaqarnermut Naalakkersuisumut nassiunneqartassapput.
  Imm. 2.  Aningaasaqarnermut inatsimmi oqaasertaliussat naapertorlugit inassuteqaatinik aalajangiinissamut Naalakkersuisut sinnerlugit Aningaasaqarnermut Naalakkersuisoq piginnaatinneqarpoq.


Kapitali 8
Inatsisartunut suliat

Sulianik piareersaaneq

  § 24.  Inatsisartut Suleriaasianni aalajangersakkat malillugit Inatsisartut ataatsimiinneranni Naalakkersuisut suliariterusutatik Inatsisartut ataatsimiinnerata aallartinnissaa kingusinnerpaamik sapaatip akunnerinik tallimanik sioqqullugu Inatsisartut Siulittaasuannut Naalakkersuisut suliassat tunniutissavaat.

  § 25.  Siunnersuut sunaluunniit Naalakkersuisunit imaluunniit Naalakkersuisut Siulittaasuannit akuerineqaqqaartinnagu Inatsisartut Siulittaasuannut nassiunneqarsinnaanngilaq takuuk § 6, imm. 1. Ataatsimiinnernut ullormut oqaluuserisassanut Naalakkersuisunit atortussanut ilanngunneqareersunut taamatut atuuppoq.
  Imm. 2.  Naalakkersuisut Siulittaasuata Naalakkersuisoqarfiata Naalakkersuisunit ullormut oqaluuserisassat akuerineqartut tamakkerlugit nalunaarutiginninnermut allattorsimaffik takussutissartalik Inatsisartut Siulittaasuannut nassiutissavaa. Atortussat Inatsisartuni suliarineqarnissaannut nassiunneqarnissaat, ilusiliussamut piumasarineqartutut atuuttoq naapertorlugu Inatsisartut Allattoqarfiannut nassiunneri Naalakkersuisut sinnerlugit suliassaqarfiit akisussaaffigaat.

  § 26.  Naalakkersuisunut ilaasortat namminneq suliassaqarfimmik iluani Inatsisartut inatsisissaattut siunnersuutit, aalajangiiffigisassatut siunnersuutit nassuiaatillu nalunaarutigiumasatik pillugit isummernissamut tunngavissianik Inatsisartut ataatsimiilersinnagit Naalakkersuisunut nassiussissapput. Suliat nalunaarutigineqarnerani Naalakkersuisunut inassuteqaatit atortussanik naleqquttunik ilanngussiffigineqassapput.
  Imm. 2.  Naalakkersuisut Siulittaasuata Naalakkersuisoqarfiata Inatsisartut ataatsimiilinnginneranni sulianik piareersaanermut pilersaarut nassiuttassavaa, Inatsisartunut saqqummiussisoqarnissaa siunertaralugu Naalakkersuisunut saqqummiunneqartussaq.


Inatsisartut inatsisissaattut siunnersuutit

  § 27.  Inatsisartut inatsisissaattut siunnersuut Naalakkersuisuni suliarineqalersinnagu inaarutaasumik siunnersuut Inatsiseqarnermut Immikkoortortaqarfiup inatsisinut periutsit atorlugit misissoqqaassavaa.
  Imm. 2.  Naalakkersuisoqarfiup suliassaqarfimmut akisussaasup suliassaqarfinnut naalakkersuisoqarfiit Inatsisartullu Allattoqarfiata akornanni sapinngisamik isumaqatigiissuteqarluni Inatsisartut inatsisissaattut siunnersuut aamma Inatsisinut periutsit atorlugit misissuinermut Immikkoortortaqarfimmit Inatsisartut Allattoqarfiat aqqutigalugu misissorneqarnissaa qulakkiissavaa..


Siunnersuutit aningaasaqarnikkut sulisorisatigullu tunngassuteqartunik imaqartinneqartut

  § 28.  Aningaasaqarnikkut sulisorisatigullu kinguneqartussamik Naalakkersuisut siunnersuummik suliarinnilinnginneranni, Aningaasaqarnermut Naalakkersuisoqarfimmiit oqaaseqaammik pissarsiniartoqartassaaq.
  Imm. 2
.  Aningaasaqarnermut Naalakkersuisoqarfiup peqqissaartumik misissuinissaa qularnaarniarlugu, Naalakkersuisuni suliarineqarnissaanut piffissaq killiliussaq nallertinnagu kingusinnerpaamik sapaatit akunneri marluk qaangiutsinnagit siunnersuummut missingiut Aningaasaqarnermut Naalakkersuisoqarfimmut nassiunneqartassaaq. Naalakkersuisut siulittaasuat taassumaluunniit sinniisua, pissutsit immikkut ittut atuunnerini sapaatit akunneri marluk killissarititaasut sanioqqunnissaanut aalajangiisinnaavoq.


Saqqummiussinermut akissuteqaatinullu allakkat

  § 29. Inatsisartut inatsisissaattut siunnersuutinut saqqummiussisutit akissuteqaatillu, aalajangiiffigisassatut siunnersuutit apeqquteqaatillu aallaavigalugit oqallinnerit Naalakkersuisunit akuersissutigineqassapput.
  Imm. 2.  Siunnersuut Naalakkersuisut saqqummiussimasaat imaluunniit siullermeerinninnermi aappassaaneerinninnermilu Naalakkersuisunit tapersersorneqartut, Inatsisartuni amerlanerussuteqartut isumaqatigiissutigisaat siunnersuutillu aappassaaneerinninnissamut pingajussaaneerinninnissamullu ataatsimiititaliamik suliarineqaratik ingerlatseqqinneqartut, aappassaaneerinninnermi pingajussaaneerinninnermilu akissuteqarfigineqartassanngillat.
  Imm. 3.  Ataatsimiititalianut isumaliutissiissut akerliusoqanngitsumik inassuteqaatitalik imaluunniit amerlanerussuteqartut inassuteqaataannik imalik, Naalakkersuisut inassuteqaataannut naapertuuppat, Naalakkersuisuni akuerineqartussatut saqqummiunnagu, Inatsisartuni aappassaaneerneqarnerani pingajussaneerneraniluunniit akissuteqarfigineqarsinnaapput.


Akuersissuteqaatit allakkat

  § 30. Naalakkersuisut Siulittaasuata Naalakkersuisoqarfiata naalakkersuisoqarfinnut pineqartunut akuersissummi allakkiaq tunniutissavaa, tamatumani allassimassalluni, Inatsisartuni oqaluuserisassat sorliit Naalakkersuisunut akuersaarneqartutut ingerlanneqartussaq.
  Imm. 2.  Suliassaqarfimmut Naalakkersuisoqarfiup  allagaq akuersissutaasoq atortussat ilanngullugit Inatsisartunut saqqummiussassatut Naalakkersuisut akuerisaat ilanngullugu Inatsisartut Allattoqarfiannut tunniutissavaa. Inatsisartut Allattoqarfiata naalakkersuisoqarfimmi suliassaqarfiusumi suliap pineqartup allagaateqarfiani inissiiffiusumi allakkap akuersissutaasup tiguneqarnera uppernarsaatitalissavaa.

Naalakkersuisunut apeqqutigisatit

  § 31. Inatsisartut Suleriaasiat malillugu Inatsisartunut ilaasortaq § 37 naapertorlugu apeqquteqaammik taaneqartartukkut pisortat oqartussaaffia pillugu paasissutissanik piniarsinnaavoq.
  Imm. 2.  Apeqquteqaatigineqartut Inatsisartut Allattoqarfiata Naalakkersuisut Siulittaasuata Allattoqarfianut nassiutissavai, tamatuma kingorna naalakkersuisoqarfimmut attuumassuteqartumut akisassanngorlugu apeqqut ingerlateqqissavaa, akissutigineqartup ilusilersorneranut naalakkersuisoqarfiit sorliit tusarneqassanersut paasissutissartalerlugu.
  Imm. 3.  Inatsisartunut ilaasortamit apeqquteqaat saqqummiunneqartumut akissutigineqartoq § 37 naapertorlugu apeqquteqaammut akissutigineqartoq nalinginnaasumik allakkatut ilusilerneqassaaq. Allakkat Naalakkersuisumit suliassaqarfimmut akisussaasumit atsiorneqassapput Inatsisartullu Allattoqarfiat aqqutigalugu apeqquteqaateqartumut nassiunneqarlutik.
  Imm. 4.  § 37 naapertorlugu apeqqutinut akissuteqaatit sapinngisamik ullut suliffiusut qulit iluanni pisassaaq. Piffissaliussaq tamanna eqqortinneqarsinnaanngippat, Naalakkersuisumit suliassaqarfimmut akisussaasumit tunngavilersuutitalimmik,  sooq piffissaliussaq eqqortinneqannginnersoq, qaqugulu akissuteqaat naatsorsuutigineqarsinnaanersoq apeqquteqartoq allakkatigut nalunaarfigineqassaaq, nuutinneralu Inatsisartut Allattoqarfiannut.


Inatsisartuni ataatsimiitalianut kiisalu ataatsimiititalianik isumasioqateqartarnermi suliat

  § 32. Suliassat Inatsisartuni ataatsimiititalianukartut, matumani ilanngullugit suliat allat aningaasaliissuteqarnermut suliat eqqaassanngikkaanni Aningaasaqarnermut Akileraartarnermullu Ataatsimiititaliamukartut, Naalakkersuisumut suliassaqarfimmut akisussaasumit pineqartumit ataatsimiititaliamut nassiunneqassapput.


Inatsisartut inatsisaannik atortussanngortitsisarneq

  § 33.  Inatsisartut inatsisai atuutilersinniarlugit, Naalakkersuisut Siulittaasuannit atortussanngortinneqassapput.
  Imm. 2.  Ataatsimiinnerup naammassinerata kingorna Inatsisartut inatsisaannik akuersissutigineqartunik tamanik pappiaranngorlugit elektroniskkinngorlugillu Inatsisartut Allattoqarfiannit Inatsiseqarnermut immikkoortortaqarfik tigusaqassaaq. Tamanna pisinnagu allannguutissatut siunnersuutit tulluarsarlugit ilanngunnissai Inatsisartut akuersissutigisimasaat Inatsisartut Allattoqarfiata isumagissavaa.  Aningaasanulli inatsisit ilassutitullu aningaasaliinissamut inatsit Aningaasaqarnermut Naalakkersuisoqarfimmiit pissarsiarineqartassapput, Inatsisartut akuersissutigisaannik siunnersuutini allannguutinik suliaqartartussamit.
  Imm. 3.  Inatsiseqarnermut Immikkoortortaqarfiup inatsisit akuerineqartut atortussanngortitassat Naalakkersuisut Siulittaasuannut saqqummiutissavai.  Atortussanngortitsinerup kingorna Inatsisartut Naalakkersuisullu pillugit Inatsisartut inatsisaat aamma Inatsiseqarnermut immikkoortortaqarfimmi inatsisinut periutsinut najoqqutassat naapertorlugit nalunaarutiginninnissaq Inatsiseqarnermut immikkoortortaqarfiup isumagissavaa, takuuk § 34.


Kapitali 9
Namminersorlutik Oqartussani malittarisassanik suliaqarnermut najoqqutassat

  § 34.  Naalakkersuisut Siulittaasuata Naalakkersuisoqarfiata Namminersorlutik Oqartussani malittarisassanik suliarinnittarnerni nalinginnaasumik najoqqutassanik aalajangersassaaq. Inatsisartut Inatsisissaatut siunnersuutinik nalunaarutinillu suliarinnittarnermi najoqqutassat tamakku malinneqassapput.
  Imm. 2.  Naalakkersuisut Siulittaasuata Naalakkersuisoqarfia nalunaarutit suliarineqartarnerannut najoqqutassanik aalajangersaasinnaavoq, kingornatigut allannguutinik Inatsisartut inatsisaannut ilanngussilluni, taamatut Namminersorlutik Oqartussat inatsisit pillugit nittartagaanni Namminersorlutik Oqartussat malittarisassaat saqqummiussat nutaanik ilallugit ilanngunneqarsinnaapput.


Kapitali 10
Atuutilersitsineq

  § 35.  Nalunaarut una ulloq 10. november 2017-imi atuutilerpoq.
  Imm. 2.  Peqatigisaanik atorunnaarsinneqarput:
1) Naalakkersuisuni, ataqatigiissaarinermut ataatsimiititaliami ataatsimiinnerit pillugit kiisalu § 37 naapertorlugu apeqqutit akissuteqarfigineqartarnerat aamma Inatsisartuni suliassat il. il pillugit Kaajallaasitaq 24. februaari 2017-imeersoq.
2) Oqartussaasut sulisorisanut allaffissornikkut akisussaaffii piginnaatitaanerilu pillugit kaajallaasitaq tassungalu tunngasumik ilitsersuutitalik 16. januaari 2015-imeersoq.



Naalakkersuisut Siulittaasuata Naalakkersuisoqarfia ulloq 9.november 2017


Kim Kielsen

/

Søren Hald Møller


Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk