Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. 22, 24. juni 2020-imeersoq

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 1, imm. 2, Meeqqat tapersersorneqarnissaannut Inatsisartut inatsisaat nr. 20, 26. juni 2017-imeersumi § 8, imm. 6, § 11, imm. 5 aamma § 37, imm. 7, Inuit innarluutillit tapersersorneqarnissaannut Inatsisartut inatsisaat nr. 13, 12. juni 2019-imeersumi § 62, imm. 4, § 63, imm. 4, § 64, imm. 6, aamma § 68, imm. 4, aamma Utoqqarnik paaqqinniffiit il.il. pillugit Inatsisartut peqqussutaat nr. 11 ulloq 30. oktober 1998-imeersumi § 5, imm. 4 malillugit tullinnguuttut makku aalajangersarneqarput:

 

Kapitali 1 

Kommunalbestyrelsip ingerlatsineranik pingaarnertut nakkutilliineq

 

  § 1.  Naalakkersuisut qitiusumik nakkutilliinermik ingerlatsivia (Nakkutilliinermik ingerlatsivik) kommunalbestyrelsip ingerlatsineranik aamma inunnik isumaginninnermut inatsisinik aqutsineranik, matumani Meeqqat tapersersorneqarnissaannut Inatsisartut inatsisaannik, Inuit innarluutillit tapersersorneqarnissaannut Inatsisartut inatsisaannik, Utoqqarnik paaqqinniffiit il.il. pillugit Inatsisartut peqqussutaannik kiisalu pisortat ingerlatsineranni suliat suliarineqartarnerat pillugu inatsimmi aamma pisortat ingerlatsinerat pillugu inatsimmi malittarisassanik pingaarnertut nakkutilliisuussaaq.

 

  § 2.  § 1 malillugu pingaarnertut nakkutilliinermi pineqassapput:
1)  § 3 malillugu inatsisit,
2)  § 4 malillugu aningaasaqarneq, aamma
3)  § 3 malillugu isumaginninnermi suliassat suliarineqarnerisa pitsaassusiat. 
  Imm. 2.  Pingaarnertut nakkutilliineq makkuninnga imaqassaaq:
1)  suliassanik assigiinngiiaartunik misissuineq,
2)  inunnik ilisimaarinnittunik oqaloqateqarnerit, aamma
3)  ingerlatsiviup aaqqissuussaaneranik misissuineq.

 

  § 3.  § 2-mi, imm. 1-imi, nr. 1 aamma 3 malillugit inatsisilerinermut tunngasunik isumaginninnermilu suliassanik nakkutilliinermut ilaassapput ingerlatsiviup:
1)  maleruagassanik allassimasunik suleriaasiulersimasunillu malinninnera,
2)  nassuiaasarnera missiliuisarneralu
3)  suliamut paasissutissiinera, suliamik suliarinnittarnera naammagittaalliuutinillu suliaqarnera
4)  piginnaasatigut tutsuiginassutsikkullu ajornartorsiutinik suliarineqarnera, aamma
5)  imminut nakkutilliivigisarnera aamma aqutsinikkut nakkutilliinera.

 

  § 4. § 2, imm. 1, nr. 2 malillugu kommunip isumaginninnermik suliassaqarfimmi aningaasaqarnermik ingerlatsinera isumannaatsuunersoq inatsisinillu tunngaveqarnersoq aningaasaqarnermik nakkutilliinerup nalilissavaa.

 

  § 5.  § 1 malillugu Nakkutilliinermik ingerlatsivik kommunini ataasiakkaani tamani minnerpaamik ukiumut ataasiarluni pingaarnertut nakkutilliinermik ingerlatsisassaaq. 
  Imm. 2.  Nakkutilliinermik ingerlatsiviup nakkutilliinerminut atatillugu ukiut sisamakkaarlugit kommuninut qinigaaffiup iluani illoqarfiit tamaasa nakkutilliiartorfigisimassavaa.
  Imm. 3.  Nakkutilliinermik ingerlatsiviup nakkutilliinerminut atatillugu imm. 2-mi piffissap pineqartup iluani nammineq naliliinini malillugu nunaqarfiit assigiinngitsut nakkutilliiartorfigisimassavai.

 

  § 6.  § 1 malillugu pingaarnertut nakkutilliinissaq sapaatit akunneri 2 sioqqullugit kommunalbestyrelsimut kalerriutigineqassaaq.

 

Nakkutilliinermit nalunaarusiaq

 

  § 7.  § 1 malillugu Nakkutilliinermik ingerlatsivik pingaarnertut nakkutilliinerminit nalunaarusiamik suliaqartassaaq.  
  Imm. 2.  §§ 3-mi aamma 4-mi pissutsit tulleriiaarneqarsimasut misissuiffigineqarnerannik aamma isummerfigineqarnerannik nakkutilliinermit nalunaarusiaq imaqassaaq.

 

  § 8.  § 7 malillugu nakkutilliinermit nalunaarusiaq, inaarutaasumik nakkutilliinermit nalunaarusiap suliarineqannginnerani kommunalbestyrelsimullu nassiunneqannginnerani, minnerpaamik ulluni 14-ini kommunalbestyrelsimut tusarniutigineqassaaq.  
  Imm. 2.  Nakkutilliinermit nalunaarusiaq kingusinnerpaamik ullormi nakkutilliiffiusimasumit qaammatit pingasut qaangiunnerisa kingorna naammassillugu suliarineqareersimassaaq.
  Imm. 3.  Immikkut ittumik pisoqartillugu imm. 1-imi aamma 2-mi piffissaliussat avaqqunneqarsinnaapput.  
  Imm. 4.  Nakkutilliinermit nalunaarusiaq Naalakkersuisut nittartagaatigut tamanut saqqummiunneqassaaq. 
  Imm. 5.  Nakkutilliinermit inaarutaasumik nalunaarusiap kommunalbestyrelsimut nassiunneqarneraniit qaammatit marluk qaangiunnerini, kommunalbestyrelse pissutsit nakkutilliinermit nalunaarusiami uparuarneqartut iluarsiiffiginiarlugit, kommunalbestyrelse qanoq iliorniarnini pillugu Nakkutilliinermik ingerlatsivimmit allakkatigut nalunaarusiussaaq.

 

Kapitali 2

Kommunini meeqqat nalinginnaasumik inummut sammititamik nakkutilliivigineqarnerat

 

  § 9.  Meeqqat kommunimi atugaannik ingerlaavartumik nakkutilliinissaminut kommunalbestyrelse pisussaaffeqarpoq. Meeraq imaluunniit meeqqat eqimattat 18-it inorlugit ukiullit immikkut ikiorserneqarnissaminnik pisariaqartitsisinnaasut, kommunalbestyrelsimit ilisimaneqalernissaat anguniarlugu, kommunalbestyrelse sapinngisamik siusissukkut nakkutiginnittassaaq. 
  Imm. 2.  Kommunalbestyrelse imm. 1 malillugu nakkutilliineq naammassiniarlugu kommunip nunaqarfiinut tamarmiusunut ukiut tamaasa nakkutilliinermik ingerlatsisassaaq.

 

Kapitali 3

Meeqqanik angerlarsimaffiup avataanut inissinneqarsimasunik inummut sammititamik nakkutilliineq

 

  § 10.  Kommunalbestyrelse inissiisoq meeqqap inissinneqarsimasup inissinneqarfiani ukiumut marloriarluni inummut sammititamik nakkutilliisassaaq.
  Imm. 2.  Meeraq kommunimut allamut inissinneqarsimappat, kommunalbestyrelse inissiisuusoq kommunimilu inissiiffiusumi kommunalbestyrelse, kommunalbestyrelse inissiisoq sinnerlugu inissiiffimmi kommunalbestyrelse nakkutilliinermik ingerlatsinissaa pillugu isumaqatigiissuteqarsinnaapput. 
  Imm. 3.  Imm. 2 malillugu inummut sammititamik nakkutilliinissamik isumaqatigiissuteqartoqarsimappat, nalunaarummi matumani aalajangersakkat malillugit, nakkutilliisoqarnissaa kommunalbestyrelsip inissiisup akisussaaffigissavaa. 

 

  § 11.  § 10 malillugu inummut sammititamik nakkutilliineq, ima aaqqissuunneqassaaq, tassani meeqqamut iliuusissanut pilersaarut inissiiffiusumut malinnaatinneqassalluni, aamma meeqqap pisariaqartitaanut tunngatillugu tapersiinerup naammannera tulluartuuneralu ingerlaavartumik qulakkeerneqassalluni, makku ilanngullugit: 
1)  meeqqap inissinneqarfigisamini sumiginnarneqannginnissaa imaluunniit atornerlunneqannginnissaa, 
2)  meeqqap taassumalu angajoqqaavisa pisinnaatitaaffimminnik ilisimatinneqarnissaat, aamma
3)  meeqqap peqataaffigisaanik naammagittaalliortoqarsimappat, naammagittaalliuutip inernera, meeqqamut, angajoqqaatut oqartussaasunut kiisalu meeqqap sullissisuanut tunniunneqarnissaa.
  Imm. 2.  Meeqqat tapersersorneqarnissaannut Inatsisartut inatsisaanni § 30-mi, imm. 2-mi nr. 2 malillugu meeraq ulloq unnuarlu paaqqinniffimmut inissinneqarsimappat, nakkutilliinerup aamma qulakkiissavai:
1)  iliuusissanut pilersaarummi siunertarineqartut anguniagaasullu ulloq unnuarlu paaqqinniffiup katsorsaanissamik pilersaarusiaani naammassineqassasut,
2)  meeqqap inissinneqarsimasup pisariaqartitai ulloq unnuarlu paaqqinniffiup perorsaariaasiatigut ikorfartorneqassasut,
3)  ulloq unnuarlu paaqqinniffimmiit killiffimmik nalunaarusiornikkut aamma katsorsaanissamik pilersaarusianik nutarterisarnikkut ingerlaavartumik nalunaaruteqartoqartassasoq, aamma 
4)  pissaanermik atuisimanerit malitseqartinneqartassasut, pissaanermillu atuisimaneq pillugu nalunaarutit tunngavigalugit meeraq ulloq unnuarlu paaqqinniffimmi eqqortumik ikorfartorneqarnersoq naliliiffigineqartassasoq.

 

  § 12.  § 10 malillugu inummut sammititamik nakkutilliinermut atatillugu meeraq kommunalbestyrelsimit oqaloqatigineqartassaaq. 
  Imm. 2.  Meeqqamik oqaloqateqarneq, apeqqutaatinnagu meeraq ilaqutariinni paarsisartuni imaluunniit ulloq unnuarlu paaqqinniffimmi inissinneqarsimanersoq, inunnit inissiivimmeersunit najuuffigineqanngitsumik ajornanngippat ingerlanneqassaaq.
  Imm. 3.  Oqaloqatigiinnermi meeraq allanit illersoqqusinnaavoq. Tamanna pillugu kommunalbestyrelsip meeraq ilisimatissavaa. Meeqqap nammineq aalajangiisinnaatitaanini malillugu ilagisinnaavaa:
1)  meeqqanik illersuisoq isumaginninnermik ilisimasalik, imaluunniit
2)  oqaloqatigiinnissamut inuk alla.
  Imm. 4.  Imm. 3-mi. nr. 2 malillugu meeraq oqaloqatigiinnissamut inummik ilaqarniarpat, meeqqallu mianerineqarnissaanut tamanna naapertuutinngitsoq nalilerneqarpat, inuk pineqartoq kommunalbestyrelsimit oqarfigineqarsinnaavoq oqaloqatigiinnissamut peqataasinnaanngitsoq. Kommunalbestyrelse aalajangiippat inuk pineqartoq oqaloqatigiinnissamut peqataasinnaanngitsoq, oqaloqatigiinnissaq aallartitsinnagu meeqqanik illersuisoq isumaginninnermik ilisimasalik kommunalbestyrelsimit aggersarneqassaaq. Meeraq pillugu iliuusissanut pilersaarummi aalajangiineq allaganngorlugu kommunalbestyrelsimit tunngavilersorneqassaaq.
  Imm. 5.  Meeraq piginnaanikillisimappat, piginnaanikillisimanerullu kinguneranik oqaloqatigiinnissami ikiorneqarnissamik pisariaqartitsippat, meeqqap isumaata ilanngunneqarnissaa qulakkeerniarlugu tassunga kommunalbestyrelse immikkut ittumik isumaginnissaaq aamma tassunga atatillugu periaatsit atortorissaarutillu immikkut ittut tassani atorsinnaallugit.  
  Imm. 6.  Meeqqamik oqaloqatiginninneq immikkut ittumik pissuteqarluni pinngitsoortinneqarsinnaavoq, matumani meeqqap inerissimanera imaluunniit meeqqap mianerineqarnissaa pissutigalugu oqaloqatiginninnissaq naapertuutinngippat. Oqaloqatigiinnissap pinngitsoortinneqarnera meeraq pillugu iliuusissanut pilersaarummi allaganngorlugu tunngavilersorneqassaaq.

 

  § 13.  § 10 malillugu kommunalbestyrelse inummut sammititamik nakkutilliinerminut atatillugu piffimmi inissiiffiusumi pissutsinik ernumanartunik maluginiagaqarpat, meeraq imaluunniit meeqqat piffimmi inissiiffiusumiittut pissutsinik ernumanartunik sunnerneqarsinnaappata, oqartussaqarfimmut ingerlatsinermut sammititamik nakkutilliinissamik suliaqarnissaminut akisussaatitaasumut kiisalu kommunalbestyrelsinut inissiisimasunut, kommunalbestyrelse nalunaaruteqassaaq.

  § 14.  Meeqqap ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat, kommunalbestyrelsip meeraq ingerlaannartumik peersissavaa uku pissutigalugit: 
1)  meeqqap naammanngitsumik isumassorneqarnera ajortumilluunniit pissusilersorfigineqarnera,
2)  timikkut tarnikkulluunniit nakuuserfigineqarsimanera, paarinerlutaasimanera imaluunniit kinguaassiuutitigut atornerlunneqarsimanera,
3)  meeqqami imaluunniit meeqqap qanigisaani atornerluinermik ajornartorsiuteqartoqarnera, pinerluttutut pissuseqartoqarnera imaluunniit allatigut inuuniarnikkut annertuunik ajornartorsiuteqartoqarnera, imaluunniit
4)  meeraq pissusilersornermigut annertuumik ajornartorsiuteqarpat sungiussiniarnerminiluunniit ajornartorsiuteqarpat.

 

Kapitali 4

Ilaqutariinnik paarsisartunik ingerlatsinermut sammititamik nakkutilliineq

 

  § 15.  Ilaqutariinnut paarsisartunut kommunalbestyrelsip akuersissummik tunniussiffigisimasaminut, kommunalbestyrelse ukiumut 1-luni ingerlatsinermut sammititamik nakkutilliisassaaq. Paarsisinnaanermut akuersissummut aamma ilaqutariittut paarsisartutut akuersissummut tunniunneqarsimasunut piumasaqaatit ilaqutariinnit paarsisartunit suli naammassineqarsinnaanerat nakkutilliinerup qulakkiissavaa.  
  Imm. 2.  Ilaqutariittut paarsisartutut akuersissut piumasaqaatitaqartumik tunniunneqarsimappat, piumasaqaatit eqqortinneqarnersut kommunalbestyrelsip nakkutilliinermini misissussavaa.  
  Imm. 3.  Kommunalbestyrelsip ingerlatsinermut sammititamik nakkutilliinermini ilaqutariinni paarsisartuni pissutsit nakkutigalugillu ilaqutariit paarsisartut oqaloqatigissavai.  
  Imm. 4.  Kommunalbestyrelsip ingerlatsinermut sammititamik nakkutilliinermini: 
1)  ilaqutariit paarsisartut nalunaaqqaarluni nakkutilliiartorfigisassavai, 
2)  ilaqutariit paarsisartut paasissutissanik naleqquttunik piniarfigisassavai, aamma
3)  meeqqat ilaqutariinni paarsisartuni inissinneqarsimasut paasissutissanik naleqquttunik piniarfigisassavai.
  Imm. 5.  Imm. 4, nr. 1 malillugu kommunalbestyrelsip nalunaaqqaarluni nakkutilliiartortarnermi saniatigut ilaqutariit paarsisartut nalunaarfigeqqaarnagit aamma nakkutilliiartorfigisinnaavai. 

 

  § 16.  § 15 malillugu ingerlatsinermut sammititamik nakkutilliineq ima ingerlanneqassaaq, nakkutilliineq assigiiaartumik, ataqatigiissillugu aaqqissuussaasumik uppernarsaasersorluakkamillu ilaqutariit paarsisartut aamma paarsinerminnut suliarinnittarnerat pillugu nalilersuinissamut tunngavissiissalluni. 
  Imm. 2.  Inunnit suliamut tunngassuteqartut ataqatigiinnissaannik paasinnissinnaanissamut tunngavissaqartunit, tamannalu tunngavigalugu ilaqutariinnut paarsisartunut unammillernartitaannik ineriartornissamullu periarfissaannik taakkununnga nalunaaruteqarsinnaasunit, nakkutilliineq ingerlanneqassaaq.  
  Imm. 3.  Siusinnerusukkut nakkutilliinermit nalunaarusiaasimasuni oqaaseqaatit inassuteqaatillu aaqqissuussaasumik malitseqartinneqartarnissaat kommunalbestyrelsip nakkutilliinermut atatillugu qulakkiissavaa.

 

  § 17. § 15 malillugu ingerlatsinermut sammititamik kommunalbestyrelsip nakkutilliinissaanut paasissutissat pisariaqartinneqartut, qinnuigineqarneq malillugu ilaqutariinnit paarsisartunit kommunalbestyrelsimut tunniunneqassapput.

  Imm. 2.  Ilaqutariinnit paarsisartunit paasissutissanik kommunalbestyrelsimut  ingerlatitseqqinneq, ingerlatitseqqinneq nakkutilliinissamut pisariaqartutut isigineqarpat, angajoqqaatut oqartussaassuseqartut akuersiteqqaarnagit pisinnaavoq.

 

  § 18.  § 15 malillugu kommunalbestyrelse ingerlatsinermut sammititamik nakkutilliinerminut atatillugu ilaqutariinni paarsisartuni pissutsinik ernumanartunik maluginiagaqarpat, meeraq pissutsinik ernumanartunik sunnerneqarsinnaappat, kommunalbestyrelsimut inissiisimasumut kommunalbestyrelse nalunaaruteqassaaq.

 

  § 19.  Meeqqap ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat, uku pissutigalugit kommunalbestyrelsip meeraq ingerlaannartumik piissavaa:

1)  meeqqap amigartumik isumassorneqarnera imaluunniit passunneqarnera,

2)  timikkut tarnikkulluunniit nakuuserfigineqarsimanera, paarinerlunneqarnera imaluunniit kinguaassiuutitigut atornerlunneqarsimanera,

3)  meeqqami imaluunniit meeqqap qanigisaani atornerluinermik ajornartorsiuteqartoqarnera, pinerluttutut pissuseqartoqarnera imaluunniit allatigut inuuniarnikkut annertuunik ajornartorsiuteqartoqarnera, imaluunniit

4)  meeqqap allatigut pissusilersornermini naleqqussarnerminiluunniit ajornartorsiuteqarnera.

  Imm. 2.  Imm. 1 malillugu meeqqamik peersitsinerminut atatillugu, inoqutigiinni meeqqat allat arlaatigut iliuuseqarfigineqassanersut kommunalbestyrelsip nammineerluni isummerfigissavaa, matumani meeqqat pineqartut ingerlaannartumik peerneqassanersut imaluunniit ilaqutariinni paarsisartuni najugaqartinneqaannassanersut ilanngullugit.

  Imm. 3.  Kommunalbestyrelsip ingerlatsinermut sammititamik nakkutilliisuusup aamma utaqqiisaa kommunalbestyrelse inissiisoq sinnerlugu meeqqamik peersitsisup, kommunalbestyrelse inissiisoq ingerlaannaq nalunaarfigissavaa. Matuma kingorna kommunalbestyrelse inissiisoq imm. 1 malillugu inaarutaasumik aalajangiissaaq.

 

  § 20.  Ilaqutariit paarsisartut inoqutigiinniluunniit allat aanngajaarniutinik inerteqqutaasunik atuisuusut kommunalbestyrelsip pasitsaappagu, § 15 malillugu kommunalbestyrelse pissutissaqanngitsumik uninnganani ingerlatsinermut sammititamik nakkutilliiartussaaq.

 

  § 21. § 15 malillugu ingerlatsinermut sammititamik nakkutilliinermut atatillugu kommunalbestyrelse aanngajaarniutinik inerteqqutaasunik atuisoqarneranik pasitsaassaqaruni inoqutigiinni ataaseq arlallilluunniit aanngajaarniutinik atuisuunersut paasiniarlugu misissorneqarnissaannik qinnuigisinnaavai.

  Imm. 2.  Imm. 1 malillugu aanngaajaarniutinik atuisuunermik misissuisoqartinnagu, inuk aanngaajaarniutinik atuisuunermut misissuiffigineqartussaq kommunalbestyrelsimit allaganngorlugu akuersisinneqassaaq. Akuersissuteqarneq pinngitsaaliissutaassanngilaq erseqqissuussallunilu.

  Imm. 3.  Imm. 2 malillugu inuup inoqutigiinniittup aanngajaarniutinik atuisuunermik misissorneqarnissamik akuersaarumanngippat, § 23 malillugu kommunalbestyrelse annertusisamik nakkutilliinermik ingerlatsisinnaavoq, imaluunniit Ilaqutariit paarsisartut pillugit Namminersorlutik Oqartussat nalunaarutaanni § 8 malillugu ilaqutariinnut paarsisartunut akuersissummik utertitsisinnaavoq.

  Imm. 4.  § 15 malillugu ingerlatsinermut sammititamik nakkutilliinermut atatillugu imaluunniit allatigut pasitsaassisoqarpat, ilaqutariit paarsisartut arlaat imaluunniit inoqutigiinni alla aanngaajaarniutinik inerteqqusaasunik atuisuusoq, kommunalbestyrelse ilaqutaannik paarsisartunik ingerlatsinermut sammititamik nakkutilliisuusoq, § 15 malillugu ingerlaannaq kommunalbestyrelsimut inissiisimasumut nalunaaruteqassaaq. Matuma kingorna § 10 malillugu kommunalbestyrelse inissiisoq pissutissaqanngitsumik uninnganani inummut sammititamik nakkutilliinermik ingerlatsinissaminut pisussaaffeqarpoq.

 

  § 22.  Ilaqutariit paarsisartut pillugit Namminersorlutik Oqartussat nalunaarutaanni § 5, imm. 2, nr. 10 malillugu kommunalbestyrelsip ilaqutariit peqqissussaannik naliliinerminut atatillugu, inoqutigiinni inuk ataaseq imaluunniit amerlanerusut peqqissutsimut uppernarsaammik tunniusseqqullugit qinnuigisinnaavai. Peqqissutsimut uppernarsaat qaammatit pingasut sinnerlugit pisoqaassuseqassanngilaq.

 

Annertusisamik nakkutilliineq

 

  § 23.  Immikkut nassuiakkamik sakkortusisamik nakkutilliisoqarnissaa pisariaqartinneqartoq kommunalbestyrelsimit nalilerneqarpat, kommunalbestyrelse annertusisamik nakkutilliisoqarnissaanik aalajangiisinnaavoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattorli piffissaq annerpaamik qaammatinik 3-nik sivisussuseqartukkuutaartinneqassalluni. 
  Imm. 2.  Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.
  Imm. 3.  Annertusisamik nakkutilliineq makkuninnga pissuteqarsinnaavoq:
1)  ilaqutariit paarsisartut ajornartorsiutaat immikkut ittut nalinginnaasulluunniit misissoqqinneqarnissaat pisariaqartoq, nakkutilliinermit nalunaarusiami inerniliunneqarpat,
2)  ilaqutariit paarsisartut pillugit naammagittaalliortoqarpat,
3)  meeraq paarineqartoq pillugu imaluunniit meeqqamut sunniisinnaasunik pissutsinik ernumassuteqarnissamik ilimasulersitsisunik, nalinginnaasumik imaluunniit immikkut ittumik kommunalbestyrelse ilaqutariinni paarsisartuni maluginiagaqarpat, imaluunniit 
4)  paarsisinnaanermut akuersissut malillugu ilaqutariittut paarsisartuunissamut imaluunniit paarsisinnaanermut akuersissummut piumasaqaatit suli naammassineqarsinnaanerinik ilaqutariinni paarsisartuni pissutsit aalajangersimasut pissutigalugit qularneq.
  Imm. 4.  Pissutsit annertusisamik nakkutilliinissamik eqqarsaateqarnermut tunngaviusut pillugit ilaqutariit paarsisartut oqaloqatigineqareernerisigut, taamaallaat annertusisamik nakkutilliisoqarnissaanik aalajangiisoqarsinnaavoq. Pissutsilli immikkut ittut pisariaqartilerpassuk annertusisamik nakkutilliisoqarnissaa erngerluni aalajangerneqarsinnaavoq. 
  Imm. 5.  Ilaqutariit paarsisartut pissutsinik aalajangiinermut tunngaviusunik aaqqiisinnaanerat aaqqeerusunnerallu ilimanaateqarsorineqarpat, annertusisamik nakkutilliisoqarnissaanik taamaallaat aalajangiisoqarsinnaavoq. Ilaqutariit paarsisartut pillugit Namminersorlutik Oqartussat nalunaarutaanni § 8 malillugu ilaqutariit paarsisartut pissutsinik ernumanartunik aaqqiisinnaanerat aaqqeerusunnerallu naatsorsuutigineqanngippat, ilaqutariinnut paarsisartunut akuersissutip utertinneqarnissaa kommunalbestyrelsip aalajangissavaa.
  Imm. 6.  Kommunalbestyrelse annertusisamik nakkutilliisoqarnissaanik aalajangiisimappat kommunalbestyrelsit inissiisuusut kommunalbestyrelsimit ilisimatinneqassapput.

 

Nakkutilliinermit nalunaarusiaq

 

  § 24.  § 15 aamma § 23 malillugit ingerlatsinermut sammititamik nakkutilliinerit tamaasa nakkutilliinermit nalunaarusiamik kommunalbestyrelse suliaqartassaaq.
  Imm. 2.  Nakkutilliinermit nalunaarusiami tulliuttut ilisimasaat isumaallu  kommunalbestyrelsimit ilanngunneqartassapput:
1)  ilaqutariit paarsisartut, matumani nammineq meeraat angerlarsimaffimmi najugaqartut, inuillu allat inoqutigiinni ilaasut ilanngullugit, aamma
2)  meeraq paarineqartoq meeqqamullu paarineqartumut angajoqqaatut oqartussaasut.
  Imm. 3.  Nakkutilliinermit nalunaarusiami paasissutissat tulliuttut saqqummiunneqassapput:  
1)  Ulloq nakkutilliiffiusoq.  
2)  Kina nakkutilliinermik ingerlatsisimanersoq. 
3)  Nakkutilliineq nalunaarutigeqqaarneqarsimanersoq imaluunniit nalunaarutigeqqarneqarsimannginnersoq.  
4)  Nakkutilliinermut tunngaviusoq.  
5)  Nakkutilliiartortoqannginnerani kommunalbestyrelse paasissutissanik sunik piniarsimanersoq.
6)  Nakkutilliinerminut atatillugu kommunalbestyrelse kikkunnik oqaloqateqarsimanersoq. 
7) Ilaqutariit meeqqanik qassinik paarisaqarnersut kiisalu meeqqat qassinik ukioqarnersut meeqqallu tapersersorneqarnissamik pisariaqartitaat.
8)  Nakkutilliinermi maluginiarneqartut suuneri. 
9)  § 21 malillugu aanngajaarniutinik atuisuunermik misissuisoqarsimappat, misissuinerup inerneri. 
10)  Ilaqutariit paarsisartut ilaqutariittut paarsisartutut akuersissummi piumasaqaatinik eqquutitsinerannik naliliineq.
11)  Nakkutilliisoqarnerata malitsigisaanik qisuariartoqarsimappat qisuariaatit, matumani annertusisamik nakkutilliisoqarnissaanik aalajangiineq, ilaqutariittut paarisartutut akuersissutip utertinneqarnissaanik aalajangiineq aamma paasissutissanik kommunalbestyrelsimut kommunalbestyrelsinulluunniit meeqqap ilaqutariinnut paarsisartunut inissinneqarnissaanik aalajangiisimasunut ingerlatitseqqissimaneq ilanngullugit.
  Imm. 4.  Nakkutilliinermit nalunaarusiaq ilaqutariinnut paarsisartunut ulluni 14-ini tusarniaanermut akissuteqarnissaannut piffissalerlugit tusarniaassutigineqassaaq. Inaarutaasumik nakkutilliinermit nalunaarusiap assilinera ilaqutariinnut paarisartunut nassiunneqassaaq.
  Imm. 5.  Immikkut ittumik pisoqartillugu, imm. 4-mi piffissaliussaq avaqqunneqarsinnaavoq.

 

  § 25.  § 24 malillugu kommunalbestyrelsip nakkutilliinermit nalunaarusiami ilanngullugit allassinnaavai:
1)  paasineqarsimasut paasissutissiissutaasimasullu pillugit oqaaseqaatit, aamma 
2)  pissutsit iluarsineqartariaqartut iliuuseqarfigineqartariaqartullu pillugit innersuussutit.
  Imm. 2.  Imm. 1 malillugu oqaaseqaatit innersuussutilluunniit ilaqutariit paarsisartut oqaloqatigineqareerneratigut suliarineqartassapput, aamma pissutsit aalajangersimasut oqaaseqaateqarnermut imaluunniit innersuussuteqarnermut tunngaviusut qanoq pitsaanerulersinneqarnissaannut imaluunniit aaqqiiffigineqarsinnaanerannut ilitsersuummik imaqassallutik.

 

Kapitali 5

Meeqqanut ulloq unnuarlu paaqqinniffinnik ingerlatsinermut sammititamik nakkutilliineq

 

  § 26.  Meeqqat tapersersorneqarnissaannut Inatsisartut inatsisaanni § 34-mi, imm. 1 malillugu meeqqanut ulloq unnuarlu paaqqinniffinni, matumani meeqqanut ulloq unnuarlu paaqqinniffiit immikkoortortaat isumannaallisakkat ilanngullugit, Nakkutilliinermik ingerlatsivik ingerlatsinermut sammititamik nakkutilliissaaq. Ulloq unnuarlu paaqqinniffiup pitsaassusissamik attassiinnarnissaa akuersissummilu piumasaqaatinik naammassinnittuarnissaa, kiisalu ulloq unnuarlu paaqqinniffiup Naalakkersuisullu akornanni ingerlatsinissamut tunngatillugu isumaqatigiissutip naammassineqarnissaa, nakkutilliinerup qulakkiissavaa. 
  Imm. 2.  Ingerlatsinermut sammititamik nakkutilliinermut atatillugu, Nakkutilliinermik ingerlatsivik ulloq unnuarlu paaqqinniffimmi pissutsit misissorlugillu ulloq unnuarlu paaqqinniffimmi sulisunik oqaloqateqartassaaq. 
  Imm. 3.  Nakkutilliinermik suliassamik isumaginninnermini Nakkutilliinermik ingerlatsivik ulloq unnuarlu paaqqinniffimmut nalunaaqqaarluni nakkutilliiartortassaaq, paasissutissanillu ulloq unnuarlu paaqqinniffimmit pissarsisassalluni.
  Imm. 4.  Imm. 3 malillugu nalunaaqqaarluni nakkutilliiartortarnerup saniatigut taamatuttaaq nalunaaqqaarani Nakkutilliinermik ingerlatsivik ulloq unnuarlu paaqqinniffimmut nakkutilliiartorsinnaavoq.  
  Imm. 5.  Imm. 1 malillugu nakkutilliineq toraagalimmik nakkutilliinertut ingerlanneqassaaq, tassani suliassaqarfiit toqqakkat taamaallaat ukkatarineqassallutik.

 

  § 27.  § 26 malillugu ingerlatsinermut sammititamik nakkutilliineq ima ingerlanneqassaaq, assigiiaamik, ataqatigiissillugu aaqqissuussinermut tunngasumik uppernarsaaserluakkamik ulloq unnuarlu paaqqinniffiup kiffartuussissutaanik inissatigullu killiliussaanut, kiisalu ulloq unnuarlu paaqqiffiup suliassaminik suliarinninnerminut periaasaata nalilersuiffigineqarnissaanut tunngavissiissalluni.
  Imm. 2.  Inunnit suliamut tunngassuteqartunut, aaqqissuussaanerup aningaasaqarnerullu ataqatigiinnissaannik paasinnissinnaanissamut tunngavissaqartunit, tamannalu tunngavigalugu ulloq unnuarlu paaqqinniffimmut unammillernartitanik ineriartornissamullu periarfissanik nalunaaruteqarsinnaasunit, nakkutilliineq ingerlanneqassaaq.
  Imm. 3.  Nakkutilliinermut atatillugu Nakkutilliinermik ingerlatsiviup ulloq unnuarlu paaqqinniffimmi aqutsisut, sulisut meeqqallu inissinneqarsimasut oqaloqatigalugit peqataatittassavai. Nakkutilliinermut atatillugu meeqqanut angajoqqaatut oqartussaassuseqartut aamma ulloq unnuarlu paaqqinniffiup suleqatigisai oqaloqatigalugit peqataatinneqassapput. 
  Imm. 4.  Nakkutilliinermut atatillugu siusinnerusukkut nakkutilliinermit nalunaarusiaasimasuni oqaaseqaatit, inassuteqaateqarsimappallu inassuteqaatit peqqussutillu, aaqqissuussaasumik malitseqartinneqartarnissaat Nakkutilliinermik ingerlatsiviup qulakkiissavaa.

 

  § 28.  § 26 malillugu ingerlatsinermut sammititamik nakkutilliinerup makku imarissavai:
1)  Meeqqat ilinniarnissamut sulinissamullu periarfissaat.
2)  Meeqqat nammineersinnaalernissaminnut periarfissaat aamma ilaquttaminnut attaveqarfigisaminnullu atassuteqarnissaannut ikorfartorneqarnerat. 
3)  Ulloq unnuarlu paaqqinniffiup sullinniagai, matumani ulloq unnuarlu paaqqinniffiup sullinniakkaminut neqeroorutigisaata imarisai kiisalu meeqqat inuunerminnut sunniuteqaqataanerat ilanngullugit.
4)  Ulloq unnuarlu paaqqinniffiup periaasii angusaalu, matumani perorsaanikkut, tarnip pissusai pillugit imaluunniit ilaqutariit peqqissarneqarnerannut suleriaatsit ilanngullugit.
5)  Ulloq unnuarlu paaqqinniffiup aaqqissuussaanera aqunneqarneralu.
6)  Ulloq unnuarlu paaqqinniffiup sulisoqarnikkut piginnaasai.
7)  Ulloq unnuarlu paaqqinniffiup aningaasaqarnera, matumani kukkunersiuisumit akuerisaasumit naatsorsuutit kukkunersiorneqarsimanersut ilanngullugit. 
8)  Ulloq unnuarlu paaqqinniffimmi inissatigut atugassarititaasut, matumani sullinniakkat pisariaqartitaannut aamma ulloq unnuarlu paaqqinniffiup periaasaanut naapertuunnersut ilanngullugit.
  Imm. 2.  Sammineqartut tamarmik arlalinnik attuumassuteqartunik aalajangiinermut tunngavilersuutinik itisilerneqassapput, katillugit ulloq unnuarlu paaqqinniffiup naleqquttumik paasisimasaqassusaanik takutitsisumik.

 

  § 29.  Ulloq unnuarlu paaqqinniffiup ileqqoreqqusamini piumasaqaatinik naammassinninnersoq Nakkutilliinermik ingerlatsiviup nakkutigissavaa.

 

  § 30.  § 26 malillugu Nakkutilliinermik ingerlatsivimmit qinnuigineqarnermigut ulloq unnuarlu paaqqinniffik, paasissutissanik ingerlatsinermut sammititamik nakkutilliinissamut pisariaqartinneqartunik, Nakkutilliinermik ingerlatsivimmut tunniussissaaq. 

  Imm. 2.  Paasissutissanik ingerlatitseqqinneq nakkutilliinerup ingerlanneqarnissaanut pisariaqartutut isigineqarpat, ulloq unnuarlu paaqqinniffimmit paasissutissanik Nakkutilliinermut ingerlatsivimmut ingerlatitseqqinneq, meeqqat angajoqqaatut oqartussaasui akuersiteqqaarnagit pisinnaavoq.

 

  § 31.  Nakkutilliinermik ingerlatsivik ulloq unnuarlu paaqqinniffimmi pissutsinik ernumanartunik maluginiagaqarpat, meeraq imaluunniit meeqqat pissutsinik ernumanartunik sunnerneqarsinnaappata, Nakkutilliinermik ingerlatsivik isumaginninnermut aqutsisoqarfimmut aamma kommunalbestyrelsinut inissiisimasunut nalunaaruteqassaaq.

 

  § 32.  Meeqqap ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat, Nakkutilliinermik ingerlatsivik kommunalbestyrelsimut inissiisuusimasumut erngerluni nalunaaruteqassaaq, uku tunngavigalugit:

1)  meeqqamik amigartumik isumassuineq passussinerluunniit,

2)  timikkut tarnikkulluunniit nakuuserfigineqarsimappat, paarinerlunneqarpat kinguaassiutitigulluunniit atornerlunneqarsimappat,

3)  meeqqami atornerluinermik ajornartorsiutit, pinerluttutut pissusilersornerit imaluunniit allatigut annertuunik pissusilersornikkut naleqqussarniarnikkulluunniit ajornartorsiutit pillugit naammaginanngitsumik suliarinnittoqarpat.

  Imm. 2. Pissutit imm. 1-imi pineqartut pillugit meeraq inissinneqarsimasoq naammagittaalliorsimasoq nalunaarutiginnissimasorluunniit Nakkutilliinermik ingerlatsiviup nakkutilliinermini allatigulluunniit tusaruniuk, naammagittaalliorsimaneq nalunaarutiginnissimanerluunniit ingerlateqqinneqarsimanersoq, Nakkutilliinermik ingerlatsiviup misissussavaa.

 

Peqqussutit

 

  § 33.  Nakkutilliinermik ingerlatsivik ulloq unnuarlu paaqqinnittarfimmut peqqussutinik tunniussisinnaavoq. Peqqussutip eqquutinneqarnissaanut piffissaliussamik Nakkutilliinermik ingerlatsivik aalajangersaasinnaavoq.
  Imm. 2.  Pissutsit peqqussuteqarnissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut peqqussuteqarnissamik taamaallaat aalajangiisoqarsinnaavoq. Pissutsilli immikkut ittut pisariaqartilerpassuk peqqussuteqarnissaq ingerlaannartumik aalajangerneqarsinnaavoq.
  Imm. 3.  Ulloq unnuarlu paaqqinniffiup pissutsinik aalajangiinermut tunngaviusunik aaqqiissuteqarsinnaanera aaqqiissuteqarusunneralu pissutissaqartumik ilimagineqarpat, peqqussuteqarnissamik taamaallaat aalajangiisoqarsinnaavoq. 
  Imm. 4.  Imm. 1 malillugu peqqussummik eqquutsitsinissaq ulloq unnuarlu paaqqinniffiup akuersissummik peqaannarnissamut piumasaqaatinngortinneqarsinnaavoq.
  Imm. 5.  Ulloq unnuarlu paaqqinniffik imm. 1 malillugu peqqussutinik eqqortitsisinnaanngippat eqqortitserusunngippalluunniit, ulloq unnuarlu paaqqinniffimmut akuersissutip utertinneqarnissaa naalakkersuisoqarfiup isumaginninnermut akisussaasuusup, Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat malillugu aalajangersinnaavaa.
  Imm. 6.  Ulloq unnuarlu paaqqinniffiup akuersissummik peqaannarnissaanut piumasaqaatinngortinneqarsimasumik imm. 4 malillugu Nakkutilliinermik ingerlatsivik peqqussuteqarpat, tamanna pillugu kommunalbestyrelsinut inissiisuusut Nakkutilliinermik ingerlatsivik ilisimatitsissaaq. 

 

Annertusisamik nakkutilliineq

 

  § 34.  Immikkut nassuiakkamik sakkortusisamik nakkutilliisoqarnissaa pisariaqartinneqartoq nalilerneqarpat, Nakkutilliinermik ingerlatsivik annertusisamik nakkutilliisoqarnissaanik aalajangiisinnaavoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattorli piffissaq annerpaamik qaammatinik 3-nik sivisussuseqartukkuutaartinneqassalluni. 
  Imm. 2.  Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.  
  Imm. 3.  Annertusisamik nakkutilliineq makkuninnga pissuteqarsinnaavoq:
1)  ulloq unnuarlu paaqqinniffiit ataasiakkaat ajornartorsiutaat immikkut ittut nalinginnaasulluunniit misissoqqinneqarnissaat pisariaqartoq, nakkutilliinermit nalunaarusiaq inerniliippat,
2)  ulloq unnuarlu paaqqinniffik naammagittaalliutigineqarsimappat,
3)  ulloq unnuarlu paaqqinniffimmi Nakkutilliinermik ingerlatsiviup maluginiagai nalinginnaasut imaluunniit immikkut ittut, imaluunniit
4)  ataatsimut naliliineq malillugu ulloq unnuarlu paaqqinniffik pisariaqartinneqartumik pitsaassuseerussimasoq.  
  Imm. 4.  Pissutsit annertusisamik nakkutilliinissamik eqqarsaateqarnermut tunngaviusut pillugit, ulloq unnuarlu paaqqinniffimmi sulisut oqaloqatigineqareernerisigut taamaallaat annertusisamik nakkutilliisoqarnissaanik aalajangiisoqarsinnaavoq. Pissutsilli immikkut ittut pisariaqartilerpassuk annertusisamik nakkutilliisoqarnissaa erngerluni aalajangerneqarsinnaavoq. 
  Imm. 5.  Ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanera aaqqeerusunneralu ilimanaateqarsorineqarpat, annertusisamik nakkutilliisoqarnissaanik taamaallaat aalajangiisoqarsinnaavoq. Ulloq unnuarlu paaqqinniffiup pissutsinik ernumanartunik aaqqiisinnaanera imaluunniit aaqqeerusunnera ilimagineqanngippat, ulloq unnuarlu paaqqinniffimmut akuersissutip utertinneqarnissaa naalakkersuisoqarfiup isumaginninnermut akisussaasuusup Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat malillugu aalajangersinnaavaa.
  Imm. 6.  Nakkutilliinermik ingerlatsivik annertusisamik nakkutilliisoqarnissaanik aalajangiippat, kommunalbestyrelsit inissiisuusut Nakkutilliinermik ingerlatsivimmit ilisimatinneqassapput.

 

Nakkutilliinermit nalunaarusiaq

 

  § 35.  §§ 26 aamma 34 malillugit ulloq unnuarlu paaqqinniffimmi ingerlatsinermut sammititamik nakkutilliinerit tamaasa Nakkutilliinermik ingerlatsivik nalunaarusiortassaaq.
  Imm. 2.  Nakkutilliinermit nalunaarusiami paasissutissat tulliuttut takuneqarsinnaassapput:

1)  Ulloq nakkutilliiffiusoq.

2)  Kina nakkutilliinermik ingerlatsisimanersoq.

3)  Nakkutilliineq nalunaaqqaarluni nalunaaqqaarnaniluunniit ingerlanneqarsimanersoq.

4)  Nalinginnaasumik imaluunniit annertusisamik nakkutilliineq pineqarnersoq.

5)  Nakkutilliinermik ingerlatsivik nakkutilliiartortoqannginnerani paasissutissanik sunik piniarsimanersoq.

6)  Nakkutilliinermik ingerlatsivik nakkutilliinerminut atatillugu kikkunnik oqaloqateqarsimanersoq.

7)  Ineqartussat amerlassusissaat akuerineqartut naapertorlugit meeqqat qassit ulloq unnuarlu paaqqinniffimmi nalunaarsorneqarsimanersut, kiisalu meeqqat qassinik ukioqarnersut meeqqallu tapersersorneqarnissamik pisariaqartitaat.

8)  Ukiumi kingullermi pissaanermik atuinerit qassiusimanersut.

9)  Nakkutilliinermi isiginiakkat.

10)  Meeqqanik paaqqinniffimmiittuutigineqartutut nalunaarsukkanik ulloq unnuarlu paaqqinniffiup katsorsaanissaminut isumassuinissaminullu suliarinninnissaminut piumasaqaatinik eqquutitsinersoq pillugu naliliineq.
11)  Ulloq unnuarlu paaqqinnittarfimmut akuersissummi piumasaqaatit ulloq unnuarlu paaqqinniffimmit suli eqquutinneqarnersut pillugu naliliineq.
12)  Nakkutilliinerup malitsigisaanik qisuariartoqarsimappat qisuariaatit, matumani annertusisamik nakkutilliisoqarnissaanik aalajangiineq, peqqussuteqarneq, akuersissummik utertitsineq aamma paasissutissanik kommunalbestyrelsimut kommunalbestyrelsinulluunniit inissiisimasunut ingerlatitseqqinneq ilanngullugit. 
  Imm. 3.  § 26, imm. 5 malillugu toraagalimmik nakkutilliinermi nakkutilliinermit nalunaarusiaq suliassaqarfiit attuumassuteqartut ukkatarineqartut pillugit paasissutissanik taamaallaat imaqassaaq. 

 

  § 36.  § 35 malillugu inaarutaasumik nakkutilliinermit nalunaarusiap suliarineqareerluni ulloq unnuarlu paaqqinniffimmut nassiunneqannginnerani, nakkutilliinermit nalunaarusiaq minnerpaamik ullunik 14-inik piffissalerlugu ulloq unnuarlu paaqqinniffimmut, kiisalu oqartussaqarfimmut ulloq unnuarlu paaqqinniffimmik ingerlatsisumut tusarniaassutigineqassaaq.
  Imm. 2.  Nakkutilliinermit nalunaarusiaq inaarutaasoq kingusinnerpaamik ullormi nakkutilliiffiusimasumit kingullermit qaammatit pingasut qaangiunnerisa kingornatigut suliarineqareersimassaaq.
  Imm. 3.  Immikkut ittumik pisoqartillugu imm. 1-imi aamma 2-mi piffissaliussat avaqqunneqarsinnaapput.
  Imm. 4.  Nakkutilliinermit nalunaarusiaq isumaginninnermut aqutsisoqarfimmut kiisalu kommunalbestyrelsinut meeqqanik ulloq unnuarlu paaqqinniffimmut inissiisimasunut ilisimatitsissutitut nassiunneqassaaq. 
  Imm. 5.  Nakkutilliinermit nalunaarusiaq Naalakkersuisut nittartagaatigut kiisalu ulloq unnuarlu paaqqinniffiup nittartagaatigut tamanut saqqummiunneqassaaq.

 

  § 37.  § 35 malillugu Nakkutilliinermik ingerlatsiviup nakkutilliinermit nalunaarusiami allassinnaavai:
1)  paasineqarsimasut paasissutissiissutaasimasullu pillugit oqaaseqaatit, aamma 
2)  pissutsit iluarsineqartariaqartut iliuuseqarfigineqartariaqartullu pillugit innersuussutit. 
  Imm. 2.  Imm. 1 malillugu oqaaseqaatit innersuussutilluunniit ulloq unnuarlu paaqqinniffiup oqaloqatigineqareerneratigut suliarineqartassapput, aamma pissutsit aalajangersimasut oqaaseqaateqarnermut imaluunniit innersuussuteqarnermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

  § 38.  § 35 malillugu nakkutilliinermit nalunaarusiami, innersuussuteqartoqarpat innersuussutinut imaluunniit peqqussuteqartoqarpata peqqussutinut tunngavigineqartut pillugit, pissutsit qanoq ilillugit aaqqiiviginiarneqarnissaat pillugu allaganngorlugu pilersaarusiamik suliaqassasoq, Nakkutilliinermit ingerlatsiviup ulloq unnuarlu paaqqinniffik innersuussinnaavaa peqqusinnaalluguluunniit, matumani piffissaliussat nalunaarutigineqarnerat ilanngullugu.

 

Kapitali 6

Inunnut innarluutilinnut najugaqarfissatut neqeroorutini najugaqartunut inummut sammititamik nakkutilliineq

 

  § 39.  Inuup innarluutillip najugaqarfigisaani kommunimi angerlarsimaffigisami kommunalbestyrelse najugaqarfissatut neqeroorummi ukiumut marloriarluni inummut sammititamik nakkutilliisassaaq. 
  Imm. 2.  Inuk innarluutilik kommunimi allami najugaqarfissatut neqeroorummi najugaqarpat, kommunalbestyrelse inissiisoq kommunimi najugaqarfissatut neqeroorutip inissisimaffigisaani kommunalbestyrelsimut, kommunalbestyrelse inissiisoq sinnerlugu taassuma nakkutilliinissaa pillugu, isumaqatigiissusiorsinnaavoq.
  Imm. 3.  Imm. 2 malillugu nakkutilliinissamik isumaqatigiissusiortoqarsimappat nalunaarummi matumani aalajangersakkat malillugit nakkutilliisoqarnissaa kommunalbestyrelsip inissiisup suli akisussaaffigissavaa. 

 

  § 40.  § 39 malillugu inummut sammititamik nakkutilliineq, ima aaqqissugaassaaq inuup innarluutillip iliuusissanut pilersaarutaa najugaqarfissatut neqeroorummit malinneqarnissaa, aamma inuup pisariaqartitaanut tapersersuutit naammannissaat naleqqunnissaallu ingerlaavartumik qulakkeerneqassalluni, matuma ataaniittut ilanngullugit:
1)  inuup innarluutillip najugaqarfissatut neqeroorummi sumiginnarneqannginnissaa imaluunniit atornerlunneqannginnissaa, 
2)  inuup taassumalu angajoqqaatut sinniisoqaruni sinniisorisaata imaluunniit angajoqqaatut oqartussaasuisa pisinnaatitaaffimminnik ilisimatinneqarsimanissaat,
3)  inuup peqataaffigisaani suliat pillugit naammagittaalliortoqarsimappat naammagittaalliuutip inernera, inummut taassumalu angajoqqaatut sinniisoqaruni sinniisorisaata imaluunniit angajoqqaatut oqartussaasuisa kiisalu inuup sulianik sullissisuanut anngunneqarnissaat, 
4)  iliuusissanut pilersaarummi anguniakkat najugaqarfissatut neqeroorummut innissinneqarnermi naammassineqarsinnaanerat,
5)  najugaqarfissatut neqeroorummi periaatsit inummut piukkunnartuussasut aamma
6)  pissaanermik atuisimanerit malitseqartinneqartassasut, nalunaarutillu tunngavigalugit, tamanna pillugu inuk najugaqarfissatut neqeroorummi eqqortumik tapersersorneqarnersoq naliliiffigineqarnissaa qulakkeerneqassasoq.
  Imm. 2.  Inuit innarluutillit tapersersorneqarnissaat pillugu Inatsisartut inatsisaanni § 48 malillugu inuk ulloq unnuarlu paaqqinniffimmi najugaqarpat, nakkutilliinerup makku aamma qulakkiissavai: 
1)  ulloq unnuarlu paaqqinniffimmit killiffinnut nalunaarusiat aamma ineriartortitsinissamut pilersaarutinik suliaqarnikkut ingerlaavartumik qisuariartoqartarnissaa, aamma 
2)  inuup inuttut ineriartornera, ilorrisimaarnera peqqissusialu iliuusissanut aamma ineriartortitsinissamut pilersaarutit suliarineqarsimasut malinneqarnissaat.

 

  § 41.  § 39 malillugu inummut sammititamik nakkutilliinermut atatillugu inuk innarluutilik kommunalbestyrelsimit oqaloqatigineqassaaq. 
  Imm. 2.  Imm. 1 malillugu kommunalbestyrelsip oqaloqatiginninnermini inuup innarluuteqarnera mianerissavaa aammalu oqaloqatigiinneq inuup innarluutillip piumasai tunngavigalugit ingerlatissallugu.
  Imm. 3.  Imm. 1 malillugu kommunalbestyrelse oqaloqatiginninnermini Inuit innarluutillit tapersersorneqarnissaat pillugu Inatsisartut inatsisaanni § 24 malillugu inuk isumaginninnermi sulianik ilisimasalimmik illersuisoqarnissaanik neqeroorfigissavaa.
  Imm. 4. Inuk innarluutilik 18-it inorlugit ukioqarpat imaluunniit nammineersinnaajunnaarsitaasimappat imm. 1 malillugu oqaloqatigineqarnera, inuk innarluutilik, taassumalu angajoqqaatut akisussaasui imaluunniit angajoqqaatut sinniisoqarsimaguni sinniisua, peqataatillugit ingerlanneqassaaq. Taamaattoq inummut innarluutilimmut mianerisassat tamanna pisariaqartippassuk, angajoqqaatut oqartussaasut imaluunniit angajoqqaatut sinniisuusoq akuersitinnagu imaluunniit najuutsinnagu oqaloqateqarneq ingerlanneqarsinnaavoq. Angajoqqaatut akisussaasut imaluunniit angajoqqaatut sinniisoq akuersiteqqaarnagit peqataatinnagilluunniit oqaloqateqarneq ingerlanneqassappat, taava § 24 malillugu illersuisumik toqqaasoqassaaq ilaasoqarlunilu.
  Imm. 5.  Inuup inerisimanera piginnaasaqarneralu imaluunniit suliap suussusaa eqqarsaatigalugit oqaloqateqarnerup ingerlanneqarnissaa aalajangiisuusumik naleqqutinngippat, imm. 1 malillugu oqaloqateqarneq ingerlanneqassanngitsoq kommunalbestyrelsip aalajangersinnaavaa. Oqaloqateqarneq ingerlanneqarsinnaanngippat, inuup innarluutillip aalajangiinissatut eqqarsaatigineqartumut isumaa allatut pissarsiariniarneqassaaq.

 

  § 42.  § 39 malillugu kommunalbestyrelse inummut sammititamik nakkutilliinerminut atatillugu najugaqarfissatut neqeroorummi pissutsinik ernumanartunik maluginiagaqarpat, inuillu najugaqarfissatut neqeroorummiittut pissutsinik ernumanartunik sunnerneqarsinnaappata, oqartussaasoqarfimmut ingerlatsineq pillugu nakkutilliisussaatitaasumut kiisalu kommunalbestyrelsinut inissiisimasunut kommunalbestyrelse nalunaaruteqassaaq.

 

  § 43.  § 39 malillugu kommunalbestyrelse inummut sammititamik nakkutilliinerit tamaasa nakkutilliinermit nalunaarusiamik suliaqartassaaq.
  Imm. 2.  Nakkutilliinermit nalunaarusiami paasissutissat tulliuttut takuneqarsinnaassapput: 
1)  Ulloq nakkutilliiffiusoq. 
2)  Kina nakkutilliinermik ingerlatsisimanersoq. 
3)  Nakkutilliiartortoqannginnerani kommunalbestyrelse paasissutissanik sunik piniarsimanersoq.
4)  Kommunalbestyrelse nakkutilliinerminut atatillugu kikkunnik oqaloqateqarsimanersoq. 
5)  Nakkutilliinermi isiginiakkat.
6)  Inuup pisariaqartitaanik ineriartornissamullu periarfissaanik najugaqarfissatut neqeroorutip isumaginninneranik nalilersuinerit.
7)  Nakkutilliinerup malitsigisaanik qisuariaataasinnaasut, matumani kommunimut angerlarsimaffiusumut paasissutissanik ingerlatitseqqinnerit ilanngullugit. 
  Imm. 3.  § 41, imm. 5 malillugu kommunalbestyrelse inummik oqaloqateqarsimanngippat oqaloqatiginnissimannginnermut peqqutaasoq nakkutilliineq pillugu nalunaarusiami allanneqassaaq.

 

Kapitali 7

Najugaqaqatigiiffinnik najugaqarfinnillu illersugaasunik ingerlatsinermut sammititamik nakkutilliineq

 

  § 44.  Kommunalbestyrelse ukiumut ataasiarluni aamma pisariaqartitsineq naapertorlugu najugaqaqatigiiffinnik najugaqarfinnillu illersugaasunik kommunalbestyrelsimit pilersinneqarsimasunik ingerlanneqartunillu ingerlatsinermut sammititamik nakkutilliisassaaq. Najugaqarfissatut neqeroorutit suli pisariaqartinneqartumik pitsaassuseqarnersut nakkutilliinerup qulakkiissavaa.
  Imm. 2.  Kommunalbestyrelsip nakkutilliinermut atatillugu najugaqarfissatut neqeroorummi pissutsit misissorlugillu najugaqarfissatut neqeroorut oqaloqatigissavaa.  
  Imm. 3.  Kommunalbestyrelsip nakkutilliinermini: 
1)  najugaqarfissatut neqeroorut nalunaaqqaarluni nakkutilliiartorfigisassavaa, 
2)  najugaqarfissatut neqeroorut paasissutissanik attuumassuteqartunik pissarsiffigissavaa, aamma
3)  inunnit najugaqarfissatut neqeroorummi najugaqartunit paasissutissanik pissarsiniassaaq.
  Imm. 4.  Kommunalbestyrelsip imm. 3 nr. 1 malillugu nalunaaqqaarluni nakkutilliiartornermi saniatigut taamatuttaaq najugaqarfissatut neqeroorut nalunaaqqaarnani nakkutilliiartorfigisinnaavaa. 

 

  § 45.  § 44 malillugu ingerlatsinermut sammititamik nakkutilliineq ima ingerlanneqassaaq, taamaalilluni assigiissumik, ataqatigiissillugu aaqqissuussaasumik uppernarsaaserluakkamillu najugaqarfissatut neqeroorutip kiffartuussissutaanik inissatigullu atugassarititaanik, kiisalu najugaqarfissatut neqeroorutip suliassaminik isumaginnittarneranik, nalilersuinissamut tunngavissiissalluni.
  Imm. 2.  Inunnit suliap, aaqqissussaanerup aningaasaqarnerullu ataqatigiinnissaannik paasinnissinnaasunit, taamalu najugaqarfissatut neqeroorutip unammillernartoqartitaanik ingerlariaqqinnissamullu periarfissaanik nalunaaruteqarsinnaasunit, nakkutilliineq ingerlanneqassaaq. 
  Imm. 3.  Nakkutilliinermi kommunalbestyrelsip nakkutilliinerminut atatillugu oqaloqatiginninnermigut najugaqarfissatut neqeroorummi aqutsisut, sulisut inuillu najugaqartut peqataatissavai. Najugaqartut angajoqqaatut sinniisoqarpata, sinniisut aamma angajoqqaatut oqartussaasut, qanigisaasut allat imaluunniit suleqatigineqartut nakkutilliinermut atatillugu oqaloqatiginninnerni peqataatinneqarsinnaapput. 
  Imm. 4.  Siusinnerusukkut nakkutilliinermit nalunaarusiaasimasuni oqaaseqaatit, inassutigisimasat peqqussutillu aaqqissuussaasumik malitseqartinneqartarnissaat kommunalbestyrelsip nakkutilliinermut atatillugu qulakkiissavaa.

 

  § 46.  § 44 malillugu ingerlatsinermut sammititamik nakkutilliinerup makku imarissavai:
1)  Najugaqartut ilinniarnissamut, sulilernissamut sammisassaqarnissamulluunniit periarfissaat.
2)  Najugaqartut ineriartornissaminnut periarfissaat, piginnaasatik naapertorlugit nammineq periarfissaqarfimminnik atorluaasinnaanissaat, tamatumuunakkullu sapinngisaq tamaat nammineersinnaanissaat.
3)  Najugaqarfissatut neqeroorutip sullinniagai, matumani najugaqarfissatut neqeroorutip sullinniakkanut neqeroorutai aamma najugaqartut namminneq inuunerminnullu sunniuteqarsinnaanerat ilanngullugit.
4)  Najugaqarfissatut neqeroorummi periaatsit angusallu, matumani perorsaanermi, tarnip pissusii pillugit imaluunniit psykiatrimut tunngasut pillugit sulisaatsit ilanngullugit. 
5)  Najugaqarfissatut neqeroorutimmi aaqqissuussaaneq aqutsinerlu.
6)  Najugaqarfissatut neqeroorummi sulisoqarnikkut piginnaasat.
7)  Najugaqarfissatut neqeroorummi inissatigut killissarititaasut, matumani sullinniakkat pisariaqartitaannik najugaqarfissatullu neqeroorutip periaasiinut ikorfartuinersut ilanngullugit.
  Imm. 2.  Sammineqartut tamarmik aalajangiinermi tunngaviit naleqquttut atorlugit itisilerneqassapput, taakkulu katillugit najugaqarfissatut neqeroorut pillugu ataatsimut isiginnittumik ersersitsissapput.

 

  § 47.  Najugaqarfissatut neqeroorutip ileqqoreqqusamini piumasaqaatinik naammassinninnersoq kommunalbestyrelsip nakkutigissavaa.

 

  § 48.  § 44 malillugu kommunalbestyrelsip ingerlatsinermut sammititamik nakkutilliinissaminut paasissutissat pisariaqartitai pillugit najugaqarfissatut neqeroorut qinnuigineqaruni, paasissutissat kommunalbestyrelsimut tunniutissavai.
  Imm. 2.  Najugaqarfissatut neqeroorummit paasissutissanik kommunalbestyrelsimut ingerlatitseqqinneq, ingerlatitseqqinneq nakkutilliinissamut pisariaqartutut isigineqarpat,, najugaqartut imaluunniit taakku angajoqqaatut sinniisoqarsimagunik sinniisui imaluunniit angajoqqaatut oqartussaassuseqartut akuersiteqqaarnagit pisinnaavoq.

 

  § 49.  § 44 malillugu kommunalbestyrelse ingerlatsinermut sammititamik nakkutilliinerminut atatillugu najugaqarfissatut neqeroorummi pissutsinik ernumanartunik maluginiagaqarpat, najugaqartoq pissutsinik ernumanartunik sunnerneqarsinnaappat, kommunalbestyrelsimut inissiisuusimasumut kommunalbestyrelse nalunaaruteqassaaq.

 

Nakkutilliinermit nalunaarusiaq

 

  § 50.  § 44 malillugu ingerlatsinermut sammititamik nakkutilliinerit tamaasa kommunalbestyrelse nakkutilliinermit nalunaarusiamik suliaqartassaaq.
  Imm. 2.  Nakkutilliinermit nalunaarusiami paasissutissat tulliuttut takuneqarsinnaassapput: 
1)  Ulloq nakkutilliiffiusoq. 
2)  Kina nakkutilliinermik ingerlatsisimanersoq. 
3)  Nakkutilliineq nalunaaqqaarluni nalunaaqqaarnaniluunniit ingerlaneqarsimanersoq. 
4)  Nakkutilliiartortoqannginnerani kommunalbestyrelse paasissutissanik sunik piniarsimanersoq.
5)  Kommunalbestyrelse nakkutilliinerminut atatillugu kikkunnik oqaloqateqarsimanersoq. 
6)  Atorfinnut akuerisaasunut naleqqiullugu najugaqarfissatut neqeroorummi najugaqartut amerlassusaat aamma najugaqartut tapersersorneqarnissamik pisariaqartitaat.
7)  Ukiumi kingullermi pissaanermik atuinerit qassiusimanersut.
8)  Nakkutilliinermi maluginiarneqartut. 
9)  Najugaqartut pisariaqartitaannik ineriartornissamullu periarfissaannik najugaqarfissatut neqeroorutip nalilersorneqarnera.
10)  Nakkutilliinerup malitsigisaanik qisuariartoqarsimappat qisuariaatit, matumani kommunalbestyrelsimut imaluunniit kommunalbestyrelsinut inissiisimasunut paasissutissanik ingerlatitseqqinnerit ilanngullugit.
  Imm. 3.  Nakkutilliinermit nalunaarusiaq najugaqarfissatut neqeroorummut ulluni 14-ini tusarniaanermut akissuteqarnissaannut piffissalerlugit tusarniaassutigineqassaaq. Inaarutaasumik nakkutilliinermit nalunaarusiap assilineqarnera najugaqarfissatut neqeroorummut nassiunneqassaaq.
  Imm. 4.  Immikkut ittumik pisoqartillugu imm. 3-mi piffissaliussaq avaqqunneqarsinnaavoq.

 

  § 51.  § 50 malillugu kommunalbestyrelsip nakkutilliinermit nalunaarusiami ilanngullugit taasinnaavai:
1)  paasineqarsimasut paasissutissiissutaasimasullu pillugit oqaaseqaatit, aamma
2)  pissutsit iluarsineqartariaqartut iliuuseqarfigineqartariaqartullu pillugit innersuussutit.
  Imm. 2.  Imm. 1 malillugu oqaaseqaatit innersuussutilluunniit najugaqarfissatut neqeroorutip oqaloqatigineqareerneratigut suliarineqartassapput, aamma pissutsit aalajangersimasut oqaaseqaateqarnermut imaluunniit innersuussuteqarnermut tunngaviusut qanoq pitsaanerulersinneqarnissaannut imaluunniit aaqqiiffigineqarsinnaanerannut ilitsersuummik imaqassallutik.

 

Kapitali 8

Inunnut innarluutilinnut ulloq unnuarlu neqeroorutinik ingerlatsinermut sammititamik nakkutilliineq

 

  § 52.  Inuit innarluutillit tapersersorneqarnissaannut Inatsisartut inatsisaanni § 18, imm. 1 malillugu Nakkutilliinermik ingerlatsiviup ingerlatsinermut sammititamik inunnut innarluutilinnut ulloq unnuarlu neqeroorutinik nakkutilliissapput, matumani ulloq unnuarlu neqeroorutit matoqqasut ilanngullugit. Ulloq unnuarlu neqeroorummi pitsaassutsit pisariaqartinneqartut suli pigineqarnersut, aamma ulloq unnuarlu paaqqinniffiup aamma Naalakkersuisut akornanni ingerlatsinissamut isumaqatigiissutip naammassineqarnera, nakkutilliinerup qulakkiissavaa.
  Imm. 2.  Nakkutilliinermik ingerlatsivik ingerlatsinermut sammititamik nakkutilliinermut atatillugu ulloq unnuarlu paaqqinniffimmi pissutsit misissorlugillu ulloq unnuarlu paaqqinniffimmi sulisunik oqaloqateqassaaq. 
  Imm. 3.  Nakkutilliinermik ingerlatsivik nakkutilliinermik suliassamik isumaginninnermini ulloq unnuarlu paaqqinniffimmut nalunaaqqaarluni nakkutilliiartussaaq, paasissutissanillu ulloq unnuarlu paaqqinniffimmit pissarsissalluni.
  Imm. 4.  Nakkutilliinermik ingerlatsivik imm. 3 malillugu nalunaaqqaarluni nakkutilliiartornerup saniatigut aamma nalunaaqqaarani ulloq unnuarlu paaqqinnittarfimmut nakkutilliiartorsinnaavoq.
  Imm. 5.  Imm. 1 malillugu nakkutilliineq toraagalimmik nakkutilliinertut ingerlanneqarsinnaavoq, tassani suliassaqarfiit toqqakkat taamaallaat ukkatarineqassallutik.

 

  § 53.  § 52 malillugu ingerlatsinermut sammititamik nakkutilliineq ima ingerlanneqassaaq, nakkutilliineq assigiiaartumik, aaqqissuussaasumik uppernarsaaserluakkamillu ulloq unnuarlu paaqqinniffiup kiffartuussissutaanik inissatigullu atugassarititaanik, kiisalu ulloq unnuarlu paaqqittarfiup suliassamik isumaginnittarneranik nalilersuinissamut tunngavissiissalluni.
  Imm. 2. Inunnit suliamut tunngassuteqartut ataqatigiinnissaannik paasinnissinnaanissamut tunngavissaqartunit, tamannalu tunngavigalugu ulloq unnuarlu neqeroorutip unammillernartitaanik ineriartornissamullu periarfissaanik tassunga nalunaaruteqarsinnaasunit nakkutilliineq ingerlanneqassaaq.
  Imm. 3.  Nakkutilliinermut atatillugu Nakkutilliinermik ingerlatsiviup ulloq unnuarlu paaqqinniffimmi aqutsisut, sulisut meeqqallu inissinneqarsimasut oqaloqatigalugit peqataatittassavai. Angajoqqaatut sinniisoqarsimappat angajoqqaatut sinniisut imaluunniit angajoqqaatut oqartussaasut, qanigisat allat imaluunniit suleqatigisat nakkutilliinermut atatillugu oqaloqatigiinnikkut peqataatinneqarsinnaapput. 
  Imm. 4.  Nakkutilliinermut atatillugu siusinnerusukkut nakkutilliinermit nalunaarusiaasimasuni oqaaseqaatit, inassuteqaatit peqqussuteqarsimappallu peqqussutit aaqqissuussaasumik malitseqartinneqartarnissaat Nakkutilliinermik ingerlatsivimmit qulakkeerneqassaaq.

 

  § 54.  § 52 malillugu ingerlatsinermut sammititamik nakkutilliinerup makku imarissavai:
1)  Najugaqartut ilinniarnissamut, sulinissamut sammisassaqartinneqarnissamulluunniit periarfissaat
2)  Najugaqartut ineriartornissaminnut periarfissaat, piginnaasatik naapertorlugit nammineq periarfissaqarfimminnik atorluaasinnaanissat, tamatumuunakkullu sapinngisaq tamaat nammineersinnaanissaat.
3)  Ulloq unnuarlu neqeroorutip sullinniagai, matumani ulloq unnuarlu neqeroorutip sullinniakkanut neqeroorutai aamma najugaqartut namminneq inuunerminnullu sunniuteqarsinnaanerat ilanngullugit.
4)  Ulloq unnuarlu neqeroorummi periaatsit angusallu, matumani perorsaanermi, tarnip pissusii pillugit imaluunniit psykiatrimut tunngasut pillugit sulisaatsit ilanngullugit. 
5)  Ulloq unnuarlu neqeroorummi aaqqissuussaaneq aqutsinerlu.
6)  Ulloq unnuarlu neqeroorummi sulisoqarnikkut piginnaasat.
7)  Ulloq unnuarlu neqeroorummi inissatigut killissarititaasut, matumani sullinniakkat pisariaqartitaannik ulloq unnuarlu neqeroorutip periaasiinut ikorfartuinersut ilanngullugit.
  Imm. 2.  Sammineqartut tamarmik aalajangiinermi tunngaviit naleqquttut atorlugit itisilerneqassapput, taakkulu katillugit ulloq unnuarlu neqeroorut pillugu ataatsimut isiginnittumik ersersitsissapput.

 

  § 55.  Ulloq unnuarlu paaqqinniffik ileqqoreqqusanik malinninnersoq Nakkutilliinermik ingerlatsiviup nakkutigissavaa.

 

  § 56.  § 52 malillugu Nakkutilliinermik ingerlatsiviup ingerlatsinermut sammititamik nakkutilliinissaminut paasissutissat pisariaqartitai pillugit ulloq unnuarlu neqeroorut qinnuigineqarnini tunngavigalugu, paasissutissanik Nakkutilliinermik ingerlatsivimmut tunniussissaaq.
  Imm. 2.  Ulloq unnuarlu paaqqinniffimmit paasissutissanik ingerlatitseqqinneq nakkutilliinissamut pisariaqartuusorineqarpat, Nakkutilliinermik ingerlatsivimmut paasissutissanik ingerlatitseqqinneq, najugaqartut imaluunniit taakku angajoqqaatut sinniisoqarsimagunik sinniisui imaluunniit angajoqqaatut oqartussaassuseqartut akuersiteqqaarnagit pisinnaavoq.

 

  § 57.  Nakkutilliinermik ingerlatsivik ulloq unnuarlu paaqqinniffimmi pissutsinik ernumanartunik maluginiagaqarpat, najugaqartullu pissutsinik ernumanartunik sunnerneqarsinnaappata, Nakkutilliinermik ingerlatsivik isumaginninnermut aqutsisoqarfimmut aamma kommunalbestyrelsinut inissiisimasunut nalunaaruteqartassaaq.

 

  § 58.  Najugaqartup ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat, Nakkutilliinermik ingerlatsivik kommunalbestyrelsimut inissiisuusimasumut erngerluni nalunaaruteqassaaq uku tunngavigalugit:

1)  inummik amigartumik isumassuineq passussinerluunniit,

2)  timikkut tarnikkulluunniit nakuuserfigineqarsimappat, paarinerlunneqarpat kinguaassiutitigulluunniit atornerlunneqarsimappat,

3)  inummi atornerluisuunermik ajornartorsiutit, pinerluttutut pissusilersortarnerit imaluunniit allatigut annertuumik pissusilersortarnikkut naleqqussarnikkulluunniit ajornartorsiutai pillugit  naammanngitsunik suliarinnittoqarpat.

  Imm. 2.  Pissutsit imm. 1-imi pineqartut pillugit najugaqartoq naammagittaalliorsimasoq nalunaarutiginnissimasorluunniit Nakkutilliinermik ingerlatsiviup nakkutilliinermini allatigulluunniit tusaruniuk, naammagittaalliorsimaneq nalunaarutiginnissimanerluunniit ingerlateqqinneqarsimanersoq Nakkutilliinermik ingerlatsiviup misissussavaa.

 

Peqqussutit

 

  § 59.  Nakkutilliinermik ingerlatsivik ulloq unnuarlu neqeroorummut peqqussutinik tunniussisinnaavoq. Peqqussutip eqquutsinneqarnissaanut piffissaliussamik Nakkutilliinermik ingerlatsivik aalajangersaasinnaavoq.  
  Imm. 2.  Pissutsit peqqussuteqarnissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut peqqussuteqarnissamik taamaallaat aalajangiisoqarsinnaavoq. Pissutsilli immikkut ittut pisariaqartilerpassuk peqqussuteqarnissaq ingerlaannartumik aalajangerneqarsinnaavoq.
  Imm. 3.  Ulloq unnuarlu paaqqinniffiup pissutsinik aalajangiinermut tunngaviusunik aaqqiissuteqarsinnaanera aaqqiissuteqarusunneralu pissutissaqartumik ilimagineqarpat, peqqussuteqarnissamik taamaallaat aalajangiisoqarsinnaavoq.

 

Annertusisamik nakkutilliineq

 

  § 60.  Immikkut nassuiakkamik sakkortusisamik nakkutilliisoqarnissaa pisariaqartinneqartoq nalilerneqarpat, Nakkutilliinermik ingerlatsivik annertusisamik nakkutilliisoqarnissaanik aalajangiisinnaavoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattorli piffissaq annerpaamik qaammatinik 3-nik sivisussuseqartukkuutaarneqassalluni. 
  Imm. 2.  Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.  
  Imm. 3.  Annertusisamik nakkutilliineq makkuninnga pissuteqarsinnaavoq:
1)  ulloq unnuarlu paaqqinniffiit ataasiakkaat ajornartorsiutaat immikkut ittut nalinginnaasulluunniit misissoqqinneqarnissaat pisariaqartoq, nakkutilliinermit nalunaarusiaq ataaseq inerniliippat,
2)  ulloq unnuarlu paaqqinniffik naammagittaalliutigineqarsimappat,
3)  ulloq unnuarlu paaqqinniffimmi Nakkutilliinermik ingerlatsiviup maluginiagai nalinginnaasut imaluunniit immikkut ittut, imaluunniit
4)  ataatsimut naliliineq malillugu ulloq unnuarlu paaqqinniffik pisariaqartinneqartumik pitsaassuseerussimasoq.  
  Imm. 4.  Pissutsit annertusisamik nakkutilliinissamik eqqarsaateqarnermut tunngaviusut pillugit, ulloq unnuarlu paaqqinniffimmi sulisut oqaloqatigineqareernerisigut taamaallaat annertusisamik nakkutilliisoqarnissaanik aalajangiisoqarsinnaavoq. Pissutsilli immikkut ittut pisariaqartilerpassuk annertusisamik nakkutilliisoqarnissaa erngerluni aalajangerneqarsinnaavoq. 
  Imm. 5.  Ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanera aaqqeerusunneralu ilimanaateqarsorineqarpat annertusisamik nakkutilliisoqarnissaanik taamaallaat aalajangiisoqarsinnaavoq.

 

Nakkutilliinermit nalunaarusiaq

 

  § 61.  §§ 52 aamma 60 malillugit ulloq unnuarlu paaqqinniffimmi ingerlatsinermut sammititamik nakkutilliinerit tamaasa Nakkutilliinermik ingerlatsivik nalunaarusiortassaaq.
  Imm. 2.  Nakkutilliinermit nalunaarusiami paasissutissat tulliuttut takuneqarsinnaassapput:

1)  Ulloq nakkutilliiffiusoq.

2)  Kina nakkutilliinermik ingerlatsisimanersoq.

3)  Nakkutilliineq nalunaaqqaarluni nalunaaqqaarnaniluunniit ingerlanneqarsimanersoq.

4)  Nalinginnaasumik imaluunniit annertusisamik nakkutilliineq pineqarnersoq.

5)  Nakkutilliinermik ingerlatsivik nakkutilliiartortoqannginnerani paasissutissanik sunik piniarsimanersoq.

6)  Nakkutilliinermik ingerlatsivik nakkutilliinerminut atatillugu kikkunnik oqaloqateqarsimanersoq.

7)  Ineqartussat amerlassusissaat akuerineqartut naapertorlugit meeqqat qassit ulloq unnuarlu paaqqinniffimmi nalunaarsorneqarsimanersut, kiisalu meeqqat qassinik ukioqarnersut meeqqallu tapersersorneqarnissamik pisariaqartitaat.

8)  Ukiumi kingullermi pissaanermik atuinerit qassiusimanersut.

9)  Nakkutilliinermi isiginiakkat.

10)  Meeqqanik paaqqinniffimmiittuutigineqartutut nalunaarsukkanik ulloq unnuarlu paaqqinniffiup katsorsaanissaminut isumassuinissaminullu suliarinninnissaminut piumasaqaatinik eqquutitsinersoq pillugu naliliineq.
11)  Ulloq unnuarlu paaqqinnittarfimmut akuersissummi piumasaqaatit ulloq unnuarlu paaqqinniffimmit suli eqquutinneqarnersut pillugu naliliineq.
12)  Nakkutilliinerup malitsigisaanik qisuariartoqarsimappat qisuariaatit, matumani annertusisamik nakkutilliisoqarnissaanik aalajangiineq, peqqussuteqarneq, akuersissummik utertitsineq aamma paasissutissanik kommunalbestyrelsimut kommunalbestyrelsinulluunniit inissiisimasunut ingerlatitseqqinneq ilanngullugit.
  Imm. 3.  § 52, imm. 5 malillugu toraagalimmik nakkutilliinermi nakkutilliinermit nalunaarusiaq suliassaqarfiit attuumassuteqartut ukkatarineqartut pillugit paasissutissanik taamaallaat imaqassaaq. 

 

  § 62.  § 61 malillugu inaarutaasumik nakkutilliinermit nalunaarusiap suliarineqareerluni ulloq unnuarlu neqeroorummut nassiunneqannginnerani, nakkutilliinermit nalunaarusiaq minnerpaamik ullunik 14-inik piffissalerlugu ulloq unnuarlu neqeroorummut kiisalu isumaginninnermut aqutsisoqarfimmut tusarniaassutigineqassaaq.
  Imm. 2.  Nakkutilliinermit nalunaarusiaq inaarutaasoq kingusinnerpaamik ullormi nakkutilliiffiusimasumit kingullermit qaammatit pingasut qaangiunnerisa kingornatigut suliarineqareersimassaaq.
  Imm. 3.  Immikkut ittumik pisoqartillugu imm. 1-imi aamma 2-mi piffissaliussat avaqqunneqarsinnaapput.
  Imm. 4.  Nakkutilliinermit nalunaarusiaq isumaginninnermut aqutsisoqarfimmut kiisalu kommunalbestyrelsinut meeqqanik ulloq unnuarlu paaqqinniffimmut inissiisimasunut ilisimatitsissutitut nassiunneqassaaq. 
  Imm. 5.  Nakkutilliinermit nalunaarusiaq Naalakkersuisut nittartagaatigut kiisalu ulloq unnuarlu paaqqinniffiup nittartagaatigut tamanut saqqummiunneqassaaq.

 

  § 63.  § 61 malillugu Nakkutilliinermik ingerlatsiviup nakkutilliinermit nalunaarusiami allassinnaavai:
1)  paasineqarsimasut paasissutissiissutaasimasullu pillugit oqaaseqaatit, aamma 
2)  pissutsit iluarsineqartariaqartut iliuuseqarfigineqartariaqartullu pillugit innersuussutit. 
  Imm. 2.  Imm. 1 malillugu oqaaseqaatit innersuussutilluunniit ulloq unnuarlu paaqqinniffiup oqaloqatigineqareerneratigut suliarineqartassapput, aamma pissutsit aalajangersimasut oqaaseqaateqarnermut imaluunniit innersuussuteqarnermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

  § 64.  § 61 malillugu nakkutilliinermit nalunaarusiami, innersuussuteqartoqarpat innersuussutinut imaluunniit peqqussuteqartoqarpata peqqussutinut tunngavigineqartut pillugit, pissutsit qanoq ilillugit aaqqiiviginiarneqarnissaat pillugu allaganngorlugu pilersaarusiamik suliaqassasoq Nakkutilliinermit ingerlatsiviup ulloq unnuarlu neqeroorut innersuussinnaavaa peqqusinnaalluguluunniit, matumani piffissaliussat nalunaarutigineqarnerat ilanngullugu.

 

Kapitali 9

Utoqqarnik paaqqinniffinnik ingerlatsinermut sammititamik nakkutilliineq

 

  § 65.  Utoqqarnik paaqqinniffiit kommunalbestyrelsimit pilersinneqarsimasut ingerlanneqartullu ingerlatsinermut sammititamik kommunalbestyrelsimit ukiumut ataasiarluni aamma pisariaqartitsineq naapertorlugu nakkutilliivigineqartassapput. Utoqqarnik paaqqiffimmi pitsaassuseq pisariaqartinneqartoq suli pigineqarnersoq nakkutilliinerup qulakkiissavaa.
  Imm. 2.  Kommunalbestyrelsip nakkutilliinerminut atatillugu utoqqarnut paaqqinniffinni pissutsit nakkutigalugillu utoqqarni paaqqinniffinni sulisut oqaloqatigissavai.  
  Imm. 3.  Kommunalbestyrelsip nakkutilliinermini: 
1)  utoqqarnik paaqqinniffik nalunaaqqaarluni nakkutilliiartorfigisassavaa, 
2)  utoqqarnik paaqqinniffik paasissutissanik piniarfigisassavaa, aamma
3)  inunnit utoqqarnit paaqqinniffinniittunit paasissutissanik attuumassuteqartunik pissarsiniassaaq.
  Imm. 4.  Kommunalbestyrelsip imm. 3 nr. 1 malillugu nalunaaqqaarluni nakkutilliiartortarnermi saniatigut utoqqarnik paaqqinniffiit nalunaarfigeqqaarnagit aamma nakkutilliiartorfigisinnaavai. 

 

  § 66.  § 65 malillugu ingerlatsinermut sammititamik nakkutilliineq ima ingerlanneqassaaq, nakkutilliineq assigiiaartumik, ataqatigiissillugu aaqqissuussaasumik uppernarsaaserluakkamillu utoqqarnik paaqqinniffiup kiffartuussissutaanik inissatigullu atugassarititaanik, kiisalu utoqqarnik paaqqinniffiup suliassanik suliarinnittarnera pillugu nalilersuinissamut tunngavissiissalluni.
  Imm. 2.  Inunnit suliamut tunngassuteqartut ataqatigiinnissaannik paasinnissinnaanissamut tunngavissaqartunit, tamannalu tunngavigalugu utoqqarnik paaqqinniffiup unammillernartoqartitaanik ineriartornissamullu periarfissaanik nalunaaruteqarsinnaasunit nakkutilliineq ingerlanneqassaaq. 
  Imm. 3.  Nakkutilliinermi kommunalbestyrelsip nakkutilliinerminut atatillugu oqaloqatiginninnermigut utoqqarnik paaqqinniffimmi aqutsisut, sulisut inuillu najugaqartut peqataatissavai. Angajoqqaatut sinniisoqartoqarpat, angajoqqaatut sinniisut nakkutilliinermi peqataatinneqarsinnaapput. 
  Imm. 4.  Siusinnerusukkut nakkutilliinermit nalunaarusiaasimasuni oqaaseqaatit inassuteqaatillu aaqqissuussaasumik malitseqartinneqartarnissaat kommunalbestyrelsip nakkutilliinermut atatillugu qulakkiissavaa.

 

  § 67.  § 65 malillugu ingerlatsinermut sammititamik nakkutilliineq sammisanik makkuninnga imaqassaaq:
1)  Najugaqartut piginnaasatik naapertorlugit nammineq periarfissaqarfimminnik atorluaasinnaanissaat tamatumuunakkullu sapinngisaq tamaat nammineersinnaanissaat.
2)  Najugaqartut sammisassaqarnissamut periarfissaat.
3)  Utoqqarnik paaqqinniffiup sullinniagai, matumani utoqqarnik paaqqinniffiup sullinniakkaminut neqeroorutigisaata imarisai, kiisalu najugaqartut nammineq inuunerminnut sunniuteqaqataanerat ilanngullugit.
4)  Utoqqarnik paaqqinniffimmi periaatsit angusallu.
5)  Utoqqarnik paaqqinniffimmi aaqqissuussaaneq aqutsinerlu. 
6)  Utoqqarnik paaqqinniffimmi sulisoqarnikkut piginnaasat.
7)  Utoqqarnik paaqqinniffimmi illutatigut sinaakkutissat, matumani sullinniakkat pisariaqartitaannut aamma utoqqarnik paaqqinniffiup periaasiinut ikorfartuinersut ilanngullugit.
  Imm. 2.  Sammineqartut tamarmik aalajangiinermi tunngaviit naleqquttut atorlugit itisilerneqassapput, taakkulu katillugit utoqqarnik paaqqinniffik pillugu ataatsimut  isiginnittumik ersersitsissapput.

 

  § 68.  § 65 malillugu ingerlatsinermut sammititamik kommunalbestyrelsip nakkutilliinissaanut paasissutissat pisariaqartinneqartut, qinnuigineqarneq malillugu utoqqarnik paaqqinniffimmit kommunalbestyrelsimut tunniunneqassapput.
  Imm. 2.  Utoqqarnut paaqqinniffimmit paasissutissanik kommunalbestyrelsimut ingerlatitseqqinneq, ingerlatitseqqinneq nakkutilliinissamut pisariaqartuut isigineqarpat, najugaqartut imaluunniit taakku angajoqqaatut sinniisoqarsimagunik angajoqqaatut sinniisui akuersiteqqaarnagit pisinnaavoq.

 

  § 69.  § 65 malillugu kommunalbestyrelse ingerlatsinermut sammititamik nakkutilliinerminut atatillugu utoqqarnik paaqqinniffimmi pissutsinik ernumanartunik maluginiagaqarpat, najugaqartut pissutsinik ernumanartunik sunnerneqarsinnaappata, kommunalbestyrelsimut inissiisuusimasumut kommunalbestyrelse nalunaaruteqassaaq.

 

Nakkutilliinermit nalunaarusiaq

 

  § 70.  § 65 malillugu ingerlatsinermut sammititamik nakkutilliinerit tamaasa nakkutilliinermit nalunaarusiamik kommunalbestyrelse suliaqartassaaq.
  Imm. 2.  Nakkutilliinermit nalunaarusiami paasissutissat tulliuttut takuneqarsinnaassapput: 
1)  Ulloq nakkutilliiffiusoq. 
2)  Kina nakkutilliinermik ingerlatsisimanersoq. 
3)  Nakkutilliineq nalunaaqqaarluni nalunaaqqaarnaniluunniit ingerlaneqarsimanersoq. 
4)  Nakkutilliisoqartinnagu paasissutissat suut kommunalbestyrelsip pissarsiariniarsimanerai.
5)  Kommunalbestyrelsip nakkutilliinerminut atatillugu kikkut oqaloqateqatigisimanerai. 
6)  Atorfinnut akuerisaasunut naleqqiullugu utoqqarnik paaqqinniffimmi najugaqartut amerlassusaat aamma najugaqartut tapersersorneqarnissamik pisariaqartitaat.
7)  Ukiumi kingullermi pissaanermik atuinerit qassiusimanersut.
8)  Nakkutilliinermi isiginiakkat. 
9)  Najugaqartut pisariaqartitaannik utoqqarnik paaqqinniffiup nalilersorneqarnera.
10)  Nakkutilliinerup malitsigisaanik qisuariartoqarsimappat qisuariaatit, matumani kommunalbestyrelsimut imaluunniit kommunalbestyrelsinut inissiisimasunut paasissutissanik ingerlatitseqqinnerit ilanngullugit.
  Imm. 3.  Nakkutilliinermit nalunaarusiaq tusarniummut akissuteqarnissamut ullunik 14-inik piffissalerlugu utoqqarnik paaqqinniffimmut tusarniaassutigineqassaaq. Inaarutaasumik nakkutilliinermit nalunaarusiap assilineqarnera utoqqarnik paaqqinniffimmut nassiunneqassaaq.

 

  § 71.  § 70 malillugu kommunalbestyrelsip nakkutilliinermit nalunaarusiamut ilanngullugit taassavai:
1)  paasineqarsimasut paasissutissiissutaasimasullu pillugit oqaaseqaatit, aamma
2)  pissutsit iluarsineqartariaqartut iliuuseqarfigineqartariaqartullu pillugit innersuussutit.
  Imm. 2.  Imm. 1 malillugu oqaaseqaatit innersuussutilluunniit utoqqarnik paaqqinniffiup oqaloqatigineqareerneratigut suliarineqartassapput, aamma pissutsit aalajangersimasut oqaaseqaateqarnermut imaluunniit innersuussuteqarnermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

Kapitali 10

Naammagittaalliuuteqarsinnaaneq

 

  § 72.  Nalunaarut manna malillugu kommunalbestyrelsip aalajangiineri Isumaginnittoqarfiup aqunneqarnera aaqqissugaaneralu pillugit Inatsisartut peqqussutaat malillugu Isumaginninnermi Naammagittaalliuuteqartarfimmut naammagittaalliuutigineqarsinnaapput.
  Imm. 2.  Nalunaarut manna malillugu Nakkutilliinermik ingerlatsiviup aalajangiineri aqutsinermi oqartussaasunut allanut naammagittaalliuutigineqarsinnaanngillat.
  Imm. 3.  Nalunaarut manna malillugu aalajangiinernut, meeqqat suliat imminnut tunngassuteqartut pillugit naammagittaalliuuteqarnissaminnut pisinnaatitaapput.

 

Kapitali 11

Atortuulerfia

 

  § 73.  Nalunaarut ulloq 1. juli 2020-mi atuutilissaaq.
  Imm. 2.  Peqatigisaanik Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. 1, 16. januar 2020-imeersoq atorunnaarsinneqassaaq.

 

 

Kalaallit Nunaanni Namminersorlutik Oqartussat, ulloq 24. juni 2020

 

 

Martha Abelsen

/

           Julie Præst Wilche

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk