Kapisilinniarneq pillugu Namminersorlutik Oqartussat nalunaarutaat nr. 20, 9. oktober 2015-imeersoq

Aalisarneq pillugu Inatsisartut Inatsisaanni nr. 18, 31. oktober 1996-imeersumi, § 5, § 8, § 10, § 10a, imm. 1, § 13, imm. 2, § 23, § 25, § 26, § 33, imm. 2 aamma § 34, imm. 3, ilaatigut Inatsisartut inatsisaanni nr. 6, 20. maj 1998-imeersukkut, Inatsisartut inatsisaanni nr. 5, 21. maj 2002-meersukkut, Inatsisartut inatsisaanni nr. 28, 18. december 2003-meersukkut, Inatsisartut Inatsisaanni nr. 17, 3. december 2009-meersukkut, Inatsisartut Inatsisaanni nr. 12, 3. december 2012-imeersukkut kingullermillu Inatsisartut Inatsisaat nr. 18, 3. juni 2015-meersoq aqqutigalugu allanngortinneqarsimasut tunngavigalugit aalajangersarneqarpoq:


Atuuffia

  § 1.  Nalunaarut kapisilinniarnermut imartani Kalaallit Nunaata aalisarnikkut oqartussaaffigisaani Nunap Isuata kitaani NAFO-p sumiiffilersuiffiani 1-imi ingerlanneqartumut atuuppoq. Tunngaviusumik killigititamit 40 sømilit avataanni aalisarneq inerteqqutaavoq.
  Imm. 2.  Kalaallit Nunaata Kangiata aalisarfiini kapisilinniarnermi malittarisassat nalunaarummi § 5, § 6, § 7, § 8, aamma § 9-mi taaneqartut atuupput. Tunngaviusumik killigititamit 12 sømilit avataani kapisilinniarluni aalisarneq inerteqqutaavoq.
  Imm. 3.  Nalunaarut aammattaaq kapisilinnik pisinerup tunisinerullu nalunaarutigineqarnerinut kiisalu inuussutissarsiummut atatinnagu kapisilinniarnermi pisat nalunaarutigineqarnerinut atuuppoq.


Nassuiaatit

  § 2.  Inuussutissarsiutigalugu kapisilinniarneq nalunaarummi matumani paasineqassaaq pisat tamaasa ilaannaasaluunniit tuniniarnissaat siunertaralugu kapisilinniarnertut. Inuussutissarsiutigalugu kapisilinniarnissamut akuersissummik allagartallit kisimik kapisilinnik tuniniaasinnaatitaapput.
  Imm. 2.  Inuussutissarsiummut atatinnagu kapisilinniarneq nalunaarummi matumani paasineqassaaq nammineq atugassanik kapisilinniarnertut.
  Imm. 3.  Kapisilinnik pisineq nalunaarummi matumani paasineqassaaq inunnit kapisilinniarnissamut akuersissummik allagartaqartunit toqqaannartumik pisineq tigusinerlu.
  Imm. 4.  Piffissaq aalisarfiusoq nalunaarummi matumani paasineqassaaq piffissatut imaluunniit piffissat ilaattut kapisilinniarsinnaatitaaffittut.
  Imm. 5.  Pisassat ilaat nalunaarummi matumani paasineqassaaq pisassat tamarmiusut piffissami aalisarfiusumi piffissami aalajangersimasumi inunnilluunniit aalajangersimasunit aalisarneqarsinnaasut imm. 1 aamma 2 takukkit.


 Inuussutissarsiutigalugu kapisilinniarnermut piumasaqaatit

  § 3.  Akuersissummik allagartamik tunineqartut kisimik inuussutissarsiutigalugu kapisilinniarsinnaatitaapput. Inuussutissarsiutigalugu kapisilinniarsinnaanermut allagartat akuersissutit Naalakkersuisunit tunniunneqassapput.
  Imm. 2.  Allagartat akuersissutit qinnuteqartunut piumasaqaatinik makkuninnga naammassinnittunut tunniussisoqarsinnaavoq:
 1) Inuiaqatigiinnut kalaallinut attuumassuteqavissunut, tak. aalisarneq pillugu Inatsisartut inatsisaanni § 3, imm. 4.
 2) Qassutinik kapisilinniutinik aamma angallammik kapisilinniummik 12,8 meterit (42 fod) tikillugit tamakkerlugu angissusilimmik nammineq pigisaqartunut.
 3) Qinnuteqarnermut atatillugu qinnuteqartumit pigineqartut qassutit kapisilinniutit qassiunerinik qanorlu ittuunerinik imaluunniit ilisarnaataannik nalunaaruteqartumut.


Inuussutissarsiutigalugu kapisilinniarnermi piniutit

  § 4.  Inuussutissarsiutigalugu kapisilinniarneq qarsorsat qassutilluunniit tasillugit 140 mm-inik nigartallit atorlugit taamaallaat ingerlanneqassaaq. Qassutit tissukartittakkat atorneqarsinnaapput, taamaattorli atuinermi ataatsimi amerlanerpaamik uiguleriit 20-kkuutaarlugit.
  Imm. 2.  Qassutit nigartaat uuttorneqassapput uuttuutit ½ kiilumik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput.  Nigartat tamarmik imm. 1-imi piumasaqaat eqquutsissavaat.
  Imm. 3.  Qassutit kapisilinniutit atorneqartut tamarmik piginnittup aqqanik imaluunniit taassuma angallataata normuanik nalunaaqutsersugaassapput. Nalunaaqutsiinermi atorneqartoq imermi allanngujaatsuussaaq.
  Imm. 4.  Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu qassusiarfigineqartassapput, pisat uumanissaminnut periarfissaat ajornerulertussaajunnaarlugit.
  Imm. 5.  Qassutit tissukartittakkat nalinginnartut nalunaaqutsigaallutillu qulleqassapput


Inuussutissarsiutigalugu kapisilinniarnerup aqunneqarnera

  § 5.  Inuussutissarsiutigalugu kapisilinniarneq pisassiissutit aallaavigalugit nunami tunitsivinnut tunisassanik kiisalu / imaluunniit najukkani kalaalimineerniarfinnut akunnittarfinnullu, neriniartarfinnut, napparsimavinnut, ilinniartut najugaqarfiinut pisortallu nerisitsisarfiinut allanut tuniniarneqartussanik aalisarnertut ingerlanneqarsinnaavoq.

   § 6.  Aalisarnermut, tak. § 5, Naalakkersuisut ukiut tamaasa, nunat tamalaat akornanni isumaqatigiissutit aallaavigalugit, Kitaani kapisilittassanik aalajangersaasassapput. Pisassat pisassanut immikkoortiterneqarsinnaapput piffissap ilaani aalisarneqarsinnaasutut agguataarneqarsinnaallutik.
  Imm. 2.  Naalakkersuisut KNAPK-lu isumasioqatigereerlugu inuussutissarsiutigalugu kapisilinniarnissamut piffissat ilaannut ataasiakkaanut ulloq aallartiffissaq aalajangertassavaa. Piffissat ilaannut ataasiakkaanut ulloq aallartiffissaq kommuninut ataasiakkaanut, KANUKOKA-mut, KNAPK-mut kiisalu nuna tamakkerlugu tusagassiorfiit aqqutigalugit nalunaarutigineqassaaq.
  Imm. 3.  Inuussutissarsiutigalugu kapisilinniarneq piffissat ilaannut ataasiakkaanut ulloq aallartiffissatut aalajangerneqartoq sioqqullugu aallartinneqassanngilaq aammalu piffissaliussat ilaasa ataasiakkaat naanerisigut unitsinneqarluni imaluunniit pisassat nungunneqarpata.
  Imm. 4.  Inuussutissarsiutigalugu kapisilinniarneq taamaallaat pisassatut aalajangerneqartut, aalisakkat uumatillutik uuttuutaattut (ilivitsuutillugit) kiilunngorlugit taaneqartut, iluanni pisinnaavoq.
  Imm. 5.  Inuussutissarsiutigalugu kapisilinniarnermit pisat Kalaallit Nunaata avataani taamaallaat pisiariortorneqarsinnaapput tuniniarneqarsinnaallutillu Naalakkersuisut akuersissuteqarnerisigut.

  § 7.  Kapisilittassiissutit aalajangikkat tamakkerlugit pisarineqarnissaat qanillippat, Naalakkersuisut nalunaarutigissavaat, qaqugu inuussutissarsiutigalugu kapisilinniarneq kiisalu taamatut aalisarnermit pisanik pisineq aamma tunisineq unissanersoq.
  Imm. 2.  Tamanna kommuninut ataasiakkaanut, KNAPK-mut KANUKOKA-mullu aammalu nuna tamakkerlugu tusagassiorfiit aqqutigalugit nalunaarutigineqassaaq.
  Imm. 3.  § 6, imm. 3 naapertorlugu aalisarneq unippat, inuussutissarsiutigalugu kapisilinniarneq sunaluunniit kiisalu aalisarnermit tamatumannga pisineq tunisinerlu inerteqqutaapput.


Inuussutissarsiutigalugu kapisilinniarnermit pisanik nalunaaruteqartarneq

   § 8.  Kapisillit pisarineqartut tamarmik Kalaallit Nunaanni Aalisarnermik Akuersissutinik Nakkutilliisoqarfimmut (KANUAANA) nalunaarutigineqassapput.
  Imm. 2.  Tunisat imaluunniit akigineqartut amerlassusii "niaquernagit erlaveerlugit" nalunaarutigineqarpata naatsorsueriaaseq 1,11 atorneqassaaq aalisakkat ilivitsunngortillugit naatsorsorneranni.
  Imm. 3.  Aalisartut inuussutissarsiutigalugu kapisilinniarnissamik akuersissummik allagartamik pillit, toqqaannartumik kalaalimineerniarfinni tunisisartut imaluunniit toqqaannartumik pisisartumut kalaalimineerniarfiit avataanni tunisaqartartut kapisilinnik tulaassinitik tamaasa nalunaarutigisassavaat. Nalunaaruteqarnermi kapisillit ataatsikkut tulaanneqartut tamakkerlugit nalunaarutigineqassapput. Pisat pillugit nalunaarutiginninneq nalunaarummi ilanngussaq 1 atorlugu pisassaaq. Pisat pillugit nalunaarutiginninnissaq uunga nassiunneqassaaq: KANUAANA, Postboks 501, 3900 Nuuk, Telefax 34 63 60 imaluunniit e-mail-ikkut uunga gflk@nanoq.gl. Nalunaarutiginninneq kapisilinnik tulaassinerup kinguninngua pisassaaq.


Inuussutissarsiummut atatinnagu kapisilinnik aalisarneq

   § 9.  Inuussutissarsiummut atatinnagu pisassiissutit aalajangersarneqartut iluanni kapisilinnik aalisarneq takujuk § 5, danskit naalagaaffianni innuttaassuseqartunit Kalaallit Nunaanni najugaqavissunit ingerlanneqassaaq, tak. Aalisarneq pillugu Inatsisartut inatsisaanni § 8, imm. 1. Nunani allani Danmarkiunngitsumi innuttaassusillit Kalaallit Nunaanni najugaqavissut ukiullu kingulliit marluk ataavartumik Kalaallit Nunaanniissimasut danskisut innuttaassuseqartutut pineqassapput.
  Imm. 2.  Inuussutissarsiummut atatinnagu kapisilinnik aalisarneq piffissap Naalakkersuisunit aalajangersarneqartup iluinnaani inuussutissarsiutigalugu aalisarneq pisinnaavoq.
  Imm. 3.  Inuussutissarsiummut atatinnagu kapisilinniarnermi qarsorsat qissattaatillu kisimik atorneqassapput kiisalu qassutit (ataatsit) 2000-inik nigartallit, taakkua tasillugit nigartaat minnerpaamik 140 mm-iusut.
  Imm. 4.  Qassutit nigartaat uuttorneqassapput aalisarnermik nakkutilliisut uuttuutaata ½ kiilumik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput.  Nigartat tamarmik imm. 1-imi piumasaqaat eqqortissavaat.
  Imm. 5.  Qassutit kapisilinniutit atorneqartut tamarmik piginnittup aqqanik imaluunniit taassuma angallataata normuanik nalunaaqutsersugaassapput. Nalunaaqutsiinermi atorneqartoq imermi allanngujaatsuussaaq.
  Imm. 6.  Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu qassusiarfigineqartassapput, pisat uumanissaminnut periarfissaat ajornerulertussaajunnaarlugit.


Inuussutissarsiummut atatinnagu kapisilinnik aalisarnermit pisanik nalunaaruteqartarneq

   § 10.  Inuussutissarsiummut atatinnagu kapisilinnik aalisarnermi kapisillit pisarineqartut tamarmik KANUAANA-mut nalunaarutigineqassapput.
  Imm. 2.  Pisat pillugit nalunaarutiginninneq nalunaarummi ilanngussaq 1 atorlugu pisassaaq. Pisat pillugit nalunaarutiginninnissaq uunga nassiunneqassaaq KANUAANA, Postboks 501, 3900 Nuuk, Telefax 34 63 60 imaluunniit e-mail-ikkut uunga gflk@nanoq.gl. Pisanik nalunaarutiginninneq qassutinik alakkaareerluni tikinnerit kinguninngua pisassaaq, takujuk § 9 imm. 6.


Pineqaatissiissutit

  § 11. §  2, imm. 1, 2. pkt., § 3, imm. 1, § 4, imm. 1, aamma imm. 3, § 6, imm. 3, 4 aamma 5, § 7, imm. 3, § 8, § 9 aamma § 10-mik unioqqutitsinerit Kalaallit Nunaanni Pinerluttulerinermik Inatsit naapertorlugu akiliisitsinermik kinguneqarsinnaapput. Akiliisitsineq Nunatta Karsianut tutsinneqassaaq.
  Imm. 2.  Inatsisilerinermi immikkoortut inuttut isigineqarsinnaasut pinerluttulerinermut inatsimmi malittarisassat malillugit imm. 1-imut ilaapput.
  Imm. 3.  Pinerluttulerinermik inatsimmi arsaarinnittarneq pillugu malittarisassat atuupputtaaq.


Atortuulersitsineq

  § 12.  Nalunaarut manna 12. oktober 2015 atuutilerpoq. Tamatuma peqatigisaanik kapisilinniarneq pillugu Namminersorlutik Oqartussat nalunaarutaat nr. 15, 13. august 2015-imeersoq atorunnaarpoq.



Namminersorlutik Oqartussat, ulloq 9. oktober 2015


Karl-Kristian Kruse

/

Jørgen Isak Olsen 

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk