Imartani Kalaallit Nunaata aalisarnikkut oqartussaaffigisaani raajarniarneq pillugu Namminersornerullutik Oqartussat nalunaarutaat nr. 23, 29. august 2002-imeersoq

Aalisarneq pillugu Inatsisartut inatsisaanni nr. 18-imi, 31. oktober 1996-imeersumi kingullermik Inatsisartut inatsisaatigut nr. 5, 21. maj 2002-imeersukkut allanngortinneqartumi, § 10, § 23, imm. 1, § 33, imm. 2 aamma § 34, imm. 3 malillugit aalajangersarneqarpoq:

 

Atuuffii

§ 1.Nalunaarut imartani Kalaallit Nunaata aalisarnikkut oqartussaaffigisaani inuussutissarsiutigalugu raajarniarnermut atuuppoq.

 

Nassuiaatit

§ 2. Nalunaarummi sumiiffiit pineqartut WGS84-imi nalunaarsorsimapput, iluarsiissutinik imartat assinginut Kalaallit Nunaannut atuuttuni nalunaarneqarsimasunik iluarsisarlugit.

§ 3. Nalunaarummi matumani  "Imartat Kalaallit Nunaata aalisarnikkut oqartussaaffigisai" aamma "tunngaviusumik killeqarfik" paasineqassapput imartatut aamma tunngaviusumik killeqarfittut imartat Kalaallit Nunaata aalisarnikkut oqartussaaffigisai pillugit statsministeriaqarfiup nalunaarutaanni aalajangersarneqartut.

§ 4. "Kalaallit Nunaata Kitaa"-tut paasineqassaaq NAFO-p imartaata 1-ip ilaa Kalaallit Nunaata aalisarnikkut oqartussaaffigisaaniittoq. "Kalaallit Nunaata Tunua"-tut paasineqassaaq ICES-ip imartaasa II-p, V-ip, XII-up aamma XIV-ip ilaat Kalaallit Nunaata aalisarnikkut oqartussaaffigisaaniittut.

§ 5. "Hareø-karsi" tassa imartaq 70o 20´ N-ip aamma 70o 45´ N-ip akornanniittoq kimmut 56o V-mik aamma kangimut tunngaviusumik killeqarfimmik killeqartoq.
Imm. 2. "Disko-karsi" tassa imartaq 68o N-ip aamma 70o 20´ N-ip akornanniittoq kimmut 56o V-mik aamma kangimut tunngaviusumik killeqarfimmik killeqartoq.
Imm. 3. "Sisimiut-karsi" tassa imartaq 66o N-ip aamma 67o N-ip akornanniittoq kimmut titarnermik tunngaviusumik killeqarfimmit 6 NM-inik ungasissuseqartumik killeqartinneqartoq kangimullu tunngaviusumik aalisarnikkut killeqarfimmit titarnermik sammiveqateqartumik killeqartinneqartoq.
Imm. 4. "Qaqortoq-karsi" tassa imartaq 59o 58,6´ N-ip aamma 60o 34,7´ N-ip akornanniittoq kimmut titarnermik tunngaviusumik killeqarfimmit 6 NM-nik ungasissuseqartumik killeqartinneqartoq kangimullu tunngaviusumik aalisarnikkut killeqarfimmit titarnermik sammiveqateqartumik killeqartinneqartoq.
Imm. 5. "Banan-karsi" tassaavoq imartaq aalisarnikkut tunngaviusumik killeqarfiup aamma nunagisap tunngaviusumik killeqarfianit 3 NM-inik ungasitsigisup akornaniittoq, piffinni 59o 58,6´ N-ip aamma 45o 21,9´ V-p (Naujat) 60o 34,7´ N-ip aamma 47o 34,9´ V-p (Qeqertat kujallerpaartaat) akornanniittoq.

 

Sinerissamut qanittumi aalisarneq

§ 6. Angallatinut sinerissamut qanittumi raajarniarsinnaanermut akuersissummik (PRA-SQT-akuersissut) pigisaqartunut imartami Kalaallit Nunaata aalisarnikkut oqartussaaffigisaani kitaani aalisarnermi sineriak kangimut killeqarfiuvoq.
Imm. 2. Aalajangersakkami aamma pineqarput angallatit OUYZ, OYKA, OZTZ, OVOJ, OVXD, OWES aamma OWMZ-mik radiukkut attaveqartilluni ilisarnaateqartut.
Imm. 3. "Banan-karsi"-mi aamma "Qaqortoq-karsi"-mi raajarniarneq angallatinut, OYKA, OZTZ aamma OVOJ-mik radiukkut attaveqartilluni ilisarnaatilinnut inerteqqutaavoq.
Imm. 4. " Hareø-karsi"-mi aalisarneq angallatinut OVXD, OWES aamma OWMZ-mik radiukkut attaveqartilluni ilisarnaatilinnut inerteqqutaavoq.

§ 7. Angallatinut sinerissamut qanittumi raajarniarsinnaanermut akuersissummik pigisalinnut angallammi nammineq tunisassiornissamut akuersissuteqarfigineqarsimasunut (akuersissut PRA-SQNT) imartami Kalaallit Nunaata aalisarnikkut oqartussaaffigisaani kitaani aalisarnermi tunngaviusumik killeqarfik kangimut killeqarfiuvoq. Taamaattorli piffissami 1. april-imit 31. oktober ilanngullugu, kitaani 61o N-imit 65o N-imut tunngaviusumik aalisarnikkut killeqarfimmit 3 NM-inik avasinnerusoq kangimut killeqarfiuvoq.
Imm. 2. Angallatit tamakku "Hareø-karsi"-mi, "Sisimiut-karsi"-mi aammalu "Banan-karsi"-mi aalisaqqusaanngillat.
Imm. 3. 70o 45´ N-ip avannaani najugaqarfiit kaajallallugit 5 NM-inik illersuutissatut killeqarfiit malinneqassapput aamma tamanna qilalukkat qernertat qaqortallu piniagaaffiini mattussigallartarnernut atuuppoq.

 

Avataasiorluni aalisarneq

§ 8. Angallatinut avataasiorluni raajarniarsinnaanermut akuersissummik pigisalinnut angallammi nammineq tunisassiornissamut akuersissuteqarfigineqarsimasunut (akuersissut PRA-ANT) imartani Kalaallit Nunaata aalisarnikkut oqartussaaffigisaani kitaani titarneq tunngaviusumik aalisarnikkut killeqarfimmik sammiveqateqartoq 3 NM-inik ungasissusilimmiittoq kangimut killeqarfiuvoq.
Imm. 2. Angallatit tamakku "Hareø-karsi" -mi, "Disko-karsi"-mi, "Sisimiut-karsi"-anni, "Banan-karsi"-mi aamma "Qaqortoq-karsi"-mi aalisaqqusaanngillat.
Imm. 3. 61o N-imit 65o N-imut tunngaviusumik killeqarfik tikillugu 1. novemberimit 31. marts ilanngullugu aalisartoqarsinnaavoq.
Imm. 4 "Hareø-karsi"-p aamma Sigguup akornanni angallatit taakku allorniusaq kimmukartoq 55o tikillugu aalisarsinnaapput, kisiannili Sigguup kujataani sineriammiit 3 NM-inik avasinnerusumi.
Imm. 5. 71o 30´ N-ip avannaani tunngaviusumik killeqarfik tikillugu najugaqarfiit kaajallallugit 5 NM-inik illersuutissatut killeqarfiit kiisalu piffissat qilalukkat qernertat qaqortallu piniagaanngiiffii malillugit aalisarneq ingerlanneqarsinnaavoq.

§ 9. Angallatinut Kalaallit Nunaata Kangiani, (Tunup imartaani) raajarniarsinnaanermut akuersissummik (PRA-TNAA-akuersissut) pigisaqartunut imartami Kalaallit Nunaata aalisarnikkut oqartussaaffigisaani 44o 00´ V- p kangiani aalisarnermi tunngaviusumik killeqarfik kimmut killeqarfiuvoq.
Imm. 2. Imartami 61o 49,6´N-ip aamma 62o 51,9´N-ip akornanni (Timmiarmiut kangerliumarngani) aammattaaq tunngaviusumik killeqarfiup iluani aalisarneq akuerisaavoq.

§ 10. Nunat allamiut angallataannut raajarniarsinnaanermut akuersissummik (PRA-NAA-akuersissut) pigisaqartunut imartami Kalaallit Nunaata aalisarnikkut oqartussaaffigisaani tunngaviusumik killeqarfimmit 12 NM-it iluanni aalisarneq inerteqqutaavoq.

 

Pineqaatissiissutit

§ 11. § 6, imm. 1, 3 aamma 4-mik, §§ 7, 8, 9 aamma 10-imi killeqarfinnik unioqqutitsineq akiliisitsinermik kinguneqassaaq.
Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik imalunniit piginneqatigiilluni umiarsuaatileqatigiiffik unioqqutitsippat ingerlatseqatigiiffik taannaatillugu akiliisitassatut akisussaasunngortinneqarsinnaavoq.
Imm. 3. Pinerluttulerinermi inatsimmi arsaarinnittarneq pillugu malittarisassat taamatuttaaq atorneqassapput.
Imm. 4. Kalaallit Nunaata eqqaani aalisarnermi malittarisassanik akuersissummiluunniit piumasaqaatinik unioqqutitsineq taassuma atorneqarsinnaatitaaneranut killiliissutinik kiisalu pissutsit ilungersunarnerutillugit imaluunniit unioqqutitsisoqaqqitsillugu piginnaatitaaffimmik arsaarinninnermik kinguneqarsinnaapput. Tamakku pillugit naalakkersuisut aalajangiissapput, nalunaarutigineqarneranillu ullut 15-it qaangiutsinnagit Nunatta Eqqartuussivianut, suliassanngortinneqarsinnaalluni aalisarneq pillugu inatsimmi § 21, imm. 4 malillugu.
Imm. 5. Pineqaatissiissutit pillugit suliat allatigut aalisarneq pillugu inatsimmi aalajangersakkat malillugit suliarineqassapput.

 

Atuutilerfia

§ 12. Nalunaarut 1. september 2002 atuutilerpoq.
Imm. 2. Peqatigitillugu Imartani Kalaallit Nunaata aalisarnikkut oqartussaaffigisaani raajarniarneq pillugu Namminersornerullutik Oqartussat nalunaarutaat nr. 20, 8. august 2002-imeersoq atuukkunnaarsinneqarpoq.




Namminersornerullutik Oqartussat, ulloq 29. august 2002




Hans Enoksen

/

Amalie Jessen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk