Kapisilinniarneq pillugu Namminersorlutik Oqartussat nalunaarutaat nr. 32 af 28. august 2020-meersoq

Aalisarneq pillugu Inatsisartut Inatsisaanni nr. 18, 31. oktober 1996-imeersumi, § 5, § 8, § 10, § 10a, imm. 1, § 13, imm. 2, § 23, § 25, § 26, § 33, imm. 2 aamma § 34, imm. 3, ilaatigut Inatsisartut inatsisaanni nr. 6, 20. maj 1998-imeersukkut, Inatsisartut inatsisaanni nr. 5, 21. maj 2002-meersukkut, Inatsisartut inatsisaanni nr. 28, 18. december 2003-meersukkut, Inatsisartut Inatsisaanni nr. 17, 3. december 2009-meersukkut, Inatsisartut Inatsisaanni nr. 12, 3. december 2012-imeersukkut Inatsisartut Inatsisaat nr. 18, 3. juni 2015-meersoq kiisalu kingullermik Inatsisartut inatsisaatigut nr. 28 28. november 2016-imeersukkut allanngortinneqarsimasut tunngavigalugit aalajangersarneqarpoq:

 

 

Kapitali 1

Atuuffia nassuiaatillu

 

Atuuffii

 

  § 1. Nalunaarut una Kalaallit Nunaata aalisarnikkut oqartussaaffigisaani kapisilinniarnermut atuuppoq:

1) Nunap Isuata kitaani NAFO-p sumiiffilersuiffiani 1-imi ingerlanneqartumut atuuppoq. Tunngaviusumik killigititamit 40 sømilit avataanni aalisarneq inerteqqutaavoq.

2) Kalaallit Nunaata Kangiata aalisarfiini. Paragraffit tulliuttut kisimik atuutissapput, tassalu § 6, § 7, § 8, § 9, § 10, § 11, § 12, § 13, § 14, § 15  aamma § 16.  Tunngaviusumik killigititamit 12 sømilit avataani kapisilinniarluni aalisarneq inerteqqutaavoq.

3) Kapisillit kuuani kapisilinniarnermi.

 

Nassuiaatit

 

  § 2. Inuussutissarsiutigalugu kapisilinniarneq nalunaarummi matumani paasineqassaaq pisat tamaasa ilaannaasaluunniit tuniniarnissaat siunertaralugu kapisilinniarnertut. 

  Imm. 2. Inuussutissarsiutiginagu kapisilinniarneq nalunaarummi matumani paasineqassaaq nammineq atugassanik kapisilinniarnertut.
  Imm. 3. Kapisilinnik pisineq nalunaarummi matumani paasineqassaaq inunnit kapisilinniarnissamut akuersissummik allagartaqartunit toqqaannartumik pisineq tigusinerlu.

 

Kapitali 2

Inuussutissarsiutigalugu kapisilinniarneq

 

Inuussutissarsiutigalugu kapisilinniarnermut piumasaqaatit

 

  § 3.  Inuussutissarsiutigalugu kapisilinniarnissamut akuersissummik allagartallit kisimik nalunaarutip atuuffigisaani pisarineqarsimasunik kapisilinnik tuniniaasinnaatitaapput, takuuk § 1.

 

  § 4.  Inuussutissarsiutigalugu kapisilinniarsinnaanermut allagartat akuersissutit qinnuteqareernermi Naalakkersuisunit tunniunneqartut piumasaqaataapput.
  Imm. 2.  Allagartat imm. 1 naapertorlugu akuersissutit qinnuteqartunut piumasaqaatinik makkuninnga naammassinnittunut taamaallaat tunniussisoqarsinnaavoq:
1)  Qinnuteqartoq inuiaqatigiinnut kalaallinut attuumassuteqavissoq, takuuk Aalisarneq pillugu Inatsisartut inatsisaanni § 3, imm. 4.
2)  Qassutinik kapisilinniutinik aamma angallammik kapisilinniummik 12,8 meterit (42 fod) tikillugit tamakkerlugu takissusilimmik qinnuteqartup nammineq pigisaqarnissaa.
3)  Qinnuteqarnermut atatillugu qinnuteqartumit pigineqartut qassutit kapisilinniutit qassiunerinik qanorlu ittuunerinik imaluunniit ilisarnaataannik nalunaaruteqartoq.
4)  Qinnuteqartut aalisarnerup siuliani akuersissummik peqarsimasut aalisarnerup siuliani nalunaaruteqartussaatitaaneq pillugu §§ 9 aamma 16 naapertorlugu naammassinnissimassapput.

 

Inuussutissarsiutigalugu kapisilinniarnermi piniutit

 

  § 5. Uku taamaallaat atorlugit inuussutissarsiutigalugu kapisilinniartoqarsinnaavoq:

1)  qarsorsat, imaluunniit
2)  qassutit tasillugit minnerpaamik 140 mm-inik nigartallit atorlugit. 

  Imm. 2.  Qassutit nigartaat uuttorneqassapput uuttuutip ½ kiilumik oqimaalutserlugu nigartamut ikkunneratigut kingornatigullu nakkartinneratigut. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput. Nigartaani tamani imm. 1, normu 2-mi piumasaqaatit naammassineqarsimassapput. 

  Imm. 3.  Qassutit kapisilinniutit atorneqartut tamarmik piginnittup atii tamaasa ilanngullugit imaluunniit taassuma angallataata atianik aamma umiarsualiviup ilisarnaataanik normuanillu nalunaaqutsigaassapput. Nalunaaqutsiussat imermit arrortinneqarsinnaassanngillat.
  Imm. 4.  Silap pissusaata taamaaliortoqarsinnaatippagu qassutit kapisilinniutit aalajangersumik akulikitsumillu napitaajarneqartassapput, taamaalilluni aalisakkap pisarineqartup atorsinnaassusia ajornerulertussaajunnaarlugu.

 

Inuussutissarsiutigalugu kapisilinniarnerup aqunneqarnera

 

  § 6.  Inuussutissarsiutigalugu kapisilinniarneq pisassiissutit aallaavigalugit nunami tunitsivinnut tunisassanik imaluunniit najukkani kalaalimineerniarfinnut najukkamilu suliffeqarfinnut tuniniarneqartussanik aalisarnertut ingerlanneqarsinnaavoq.

 

  § 7.  Inuussutissarsiutigalugu aalisarnermut § 6 malillugu Naalakkersuisut ukiut tamaasa, nunat tamalaat akornanni isumaqatigiissutit mianeralugit, Kalaallit Nunaanni kapisilittassanik aalajangersaassapput.

  Imm. 2.  Naalakkersuisut KNAPK-lu isumasioqatigereerlugu inuussutissarsiutigalugu kapisilinniarnissamut  ulloq aallartiffissaq aalajangertassavaat. Ulloq aallartiffia nuna tamakkerlugu tusagassiutit aqqutigalugit nalunaarutigineqartassaaq.
  Imm. 3.  Inuussutissarsiutigalugu kapisilinniarneq ulloq aalajangiiffigineqartoq sioqqullugu aallartinneqassanngilaq.

  Imm. 4.  Inuussutissarsiutigalugu kapisilinniarneq taamaallaat pisassatut aalajangerneqartut, aalisakkat uumatillutik uuttuutaattut (ilivitsuutillugit) kiilunngorlugit taaneqartut iluanni pisinnaavoq.
  Imm. 5.  Inuussutissarsiutigalugu kapisilinniarnermit pisat Kalaallit Nunaata avataani taamaallaat pisiarineqarsinnaapput tuniniarneqarsinnaallutillu Naalakkersuisut akuersissuteqarnerisigut.

 

  § 8.  Pisassiissutit § 7 malillugu aalajangikkat tamakkerlugit pisarineqarnissaat qanillippat, Naalakkersuisut nalunaarutigissavaat, qaqugu inuussutissarsiutigalugu kapisilinniarneq kiisalu taamatut aalisarnermit pisanik pisineq aamma tunisineq unissanersoq.
  Imm. 2.  Imm. 1 malillugu nuna tamakkerlugu tusagassiutit aqqutigalugit nalunaarutigineqartassaaq.
  Imm. 3.  Imm. 1 malillugu aalisarneq unitsinneqarpat, inuussutissarsiutigalugu kapisilinniarneq kiisalu taamatut aalisarnermit pisanik pisiortorneq tunisinerlu inerteqqutaalissapput.

 

Inuussutissarsiutigalugu kapisilinniarnermit pisanik nalunaaruteqartarneq

 

  § 9. Inuussutissarsiutigalugu aalisartunit kapisilittarineqartut tamarmik Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) ingerlaannaq nalunaarutigineqassapput.
  Imm. 2.  Tunisat annertussusii "niaquernagit erlaveerlugit" nalunaarutigineqarpata naatsorsueriaaseq 1,11 atorneqassaaq aalisakkat ilivitsunngortillugit naatsorsorneranni.
  Imm. 3.  Inuussutissarsiutigalu aalisarnissamut akuersissutillit kalaalilimineerniarfinni toqqaannaq tunisisartut tulaassinerit tamaasa pillugit nalunaaruteqartassapput. Nalunaaruteqarnermi kapisillit pisat tamarmik ilaatinneqassapput. Pisat pillugit nalunaarutiginninneq nalunaarummi ilanngussaq 1 atorlugu pisassaaq. Kapisilinnik tamatigut tulaassinerit kingorna nalunaarutiginninneq uunga nassiunneqartassaaq: KANUAANA, Postboks 501, 3900 Nuuk, Telefax 34 63 60 imaluunniit e-mailikkut
gflk@nanoq.gl. Sullissivik.gl-ikkut aamma nalunaarutiginnittoqarsinnaavoq.

 

Kapitali 3

Inuussutissarsiutiginagu kapisilinnik aalisarnermit pisanik nalunaaruteqartarneq

 

Inuussutissarsiutiginagu kapisilinnik aalisarnermut piumasaqaatit

 

  § 10.  Inuussutissarsiutiginagu kapisilinniarnissamut piumasaqaataavoq akuersissut qinnuteqareernikkut Naalakkersuisunit tunniunneqartoq.
  Imm. 2.  Imm. 1 malillugu qinnuteqartunut piumasaqaatinik makkuninnga naammassinnittunut taamaallaat akuersissutinik tunniussisoqarsinnaavoq:
1)  Aalisarneq pillugu Inatsisartut inatsisaanni § 8, imm. 1-imi piumasaqaatinik naammassinnissimasunut.
2)  Qinnuteqartunut aalisarnerup siuliani akuersissummik peqarsimasunut aalisarnerup siuliani nalunaaruteqartussaatitaaneq pillugu §§ 15 aamma 16 naapertorlugu naammassinnissimasunut.

Inuussutissarsiutiginagu kapisilinniarnermi piniutit

 

  § 11. Uku taamaallaat atorlugit inuussutissarsiutiginagu kapisilinniartoqarsinnaavoq:

1)  qarsorsat, imaluunniit
2)  qassutit ataatsit 2000-inik nigartallit, taakkua tasillugit nigartaat minnerpaamik 140 mm-iusut.
  Imm. 2. Qassutit nigartaat uuttorneqassapput uuttuutip ½ kiilumik oqimaalutserlugu nigartamut ikkunneratigut kingornatigullu nakkartinneratigut. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput. Nigartaani tamani imm. 1, normu 2-mi piumasaqaatit naammassineqarsimassapput.
  Imm. 3.  Qassutit piginnittup atii tamaasa ilanngullugit nalunaaqutsigaassapput. Nalunaaqutsiussat imermit arrortinneqarsinnaassanngillat.
  Imm. 4.  Silap pissusaata taamaaliortoqarsinnaatippagu qassutit kapisilinniutit aalajangersumik akulikitsumillu napitaajarneqartassapput, taamaalilluni aalisakkap pisarineqartup atorsinnaassusia ajornerulertussaajunnaarlugu.

 

Inuussutissarsiutiginagu kapisilinniarnerup aqunneqarnera

 

  § 12.  Inuussutissarsiutiginagu kapisilinniarneq pisassiissuteqarnikkut ingerlanneqarsinnaavoq.

 

  § 13.  Inuussutissarsiutiginagu aalisarnermut, takuuk § 12, Naalakkersuisut ukiut tamaasa nunat tamalaat akornanni isumaqatigiissutit mianeralugit kalaallit kapisilittassanik aalajangersaassapput.
  Imm. 2.  Inuussutissarsiutiginagu kapisilinniarnerup inuussutissarsiutigalugu aalisarneq aallarteqatigissavaa, takuuk § 7, imm. 2.
  Imm. 3.  Inuussutissarsiutiginagu kapisilinniarneq taamaallaat pisassatut aalajangerneqartut, aalisakkat uumatillutik uuttuutaattut (ilivitsuutillugit) kiilunngorlugit taaneqartut, iluanni pisinnaavoq.

  § 14. Kapisilittassiissutit § 13-mi aalajangikkat tamakkerlugit pisarineqarnissaat qanillippat, Naalakkersuisut nalunaarutigissavaat, qaqugu inuussutissarsiutiginagu kapisilinniarneq unissanersoq.
  Imm. 2.   Imm. 1 malillugu nuna tamakkerlugu tusagassiutit aqqutigalugit nalunaarutigineqartassaaq.
  Imm. 3.  Aalisarneq unitsinneqarpat, takuuk imm. 1, inuussutissarsiutiginagu kapisilinniarneq qanorluunniit ingerlanneqartoq inerteqqutaalissaaq.

 

Inuussutissarsiutiginagu kapisilinnik aalisarnermit pisanik nalunaaruteqartarneq

 

  § 15.  Inuussutissarsiutiginagu kapisilinniarnermi kapisillit pisarineqartut tamarmik KANUAANA-mut nalunaarutigineqassapput.
  Imm. 2.  Pisat pillugit nalunaarutiginninneq nalunaarummi ilanngussaq 1 atorlugu pisassaaq. Imaluunniit Sullissivik.gl-ikkut aamma nalunaarutiginnittoqarsinnaavoq. Kapisilinnik qassutinik napitaajaanerup kingornatigut, takuuk § 11, imm. 4, nalunaarutiginninneq apuutereernermi ingerlaannaq uunga nassiunneqartassaaq:  KANUAANA, Postboks 501, 3900 Nuuk, Telefax 34 63 60 imaluunniit e-mailikkut
gflk@nanoq.gl.

 

Kapitali 4

Inuussutissarsiutigalugu aamma inuussutissarsiutiginagu kapisilinniarnermi pisaqanngitsoornerit nalunaarutigineri

 

  § 16.  Inuussutissarsiutigalugu kiisalu inuussutissarsiutiginagu kapisilinniarnissamut akuersissutaatillit tamarmik kapisilinniarsimanngitsut, tamanna ilanngussaq 1 atorlugu nalunaarutigissavaat.  

  Imm. 2.  Inuussutissarsiutigalugu kiisalu inuussutissarsiutiginagu kapisilinniarnissamut akuersissutaatillit tamarmik kapisilinniarsimasut kapisilinngitsoorsimasullu, tamanna ilanngussaq 1 atorlugu nalunaarutigissavaat.  

  Imm. 3.  Akuersissutinik atorneqanngitsunik pisaqannginnermillu nalunaaruteqarneq nalunaarummi ilanngussaq 1 aqqutigalugu pissaaq. Imaluunniit Sullissivik.gl-ikkut aamma nalunaarutiginnittoqarsinnaavoq. Nalunaarutiginninneq kapisilinniarnerup matoreernerani kingusinnerpaamik ullut 30-t qaangiunneranni uunga nassiunneqassaaq: KANUAANA, Postboks 501, 3900 Nuuk, Telefax 34 63 60 imaluunniit e-mailikkut gflk@nanoq.gl

 

Kapitali 5

Pineqaatissiissuteqartarneq

 

  § 17.   § 1, nr. 1-imik aamma nr. 2-mik, § 3-mik, § 4-mik, § 5, imm. 1-mik, imm. 3-mik, aamma imm. 4-mik, § 7, imm. 3-mik, 4-mik aamma 5-imik, § 8, imm. 3-mik, § 9-mik, § 10, imm. 1-imik, § 11, imm. 1-mik, imm. 3-mik aamma imm. 4-mik, § 13, imm. 3-mik, § 14, imm. 3-mik, § 15-imik  aamma § 16-imik unioqqutitsineq Kalaallit Nunaanni Pinerluttulerinermik Inatsit naapertorlugu akiliisitsinermik kinguneqarsinnaapput.

  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

  Imm. 3.  Kalaallit Nunaanni Pinerluttulerinermi inatsisimi malittarisassat malillugit imm. 1-imi aalajangersakkanik unioqqutitsineq arsaarinnittoqarsinnaavoq.

  Imm. 4.   Akiliisitsissutit imm. 1-2 malillugit pineqaatissiissutigineqartut Nunatta Karsianut pisassanngortinneqassapput.

 

Kapitali 6

Atortuulersitsineq, atorunnaarsinneqarnissaa kiisalu ikaarsaariarnermi aalajangersakkat

 

  § 18.  Nalunaarut una atortuulissaaq ulloq 1. september 2020-mi.  

  Imm. 2.  Peqatigitillugu Namminersorlutik Oqartussat kapisilinniarneq pillugu nalunaarutaat nr. 5 21. september 2018-imeersoq atorunnaarpoq.




Namminersorlutik Oqartussat, ulloq af 28. august 2020




Jens Immanuelsen

/

Jørgen Isak Olsen

 

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk