Katerisimaartarnernut, ininut kikkunnit tamanit iserfigineqarsinnaasunut assartuutinullu killilersuigallarnerit pillugit Namminersorlutik Oqartussat nalunaarutaat nr. 19, 16. juni 2020-meersoq

Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 12 a aamma 12 b, aamma § 29, imm. 2 malillugit aalajangersarneqarpoq:

 

Atuuffiata killilerneqarnera

 

  § 1.  Nalunaarut napparsimmavissuarnut, nakorsiartarfinnut kiisalu nakorsiartarfinnut namminersortunut niuertarfinnullu peqqissaanermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 2.  §§ 3-5 katersuunnernut naalakkersuinikkut allatulluunniit isummersornissamik siunertalinnut atuutinngillat.

 

Nassuiaatit

 

  § 2.  Nalunaarummi matumani sumiiffiit tassaapput: kommunit Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaat nr. 11, 30. oktobari 1998-imeersumi aalajangersarneqartut.

 

Katerisimaartarnerit il.il. pillugit killilersuigallarnerit

 

  § 3.  Illup iluani silamilu aaqqissuussanik, nalliuttorsiornernik, sammisaqartitsinernik assigisaanilluunniit ingerlataqarniarnerni nalinginnaasumik aaqqissuussanut, nalliuttorsiornernut, sammisaqartitsinernut assigisaanulluunniit peqataaniartut sumiiffinniit assigiinngitsunit angalasariaqassagunik amerlanerpaamik katillugit 30-usinnaapput. Oqaaseqatigiit siulliit eqqortinnissaannut aaqqissuussisoq akisussaavoq.
  Imm. 2.  Imm. 1-imi taaneqartut nalinginnaasumik peqataaniarnermi angalasariaqartut matumani tassaapput aaqqissuussani, nalliuttorsiornerni, sammisaqartitsinerni assigisaaniluunniit pisussat sioqqullugit inuk imaluunniit inuit ataatsimoortut peqataaniarlutik nalunaartariaqartut, imaluunniit inuk inuilluunniit ataatsimoorlutik sumiiffinniit assigiinngitsunit angalariarlutik sumiiffimmi aalajangersimasumi unammillutik il.il. naapittut.

 

  § 4.  Illup iluani aaqqissuussat, nalliuttorsiornerit, sammisaqartitsinerit assigisaallu § 3-mi ilaanngitsut amerlanerpaamik 100-nik peqataasoqaqqusaapput, § 8-millu malinnissallutik. Oqaaseqatigiinnik siullernik malinninnissamut aaqqissuussisoq akisussaavoq.

 

  § 5.  Silami aaqqissuussat, nalliuttorsiornerit, sammisaqartitsinerit assigisaallu § 3-mi ilaanngitsut amerlanerpaamik 250-inik peqataasoqaqqusaapput. Oqaaseqatigiit siulliit eqqortinnissaannut aaqqissuussisoq akisussaavoq.
  Imm. 2.  Imm. 1-imi piumasaqaataavoq aaqqissuussat, nalliuttorsiornerit, sammisaqartitsinerit assigisaallu inuit sumiiffinniit allanit aaqqissuussamut, nalliuttorsiornermut, sammisaqartitsinermut assigisaanulluunniit angalallutik peqataajartornissaat toqqaannartumik kaammattuutigineqassanngitsoq.
  Imm. 3.  Inuit sumiiffinniit allanit aaqqissuussamut, nalliuttorsiornermut, sammisaqartitsinermut assigisaanulluunniit angalallutik peqataajartornissaat toqqaannartumik kaammattuutigineqarpat aaqqissuussami, nalliuttorsiornermi, sammisaqartitsinermi assigisaaniluunniit amerlanerpaamik 30-nik peqataasoqaqqusaassaaq.

 

Ininut kikkunnilluunniit iserfigineqarsinnaasunut piumasaqaatit

 

  § 6.  Namminersorlutik inuussutissarsiutillit aamma suliffeqarfiit pisortanit pigineqartut ininik kikkunnit tamanit iserfigineqarsinnaasunik pigisallit piumasaqaatinik makkuninnga naammassinnissimassapput:
1)  Inuit ininut qatserisartoqarfinni oqartussaasunik akuerineqarsimasunut isersinnaatitaasut amerlanerpaaffissaasa affaannaat akuerineqarsinnaapput.
2)  Init ajornanngippat imatut pequsersorsimassapput tuniluunnissaq minnerpaaffianiitinneqassalluni, tassunga ilaalluni pisisut pulaartullu imminnut qanillinnginnissaat periarfissaqartillugu.
3)  Inimi ininiluunniit tamanit iserfigineqarsinnaasuni eqqiliusaarnissaq ileqqorissaarnissarlu pillugit Nunatta Nakorsaaneqarfianiit paasissutissanik nivinngaasoqassaaq.
4)  Sulisut tamarmik Nakorsaaneqarfiup eqqiluisaaqqissaarnissamik naleqquttumillu pissusilersornissamik innersuussutaanik malinninnissaat qulakkeerneqassaaq. 
5)  Pisisunut pulaartunullu ajornanngippat imermik qaqorsaammillu imaluunniit assammut spritimik ersittoqassaaq.
6)  Nerisassanik poortorneqarsimanngitsunik tuniniaanerni sulisut aaqqateqassapput.

 

  § 7.  Namminersorluni inuussutissarsiutilik politiit naliliinerat malillugu § 6-imik unioqqutitsisimappat aamma namminersorluni inuussutissarsiutilik § 6-imik malinninnissaa ilimagineqanngippat, inimik piffissami aalajangersimasumi tamanut matoqqatitsinissaanik politiit peqqusisinnaapput.

 

Assartuutinut piumasaqaatit

 

  § 8.  Assartuutit issiaffiusinnaasut sinnerlugit ilaasoqaqqusaanngillat. Oqaaseqatigiinni siullermi taaneqartup naammassinninnissaa assartuutip piginnittuata akisussaaffigaa.

 

Pineqaatissiissuteqartarnerit

 

  § 9.  Inummut §§ 3-6-imik, aamma 8-mik, unioqqutitsisumut imaluunniit § 7 malillugu peqqusinermik malinnikkumanngitsumut Kalaallit Nunaannut Pinerluttulerinermik Inatsit malillugu pineqaatissiisoqarsinnaavoq.
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) Pinerluttulerinermik Inatsimmi kapitali 5-imi malittarisassat malillugit Pinerluttulerinermut Inatsiseqartitsinikkut akisussaatinneqarlutik pineqaatissinneqarsinnaapput.

 

Atuutilersitsineq aamma atuunneranut piffissaliussaq

 

  § 10.  Nalunaarut ullormi 16. juni 2020, nal. 12:00 atuutilissaaq.
  Imm. 2.  Nalunaarut malillugu killilersuinerit, inerteqquteqartitsinerit, peqqusinerit il.il. 1. august 2020 ilanngullugu atuutissapput.

 

 

 

Namminersorlutik Oqartussat, ulloq 16. juni 2020

 

 

 

Anna Wangenheim

/

Tine Pars

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk