Kommunit aqunneqarnerat pillugu Inatsisartut inatsisaata allanngortinneqarnera pillugu Inatsisartut inatsisaat nr. 6, 29. november 2013-imeersoq (Kommunalbestyrelsimit ilaasortaajunnaarnissamik qinnuteqaatit. Najukkami ataatsimiititaliat aamma ataatsimiititaliat immikkut ittut kiisalu ataatsimiititaliani ilaasortat aningaasarsiaqartinneqartarnerat. Borgmesterit soraarnerussutisiaqartinneqartarnerat pillugu aaqqissuussineq.)

§ 1

Kommunit aqunneqarnerat pillugu Inatsisartut inatsisaat nr. 22, 18. november 2010-meersoq imaattunik allannguuteqarpoq:


1.
§ 15, imm. 2, imatut oqaasertalerneqarpoq:
Imm. 2.  Kommunalbestyrelsimi ilaasortaq imm. 1-imi taagorneqartuni pissuteqarluni qaammatit marluk sinnerlugit suliassanik isumagisaqarnissamik pisinnaanngitsoq, kommunalbestyrelsimut ilaasortaq akissaateqarani sulinngiffeqarallarnissamik qinnuteqassaaq. Sulinngiffeqarallarnissamik qinnuteqaat borgmesterimut nassiunneqassaaq, qinnuteqaallu imaqassaaq pissutaasutut tunuliaqutaasoq pillugu paasissutissamik aamma taamatut pisinnaanginnermut pissutaasup qanoq sivisutiginissaa naatsorsuutigineqarnersoq. Qinnuteqarnermut atatillugu uppernarsaatit pisariaqartut qinnuteqaammut ilaatinneqassapput imaluunniit borgmesterip taakkuninnga noqqaassuteqarneratigut nassiunneqassapput. Tamatuma kingorna sinniisussaq ataatsimiinnissami tulliuttumi siullermi peqataaqqullugu borgmesterip aggersassavaa.”

2. § 15, imm. 3, imatut oqaasertalerneqarpoq:
Imm. 3.  Kommunalbestyrelsip aalajangissavaa ilaasortap sulinngiffeqarallarnissaamik qinuteqaataani aamma sinniisussap isernissaanut piumasaqaataasut eqqortinneqarnersut.”

3. § 31, imm. 3, atorunnaarpoq.

4. § 31, imm. 4, matuma kingorna imm. 3-nngortussaq, imatut oqaasertalerneqarpoq:
Imm. 3.  Kommunalbestyrelsip aalajangiussinnaavaa ataatsimiititaliani il.il. imm. 1-imi taaneqartuni kommunalbestyrelsimi ilaasortaanngitsunik sinniisunik allanik toqqaasoqarnissaa, inatsisini allani immikkut ittumik taamaaliorsinnaatitsisoqarpat aamma suliassanik allanik isumaginnittoqarsinnaatitaappat, kommunabestyrelsimit suliassatut tunniussanik."

5. § 31-ip kingorna ilanngunneqarpoq:
§ 31a.  Kommunalbestyrelsi kommunimi illoqarfinni tamani najukkami ataatsimiititalianik ataatsimik arlalinnilluunniit pilersitsisinnaavoq. Najukkani ataatsimiititaliat suliassaqarfinnik aalajangersimasunik isumaginnittuusinnaapput imaluunniit kommunalbestyrelsimut, aningaasaqarnermut ataatsimiititaliamut imaluunniit aamma ataatsimiititalianut ataavartunut piareersaasiornermik siunnersortaanermillu atuuffeqarsinnaallutik.
Imm. 2.  Najukkami ataatsimiititaliat ilaasortalersugaanermikkut qanoq katitigaanissaat qanorlu annertutigisumik peqataatitsisoqassanersoq kommunalbestyrelsip aalajangiiffigissavaa, tassunga ilanngullugit kattuffiit, najukkani aalajangersimasuni innuttaasut ataatsimoortut, partiit aamma ataatsimoorlutik qinigassanngorteqatigiit inuilluunniit allat ataatsimiititaliani ilaasortassatut innersuussutigineqassanersut imaluunniit ataatsimiititaliat ataatsimiinnerini alaatsinaattutut peqataatinneqartassanersut.
Imm. 3.  Najukkami ataatsimiititaliat suliassaqarfii kommunalbestyrelsip aalajangersaavigissavai.
Imm. 4.  Najukkami ataatsimiititaliami ilaasortanut, kommunalbestyrelsimi ilaasortaanngitsunut, kommunalbestyrelsi aalajangersimasumik angissusilikkamik aningaasarsiaqartitsisinnaavoq. Aningaasarsiaritinneqartussat tunniunneqarsinnaapput Naalakkersuisut aalajangersagaat tak. § 66, imm. 6 malillugu amerlanerpaaffissaliussat sippornagit.
Imm. 5. Kommunalbstyrelsimi, aningaasaqarnermut ataatsimiititaliami imaluunniit ataatsimiititialiani ataavartuni suliassat suliarineqarnerannut atatillugu immikkut ilisimasaqartut aamma paasisimasallit imaluunniit immikkut ittunik soqutigisallit ilaatinneqartarnissaat siunertaralugu kommunalbestyrelsi ataatsimiititalianik immikkut ittunik pilersitsisinnaavoq.
Imm. 6.  Ataatsimiititaliat imm. 1-imi aamma 5-imi taaneqartut kommunalbestyrelsip atuuffissaata iluani piffissami aalajangersimaqqinnaartumi atuuttussanngorlugit qanorluunniit ilinikkut pilersinneqarsinnaapput.”

6. § 34-imi allanngortinneqarput ”§§ 24, 26 aamma § 31” imaalersillugit: ”§§ 24, 26, 31 aamma § 31a”.

7. § 51, imm. 1, imatut oqaasertalerneqarpoq:
§ 51. Nunaqarfinni aqutsisut ataasimoorussat aamma nunaqarfinni aqutsisut ilaasortanik 3-nik imaluunniit 5-inik amerlassuseqarput. Tamanna pillugu kommunalbestyrelsip aalajangernera pissaaq nunaqarfinni aqutsisussanik ukioq qinersiviusussaq sioqqullugu, ukiup naannginnerani.”

8. § 51, imm.  2, atorunnaarpoq. Imm. 3 aamma 4, matuma kingorna tassaalerput imm. 2 aamma 3.

9. § 67, imm. 1, imatut oqaasertalerneqarpoq:
§ 67.  Naalakkersuisut maleruagassanik tunniussisarnissamullu tunngasut makkununnga tunngasut aalajangersaaffigissavaat:
1)  Borgmesterinut aningaasarsiaqartitsisarneq aamma soraarnerussutisiaqartitsisarneq.
2)  Borgmesterit tullersortaasa imaluunniit kommunalbestyrelsini ilaasortat, borgmesterip peqanngikkallarnerani borgmesterip suliassaanik isumaginnittussanngortitaasut aningaasarsiaqartinneqartarnerat.”

10. § 67-ip kingorna ilanngunneqarput:
§ 67a.  Naalakkersuisut makkununnga tunngasut maleruagassiorfigissavaat:
1)  Borgmesterinut aamma taakku aapparisaasa qitornaasalu soraarnerussutisiassaannik tunniussisarnissaq.
2)  Inatsisartuni Naalakkersuisunilu ilaasortat soraarnerussutisiaqartinneqartarnerannut maleruagassat atuuttut assigisaannik borgmesterit soraarnerussutisiaqarnermikkut inuttut aaqqissuussivigineqarnissaat.
Imm. 2.  Inuttut namminerisamik soraarnerussutisiaqalernissamut aaqqissuussivigineqarsin-naanissamik maleruagassat 2013-imi 1. majimi taassumaluunniit kingorna borgmesterinngortussanut atuutissapput, tak. imm. 1, nr. 2. Matumani maleruagassat aalajangersarneqartut naapertorlugit soraarnersussutisiaqalernissamik aaqqissuussinerup siusinnerpaamik pilersinneqarsinnaapput 2014-imi januaarip 1-anit sunniuteqartumik.
Imm. 3.  Borgmesterit, qinigaaffimmi 2013-imi naasussami sivikinnerpaamik ukiuni sisamani borgmesterioreersimasut, imm. 2-mi aalajangersagaq malinngikkaluarlugu imm. 1, nr. 1-imi maleruagassat naapertorlugit pineqarnissartik toqqarsinnaavaat.
Imm. 4.  Soraarnerussutisiaqariaasererusutamik toqqaaneq tak. imm. 3, kingusinnerpaamik Inatsisartut inatsisaata atortuulersinneqarneraniit qaammatit marluk qaangiutsinnagit kommunalbestyrelsimut allakkatigut nalunaarutigineqassaaq. Toqqagat pituttuisuussaaq siunissamilu borgmesteriusarnissami najoqqutarineqartassalluni.”



§ 2

Inatsisartut Inatsisaat 1. januar 2014-imiit atuutsilissaaq.



Kalaallit Nunaanni Namminersorlutik Oqartussat, ulloq 29. november 2013



Aleqa Hammond

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk