Katerisimaartarnernut, ininut kikkunnit tamanit iserfigineqarsinnaasunut assartuutinullu killilersuigallarnerit pillugit Namminersorlutik Oqartussat nalunaarutaat nr. 11, 15. februar 2021-meersoq

Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 12 a aamma 12 b, aamma § 29, imm. 2 malillugit aalajangersarneqarpoq:

 

Atuuffiata killilerneqarnera

 

  § 1.  Nalunaarummi §§ 2-5 katersuunnernut naalakkersuinikkut allatulluunniit isummersornissamik siunertalinnut atuutinngillat. 
  Imm. 2.  Nalunaarummi § 6 napparsimavinnut, nakorsiartarfinnut kiisalu nakorsiartarfinnut namminersortunut niuertarfinnilu peqqissaanermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut ulluunerani neqeroorutinut namminersortunut pisortaniillu pigineqartunut, atuarfinnut, ilinniarfeqarfinnut il.il. atuutinngilaq, nappaatit tunillaassortut akiorniarlugit iliuutsit pillugit Inatsisartut peqqussutaanni § 22 takuuk.
  Imm. 4.  Nalunaarut eqqartuussisunut atuutinngilaq.

 

Aaqqissuussinernik il.il., peqataaniarnermi t nunanit allanit angalaqqaarluni peqataaffigineqarsinnaasunik inerteqquteqarneq

 

  § 2.  Illup iluani silamilu aaqqissuussanik, nalliuttorsiornernik, sammisaqartitsinernik assigisaannilluunniit ingerlataqarnerit, nalinginnaasumik aaqqissuussanut, nalliuttorsiornernut, sammisaqartitsinernut assigisaannulluunniit peqataaniarnermi nunanit allanit angalaqqaarluni peqataaffigineqarsinnaasut taamatulluunniit naatsorsuuteqarfigineqartut inerteqqutaapput, taamaattorli imm. 2, 3 aamma § 3 takukkit.  
  Imm. 2.  Aaqqissuussani, nalliuttorsiornerni, sammisaqartitsinerni assigisaanniluunniit peqataanissamut nalunaarnissamik piumasaqaatilinni inuit nunanit allaneersut aaqqissuussamut, nalliuttorsiornermut, sammisaqartitsinermut assigisaannulluunniit peqataasussatut nalunaarsorsinnaannginnissaat aaqqissuussisup qulakkiissavaa. Imm. 1 malinneqarpat, taava aaqqissuussaq, nalliuttorsiorneq, sammisaqartitsineq assigisaanilluunniit ingerlataq ingerlanneqarsinnaavoq.
  Imm. 3.  Pikkorissartitsinerit, isumasioqatigiinnerit assigisaallu imm. 2-mi ilaapput.
  Imm. 4.  Namminerisamik aaqqissuussinerit, soorlu kuisitsinerit, inuuissiornerit, apersortinnerit, soraarummeertoqarneranut atatillugu nalliuttorsiortitsinerit, katinnerit ilisinerillu imm. 1-imi ilaanngillat. Namminerisamilli aaqqissuussinerit § 4, imm. 1-imi aamma § 5, imm. 1-imi ilaapput.

 

Aaqqissuussinernut il.il kommuninit allanit angalalluni peqataaffigineqartussanut piumasaqaatit

 

  § 3.  Illup iluani silamilu aaqqissuussat, nalliuttorsiornerit, sammisassaqartitsinerit assigisaalluunniit, kommuninit allaneersunit peqataaffigineqartut, taamaallaat piumasaqaatit tulliuttut malinneqarpata ingerlanneqarsinnaapput: 
1)  Aaqqissuussineq il.il. Nunatta avataaniit Kalaallit Nunaannut angalanermi piumasaqaatit pillugit Namminersorlutik Oqartussat nalunaarutaanni § 12, imm. 1 naapertorlugu tikittarfimmi aalajangersimasumi pisussaappat.
2)  Aaqqissuussineq il.il. sioqqullugu ulluni 30-ni illoqarfimmi aaqqissuussamik ingerlatsiffiusussami Covid-19-imik tunillatsittoqarsimanngippat.
  Imm. 2. Aaqqissuussami il.il. inuit 50-it sinnerlugit peqataassappata aaqqissuussinerup il.il. ingerlanneqarnera sioqqullugu tamanna Nunatta Nakorsaaneqarfianit akuersissutigineqarpat. Akuersissuteqarnissamut atatillugu Nunatta Nakorsaaneqarfia piumasaqaatinik aalajangersaasinnaapput. 
  Imm. 3.  Ullut kingulliit 14-it iluanni nunamut maanga tikissimagaanni imaluunniit meterit marluk iluanni inunnik ullut 14-it iluanni nunamut maanga tikissimasunik attaveqaqateqarsimagaanni aaqqissuussamut il.il. peqataanissaq imaluunniit najuunnissaq inerteqqutaavoq.
  Imm. 4. Aaqqissuussamut il.il. peqataasut tamarmik peqataareernerup kingorna angerlannginnerminni misissortissapput, illoqarfimmi Covid-19-imik tunillatsittoqarsimasoq paasineqarpat.
  Imm. 5.  Aaqqissuussamik il.il. aaqqissuussisuusup aaqqissuussap il.il. nalunaarummi matumani malittarisassat tamaasa naapertorlugit ingerlanneqarnissaa qulakkiissavaa.
  Imm. 6.  Pikkorissarnerit, isumasioqatigiinnerit assigisaallu imm. 1-mittaaq ilaapput. 
  Imm. 7.  Namminerisamik aaqqissuussinerit, soorlu kuisitsinerit, inuuissiornerit, apersortinnerit, soraarummeertoqarneranut atatillugu nalliuttorsiortitsinerit, katinnerit ilisinerillu imm. 1-imi ilaanngillat. Namminerisamilli aaqqissuussinerit § 4, imm. 1-imi aamma § 5, imm. 1-imi ilaapput.
  Imm. 8.  Nunatta Nakorsaaneqarfia imm, 1-5-mut immikkut akuersissuteqarsinnaavoq, pissutsinik piviusunik tamanna tunngavilersorneqarsinnaappat.

 

Illup iluani aaqqissuussinerni il.il. peqataasinnaasunut killilersuineq

 

  § 4.  Illup iluani aaqqissuussinerit, nalliuttorsiornerit, sammisaqartitsinerit assigisaalluunniit amerlanerpaamik inunnik 100-nik peqataasoqaqqusaapput, § 6-imullu naapertuussallutik. 
  Imm. 2.  Aaqqissuussisoq aaqqissuussamut, nalliuttorsiornermut, sammisaqartitsinermut assigisaannulluunniit inuit kommuninit nunanilluunniit allanit peqataanissaannut toqqaannartumik kajumissaarissanngilaq. § 3 naapertorlugu aaqqissuussaq ingerlanneqassappat, inuit kommuninit allanit aaqqissuussinermut il.il. peqataanissaannut kajumissaarineq inerteqqutaanngilaq.

 

Silami aaqqissuussinerni il.il. peqataasinnaasunut killilersuineq

 

  § 5.  Silami aaqqissuussinerit, nalliuttorsiornerit, sammisaqartitsinerit assigisaalluunniit amerlanerpaamik inunnik 250-inik peqataasoqaqqusaapput. 
  Imm. 2.  Aaqqissuussisoq aaqqissuussamut, nalliuttorsiornermut, sammisaqartitsinermut assigisaannulluunniit inuit kommuninit nunanilluunniit allanit peqataanissaannut toqqaannartumik kajumissaarissanngilaq. § 3 naapertorlugu aaqqissuussaq ingerlanneqassappat, inuit kommuninit allanit aaqqissuussinermut il.il. peqataanissaannut kajumissaarineq inerteqqutaanngilaq.

 

Ininut kikkunnilluunniit iserfigineqarsinnaasunut piumasaqaatit

 

  § 6.  Inuussutissarsiummik ingerlatallit aamma suliffeqarfiit pisortanit pigineqartut ininik kikkunnit tamanit iserfigineqarsinnaasunik pigisallit piumasaqaatinik makkuninnga naammassinnissimassapput:
1)  Inuit ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat isersimaqqusaapput. Inini qatserisartoqarfinni oqartussaasunit akuersissutitaqartinneqanngitsuni, natermi 4 m2-iusumi amerlanerpaamik inuk ataasiinnaaqqusaavoq. Nateq 4 m2-imit mikineruppat oqaaseqatigiit aappaat apeqqutaatinnagit inuup ataasiinnaanissaa akuerineqarsinnaavoq. Nateq oqaaseqatigiit aappaanni pineqartoq qanoq pequteqartiginera apeqqutaatinnagu iikkamiit iikkamut naatsorsorneqassaaq.
2)  Ajornanngippat init imatut pequsersorsimassapput suliffeqarfiillu imatut ingerlanneqassallutik tuniluunnissaq minnerpaaffianiitinneqassalluni, tassunga ilanngullugu pisisartut pulaartullu imminnut qanillinnginnissaat periarfissaqartillugu.
3)  Inimi ininiluunniit tamanit iserfigineqarsinnaasuni eqqiliusaarnissaq ileqqorissaarnissarlu pillugit Nunatta Nakorsaaneqarfianiit paasissutissanik nivinngaasoqassaaq. 
4)  Sulisut tamarmik Nakorsaaneqarfiup eqqiluisaaqqissaarnissamik ileqqorissaarnissamillu innersuussutaanik malinninnissaat qulakkeerneqassaaq. 
5)  Pisisartunut pulaartunullu ajornanngippat imermik qaqorsaammillu imaluunniit assammut spritimik peqassaaq.
6)  Nerisassanik poortorneqarsimanngitsunik tuniniaanermi sulisut aaqqateqassapput.

 

  § 7. Inuussutissarsiummik ingerlatalik politiit naliliinerat malillugu § 6-imik unioqqutitsisimappat, inuussutissarsiummillu ingerlatalik § 6-imik malinninnissaa ilimagineqanngippat, inuussutissarsiummik ingerlatalik inip piffissami aalajangersimasumi tamanut matoqqatinnissaanik politiinit peqquneqarsinnaavoq.

 

Assartuutinut piumasaqaatit

 

  § 8.  Assartuutit issiaffiusinnaasut sinnerlugit ilaasoqaqqusaanngillat. Oqaaseqatigiinnik siullernik eqqortitsinissaq assartuummik piginnittup akisussaaffigaa.

 

Pineqaatissiissuteqartarneq

 

  § 9.  Aaqqissuussisut §§ 2-5-inik unioqqutitsisut pinerluttulerinermik inatsit malillugu pineqaatissinneqarsinnaapput. 
  Imm. 2.  § 3, imm. 2-5-mik aammalu §§ 6 aamma 8-mik unioqqutitsisoq imaluunniit § 7 malillugu peqqussummik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 3.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.
Imm. 4. Akileeqqusissutit Nunap Karsianut tutsinneqassapput.

 

Atuutilersitsineq, atorunnaarsitsineq piffissarlu atuuffissaq

 

  § 10.  Nalunaarut 16. februar 2021-mi atuutilissaaq. 
  Imm. 2. Ilutigisaanik Katerisimaartarnernut, ininut kikkunnit tamanit iserfigineqarsinnaasunut assartuutinullu killilersuigallarnerit pillugit Namminersorlutik Oqartussat nalunaarutaat nr. 2, 4. januar 2021-meersoq atorunnaarsinneqarpoq.
  Imm. 3. Nalunaarut malillugu killilersuinerit, inerteqquteqarnerit, peqqusinerit il.il. 18. april 2021 ilanngullugu atuutissapput.
  Imm. 4.  Inuit ulloq 20. juni 2020 sioqqullugu § 2, imm. 2 aamma § 3-mi allaaserineqartut naapertorlugit aaqqissuussanut, nalliuttorsiornernut sammisassaqartitsinernut assigisiaannulluunniit peqataaniarlutik nalunaarsorsimasut taakkununnga peqataasinnaapput

 

 

 

Namminersorlutik Oqartussat, ulloq 15. februar 2021

 

 

 

Martha Abelsen

/

Tine Pars

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk