Naatsorsuusiortarnermi malittarisassat Qarasaasiatigut attaveqaatinik qarasaasiatigulluunniit kiffartuussinernik tamanut neqerooruteqartarnermut akuersissutaateqartut pillugit Namminersorlutik oqartussat nalunaarutaat nr. 2, 7. februar 2014-imeersoq

Nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaanni nr. 17-imi, 20. november 2006-imeersumi § 15, imm. 2 tunngavigalugu makku aalajangersarneqarput:

 

Akuersissutaateqartup naatsorsuusiortarnerani malittarisassat

§ 1.  Akuersissutaateqartup naatsorsuutini agguataarlutik immikkoortiterneri tunisassiorfeqarfinnut immikkoortunut arlalinnut agguaattassavai, tak. §§ 2-6.

 
Tunisassiorfeqarfiit naatsorsuutini immikkuualuttulersugaanerat

§ 2.   Akuersissutaateqartoq tunisassiorfeqarfimmini ataasiakkaani ingerlatsinermi aningaasaqarnikkut naatsorsuutit immikkoortukkuutaartut suliarisassavai, ingerlatseqatigiiffinnut inatsiseqartitsinikkut arlaannaannulluunniit attuumassuteqanngitsunut piumasaqaataasutut annertutigisumik, inuussutissarsiutigalugu suliffeqarfiit ukiumoortumik naatsorsuutinik il.il. saqqummiussisarnerat pillugu malittarisassat sukkulluunniit atuuttut tunngavigalugit.
Imm. 2.  Akuersissutaateqartup tunisassiorfeqarfiit tunisassiat attaveqaatinik ataatsimut atuiumalluni naleqquttumik qinnutigineqartut tamaasa akuersaassallugit nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaat tunngavigalugu pisussaaffeqarfigisani ataasiakkaarlugit ingerlatsinermi aningaasaqarnikkut naatsorsuutit immikkoortukkuutaat suliarisassavai. 


Naatsorsuutit pingaarnerusutigut imarisaat

§ 3.  Akuersissutaateqartup tunisassiorfeqarfinni § 2-mi taaneqartuni ataasiakkaani tamani ingerlatsinermi naatsorsuutit ukiumut ataasiarluni suliarissavai.
Imm. 2.  Ingerlatsinermi aningaasaqarnikkut naatsorsuutit imm. 1-imi taaneqartut angusanut takussutissiamik, aningaasaliissutigineqartunut takussutissiamik kiisalu tunisassiorfeqarfiit ataasiakkaat akornanni niueqatigiinnermut takussutissiamik imaqassapput. Pigisat tigussaanngitstut aamma pigisat tigussaasut aningaasaatinik aningaasaliissuteqarnermut ilaapput kiisalu kaaviaartitsinermi pigisanut erniaqanngitsunut piffissami sivikitsumik akiitsut erniaqanngitsut ilanngaatigineqarput.
Imm. 3.  Ukiumoortumik naatsorsuutit pillugit inatsimmi inuussutissarsiortut suliffeqarfiissa ukiumoortumik naatsorsuutinik il.il. saqqummiussisarneranni tunngaviit aaqqissuussineq uuttuisarnerlu eqqarsaatigalugit atuutissapput, nalunaarummi matumani malittarisassanut allanut akerliunatik.
Imm. 4.  Akuersissutaateqartup, imm. 1-3-mi taaneqartutut ataatsimut isigalugit ingerlatsinermi aningaasaqarnikkut naatsorsuutit ukiumut ataasiarluni suliarisassavai. § 2-mi nioqqutissiorfinnut ataasiakkaanut naatsorsuutit ingerlatsinermut aningaasaqarnikkut naatsorsuutinut naligiisinneqartassapput.


Akiliinermi tunngaviit

§ 4.  Akuersissutaateqartup tunisassiorfeqarfiit ataasiakkaarlugit, tak. §§-it 2 aamma 3, ingerlatsinermi aningaasaqarnikkut naatsorsuutinik suliarinninnerminut atatillugu nammineq ilumini akiliisarnermi tunngaviit makku atussavai:
1)  Tunisassiorfeqarfiup namminersortup suliffeqarfiullu sinnerata akornanni kif-fartuussinernut suliffeqarfiup nammineq iluani akiliinermi aki niuffaffinni akitiginneqartoq atorneqassaaq.
2)  Kiffartuussinernik tunisassiat nalunaarasuartaatitigut atassuteqarneq na-lunaarasuartaatitigullu kiffartuussinerit pillugit Inatsisartut peqqussutaat tunngavigalugu pisussaaffeqarfigisanut ilaatinneqartut assigisaannik assigiinngisitsiniarani atuinernut akiliinermi akit avataani atorneqartut assingi atorneqassapput.
3)  Niuffaffinni akit, tak. imm. 1 aamma imm. 2, pigineqanngippata aningaasartuutit kiffartuussinernut pineqartunut attuumassuteqartut naatsorsorneqassapput, matumani aningaasaliissutinut pineqartunut erniat naleqquttut ilanngullugit eqqarsaatigalugit.
4)  Sanaartornermi atortuutinik tigussaasunik tigussaanngitsunilluunniit tunisassiorfeqarfiit ataasiakkaat akornanni nuussineq naliliussat naatsorsuutinut allanneqartut atorlugit pisassaaq, immikkoortut 1-imit 3-mut apeqqutaatinnagit.
Imm. 2.  Tunisassianut akinik nakkutilliinissamik pisussaaffeqarnermi ilaatinneqartunut, tak. nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaat, §§-imi 2-mi 3-milu taaneqartunut naatsorsuutini akiliineq akit pisussaaffiup taassuma imarisaanut naapertuuttut atorlugit pissaaq, imm. 1 apeqqutaatinnagu.
Imm. 3. Akuersissutaateqartup nammineq immikkoortortaqarfimmi, ingerlatseqatigiiffiutimi ataani ingerlatseqatigiiffiutimi assigisaasalu tunisassiorfeqarfiit ataasiakkaat akornanni attaveqaatinik ataatsimut atuineq pillugu isumaqatigiissutini taaneqarsimasut akornanni akiliinermut atatillugu akuersissutaateqartup piumasaqaatit, akit il.il. atorsimagai naatsorsuutit §§-ini 2-mit 3-mut taaneqartut uppernarsassavaat.


Agguataarinermi tunngaviit

§ 5. Akuersissutaateqartup tunisassianut ataasiakkaanut ingerlatsinermi aningaasaqarnikkut naatsorsuutinik suliarinninnerminut atatillugu, tak. §§-it 2-mit 3-mut, aningaasartuutinik agguataarineq ingerlatanik tunngaveqartoq atussavaa, takuuk imm. 2. Ingerlatat pillugit nassuiaammi tunisassiat ingerlatat inaarutaasumik agguataarneqarfii eqqarsaatigalugit aningaasartuutit allanngorarsinnaanerat sapinngisamik annertunerpaamik isiginiarneqassaaq.
Imm. 2.  Aningaasartuutinik agguataarinermi tunngaviit makku isiginiarneqassapput:
1) Ingerlatanut tunisassiamut tunisassiap allanngorarnera peqatigalugu allanngorartussatut naatsorsuutigineqartunuinnaq tunngasunut aningaasartuutit (toqqaannartumik aningaasartuutit) tunisassiamut toqqaannartumik tutsinneqassapput.
2) Ingerlatanut tunisassianut allanngorartunut arlalinnullu tunngasut (ataatsimut aningaasartuutit) tunisassianut ataasiakkaanut sapinngisamik agguataarniarneqassapput, aningaasartuutit pilernerannik misissueqqissaarneq tunngavigalugu.
3) Ingerlatat imm. 2-mi taaneqartutut misissueqqissaarfigineqarsinnaanngitsut eqqarsaatigalugit aningaasartuutit ingerlatamut ataatsimut arlalinnulluunniit taakkununnga toqqaannartumik attuumassuteqarneq ajornanngippat toqqaannanngitsumik attuumassuteqarneq tunngavigalugu agguataarneqassapput. Taamatut attuumassuteqarneq allanngoraammik assersuunneqarsinnaasumik tunngaveqartinneqassaaq.
4) Ingerlatat nr. 1-3 tunngavigalugit agguataarneqarsinnaanngitsut allanngoraat assersuunneqarsinnaasoq atorlugu aningaasartuutit katinnerisa amerlassusiat aallaavigalugu agguataarneqassapput.
Imm. 3.  Isertitat neqerooruteqartup tunisassiamut ingerlatanik isumaginninneranut ilaatillugit pissarsiarineqartut tunisassiorfeqarfiup naatsorsuutaanut ilanngunneqassanngillat. Isertitat tunisassiap ingerlataanit qularnaatsumik pilersinneqanngitsut tunisassiat susassaqartut akornanni agguataarneqassapput, tunisassianit susassaqartunit isertitat katinnerat imaluunniit tunisassianut susassaqartunut aningaasartuutit katinnerat imm. 2-mi nr. 1-mit 4-mut agguataarneqartut tunngavigalugit.
Imm. 4. Paasissutissanik naammattumik immikkuualuttulersugaasunik nalunaarsuisoqarnissaa akuersissutaateqartup qulakkiissavaa, taamaalilluni ingerlatanut tunisassianullu ataasiakkaanut aningaasartuutinik agguataarinermi naatsorsueriaaseq aningaasaqarneq pillugu paasissutissanik (naatsorsuutini kontolersuinernik imaluunniit aningaasaqarnikkut iliuuserineqartunik nalunaarsuinernik) aamma paasissutissanik aningaasaqarnermut tunngasuunngitsunik (piffissalersuinernik, kisitsisitigut naatsorsueqqissaarnernik, tigulaaraluni misissuinernik aamma/imaluunniit missingiutinik) atuisoq tunisassiorfeqarfinnut ataasiakkaanut atasumik isertitanik aningaasartuutinillu eqqortumik takutitsisuusinnaaqqullugu.


Naatsorsuutit tunngaviat

§ 6.  Naatsorsuutit §§-it 2-mit 3-mut tunngavigalugit suliarineqartut ukiumi naatsorsuusiorfiusumi pineqartumi aningaasartuutitut, isertitatut il.il. nalunaarsorneqarsimasorpiaat kiisalu pisinermi naliliunneqaqqaartut ukiut ingerlanerini nalikilliliissutinik (qangali ileqquusumik aningaasartuutaasut) aaqqiissutitaqartut tunngavigalugit sanaartornermi atortut tigusaassut tunngavigalugit suliarineqartassapput.
Imm. 2. Nalunaarasuartaateqarnermut Aqutsisoqarfik attaveqaatinik ataatsimut atuinermik qangali ileqquusumik aningaasartuutinit allaasunik tunngaveqatinneqartumik suliami aalajangiiguni akuersissutaatilik Naluanaarasuartaateqarnermut Aqutsisoqarfiup peqqusinnaavaa tunisassianut naatsorsuutit allat tunngaviit allat, matumani LRAIC tunngavigalugu akinik aalajangersaariaaseq ilanngullugu eqqarsaatigalugu, tunngavigalugit suliareqqullugit.


Naatsorsuutinik uppernarsaasersuineq

§ 7.  Naatsorsuutit §§ 2-3 naapertorlugit suliarineqartussat qanoq iliorluni suliarineqarsimanersut akuersissutaateqartup uppernarsassavaa, matumani makku ilanngullugu eqqarsaatigalugit:
1)  Naatsorsuusiornermi tunngaviit atorneqartut.
2)  Isertitanik,  aningaasartuutinik  oqimaaqatigiissutsinernillu    agguataarinermut  tunngaviit, tak. § 5.
3)  Nammineq ilumi akiliinermut tunngaviit, tak. § 4.
4)  Naatsorsueriaatsip allaaserineqarnera, tak. § 5, imm. 4.
5)  Paasissutissanik aningaasaqarnermut tunngasuunngitsunik atuineq, tak. § 5, imm. 4.
6)  Tunisassiat, kiffartuussinerit, ingerlatat qarasaasiallu atortuisa allattorsimaffiat.
Imm. 2.  Naatsorsuutinut § 6, imm. 2 tunngavigalugu suliarineqartunut uppernarsaatit periaaseq atorneqartoq tunngavigalugu  naatsorsuutinik suliarinninnermut tunngaviit allaaserineqarnerannik imaqassapput.


Naatsorsuutit imarisaat tunniussinissamullu piffissaliussat

§ 8.  Akuersissutaateqartup tunisassiorfeqarfinnut nammineertunut tamanut immikkut naatsorsuutit kiisalu suliffeqarfissuaq pineqarpat tassunga naatsorsuutit aamma suliffeqarfiup tamarmiusup ukiumoortumik nalunaarusiaa Nalunaarasuartaateqarmut Aqutsisoqarfimmut ukiup naatsorsuusiorfiusup naaneranit qaammatit arfinillit qaangiutsinnagit tunniutissavai.
Imm. 2.  Naatsorsuutit imm. 1-imi taaneqartut makkuninnga imaqassapput:
1)  Pisortaqatigiit oqaaseqaataat.
2)  Ingerlatsinermi aningaasqarnikkut naatsorsuutit, takuuk § 3, imm. 1-2.
3)  Nammineq suliffiup iluani niuernermut takussutissiaq oqimaaqatigiissitsinerlu, takuuk  § 3, imm. 4.
4)  Ingerlatseqatigiiffinnik inatsiseqartitsineq tunngavigalugu naatsorsuutinik oqimaaqaatigiissitsineq, tak. § 3, imm. 4.
Imm. 3. Immikkut naatsorsuutinik § 6, imm. 2 tunngavigalugu saqqummiussinermi siullermi piffissaliussaq § 8, imm. 1-imi taaneqartoq qaammatinik arfinilinnik sivitsorneqassaaq.
Imm. 4.  Naatsorsuutit imm. 1-imi taaneqartut kukkunersiuisumit naalagaaffimmit akuerisaasumit imaluunniit kukkunersiuisumit nalunaarsugaasumit kukkunersiorneqarsimassapput, naatsorsuutillu nalunaarut manna aamma § 7-imi naatsorsuutinik uppernarsaasersuineq taaneqartoq naapertorlugit suliarineqarsimasut kukkunersiuisup oqaaseqaataanik ilaqartinneqassallutik.

Saqqummiussineq aamma naatsorsuutinik uppernarsaasersuinermik allanngortitsineq

§ 9.  Naatsorsuutinik § 8, imm. 1-imi taaneqartunik saqqummiussinermi siullermi naatsorsuuserinermi tunngaviit atorneqartut allaaserineqarnerat ilanngunneqassaaq.
Imm. 2.  Naatsorsuutinik § 8, imm. 1-imi taaneqartunik saqqummiussinermi tullermi naatsorsuuserinermi tunngaviit allannguutigisimasinnaasaat paasissutissiissutigineqassapput, tak. imm. 1.
Imm. 3.  Naatsorsuutit suliarineqartut uppernarsaasersorneqassasut Nalunaarasuartaateqarnermut Aqutsisoqarfiup piumasarisinnaavaa.


Nalunaarasuartaateqarnermut Aqutsisoqarfiup naatsorsuuserinikkut nakkutilliinera

§ 10.  Nalunaarasuartaateqarnermut Aqutsisoqarfik akuersissutaateqartunut naatsorsuuserinikkut nakkutilliisuuvoq.
Imm. 2.  Naatsorsuutit § 8-mi taaneqartut imaluunniit uppernarsaasersuineq § 7-mi taaneqartoq allanngortinneqassasut Nalunaarasuartaateqarnermut Aqutsisoqarfiup piumasarisinnaavaa, taakku pisussaaffinnik akuersissuteqaateqartumut nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaat tunngavigalugu pisussaaffiliunneqartunik unioqqutitsisuuppata.


Atortuulersitsineq il.il.

§ 11.  Naatsorsuutinik nalunaarummi matumani malittarisassat tunngavigalugit saqqummiussineq siulleq ukiumik naatsorsuusiorfiusumit 2015-imit atuutilersumik pissaaq.

§ 12.  Nalunaarut ulloq 1. marts 2014-mi atortuulerpoq.



Kalaallit Nunaanni Namminersorlutik Oqartussat, ulloq 7. februar 2014



Steen Lynge

/

Ann Birkekær Kjeldsen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk