Nalunaarasuartaatitigut aqqutinut tamanut ammasunut terminalini atortunik atassusiisarneq pillugu Namminersornerullutik Oqartussat nalunaarutaat nr. 27, 10. oktober 2002-meersoq

Nalunaarasuartaatitigut attaveqarneq sullissinerillu pillugit Inatsisartut peqqussutaanni nr. 10, 28. oktober 1993-imeersumi, Inatsisartut peqqussutaatigut nr. 12, 6. november 1997-imeersukkut allanngortinneqartumi, § 2, § 3, imm. 3, § 14 aamma § 15 naapertorlugit aalajangersarneqarput:

 

Atuuffia

§ 1. Nalunaarut manna tamanut ammasumik nalunaarasuartaatitigut attaveqarnermi aqqutinut terminalini atortunik, atortunik allanik namminerisamillu attaveqaatinik atassusiinernut Namminersornerullutik Oqartussat kisermaassinerisa avataaniittunut atuuppoq.
Imm. 2. Terminalini atortut Namminersornerullutik Oqartussat kisermaassinerannut ilaatinneqartut nalunaarummut matumunnga ilanngussami A-mi takuneqarsinnaapput.
Imm. 3. Akuersissummik pigisaqartup apeqquteqaateqartoqarnerani paasissutissiissutigissavaa atortut sorliit Namminersornerullutik Oqartussat kisermaassinerata avataaniinnersut.

 

Nassuiaatit

§ 2. Nalunaarummi matumani nalunaarasuartaateqarnermi "terminalini atortutut" paasineqassapput atortut paasissutissanik nassiussinissaq tigooraanissarlu siunertaralugu makkununnga naatsorsuussat
1) nalunaarasuartaatitigut aqqutini tamanut ammasuni pisortat atuisullu akornanni attaveqaatit naapiffiinik toqqaannartumik atassuserneqarnissamut, imaluunniit
2) toqqaannartumik imaluunniit alla aqqutigalugu nalunaarasuartaatitigut aqqutinut tamanut ammasunut pisortat atuisullu akornanni attaveqaatit naapiffiinut atassuserneqarnikkut nalunaarasuartaatitigut aqqutit tamanut ammasut peqatigalugit ingerlanissamut.
Imm. 2. Atassusiineq imm. 1, nr. 1-imi 2-milu taaneqartoq ungerutissiatigut aqqutit, radiup maligaasai, qaamaneq atorlugu attaveqaatit imaluunniit atortut innaallagissap ingerlaarneratigut kajungerisaqalersitsinermik ingerlasut allat atorlugit pisinnaavoq.
Imm. 3. Atortup siunertaa tunisassiarineqarfianit imaluunniit pilersuisumit nalunaarutigineqassaaq. Nalunaarasuartaateqarnermi terminalini atortut imm. 1-imi nassuiarneqartut, radiup maligaasai atorlugit atassuserneqartartut nalunaarasuartaatitigut aqqutinut tamanut ammasunut atassuserneqarnissamut atugassiaassapput.

§ 3. "Nalunaarasuartaatitigut aqqutitut tamanut ammassutut" paasineqassaaq nalunaarasuartaatitigut attaveqarnerup tamanut ammasup tamarmiusup aaqqissugaanera, ungerutissiatigut aqqutit, radiup maligaasai, qaamaneq atorlugu attaveqaatit imaluunniit atortut innaallagissap ingerlaarneratigut kajungerisaqalersitsinermik ingerlasut allat iluaqutigalugit pisortat atuisullu akornanni attaveqaatit naapiffiinik nassiussisinnaanermut periarfissiisoq.

§ 4. Nalunaarummi matumani "pisortat atuisullu akornanni attaveqaatinut naapiffik" paasineqassaaq, sumiiffittut nalunaarasuartaatitigut tamanut aqqutinit tamanut ammasunit namminerisamik attaveqaatinut ikaarsaariarfittut.

§ 5. Nalunaarummi matumani "namminerisamik attaveqaatit" tassaapput nalunaarasuartaateqarnermi namminerisamik attaveqaatit
1) atuisumi namminermi attaveqarnermut atortut,
2) atuisumi aammalu pisortat atuisullu akornanni attaveqaatinut naapiffinnut atortut ilanngussami A-mi ilaatinneqartut akornanni nalunaarasuartaatitigullu aqqutitigut tamanut ammasutigut attaveqaateqarnermut atorneqartut, imaluunniit
3) pisortat atuisullu akornanni attaveqaatinut naapiffinni nalunaarasuartaatitigut aqqutinut tamanut ammasunut attavilerneqartut.
Imm. 2. § 4 naapertorlugu nalunaarasuartaatitigut attaveqarnikkut attaveqaatit atuisumi inissinneqarsimasutigut akuersissummik pigisallip atugai § 5-imi attaveqaatit pineqartut pineqanngillat. Attaveqaatit taamaattut nalunaarasuartaatitigut aqqutinut tamanut atorneqartunut ilaassapput.

§ 6. Nalunaarummi matumani "akuersissummik pigisaqartutut" paasineqassaaq TELE Greenland A/S.

 

Terminalini atortunik attaviliineq

§ 7. Nalunaarasuartaateqarnermi terminalini atortut § 1-imi ilaatinneqartut nalunaarasuartaatitigut aqqutinut tamanut ammasunut taamaallaat atassuserneqarsinnaapput makku arlaannik nalunaaqutserneqarsimagunik:
1) "CE"-mik naqissusigaagunik atortut CTR-imut ilaatinneqarnerannut takussutissatut. Nalunaaqutsikkap isikkua ilanngussami B-mi, nr. 1-imi takutinneqarpoq.
2) Danmarkip naalagaaffiani assigiissaarutitut akuersissummik nalunaaqutsikkat. Nalunaaqutsiussap isikkua ilanngussami B-mi nr. 2-mi takutinneqarpoq.
3) Danskit akuersissutaannik nalunaaqutsikkat takussutissaatillugit tamatumunnga peqatigitillugu radiumut atortulersuutaanerat. Nalunaaqutsiussap isikkua ilanngussami B-mi nr. 3-mi takutinneqarpoq.
4) "CE"-mik naqissusigaagunik. Nalunaaqutsiussap isikkua ilanngussami B-mi nr. 4-mi takutinneqarpoq.
Imm. 2. Nalunaarasuartaateqarnermi terminalini atortut § 1-imi ilaatinneqartut nalunaarasuartaatitigut aqqutinut tamanut ammasunut taamaallaat atassuserneqarsinnaapput akuersissummik piginnittup pisortat atuisullu akornanni attaveqaatit naapiffiisa innersuussutigisaanut.
Imm. 3. Akuersissummik pigisaqartoq nalunaarasuartaateqarnermi terminalini atortut arlaannik tamanut ammasumik nalunaarasuartaatitigut attaveqarnermi aqqutinut, terminalinut atortunik aalajangersimasunik tigusisinnaanngitsunut atassuserneqartunik attaveqaatitigut aqqutit katitigaanerannik, teknik aningaasalluunniit pissutaallutik teknikikkut aaqqiissuteqarnernik pisariaqartitsisunik, killilersuisinnaavoq.
Imm. 4. Naalakkersuisut aalajangersinnaapput terminalinut atortut aalajangersimasut imm. 3-mut ilaatinneqassanngitsut.
Imm. 5. Akuersissummik pigisaqartup nalunaarasuartaatitigut tamanut ammasutigut aallakaatitsinermi killissarititaasut teknikikkut nassuiaatitaat ingerlaavartumik tamanut nalunaarutigisassavai.

§ 8. Akuersissummik pigisaqartup paasippagu atortut § 7-imi piumasaqaatinik naammassinnikkaluartut attaveqaatini kukkutitsisarlutillu akornusersuisut, taava akuersissummik pigisaqartoq allamik aalajangigaqanngippat nalunaarasuartaatitigut attaveqaatit attaveerneqassapput.
Imm. 2. Atortunik piginnittoq atuisorluunniit imm. 1 naapertorlugu attaveerneqartussaq akuersissummik pigisaqartup, aamma piffissamik killiliisuusup, kissaateqarneratigut atortut attaveerneqarnissaat sulissutigissavaa.
Imm. 3. Naalagaaffimmi pisortanilu oqartussaasuni isumannaatsuunissaq, inuinnaat akornanni toqqissisimanerup qularnaarneqarnissaa, inuit navianartorsiortinneqarnerat, inuiaqatigiinnut pingaaruteqartumik attaveqaatinik akornusersuineq taamatullu ittut allat eqqarsaatigalugit nalunaarasuartaatitigut attaveqaatini kukkuneqartitsisoqarpat akornusersuisoqarpallu akuersissummik pigisaqartoq siumut nalunaarfigeqqaarnagu siumullu akuerineqaqqaaratik Naalakkersuisut atortut atta-veersinnaavaat.
Imm. 4. Imm. 3-mi inuiaqatigiinnut pingaaruteqartumik attaveqaateqarneq, radiukkut nalunaarasuartaatitigulluunniit atortutigut inuit inuunerannik peqqissusaannillu aammalu inuiaqatigiinnut tunngassuteqartunik pilersuinermut atatillugu attaveqaateqarnertut paasineqassaaq.
Imm. 5. Imm. 4-mi piumasaqaatit naammassineqarsimappata inuiaqatigiinni pingaarutilimmik attaveqaateqarnertut makku isigineqarput:
1) Politiit attaveqaateqarnerat.
2) Sakkutuut attaveqaateqarnerat.
3) Annaassiniarnermik suliaqartut attaveqaateqarnerat.
4) Timmisartut sakkutuullu imarsiortut attaveqaateqarnerat sumiissusersiortarnerallu.
5) Peqqinnissaqarfiup attaveqaateqarnera.
6) Inuiaqatigiinnut tunngassuteqartunik pilersuinikkut attaveqaateqarneq.
Imm. 6. Imm. 3 naapertorlugu attaveersisoqarsimappat, akuersissummik pigisaqartoq pisussaavoq atortunik piginnittoq atuisorluunniit tamanna pillugu piaarnerpaamik ilisimatissallugu kiisalu attaveerneqarnermut suna pissutaasoq nalunaarutigissallugu.

§ 9. Malittarisassat atuuttut naapertorlugit terminalinut atortut nalunaarutip matuma atuutilin-nginnerani attavilerneqarsimasut suli atorneqarsinnaapput, § 8-li naapertorlugu akuersissummik pigisaqartumit peqquneqarnermikkut attaveeqquneqarsinnaallutik.
Imm. 2. Nalunaarutip matuma atuutilernerata kingorna terminalinut atortut attavilerneqartut § 7-ilu naapertorlugu ilisarnaaserneqarsimanngitsut akuersissummik pigisaqartup noqqaassuteqarneratigut ingerlaannaq attaveerneqassapput.

 

Namminerisanik attaveqaatinik tunniussineq

§ 10. Akuersissummik pigisaqartup namminerisamik attaveqaatit sanaartukkaniittut sanaartukkap piginnittuanut tunniutissavai.
Imm. 2. Sanaartukkat arlallit imminnut qanittut ataatsimit pigineqarpata, attaveqaatit sanaartukkanut ataasiakkaanut imminnut atassusersimasut sanaartukkanik piginnittumut tunineqarsinnaapput.
Imm. 3. Attaveqaatit tunineqarsimasut allamut attaveqaateqartinneqassanngillat, tassa attaveqaateqassanatik atuisut allat nalunaarasuartaatitigut attaveqaatinut tamanut ammasunut attavilerlugit atorsinnaasaannik. Attaveqaat arlalinnik atuisoqarpat makkuninnga periarfissaqarpoq:
1) Attavilersornerit aggulunneqassapput atuisut allat attaveqaatinik tamanut ammasunik atuisinnaatiinnarlugit.
2) Atuisut allanut attaveqaatinik immikkuullarissunik pilersitsisoqassaaq.
Imm. 4. Imm. 1 naapertorlugu tunniussineq akeqanngitsumik tunisinikkulluunniit pisinnaavoq.
Imm. 5. Tunisisoqarsimappat tamanna tunisinermik isumaqatigiissutikkut atsiorneqassaaq, akuersissummik pigisaqartup neqeroorutaa tunngavigalugu.
Imm. 6. Akuersissummik pigisaqartup namminerisamik attaveqaatit tunniunneranni tuninerinilu atugassarititaasut akigitinneqartullu Naalakkersuisut akuerissavaat.
Imm. 7. Pisuni tamani akuersissummik pigisaqartup tunniussineq pillugu sanaartukkamik piginnittoq nalunaarfigisassavaa. Namminerisamik attaveqaatinik tunineqartunik atuisoq sanaartukkamik piginnittuunngippat akuersissummik pigisaqartup attaveqaatinik atuisoq tunniussineq pillugu aamma nalunaarfigissavaa.

§ 11. Namminerisamik attaveqaatinik tunisinerni tamani akuersissummik pigisaqartup qulakkiissavaa tunniussineq allat pisinnaatitaaffiinik innarliissanngitsoq.

§ 12. Namminerisamik attaveqaatinik tunniussinermi atuisumi nalunaarasuartaatitigut tamanut ammasunut pisortat atuisullu akornanni attaveqaatit naapiffiinik pilersitsisoqassaaq.
Imm. 2. Imm. 1-imi taaneqartumi pisortat atuisullu akornanni attaveqaatinut naapiffimmik pilersitsilluni inissiinermi sapinngisaq tamaat atuisup kissaataa malinniarneqassaaq.

§ 13. Tunniussinerup kingorna namminerisamik attaveqaatit akuersissummut ilaatinneqarunnaassapput.
Imm. 2. Attaveqaatit ataasiakkaat tunniunneqarneranni akuersissummik pigisaqartup namminerisamik attaveqaatinut pisussaaffii pisinnaatitaaffiilu piaarnerpaamik atorunnaarsinneqassapput.

 

Nalunaarasuartaatitigut attaveqarnermi namminerisamik attaveqaatit atorneqarnerat

§ 14. Naalakkersuisut akuersiteqqaartinnagit akuersissummik pigisaqanngitsut nalunaarasuartaatitigut attaveqaatikkut inuk alla sinnerlugu attaveqaateqartitsisinnaanngillat.
Imm. 2. Imm. 1 naapertorlugu nalunaarasuartaatitigut attaveqaatitigut attaveqartitsinissamut inerteqqummi makku pineqanngillat:
1) Inoqutigiit, attaveqatinik atuineq inoqutigiit arlaat sinnerlugu pisinnaagaangat.
2) Ingerlatseqatigiiffiit ataatsimoorlutik ingerlatseqatigiiffissuusut imminerminni attaveqarneranni ingerlatseqatigiiffissuarmi ingerlatseqatigiiffinnut allannut attaveqaateqarsinnaanerat.
3) Akunnittarfiit akunnittarfimmut akunnittunut attaveqaateqartitsisinnaanerat.
4) Napparsimmaviit sulisut angerlarsimaffiinit napparsimmaviup namminerisamik attaveqaatai aqqutigalugit nalunaarasuartaatitigut tamanut ammasutigut 31. december 2006 tikillugu attaveqaateqarsinnaanerat.
5) Immikkut ittumik oqarasuaatit inniminniiffigineqarsinnaasut mittarfinni assigisaannilu inissinneqarsimasut illoqarfigisamilu taxaatileqatigiiffinnut assigisaannulluunniit nalunaarasuartaatitigut attaveqaatinut tamanut ammasutigut attaveqartut taxanillu assigisaannilluunniit taamaallaat atorneqarsinnaasut 31. december 2006 tikillugu attaveqartinneqarsinnaanerat.
Imm. 3. Illoqarfiit nunaqarfiillu assigiinngitsut akornanni kiisalu nunanut allanut nunanillu allaniit nalunaarasuartaatitigut attaveqaatitigut tamanut ammasutigut attaveqarneq nalunaarasuartaatitigut attaveqaatitigut tamanut ammasutigut ingerlanneqassaaq.
Imm. 4. Imm. 2 aamma 3-mi akunnittarfimmi killilimmik sivisussusilimmik akunnittut pineqarput.
Imm. 5. Imm. 2, nr. 4 aamma 5-imi inerteqqummi pineqanngitsut tassatuaapput nalunaarasuartaatigigut attaveqarnerit 1. januar 2002 sioqqullugu pilersinneqarsimasut.

 

Naammagittaalliuutit

§ 15. Nalunaarut manna naapertorlugu aalajangiinernut naammagittaalliutigineqartut akuersissummik pigisaqartumut ingerlatinneqartassapput.
Imm. 2. Imm. 1 naapertorlugu suliani naammagittaalliorfiusuni akuersissummik pigisaqartup aalajangiineri Naalakkersuisunut naammagittaalliuutigineqarsinnaapput.
Imm. 3. Aalajangersagaq una naapertorlugu naammagittaalliuutinik tunniussinnissaq pissaaq naammagittaalliuutigineqartup aalajangiiffigineqarneraniit sap. ak. sisamat qaangiutsinnagit. Naammagittaalliuuteqarnerit kinguartitsiffiusutut atuussinnaanngillat.
Imm. 4. Imm. 2 naapertorlugu Ineqarnermut, Attaveqarnermut Pilersuinermullu Naalakkersuisoqarfiup immikkut ittumik pisoqartillugu naammagittaalliuutit kinguartitsiffiusinnaanerat aalaja-ngersinnaavaa.

 

Pineqaatissiinissamik pillaatissiinissamillu aalajangersakkat

§ 16. § 7, imm. 1-2 aamma 5-imik,§8, imm. 1-2-mik, §9, imm. 2-mik aamma § 14-imik unioqqutitsinerit akiliisitsissutaasinnaapput.
Imm. 2. Pinerluttulerinermi inatsimmi arsaarinninnissamut aalajangersakkat § 7, imm. 1-2-mut, §8, imm. 1-2-mut aamma § 9, imm. 2-mut atuutsinneqassapput.
Imm. 3. Aktiaateqarluni ingerlatseqatigiiffiit, piginneqataassuteqarluni ingerlatseqatigiiffiit assigisaallu unioqqutitsippata ingerlatseqatigiiffiit imminni akiliisitaanissamut akisussaatitaasinnaapput. Namminersornerullutik Oqartussat, kommuni kommunilluunniit suleqatigiiffii kommunalbestyrelsit nunaqarfinni aqutsisut pillugit inatsisartut inatsisaanni §64-imut ilaatinneqartut unioqqutitsippata Namminersornerullutik Oqartussat, kommunalbestyrelsit kommunilluunniit suleqatigiiffii akiliisitaanissamut akisussaatitaasinnaapput.

 

Atuutilerfia

§ 17. Nalunaarut 15. oktober 2002 atuutilerpoq.
Imm. 2. Peqatigitillugu Nalunaarasuartaatitigut aqqutinut tamanut ammasunut terminalini atortunik atassusiisarneq pillugu Namminersornerullutik Oqartussat nalunaarutaat nr. 12, 28. juni 1999-imeersoq atorunnaarsinneqarpoq.




Namminersornerullutik Oqartussat, ulloq 10. oktober 2002.




Jørgen Wæver Johansen

/

Jens K. Lyberth


Ilanngussaq A

Ilanngussaq B

 

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk