Ataatsimut atuinermi itigartitsisarneq attaveerutsitsisarnerlu pillugit Namminersorlutik Oqartussat nalunaarutaat nr. 11, 4. november 2013-imeersoq

Nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaanni nr. 17-imi, 20. november 2006-imeersumi § 6, imm. 1 aamma 4 naapertorlugit aalajangersarneqarpoq:



Ataatsimut atuilernissamik qinnuteqaatinik itigartitsisarneq

§ 1.  Akuersissummik pigisaqartup ataatsimut atuilernissamik qinnuteqaatit akuerisussaavai. Taamaallaat itigartitsisoqarsinnaavoq uku innersuussutigalugit,
1)  qinnuteqaat kiffartuussinermik tuniniagaqartumit, nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaanni § 6 naapertorlugu atuisin­naatitaanermut akuerineqarsimanngitsumit saqqummiunneqarpat.
2)  qinnuteqaat ataatsimut attaveqarnissamut tunisassiamut imaluunniit ataatsimut attaveqarnissamut atuisinnaatitaanermut, ingerlatsinissamut akuersissummik pigisaqartup nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaanni § 6 naa­pertorlugu atuisinnaatitsinissamik pisussaaffeqarfiginngisaanut tunngasuuppat, imaluunniit
3)  eqqarsaatigisassanik, itigartitsinissamut tunngavigineqarsinnaasunik annertuunik peqarpat. Eqqarsaatigisassat tassaassapput:
a)  nalunaarasuartaatitigut attaveqaatit imaluunniit nalunaarasuartaatitigut kiffartuussinerit eqqorneqartussat pigiinnarneqarnissaat
b)  kiffartuussinerni attaveqaatillu iluini paasissutissanik illersuinissaq
c)  paasissutissanik inunnut tunngassuteqartunik illersuinissaq
d)  nalunaarasuartaatitigut attaveqaatinik imaluunniit nalunaarasuartaatitigut kiffartuussinernik illersuinissaq
e)  pineqartut nunami sumiiffinni, pisinnaasatigut suliassatigullu annertusineqarnissaannik pisariaqartitsilernerit, akuersissummik pigisaqartumut teknikkikkut aningaasaqarnikkullu annertuumik ajornartorsioqqaarani naammassineqarsinnaanngitsut.


Ataatsimut atuinermik killilersuineq attaveerutsitsisarnerlu

§ 2.  Eqqarsaatigisassat § 1, imm. 1, nr. 3-mi taaneqartut innersuussutigalugit ingerlatsinissamik akuersissummik pigisaqartoq ataatsimut atuinissamut isumaqatigiissuteqarnermini, ataatsimut atuinermik ingerlareertumik killilersuiniarluni attaveerutsitsiniarluniluunniit kissaateqarpat, tamanna pillugu Nalunaarasuartaateqarnermut Aqutsisoqarfimmut saaffiginnittoqassaaq. Tamatuma kingorna ataatsimut atuinermik killilersuinissaq attaveerutsitsinissarluunniit pisinnaatitaaffigineqarnersoq pil­lugu Nalunaarasuartaateqarnermut Aqutsisoqarfik aalajangiissaaq.
Imm. 2.  Imm. 1 apeqqutaatinnagu ingerlatsinissamut akuersissummik pigisaqartup sumiiffinni eqqorneqartuni ataatsimut atuineq erngerluni aammalu Nalunaarasuartaateqarnermut Aqutsisoqarfik ilisimateqqaarnagu attaveerutsissinnaavaa, illuatungiliuttup atuinera attaveqaatinik kiffartuussinernilluunniit imaluunniit assigisaannik qamittoornermik kinguneqartoq, tamatumaniluunniit annertuumik ulorianartorsiortoqarnera uppernarsarneqarsinnaappat.
Imm. 3.  Imm. 2 naapertorlugu ataatsimut atuineq killilersorneqarpat attaveerutsinneqarpalluunniit, ingerlatsinissamik akuersissummik pigisaqartup erngerluni illuatungiliuttoq tamanna pillugu ilisimatissavaa.
Imm. 4.  Imm. 2 naapertorlugu ataatsimut atuineq killilersorneqarpat attaveerutsinneqarpalluunniit, attaveerutsitsineq Nalunaarasuartaateqarnermut Aqutsisoqarfimmut nalunaarutigineqassaaq.

Atuutilerfia

§ 3.  Nalunaarut 1. januar 2014-imi atuutilerpoq.



Namminersorlutik Oqartussat, ulloq 4. november 2013



Steen Lynge

/

Ann Birkekær Kjeldsen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk