Ilinniarfissuup aqunneqarnera pillugu Namminersornerullutik Oqartussat nalunaarutaat nr. 11, ulloq 29. april 2002-imeersoq Atuussimasoq (Historisk)

Meeqqat atuarfianni ilinniartitsisussanik ilinniartitsineq pillugu Inatsisartut peqqussutaanni nr. 2-mi, 2. maj 1996-imeersumi §§ 19-20 naapertorlugit Inatsisartut peqqussutaannilu nr. 2-mi, 31. maj 2001-imeersumi allanngortinneqartumi aalajangersarneqarpoq:

 

Ilinniartitaanermut Pisortaqarfik

§ 1. Ilinniartitaanermut Pisortaqarfik Ilinniartitsisutut ilinniartitaanermut siunnersuisoqatigiinnik pilersitsissaaq, taakku ilinniartitaanernut tunngasutigut ingerlatsinerup ineriartornera aammalu inuiaqatigiinni ineriartorneq tamaat malinnaaffigissavaat, taamaalillutik. Ilinniartitaanermut Pisortaqarfiup meeqqat atuarfianni ilinniartitsisutut ilinniarsimasunut aammalu ilinniartitsisutut ilinniartitaanerup ineriartortinneqarsinnaaneranut piumasaqaatit allanngorartut pillugit ataavartumik siunnersorsinnaajumallugu.
Imm. 2. Ilinniartitsisutut ilinniartitaanermut siunnersuisoqatigiit ilinniartitsisutut ilinniartitaaneq pillugu apeqqutit pillugit Ilinniartitaanermut Pisortaqarfimmik siunnersuisuussapput aammalu makku pillugit Ilinniartitaanermut Pisortaqarfimmut inassuteqartartuussallutik:
1) Ilinniarfissuup ilinniartitsinerani ilinniartitaanermut aaqqissuussaq.
2) Ilinniarfissuup ilinniartitseqqittarnernut tunngatillugu ingerlatsinera.
3) Ilinniarfissuup illuutaata allanngortiternera nutarterneqarneralu.
4) Ilinniartitaanermi pinngitsoorani peqataanissamut malittarisassanik aqutsineq.
5) Ilinniarfissuup rektorissaanik atorfinitsitsineq.
6) Ilinniarfissuarmi ilinniartitsisut qanoq ilinniagaqarsimanissaannik aalajangersaaneq.
7) Ilinniarfissuup aqunneqarnerata aaqqissuussaanerani, aqutsisuini mellemlederiini allannguisoqassatillugu.
8) Ilinniartitsissutissat pillugit ataatsimiititaliap inuttalersorneqarnerani avataaniillu naliliisoqarnermi toqqammavissat.
Imm. 3. Ilinniartitaanermut Pisortaqarfik siunnersuisoqatigiinnik inuttalersuissaaq, siunnersuisoqatigiit suleriaasissaannik aalajangersaasassaaq siunnersuisoqatigiillu atuunnerat pillugu erseqqinnerusunik malittarisassiussalluni.

 

Rektor

§ 2. Ilinniarfissuaq rektorimit ilinniarfimmi allaffissornikkut aqutsinermik, perorsaanermik aningaasaqarnermillu akisussaaffeqartumit aqunneqassaaq.
Imm. 2. Rektor Ilinniarfissuup ukiup ingerlanerani ingerlanneqarnera pillugu Ilinniartitsisutut ilinniartitaanermut siunnersuisoqatigiinnut ukiumoortumik allakkatigut nalunaarusiortassaaq. Nalunaarusiaq Ilinniartitaanermut Pisortaqarfimmut ilisimatitsissutitut nassiunneqartassaaq.

§ 3. Rektor suliassani siunnersuisoqatigiinni ataatsimiititalianilu suliarineqartussatut utaqqisinneqarsinnaanngitsuni aalajangiisassaaq, tak. § 6, § 8 aamma § 10. Aalajangiinerit taamaattut piaartumik siunnersuisoqatigiinnut ataatsimiititalianulluunniit suliarinnittussaagaluanut saqqummiunneqartassapput.

§ 4. Rektor ilinniartitsisutut ilinniartitaanermut siunnersuisoqatigiinni ilinniartitsinermilu siunnersuisoqatigiinni peqataasassaaq aammalu siunnersuisoqatigiit ataatsimiititaliallu allat tamaasa ataatsimiinnerini peqataasinnaalluni.

 

Ilinniartitsinermi siunnersuisoqatigiit

§ 5. Rektor ilinniartitsisutut ilinniartitaanermut ilinniartitsinermi siunnersuisoqatigiinnik pilersitsissaaq. Ilinniartitsinermi siunnersuisoqatigiit inuttaat tassaassapput ilinniartitaanermi pisortaq, ilinniaqatigiinni tamani sinniisuutitaq ataaseq ilinniartitsisuniillu sinniisut aamma taamak amerlatigisut.
Imm. 2. Sinniisuutitat gruppinit sinnikkanit taakkulu akornannit toqqarneqartassapput.
Imm. 3. Siulittaasoq ilinniartitsinermi siunnersuisoqatigiinni ilaasortat tamarmiusut akornanni toqqarneqassaaq.
Imm. 4. Siunnersuisoqatigiit suleriaasissartik namminneq aalajangersassavaat.

§ 6. Ilinniartitsinermi siunnersuisoqatigiit suliassat ilinniartitaanermut attuumassutillit rektorimut aalajangigassanngorlugit inassutigisassavaat, tassunga ilanngullugit:
1) Aalajangersimasumik qulequtaqartitsilluni sammisaqartitsineq naammassiniagaqartitsinerlu.
2) Ataatsimut aaqqissuussat.
3) Pissuserissaarnissami malittarisassat.
4) Ilinniarnermut atatillugu aallaarsimaarnerit.
5) Paasisassarsiorluni angalaarnerit.
6) Ilinniarnermut atatillugu angalanerit.
7) Pikkorissartitsinerit.
8) Nammineq piumassuseq atorlugu ilinniartitsineq.
9) Ilinniarnermi peqataanissamut malittarisassat.
10) Ilinniartuujunnaarsitsinermi malittarisassat.

 

Ilinniartitsisut siunnersuisoqatigiivi

§ 7. Ilinniartitsisut siunnersuisoqatigiivi tassaapput ilinniartitsisut, timelærerit vikarillu atorfeqavissut tamarmik.
Imm. 2. Siunnersuisoqatigiit suleriaasissartik namminneq aalajangersassavaat.

§ 8. Ilinniartitsisut siunnersuisoqatigiivisa suliassat perorsaanermut attuumassutillit rektorimut aalajangigassanngorlugit inassutigisassavaat, tassunga ilanngullugit:
1) Atorfiit immikkut ittut suliffiullu iluani suliassat inuttassarsiorneqarneri.
2) Ilinniartitsissutit tiimillu agguarneqarnissaannut pilersaarutit.
3) Ilinniartut ilinniarnerup immikkoortuanut tulliuttumut ingerlateqqinneqartarneri.
4) Ilinniartunik soraarummeertussatut inassutiginerit.
5) Suliassat immikkut akuersissutigisassat.
6) Ilinniarnerup immikkoortuini pilersaarutit.
7) Ilinniarnermik aaqqissuussineq.
8) Killissarititassatut pilersaarut.
9) Misiligutaasumik ilinniartitsineq.

 

Ilinniartut siunnersuisoqatigiivi

§ 9. Ilinniartut siunnersuisoqatigiivinik pilersitsinissaq rektorip qulakkiissavaa.
Imm. 2. Siunnersuisoqatigiit suleriaasissartik namminneq aalajangersassavaat.

 

Sulinermik sungiusarnermut ataatsimiititaliaq

§ 10. Rektor sulinermik sungiusarnermut ataatsimiititaliamik pilersitsissaaq aammalu ataatsimiititaliap inuttalersugaanissaa suliassaalu pillugit erseqqinnerusunik aalajangersagaliussalluni.

 

Atortuulersitsinermi atorunnaarsitsinermilu aalajangersakkat

§ 11. Nalunaarut ulloq 1. juni 2002-mi atuutilissaaq.
Imm. 2. Tamatumunnga peqatigitillugu Ilinniarfissuarmi rådit, ataatsimiititaliat il.il. pillugit Namminersornerullutik Oqartussat nalunaarutaat nr. 24, 8. juli 1991-imeersoq atorunnaarsinneqarpoq.




Namminersornerullutik Oqartussat, 29. april 2002.




Lise Lennert

/

Karl Kristian Olsen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk