Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisaat nr. 2, 21. maj 2002-meersoq (Umiarsuit takornarianik angallassissutit ilaasunik angallassinermi akitsuummik akiliisinneqartalernissaat)

§ 1.

Umiarsualivimmiinnermut akileraarutit pillugit Inatsisartut inatsisaanni nr. 20, 30. oktober 1992-imeersumi, kingullermik Inatsisartut inatsisaatigut nr. 1, 20. maj 1998-imeersukkut allanngortinneqartumi makku allannguutigitinneqarput:


1.
Inatsisartut inatsisaata taaguutaa ima allassimassaaq: "Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Inatsisartut inatsisaat".

2. § 1 ima oqaasertaqassaaq:
"§ 1. Umiarsuit Kalaallit Nunaanni umiarsualivinnut nunalittut akileraarutinik landskarsimut akiliisassapput.
Imm. 2. Umiarsuit takornarianik angallassissutit Kalaallit Nunaanni umiarsualivinnut nunalittut, umiarsualiviup avataani kisartut imaluunniit ilaasunik sinerissamut nunnigussisut imm. 1 naapertorlugu akileraarutinik akiliissanngillat. Tassunga taarsiullugu umiarsuup takornarianik angallassinermini ilaasuinut akileraarut tamarmiusoq ilaasumut ataatsimut 300 kr.-niusoq akilerneqartassaaq. Umiarsuup takornarianik angallassinissani Kalaallit Nunaanni umiarsualivimmiit aallarnerpagu, umiarsuup aallarnerani ilaasorineqartumut ataatsimut akileraarut tamarmiusoq 300 kr.-niusoq akilerneqartassaaq.
Imm. 3. Umiarsuup Kalaallit Nunaanni umiarsualivimmut, umiarsualiviup avataanut sinerissamiluunniit ilaasuminik nunnigussiffissamisut tikitassaanut siullermut apuunnissaa nal.ak. 24-nik sioqqullugu umiarsuup takornarianik angallassissutip naalagaata allattorsimaffik ilaasut qanoq amerlatiginerannik imaqartoq Akileraartarnermi Pisortaqarfimmut nassiutissavaa. Takornarianik angallassineq Kalaallit Nunaanni umiarsualivimmiit aallarnerneqarpat umiarsuaq aallartinnagu allattorsimaffik nassiunneqassaaq."

3. § 2-mi nr. 10)-tut nutaatut ilanngunneqassaaq:
"10) Umiarsuit ilaasunik angallassissutit umiarsuaatileqatigiiffinnit Namminersornerullutik Oqartussanut sullissinissamik isumaqatigiissuteqartunit pigineqartut."

4. § 5 ima oqaasertaqassaaq:
"§ 5. Akileraarutinut akiligassaq umiarsuup umiarsualivimmut nunalinnerani akiligassanngussaaq. Umiarsuarnut takornarianik angallassissutinut ilaasunik nassataqartunut tunngatillugu akileraarutinut akiligassaq umiarsuup umiarsualivimmut nunalinnerani, umiarsualiviup avataani kisarnerani imaluunniit sinerissami ilaasuminik nunnigussiffissaani akiligassanngussaaq. Takornarianik angallassineq aallartereersoq ilaasunik nutaanik Kalaallit Nunaanni umiarsualivimmiit ilaasoqalerpat, akileraarutinut akiligassat amerlissutaat umiarsuup umiarsualivimmut tassunga nunalinneraniit akiligassanngussaaq.
Imm. 2. Akileraarutinut akiligassaq Akileraartarnermi Pisortaqarfimmut kingusinnerpaamik akilerneqassaaq umiarsuup aallalernerani.
Imm. 3. Umiarsuit takornarianik angallassissutit akileraarutinut akiligassaat Akileraartarnermi Pisortaqarfimmut kingusinnerpaamik akilerneqassaaq umiarsuup umiarsualivimmiit, umiarsualiviup avataani kisarsimaffimminiit imaluunniit sinerissami ilaasuminik nunnigussiffigisaminiit aallalernerani.
Imm. 4. Umiarsuit umiarsualivimmut ataatsimut arlalinnulluunniit aalajangersimasumik nunalittartut imm. 2-mi aalajangersakkanit allaanerusumik akiliuteqarnissaat pillugu Akileraartarnermi Pisortaqarfimmik isumaqatigiissuteqartoqarsinnaavoq."

 

§ 2.

Inatsisartut inatsisaat atuutilissaaq ulloq 1. januar 2003-miit.




Namminersornerullutik Oqartussat, u1loq 21. maj 2002




Jonathan Motzfeldt

/

Augusta Salling

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk