Tunillaassortumik nappaalasoqalernerani atuarfiit paaqqinnittarfiillu atugaat pillugit Namminersorlutik Oqartussat nalunaarutaat nr. 4, 17. marsi 2020-meersoq

Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi § 22 naapertorlugu aalajangersarneqarpoq:

 

Atuuffii

 

  § 1.  Nalunaarummi matumani tunillaassortumik nappaalasoqalernerani atuarfiit paaqqinnittarfiillu atugaat pillugit aalajangersaasoqarpoq, tamatumunnga ilanngullugit:
1)  nappaatinik ulorianartutut nalinginnaasumik isigineqartunik aamma nappaatinik tuniluuttunik allanik, nappaatit tunillaassortut akiorniarlugit iliuutsit pillugit Inatsisartut peqqussutaanni allattorsimaffik A-mi aamma allattorsimaffik B-mi ilaatinneqartunik siaruartoqarnissaata pinngitsoortinnissaa aamma 
2)  nappaatinik tuniluuttunik allanik siaruaattoqarnissaata killilerneqarnissaa

 

  § 2.  Nalunaarut manna meeqqanut inuusuttunullu ulluunerani paaqqinnittarfinnut, atuareernerup kingorna ornittakkanut, sunngiffimmi sammisassaqartitsivinnut, sunngiffimmi ornittakkanut, atuarfinnut pisortanit aamma namminersortunit pigineqartunut, matumani ilinniarnertuunngorniarfinnut inuusuttunullu ilinniarfinnut allanut atuuppoq.  Nalunaarut ulluunerani neqeroorutinut allanut aamma atuuppoq.

 

Nappaatinik tuniluuttoqartillugu nalinginnaasumik ileqqorisassatut malittarisassat

 

  § 3.  Meeqqat, inuusuttut sulisullu tuniluuttumik nappaateqartut paaqqinnittarfinnut atuarfinnullu tuniluuffiusinnaasunut iseqqusaanngillat.
  Imm. 2.  Paaqqinnittarfimmiinnermi imaluunniit atuarfimmiinnermi meeraq nappaammik tuniluuttumik takussutissaqalerpat, angerlartinneqarnissaa isumaginiarlugu angerlarsimaffik nalunaarfigineqassaaq, pisariaqarpallu meeqqap angerlartinneqarnissaata tungaanut meeqqanut allanut qanillattortinneqarnaveersaassaaq.
  Imm. 3.  Meeqqat, inuusuttut imaluunniit sulisut akornanni imaluunniit taakku illoqataasa akornanni § 1-imi nappaatinik pineqartunik tunillatsittoqarsimappat imaluunniit tunillatsittoqarsimasoq ilimagineqarpat, pineqartut paaqqinnittarfimmut imaluunniit atuarfimmut qaqugukkut isersinnaanersut nalornissutigineqarpat Nunatta Nakorsaaneqarfia aalajangiissaaq.

 

  § 4.  Naalakkersuisut paaqqinnittarfinnik aamma atuarfinnik tamakkiisumik imaluunniit ilaannakortumik matusinissaq aalajangersinnaavaat.  Matoqqasitsinerup nalaani Naalakkersuisut tunillaasinnaanermut aarlerinassutsimut aaqqiissutaasussatut peqqussutaat sulissutigineqassapput. Ammaaqqinneq Naalakkersuisut akuersinerisigut taamaallaat pisinnaavoq. 
  Imm. 2.  Pisuni imm. 1-imi ilaatinneqartuni piumasaqaatit Naalakkersuisut aalajangersagaat naapertorlugit, ajornartoornermi meeqqat inuusuttullu paaqqutarineqarnissaannut kommunalbestyrelse aaqqiissuteqarnissamut pisussaaffilerneqassaaq.  
 
Imm. 3.  nappaatinik tuniluuttoqarnerani paaqqinnittarfinni § 2-mi allaaserineqartuni meeqqanik nutaanik tigusisoqarsinnaanngitsoq Naalakkersuisut aalajangiisinnaapput.

 

Nalunaaruteqarnissaq ilisimatitsinissarlu

 

  § 5.  Nappaatinik § 1, nr. 1-imi pineqartunik tunillaassuuttoqarnerani pasitsaassaqartoqarneraniluunniit nalunaaruteqarnissamik ilisimatitsinissarlu pillugit uani §§ 6 - 9-mi aalajangersakkatut allassimasut atuupput.

 

  § 6.  Meeqqani sulisunilu nappaatinik taamaattunik napparsimasoqalernerit tamaasa nakorsap suliaqartup Nunatta Nakorsaaneqarfia sapinngisamik piaarnerpaamik ilisimatissavaa. Nappaatinik nappaatit tunillaassortut akiorniarlugit iliuutsit pillugit Inatsisartut peqqussutaanni allattorsimaffik A-mi ilaasunik, inoqutigiinni napparsimasoqarpat, aamma tamanna ilisimatitsissutigineqassaaq.

 

  § 7.  § 6 naapertorlugu nappaatit nalunaarutigineqartut pillugit Nunatta Nakorsaaneqarfiata paaqqinnittarfinni imaluunniit atuarfinni aqutsisoq aamma kommunalbestyrelse sapinngisamik piaarnerpaamik ilisimatitsissavai.
  Imm. 2.  Nunatta Nakorsaaneqarfia inuit kikkut paasissutissinneqarnissaannik kiisalu paasissutissiinerup qanoq imaqarnissaanik aalajangiissaaq.

 

  § 8.  Paaqqinnittarfiup imaluunniit atuarfiup pisortaata § 7, imm. 2-mi paasissutissiineq pineqartoq meeqqat aamma sulisut angerlarsimaffiinut ingerlateqqissavaa. 
  Imm. 2.  Paaqqinnittarfinni atasuni paaqqinnittarfimmi napparsimasoqarfiusumi pisortaq paaqqinnittarfinnut atasunut pisortanut allanuttaaq ilisimatitsissaaq. 

 

Ilitsersuut

 

  § 9.  Nunatta Nakorsaaneqarfia nalunaarummut matumunnga atatillugu meeqqat aamma inuusuttut atuarfiini aamma ulluunerani paaqqinnittarfinni nappaatit tuniluuttut pinaveersaartinnissai pillugit maleruagassat pillugit ilitsersuissaaq.

 

Atuutilerfia

 

  § 10.  Nalunaarut 18. marsi 2020-mi atuutilissaaq.

 

 

Namminersorlutik Oqartussat, ulloq 17. marsi 2020

 



Martha Abelsen

/

Tine Pars

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk