Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. 1, 16. januar 2020-imeersoq

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 1, imm. 2, Meeqqat tapersersorneqarnissaannut Inatsisartut inatsisaat nr. 20, 26. juni 2017-imeersumi § 8, imm. 6, § 11, imm. 5 aamma § 37, imm. 7, Inuit innarluutillit tapersersorneqarnissaannut Inatsisartut inatsisaat nr. 13, 12. juni 2019-imeersumi § 62, imm. 4, § 63, imm. 4, § 64, imm. 6, aamma § 68, imm. 4, aamma Utoqqarnik paaqqinniffiit il.il. pillugit Inatsisartut peqqussutaat nr. 11 ulloq 30. oktober 1998-imeersumi § 5, imm. 4 malillugit tullinnguuttut makku aalajangersarneqarput:

 

Kapitali 1

Kommunalbestyrelsip ingerlatsineranik pingaarnertut nakkutilliineq

 

  § 1.  Naalakkersuisut qitiusumik nakkutilliinermik ingerlatsivia (Nakkutilliinermik ingerlatsivik) kommunalbestyrelsip ingerlatsineranik aamma inunnik isumaginninnermut inatsisinik aqutsineranik, matumani Meeqqat tapersersorneqarnissaannut Inatsisartut inatsisaannik, Inuit innarluutillit tapersersorneqarnissaannut Inatsisartut inatsisaannik, Utoqqarnik paaqqinniffiit il.il. pillugit Inatsisartut peqqussutaannik kiisalu pisortat ingerlatsineranni suliat suliarineqartarnerat pillugu inatsimmi aamma pisortat ingerlatsinerat pillugu inatsimmi malittarisassanik pingaarnertut nakkutilliisuussaaq.

 

  § 2.  Pingaarnertut nakkutilliinermi § 1 malillugu pineqassapput:
1)  § 3 malillugu inatsisit,
2)  § 4 malillugu aningaasaqarneq, aamma
3)  § 3 malillugu isumaginninnermi suliassat suliarineqarnerisa pitsaassusiat. 
  Imm. 2.  Pingaarnertut nakkutilliineq makkuninnga imaqassaaq:
1)  suliassanik assigiinngiiaartunik misissuineq,
2)  inunnik ilisimaarinnittunik oqaloqateqarnerit, aamma
3)  ingerlatsiviup aaqqissuussaaneranik misissuineq.

 

  § 3.  § 2-mi, imm. 1-imi, nr. 1 aamma 3 malillugit inatsisinik isumaginninnermilu suliassanik nakkutilliinermut ilaassapput ingerlatsiviup:
1)  maleruagassanik allassimasunik periaasiulersimasunillu malinninnera,
2)  nassuiaasarnera missiliuisarneralu,
3)  suliamut paasissutissiinera, suliamik suliarinninnera naammagittaalliuutinillu suliaqarnera
4)  piginnaasatigut tutsuiginassutsikkullu ajornartorsiutinik suliarineqarnera, aamma
5)  imminut nakkutilliivigisarnera aamma aqutsinikkut nakkutilliinera.

 

  § 4. Kommunip aningaasaqarnermik ingerlatsinera isumannaatsuunersoq isumaginninnermilu suliassaqarfiup iluani inatsisinik tunngavilersorneqarnersoq § 2, imm. 1, nr. 2 malillugu aningaasaqarnermik nakkutilliinerup nalilissavaa.

  § 5.  § 1 malillugu Nakkutilliinermik ingerlatsivik kommunini ataasiakkaani minnerpaamik ukiumut ataasiarluni pingaarnertut nakkutilliinermik ingerlatsisassaaq. 
  Imm. 2.  Nakkutilliinermik ingerlatsiviup nakkutilliinerminut atatillugu ukiut sisamakkaarlugit kommuninut qinigaaffiup iluani illoqarfiit tamarmiusut nakkutilliiartorfigisimassavaa.
  Imm. 3.  Nakkutilliinermik ingerlatsiviup nakkutilliinerminut atatillugu imm. 2-mi piffissap pineqartup iluani nammineq naliliinini malillugu nunaqarfiit assigiinngitsut nakkutilliiartorfigisimassavai.

 

  § 6.  § 1 malillugu pingaarnertut nakkutilliinissaq sapaatit akunneri marluk sioqqullugit kommunalbestyrelsimut kalerriutigineqassaaq.

 

Nakkutilliinermit nalunaarusiaq

 

  § 7.  § 1 malillugu Nakkutilliinermik ingerlatsivik pingaarnertut nakkutilliinerminit nalunaarusiamik suliaqartassaaq.  
  Imm. 2.  §§ 3-mi aamma 4-mi pissutsit tulleriiaarneqarsimasut misissuiffigineqarnerannik aamma isummerfigineqarnerannik nakkutilliisimanermit nalunaarusiaq imaqassaaq.

 

  § 8.  § 7 malillugu inaarutaasumik nakkutilliinermit nalunaarusiap suliarineqariarluni kommunalbestyrelsimut nassiunneqannginnerani nakkutilliinermit nalunaarusiaq minnerpaamik ulluni 14-ini kommunalbestyrelsimut tusarniaassutigineqassaaq.
  Imm. 2.  Nakkutilliinermit nalunaarusiaq kingusinnerpaamik ullormi nakkutilliiffiusimasumit qaammatit pingasut qaangiunnerisa kingorna naammassillugu suliarineqareersimassaaq.
  Imm. 3.  Immikkut ittumik pisoqartillugu imm. 1-imi aamma 2-mi piffissaliussat avaqqunneqarsinnaapput.
  Imm. 4.  Nakkutilliinermit nalunaarusiaq Naalakkersuisut nittartagaatigut tamanut nalunaarutigineqassaaq. 
  Imm. 5.  Nakkutilliinermit inaarutaasumik nalunaarusiap kommunalbestyrelsimut nassiunneqarneraniit qaammatit marluk qaangiunnerini kommunalbestyrelse pissutsit nakkutilliinermit nalunaarusiami uparuaassutigineqartut iluarsiiffiginiarlugit  kommunalbestyrelse qanoq iliorniarnini pillugu Nakkutilliinermik ingerlatsivimmit allakkatigut nalunaarusiortoqassaaq.

 

Kapitali 2

Kommunini meeqqanik nalinginnaasumik inummut sammititamik nakkutilliineq

 

  § 9.  Meeqqat kommunimi atugaannik ingerlaavartumik nakkutilliinissaminut kommunalbestyrelse pisussaaffeqarpoq. Meeraq imaluunniit meeqqat eqimattat 18-it inorlugit ukiullit immikkut ikiorserneqarnissaminnik pisariaqartitsisinnaasut, kommunalbestyrelsimit ilisimaneqalernissaat anguniarlugu, kommunalbestyrelse sapinngisamik siusissukkut nakkutiginnittassaaq. 
  Imm. 2.  Kommunalbestyrelse imm. 1 malillugu nakkutilliineq naammassiniarlugu kommunip nunaqarfiinut tamarmiusunut ukiut tamaasa nakkutilliinermik ingerlatsisassaaq.

 

Kapitali 3

Meeqqanik angerlarsimaffiup avataanut inissinneqarsimasunik inummut sammititamik nakkutilliineq

 

  § 10.  Kommunalbestyrelse inissiisoq meeqqap inissinneqarsimasup inissinneqarfiani ukiumut marloriarluni inummut sammititamik nakkutilliisassaaq.
  Imm. 2.  Meeraq kommunimut allamut inissinneqarsimappat, kommunalbestyrelse inissiisuusoq kommunimilu inissiiffiusumi kommunalbestyrelse, kommunalbestyrelse inissiisoq sinnerlugu inissiiffimmi kommunalbestyrelse nakkutilliinermik ingerlatsinissaa pillugu isumaqatigiissuteqarsinnaapput. 
  Imm. 3.  Imm. 2 malillugu inummut sammititamik nakkutilliinissamik isumaqatigiissuteqartoqarsimappat nalunaarummi matumani aalajangersakkat malillugit nakkutilliinissaq kommunalbestyrelsip inissiisup akisussaaffigissavaa. 

 

  § 11.  Meeqqamut tunngatillugu iliuusissanut pilersaarutip inissiiviusumi malinneqarnissaa aamma meeqqap pisariaqartitai eqqarsaatigalugit ikiorsiinerup naammattuunissaa siunertamullu naapertuuttuunissaa § 10 malillugu inummut sammititamik ingerlaavartumik nakkutilliinikkut qulakkeerneqassaaq, matumani ilanngullugit:
1)  meeqqap inissinneqarfigisamini sumiginnarneqannginnissaa imaluunniit innarlerneqannginnissaa, 
2)  meeraq taassumalu angajoqqaavi pisinnaatitaaffimminnik ilisimatinneqarnissaat, aamma
3)  naammagittaalliuutaasinnaasut, meeqqap akuuffigisaasa inerneri meeqqamut, angajoqqaatut oqartussaasunut kiisalu meeqqap sullissisuanut tunniunneqarnissaat.
  Imm. 2.  Meeqqat tapersersorneqarnissaannut Inatsisartut inatsisaanni § 30-mi, imm. 2-mi nr. 2 malillugu meeraq ulloq unnuarlu paaqqinnittarfimmut inissinneqarsimappat, nakkutilliinerup aamma qulakkiissavai:
1)  iliuusissanut pilersaarummi siunertarineqartoq anguniagaasorlu ulloq unnuarlu paaqqinniffiup katsorsaanissamik pilersaarutaani naammassineqassasut,
2)  meeqqap inissinneqarsimasup pisariaqartitai ulloq unnuarlu paaqqinniffiup perorsaariaasiatigut ikorfartorneqassasut,
3)  ulloq unnuarlu paaqqinniffik killiffimmik nalunaarusiornermigut aamma katsorsaanissamik pilersaarumminik nutarterisarnermigut ingerlaavartumik nalunaaruteqartassasoq, aamma 
4)  pissaanermik atuisimanerit malitseqartinneqartassasut pissaanermillu atuisimaneq pillugu nalunaarutit tunngavigalugit meeraq ulloq unnuarlu paaqqinniffimmi eqqortumik ikorfartorneqarnersoq naliliiffigineqartassasoq.

 

  § 12.  § 10 malillugu inummut sammititamik nakkutilliinermut atatillugu meeraq kommunalbestyrelsimit oqaloqatigineqartassaaq. 
  Imm. 2.  Meeqqamik oqaloqateqarneq inunnit inissiivimmeersunit najuuffigineqanngitsumik ajornanngippat ingerlanneqassaaq, apeqqutaatinnagu meeraq ilaqutariinni paarsisartuni imaluunniit ulloq unnuarlu paaqqinniffimmi inissinneqarsimanersoq.
  Imm. 3.  Meeraq oqaloqatigiinnermi allanik illersuisoqarsinnaavoq. Tamanna pillugu kommunalbestyrelsip meeraq ilisimatissavaa. Meeqqap nammineq aalajangiisinnaatitaanini malillugu ilagisinnaavaa:
1)  meeqqanik illersuisoq isumaginninnermik ilisimasalik, imaluunniit
2)  oqaloqateqarnermi inuk alla ilagisinnaavaa.
  Imm. 4.  Imm. 3-mi. nr. 2 malillugu meeraq oqaloqateqarnissamut inummik ilaqarniarpat, meeqqallu mianerineqarnissaanut tamanna naapertuutinngitsoq nalilerneqarpat, inuk pineqartoq kommunalbestyrelsimit oqarfigineqarsinnaavoq oqaloqateqarnissamut peqataasinnaanngitsoq. Kommunalbestyrelse aalajangiippat inuk pineqartoq oqaloqateqarnissamut peqataasinnaanngitsoq, oqaloqatigiinnissaq aallartitsinnagu meeqqanik illersuisoq isumaginninnermik ilisimasalik kommunalbestyrelsimit aggersarneqassaaq. Meeraq pillugu iliuusissanut pilersaarummi aalajangiineq allaganngorlugu kommunalbestyrelsimit tunngavilersorneqassaaq.
  Imm. 5.  Meeqqap pisinnaaneqassusaa annikilleriarsimappat, oqaloqatigineqarnerminilu ikiorneqarnissamik pisariaqartitsippat, meeqqap isumaata tusarneqarnissaa qulakkeerniarlugu tamanna kommunalbestyrelsimit immikkut eqqarsaatigineqassaaq aamma tassunga atatillugu periutsinik aamma ikiorsiissutsinik immikkut ittunik atuisinnaavoq. 
  Imm. 6.  Meeqqamik oqaloqateqarnissaq immikkut pissuteqarluni pinngitsoortinneqarsinnaavoq, matumani meeqqap inerissimassusaa pissutaappat imaluunniit meeqqap mianerineqarnissaa pissutigalugu oqaloqateqarnissaq naapertuutinngippat. Oqaloqateqarnissap pinngitsoortinneqarnera meeraq pillugu iliuusissanut pilersaarummi allaganngorlugu tunngavilersorneqassaaq.

 

  § 13.  § 10 malillugu kommunalbestyrelse inummut sammititamik nakkutilliinerminut atatillugu piffimmi inissiiffiusumi pissutsinik ernumanartunik maluginiagaqarpat, oqartussaqarfimmut ingerlatsinerup tunngasutigut nakkutilliinissamik suliaqarnissaminut akisussaatitaasumut kiisalu kommunalbestyrelsinut inissiisimasunut kommunalbestyrelse nalunaaruteqassaaq, meeraq imaluunniit meeqqat piffimmi inissiiffiusumiittut pissutsinik ernumanartunik sunnerneqarsinnaappata.

 

  § 14  Kommunalbestyrelsip meeraq ingerlaannartumik peersissavaa, meeqqap ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat uku pissutigalugit:
1)  meeqqamik amigartumik isumassuineq isumaginninnerluunniit,
2)  timikkut nakuuserfigineqarsimappat tarnikkulluunniit ikilertissimappat, paarinerlunneqarpat imaluunniit kinguaassiuutitigut innarlerneqarpat,
3)  meeqqami imaluunniit meeqqap qanigisaani atornerluinermik ajornartorsiutit, pinerluttutut pissuseqarneq imaluunniit allatigut inuuniarnikkut annertuunik ajornartorsiuteqarneq, imaluunniit
4)  meeqqap allatut pissusilersornerani naleqqussarniarneraniluunniit ajornartorsiutit.

 

Kapitali 4

Ilaqutariinnik paarsisartunik ingerlatsinermut sammititamik nakkutilliineq

 

  § 15.  Kommunalbestyrelsip ilaqutariinnut paarsisartunut akuersissummik tunniussaqartup ilaqutariit paarsisartut ukiumut ataasiarluni aamma pisariaqartitsineq malillugu ingerlatsinermut sammititamik nakkutilliiffigisassavai. Ilaqutariit paarsisartut paarsisuunissamut aamma ilaqutariinnut paarsisartunut akuersissutini tunniunneqartuni piumasaqaatinik suli naammassinnissinnaanersut nakkutilliinikkut qulakkeerneqassaaq.
  Imm. 2.  Ilaqutariinnut paarsisartunut akuersissut piumasaqaatitaqartumik tunniunneqarsimappat piumasaqaatit eqqortinneqarnersut kommunalbestyrelsip nakkutilliinermini misissussavaa.  
  Imm. 3.  Kommunalbestyrelsip ingerlatsinermut sammititamik nakkutilliinermini ilaqutariinni paarsisartuni pissutsit misissorlugillu ilaqutariit paarsisartut oqaloqatigissavai.  
  Imm. 4.  Kommunalbestyrelsip ingerlatsinermut sammititamik nakkutilliinermini: 
1)  ilaqutariit paarsisartut nalunaaqqaarluni nakkutilliiartorfigisassavai, 
2)  ilaqutariit paarsisartut paasissutissanik piniarfigisassavai, aamma
3)  meeqqat ilaqutariinni paarsisartuni inissinneqarsimasut paasissutissanik piniarfigisassavai.
  Imm. 5.  Kommunalbestyrelsip imm. 4, nr. 1 malillugu nalunaaqqaarluni nakkutilliiartortarnermi saniatigut ilaqutariit paarsisartut nalunaarfigeqqaarnagit aamma nakkutilliiartorfigisinnaavai. 

 

  § 16.  § 15 malillugu ingerlatsinermut sammititamik nakkutilliineq ilaqutariinnik paarsisartunik paarsinermilu suliassamik qanoq ingerlatsisarnermik assigiiaartumik, aaqqissuussaasumik tunngavilersorluakkamillu nalilersuinissamut tunngavissiisumik ingerlanneqassaaq. 
  Imm. 2.  Nakkutilliineq inunnit suliap ataqatigiinnissaanik paasinnissinnaasunit taamalu ilaqutariit paarsisartut unammillernartoqartitaannik ingerlariaqqinnissamullu periarfissaannik nalunaaruteqarsinnaasunit ingerlanneqassaaq.  
  Imm. 3.  Siusinnerusukkut nakkutilliinermit nalunaarusiaasimasuni oqaaseqaatit, inassutigisimasat peqqussutillu aaqqissuussaasumik malitseqartinneqartarnissaat kommunalbestyrelsip nakkutilliinermut atatillugu qulakkiissavaa.

 

  § 17. Ilaqutariit paarsisartut kommunalbestyrelsimit § 15 malillugu nakkutilliisuusumit qinnuigineqarunik paasissutissat kommunalbestyrelsip ingerlatsinermut sammititamik nakkutilliinermini pisariaqartitai tunniutissavaat.

  Imm. 2.  Ilaqutariit paarsisartut paasissutissanik kommunalbestyrelsimut tunniussaapput ingerlatitseqqinneq angajoqqaatut oqartussaassuseqartoq akuersisinngikkaluarlugu pisinnaavoq, ingerlatitseqqinneq nakkutilliinissamut pisariaqartuusorineqarpat.

 

  § 18.  § 15 malillugu kommunalbestyrelse ingerlatsinermut sammititamik nakkutilliinerminut atatillugu ilaqutariit paarsisartuni pissutsinik ernumanartunik maluginiagaqarpat, meeraq pissutsinik ernumanartunik sunnerneqarsinnaappat kommunalbestyrelsimut inissiisuusimasumut kommunalbestyrelse nalunaaruteqassaaq.

 

  § 19.  Meeqqap ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat uku pissutigalugit kommunalbestyrelsip meeraq ingerlaannartumik peersissavaa:

1)  meeqqamik amigartumik isumassuineq isumaginninnerluunniit,

2)  timikkut nakuuserfigineqarsimappat tarnikkulluunniit ikilertissimappat, paarinerlunneqarpat imaluunniit kinguaassiuutitigut innarlerneqarpat,

3)  meeqqami imaluunniit meeqqap qanigisaani atornerluinermik ajornartorsiutit, pinerluttutut pissuseqarneq imaluunniit allatigut inuuniarnikkut annertuunik ajornartorsiuteqarneq, imaluunniit

4)  meeqqap allatigut pissusilersornerani naleqqussarniarneraniluunniit ajornartorsiutit.

  Imm. 2.  Kommunalbestyrelsip imm. 1 malillugu meeqqamik paarsisunit peersitsinerminut atatillugu nammineerluni isummerfigissavaa inoqutigiinni meeqqat allat arlaatigut iliuuseqarfigineqassanersut, tassa meeqqat pineqartut ingerlaannartumik peerneqassanersut imaluunniit ilaqutariinni paarsisartuni najugaqartinneqaannassanersut.

  Imm. 3.  Kommunalbestyrelsip ingerlatsinermut sammititamik nakkutilliisuusup aamma utaqqiisaa kommunalbestyrelse inissiisuusoq sinnerlugu meeqqamik peersitsisup kommunalbestyrelse inissiisuusimasoq ingerlaannaq nalunaarfigissavaa. Matuma kingorna kommunalbestyrelse inissiisuusimasoq imm. 1 malillugu inaarutaasumik aalajangiissaaq.

 

  § 20. § 15 malillugu kommunalbestyrelsip pasitsaappagu ilaqutariit paarsisartut inoqutigiinniluunniit allat aanngajaarniutinik inerteqqutaasunik atuisuusut kommunalbestyrelse ingerlatsinermut sammititamik nakkutilliiartussaaq.

 

  § 21. § 15 malillugu ingerlatsinermut sammititamik nakkutilliinermut atatillugu kommunalbestyrelse aanngajaarniutinik inerteqqutaasunik atuisoqarneranik pasitsaassaqaruni inoqutigiinni ataaseq arlallilluunniit aanngajaarniutinik atuisuunersut paasiniarlugu misissorneqarnissaannik qinnuigisinnaavai.

  Imm. 2.  Imm. 1 malillugu aanngaajaarniutinik atuisuunermik misissuisoqartinnagu, inuk aanngaajaarniutinik atuisuunermut misissuiffigineqartussaq kommunalbestyrelsimit allaganngorlugu akuersisinneqassaaq. Akuersissuteqarneq pinngitsaaliissutaassanngilaq erseqqissuussallunilu.

  Imm. 3.  Imm. 2 malillugu inuup inoqutigiinniittup aanngajaarniutinik atuisuunermik misissorneqarnissani akuersaarumanngippagu, § 23 malillugu kommunalbestyrelse nakkutilliinermik sakkortunerusumik ingerlatsisinnaavoq, imaluunniit Ilaqutariit paarsisartut pillugit Namminersorlutik Oqartussat nalunaarutaanni § 8 malillugu ilaqutariinnut paarsisartunut akuersissut atorunnaarsillugu.

  Imm. 4.  § 15 malillugu ingerlatsinermut sammititamik nakkutilliinermut atatillugu imaluunniit allatigut pasitsaassisoqarpat, ilaqutariit paarsisartut ilaat imaluunniit inoqutigiinni alla aanngaajaarniutinik inerteqqusaasunik atuisuusoq, kommunalbestyrelse ilaqutaannik paarsisartunik ingerlatsinermut sammititamik nakkutilliisuusoq § 15 malillugu ingerlaannaq kommunalbestyrelsimut inissiisuusimasumut nalunaaruteqassaaq. Matuma kingorna § 10 malillugu kommunalbestyrelse inissiisuusimasoq pissutissaqanngitsumik kinguarsaanani inummut sammititamik nakkutilliinermik ingerlatsinissaminut pisussaaffeqarpoq.

 

  § 22.  Kommunalbestyrelse ilaqutariit peqqissussaannik naliliinerminut atatillugu, Ilaqutariit paarsisartut pillugit Namminersorlutik Oqartussat nalunaarutaat § 5, imm. 2, nr. 10 malillugu, inoqutigiinni inuk ataaseq imaluunniit amerlanerusut peqqissutsimut uppernarsaammik tunniusseqqullugit qinnuigisinnaavai. Peqqissutsimut uppernarsaat qaammatit pingasut sinnerlugit pisoqaassuseqassanngilaq.

 

Annertusisamik nakkutilliineq

 

  § 23.  Immikkut nassuiakkamik annertusisamik nakkutilliisoqarnissaa pisariaqartinneqartoq kommunalbestyrelsimit nalilerneqarpat kommunalbestyrelse annertusisamik nakkutilliisoqarnissaanik aalajangiisinnaavoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattorli nakkutilliineq ataaseq sivisunerpaamik qaammatinik pingasunik sivisussuseqartassaaq. 
  Imm. 2.  Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.
  Imm. 3.  Annertusisamik nakkutilliinissamut tunngaviusinnaapput:
1)  nakkutilliinermit nalunaarusiaq ataaseq inerniliippat ilaqutariit paarsisartut ajornartorsiutaat immikkut ittut nalinginnaasulluunniit misissoqqinneqarnissaat pisariaqartoq,
2)  ilaqutariit paarsisartut pillugit naammagittaalliutigineqarpata,
3)  kommunalbestyrelse nalinginnaasumik immikkulluunniit ittumik ilaqutariinni paarsisartuni pissutsinik ernumanarsinnaasunik meeqqamut paaqqutarineqartumut tunngatillugu maluunniit meeqqamut pineqartumut eqquisunik maluginiagaqarpat, imaluunniit 
4)  ilaqutariinni paarsisartuni pissutsit paaqqutaqarnissamut akuersissut imaluunniit ilaqutariittut paaqqutaqarnissamut akuersissut naapertorlugit ilaqutariittut paarsisuusinnaanermut piumasaqaatinik naammassinninnissamut qulartitsisut. 
  Imm. 4.  Annertusisamik nakkutilliisoqarnissaanik taamaallaat aalajangiisoqarsinnaavoq pissutsit annertusisamik nakkutilliinissamik eqqarsaateqarnermut tunngaviusut pillugit ilaqutariit paarsisartut oqaloqatigineqareernerisigut. Pissutsilli immikkut ittut pisariaqartilerpassuk annertusisamik nakkutilliisoqarnissaa ingerlaannartumik aalajangerneqarsinnaavoq.
  Imm. 5.  Annertusisamik nakkutilliisoqarnissaanik taamaallaat aalajangiisoqarsinnaavoq ilaqutariit paarsisartut pissutsinik aalajangiinermut tunngaviusunik aaqqiisinnaanerat aaqqeerusunnerallu ilimanaateqarsorineqarpat. Ilaqutariit paarsisartut pillugit Namminersorlutik Oqartussat nalunaarutaanni § 8 malillugu ilaqutariit paarsisartut pissutsinik ernumanartunik aaqqiisinnaanerat aaqqeerusunnerallu naatsorsuutigineqanngippat ilaqutariinnut paarsisartunut akuersissutip atorunnaarsinneqarnissaa kommunalbestyrelsip aalajangissavaa.
  Imm. 6.  Kommunalbestyrelse annertusisamik nakkutilliisoqarnissaanik aalajangiisimappat kommunalbestyrelsit inissiisuusut kommunalbestyrelsimit ilisimatinneqassapput.

 

Nakkutilliinermit nalunaarusiaq

 

  § 24.  Kommunalbestyrelse § 15 aamma § 23 naapertorlugit ingerlatsinermut sammititamik nakkutilliinerit tamaasa nakkutilliinermit nalunaarusiamik suliaqartassaaq.
  Imm. 2.  Nakkutilliisimanermit nalunaarusiami tulliuttut ilisimasaat isumaallu  kommunalbestyrelsimit ilanngunneqartassapput:
1)  ilaqutariit paarsisartut, tassunga ilanngullugit nammineq meeqqat angerlarsimaffimmi najugaqartut inuillu allat inoqutigiinnut ilaasut, aamma
2)  meeraq paaqqutarineqartoq meeqqamullu paaqqutarineqartumut angajoqqaatut oqartussaasut.
  Imm. 3.  Nakkutilliisimanermit nalunaarusiami paasissutissat tulliuttut saqqummiunneqassapput:  
1)  Ulloq nakkutilliiffiusoq.  
2)  Kina nakkutilliinermik ingerlatsisimanersoq. 
3)  Nakkutilliiartornissaq nalunaarutigeqqaarneqarsimanersoq imaluunniit nalunaarutigeqqarneqarsimannginnersoq.  
4)  Nakkutilliinermut tunngaviusoq.  
5)  Kommunalbestyrelse nakkutilliiartortoqannginnerani paasissutissanik sunik piniarsimanersoq.
6)  Kommunalbestyrelse nakkutilliinerminut atatillugu kikkunnik oqaloqateqarsimanersoq. 
7) Ilaqutariit meeqqanik qassinik paaqqutaqarnersut kiisalu meeqqat qassinik ukioqarnersut meeqqallu tapersersorneqarnissamik pisariaqartitaat.
8)  Nakkutilliinermi maluginiarneqartut suuneri. 
9)  § 21 malillugu aanngajaarniutinik atuisuunermik misissuisoqarsimappat inerneri. 
10)  Ilaqutariit paarsisartut ilaqutariittut paarsisartutut akuersissummi piumasaqaatinik malinninnerannik naliliineq.
11)  Nakkutilliisoqarnerata, matumani aamma annertusisamik nakkutilliisoqarnissaanik aalajangiinerup, ilaqutariinnut paarisartunut akuersissummik atorunnaarsitsinissamik aalajangiinerup aamma paasissutissanik kommunalbestyrelsimut kommunalbestyrelsinulluunniit meeqqap ilaqutariinnut paarsisartunut inissinneqarnissaanik aalajangiisimasunut ingerlatitseqqissimanerup malitsigisaannik qisuariaataasimasut.
  Imm. 4.  Nakkutilliisimanermi nalunaarusiaq ilaqutariinnut paarsisartunut tusarniaassutigineqassaaq, tassani tusarniaanermut akissummik tunniussinissamut ullut 14-it piffissaritinneqarlutik. Naammassillugu nakkutilliinermut nalunaarusiap assilineqarnera ilaqutariinnut paarisartunut nassiunneqassaaq.
  Imm. 5.  Immikkut ittumik pisoqartillugu imm. 4-mi piffissaliussaq avaqqunneqarsinnaavoq.

 

  § 25.  § 24 malillugu kommunalbestyrelsip nakkutilliinermit nalunaarusiamut ilanngullugit allassinnaavai:
1)  paasisimasat ilisimatitsissutillu, aamma
2)  pissutsit iluarsineqartariaqartut iliuuseqarfigineqartariaqartullu pillugit siunnersuutit.
  Imm. 2.  Imm. 1 malillugu oqaaseqaatit siunnersuutilluunniit ilaqutariit paarsisartut oqaloqatigineqareerneratigut suliarineqartassapput, aamma pissutsit oqaaseqaateqarnermut imaluunniit inassuteqarnermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

Kapitali 5

Meeqqanut ulloq unnuarlu paaqqinnittarfinnik ingerlatsinermut sammititamik nakkutilliineq

 

  § 26.  Nakkutilliinermik ingerlatsivik Meeqqat tapersersorneqarnissaannut Inatsisartut inatsisaanni § 34-mi, imm. 1 malillugu meeqqanut ulloq unnuarlu paaqqinnittarfinni, matumani aamma meeqqanut ulloq unnuarlu paaqqinnittarfiit immikkoortortaanni isumannaallisakkani ingerlatsineq nakkutigissavaa. Ulloq unnuarlu paaqqinniffiup pitsaassusissamik attassiinnarnissaa akuersissummilu piumasaqaatinik naammassinnittuujuarnissaa nakkutilliinerup qulakkiissavaa, kiisalu ulloq unnuarlu paaqqinniffiup Naalakkersuisullu akornanni ingerlatsinissamut tunngatillugu isumaqatigiissutaasa naammassineqarnissaa qulakkiissallugu.
  Imm. 2.  Nakkutilliinermik ingerlatsivik ingerlatsinermut sammititamik nakkutilliinermut atatillugu ulloq unnuarlu paaqqinniffimmi pissutsit misissorlugillu ulloq unnuarlu paaqqinniffimmi sulisunik oqaloqateqartassaaq. 
  Imm. 3.  Nakkutilliinermik ingerlatsivik nakkutilliinermik suliassamik isumaginninnermini ulloq unnuarlu paaqqinnittarfimmut nalunaaqqaarluni nakkutilliiartortassaaq, paasissutissanillu ulloq unnuarlu paaqqinniffimmit pissarsisassalluni.
  Imm. 4.  Nakkutilliinermik ingerlatsivik imm. 3 malillugu nalunaaqqaarluni nakkutilliiartortarnerup saniatigut aamma nalunaaqqaarani ulloq unnuarlu paaqqinnittarfimmut nakkutilliiartorsinnaavoq.
  Imm. 5.  Imm. 1 malillugu nakkutilliineq toraagalimmik nakkutilliinertut ingerlanneqassaaq, tassani suliassaqarfiit toqqakkat taamaallaat ukkatarineqassallutik.

 

  § 27.  § 26 malillugu ingerlatsinermut sammititamik nakkutilliineq ingerlanneqassaaq assigiimmik, aaqqissuussaasumik uppernarsaaserluakkamillu ulloq unnuarlu paaqqinniffiup tunniussassaanik inissatigullu atugassarititaanik, kiisalu ulloq unnuarlu paaqqittarfiup suliassamik isumaginnittarneranik nalilersuinissamut tunngavissiisumik.
  Imm. 2.  Nakkutilliineq ingerlanneqassaaq inunnit suliap, aaqqissussaanerup aningaasaqarnerullu ataqatigiinnissaannik paasinnissinnaasunit taamalu ulloq unnuarlu paaqqinniffiup unammillernartoqartitaanik ingerlariaqqinnissamullu periarfissaanik nalunaaruteqarsinnaasunit. 
  Imm. 3.  Nakkutilliinermut atatillugu Nakkutilliinermik ingerlatsiviup ulloq unnuarlu paaqqinniffimmi aqutsisut, sulisut meeqqallu inissinneqarsimasut oqaloqatigalugit peqataatittassavai. Nakkutilliinermut atatillugu meeqqanut angajoqqaatut oqartussaassuseqartut aamma ulloq unnuarlu paaqqinniffiup suleqatigisai oqaloqatigalugit peqataatinneqassapput. 
  Imm. 4.  Nakkutilliinermut atatillugu siusinnerusukkut nakkutilliinermit nalunaarusiaasimasuni oqaaseqaatit, inassutigisimasat peqqussutillu aaqqissuussaasumik malitseqartinneqartarnissaat Nakkutilliinermik ingerlatsivimmit qulakkeerneqassaaq.

 

  § 28.  § 26 malillugu ingerlatsinermut sammititamik nakkutilliinerup makku imarissavai:
1)  Meeqqat ilinniarnissamut sulinissamullu periarfissaat.
2)  Meeqqat nammineersinnaalernissaminnut aamma ilaquttaminnut attaveqaatiminnullu atassuteqarnissaannut periarfissaat.
3)  Ulloq unnuarlu paaqqinniffiup saaffigisai, matumani ulloq unnuarlu paaqqinniffiup sullinniakkaminut neqeroorutigisaata imarisai kiisalu meeqqat inuunerminnut sunniuteqaqataanerat.
4)  Ulloq unnuarlu paaqqinniffiup periaasii angusaalu, matumani perorsaanikkut, tarnip pissusaanik ilisimatusarnikkut imaluunniit ilaqutariinnik katsorsaanikkut suleriaatsit.
5)  Ulloq unnuarlu paaqqinniffimmi aaqqissuussaaneq aqutsisullu.
6)  Ulloq unnuarlu paaqqinniffimmi sulisoqarnikkut piginnaasat.
7)  Ulloq unnuarlu paaqqinniffimmi aningaasaqarneq, matumani kukkunersiuisunit akuerineqarsimasumik naatsorsuuteqarnersoq. 
8)  Ulloq unnuarlu paaqqinniffimmi inissatigut atugassarititat, matumani sullinniakkat pisariaqartitaannut aamma ulloq unnuarlu paaqqinniffiup periaasaanut naapertuunnersut.
  Imm. 2.  Sammineqartut tamarmik arlalitsigut naapertuuttunik tunngavilersorlugit itisilerneqassapput, ulloq unnuarlu paaqqinniffiup tamakkiisumik siumullu isigisumik aaqqissugaanik takutitsisumik.

 

  § 29.  Ulloq unnuarlu paaqqinniffik ileqqoreqqusanik malinninnersoq Nakkutilliinermik ingerlatsiviup misissussavaa.

 

  § 30.  § 26 malillugu ulloq unnuarlu paaqqinniffimmi Nakkutilliinermik ingerlatsivik nakkutilliinermik ingerlatsinermut sammititamik nakkutilliinermini Nakkutilliinermik ingerlatsivik paasissutissanik pisariaqartitaminik qinnuiginnikkuni, ulloq unnuarlu paaqqinniffiup tunniutissavai.

  Imm. 2.  Nakkutilliinermut paasissutissanik ingerlatitseqqinneq pisariaqartuusorineqarpat, meeqqanut angajoqqaatut oqartussaassuseqartut akuersisinngikkaluarlugit, ulloq unnuarlu paaqqinniffimmiit paasissutissanik ingerlatitseqqinneq Nakkutilliinermik ingerlatsivimmut pisinnaavoq.

 

  § 31.  Nakkutilliinermik ingerlatsivik ulloq unnuarlu paaqqinniffimmi pissutsinik ernumanartunik maluginiagaqarpat, Nakkutilliinermik ingerlatsivik isumaginninnermut aqutsisoqarfimmut aamma kommunalbestyrelsinut inissiisimasunut nalunaarfiginnittassaaq, meeraq imaluunniit meeqqat pissutsinik ernumanartunik sunnerneqarsinnaappata.

 

  § 32.  Nakkutilliinermik ingerlatsivik kommunalbestyrelsimut inissiisuusimasumut ingerlaannaq nalunaaruteqassaaq, meeqqap ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat uku pissutigalugit:

1)  meeqqamik amigartumik isumassuineq isumaginninnerluunniit,

2)  timikkut nakuuserfigineqarsimappat tarnikkulluunniit ikilertissimappat, paarsinerluttoqarsimappat kinguaassiutitigulluunniit innarliisoqarsimappat,

3)  meeqqap atornerluinermik ajornartorsiutaanik, pinerluttarneranik imaluunniit allatigut pissusilersornikkut naleqqussarniarnikkulluunniit ajornartorsiutaanik naammaginanngitsumik katsorsaaneq.

  Imm. 2.  Nakkutilliinermik ingerlatsiviup nakkutilliinermini allatigulluunniit paasiguniuk meeqqap inissitap imm. 1-imi pissutsit pineqartut naammagittaalliuutigisimagai imaluunniit nalunaarutigisimagai Nakkutilliinermik ingerlatsiviup misissussavaa naammagittaalliuut imaluunniit nalunaarut malitseqartinneqarsimanersoq.

 

Peqqussut

 

  § 33.  Nakkutilliinermik ingerlatsivik ulloq unnuarlu paaqqinnittarfimmut peqqussuteqarsinnaavoq. Peqqusinerup eqquutsinneqarnissaanut piffissaliussaq Nakkutilliinermik ingerlatsiviup aalajangersassavaa.
  Imm. 2.  Peqqussuteqarnissamik taamaallaat aalajangiisoqarsinnaavoq pissutsit peqqussuteqarnissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut. Pissutsilli immikkut ittut pisariaqartilerpassuk peqqussuteqarnissaq ingerlaannartumik aalajangerneqarsinnaavoq.
  Imm. 3.  Peqqussuteqarnissamik taamaallaat aalajangiisoqarsinnaavoq ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanerat aaqqeerusunnerallu ilimanaateqarsorineqarpat. 
  Imm. 4.  Imm. 1 malillugu peqqussummik eqquutsitsinissaq akuersissummik peqaannarnissamut piumasaqaatinngortinneqarsinnaavoq.
  Imm. 5.  Ulloq unnuarlu paaqqinniffik imm. 1 malillugu peqqussummik eqquutsitsisinnaanngippat ulloq unnuarlu paaqqinnittarfimmut akuersissutip atorunnaarsinneqarnissaa naalakkersuisoqarfiup isumaginninnermut akisussaasuusup ulloq unnuarlu paaqqinnittarfinnik pilersitsineq ingerlatsinerlu pillugit Namminersorlutik Oqartussat nalunaarutaat malillugu aalajangersinnaavaa.
  Imm. 6.  Nakkutilliinermik ingerlatsivik peqqusippat, imm. 4 malillugu piumasaqaatinngortinneqarsimasumik Nakkutilliinermik ingerlatsivik kommunalbestyrelsit inissiisuusut tamatumannga ilisimatinneqassapput.

 

Annertusisamik nakkutilliineq

 

  § 34.  Immikkut nassuiakkamik annertusisamik nakkutilliisoqarnissaa pisariaqartinneqartoq kommunalbestyrelsimit nalilerneqarpat Kommunalbestyrelse annertusisamik nakkutilliisoqarnissaanik aalajangiisinnaavoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattorli nakkutilliineq ataaseq sivisunerpaamik qaammatinik pingasunik sivisussuseqartassaaq. 
  Imm. 2.  Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.  
 
Imm. 3.  Annertusisamik nakkutilliinissamut tunngaviusinnaapput:
1)  nakkutilliinermit nalunaarusiaq ataaseq inerniliippat ulloq unnuarlu paaqqinnittarfiit ataasiakkaat ajornartorsiutaat immikkut ittut nalinginnaasulluunniit misissoqqinneqarnissaat pisariaqartoq,
2)  ulloq unnuarlu paaqqinniffiup naammagittaalliutigineqarsimanera,
3)  ulloq unnuarlu paaqqinniffimmi Nakkutilliinermik ingerlatsivimmit maluginiakkat nalinginnaasut imaluunniit immikkut ittut, imaluunniit
4)  ataatsimut naliliineq malillugu ulloq unnuarlu paaqqinniffik pisariaqartinneqartumik pitsaassuseerussimasoq.  
  Imm. 4.  Annertusisamik nakkutilliisoqarnissaanik taamaallaat aalajangiisoqarsinnaavoq pissutsit annertusisamik nakkutilliinissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut. Pissutsilli immikkut ittut pisariaqartilerpassuk annertusisamik nakkutilliisoqarnissaa ingerlaannartumik aalajangerneqarsinnaavoq.
  Imm. 5.  Annertusisamik nakkutilliisoqarnissaanik taamaallaat aalajangiisoqarsinnaavoq ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanera aaqqeerusunneralu ilimanaateqarsorineqarpat. Ulloq unnuarlu paaqqinniffiup pissutsinik ernumanartunik aaqqiisinnaanera imaluunniit aaqqeerusunnera ilimagineqanngippat, ulloq unnuarlu paaqqinnittarfimmut akuersissutip atorunnaarsinneqarnissaa naalakkersuisoqarfiup isumaginninnermut akisussaasuusup Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat malillugu aalajangersinnaavaa.
  Imm. 6.  Nakkutilliinermik ingerlatsivik annertusisamik nakkutilliisoqarnissaanik aalajangiippat, kommunalbestyrelsit inissiisuusut Nakkutilliinermik ingerlatsivimmit ilisimatinneqassapput.

 


Nakkutilliinermit nalunaarusiaq

 

  § 35.  Nakkutilliinermik ingerlatsivik §§ 26 aamma 34 malillugit ulloq unnuarlu paaqqinniffimmi ingerlatsinermut sammititamik nakkutilliinermit tamanit nalunaarusiortassaaq.
  Imm. 2.  Nakkutilliisimanermit nalunaarusiami paasissutissat tulliuttut saqqummiunneqassapput:

1)  Ulloq nakkutilliiffiusoq.

2)  Kina nakkutilliinermik ingerlatsisimanersoq.

3)  Nakkutilliiartornissaq nalunaarutigeqqaarneqarsimanersoq imaluunniit nalunaarutigeqqarneqarsimannginnersoq.

4)  Nalinginnaasumik imaluunniit annertusisamik nakkutilliineq pineqarnersoq.

5)  Nakkutilliinermik ingerlatsiviup nakkutilliiartortoqannginnerani paasissutissanik sunik piniarsimanersoq.

6)  Nakkutilliinermik ingerlatsivik nakkutilliinerminut atatillugu kikkunnik oqaloqateqarsimanersoq.

7)  Meeqqat qassit inissat eqqarsaatigalugit ulloq unnuarlu paaqqinniffimmi inissinneqarnissamut allatsinnikuunersut kiisalu meeqqat qassinik ukioqarnersut meeqqallu tapersersorneqarnissamik pisariaqartitaat.

8)  Ukiumi kingullermi pissaanermik atuinerit qassiusimanersut.

9)  Nakkutilliinermi maluginiarneqartut suuneri.

10)  Ulloq unnuarlu paaqqinniffiup meeqqanik paaqqinniffimmiittuutigineqartutut nalunaarneqarsimasunik katsorsaanissamik isumassuinissamillu suliassaminik isumaginninnissamut piumasaqaatinik malinninneranik naliliineq.
11)  Ulloq unnuarlu paaqqinnittarfimmut akuersissummi piumasaqaatit ulloq unnuarlu paaqqinniffimmit suli malinneqarnersut pillugu naliliineq.
12)  Nakkutilliisoqarsimanerata kingunerisaanik akuersissummik atorunnaarsitsinissamik peqqusinerup aamma paasissutissanik kommunalbestyrelsimut kommunalbestyrelsinulluunniit inissiisimasunut ingerlatitseqqissimanerup malitsigisaannik qisuariaataasimasut, matumani annertusisamik nakkutilliisoqarnissaanik aalajangiineq.
  Imm. 3.  § 26, imm. 5 malillugu toraagalimmik nakkutilliinermi nakkutilliinermit nalunaarusiaq suliassaqarfiit toqqakkat ukkatarineqartut pillugit paasissutissanik taamaallaat imaqassaaq. 

 

  § 36.  § 35 malillugu inaarutaasumik nakkutilliinermit nalunaarusiap suliarineqariarluni ulloq unnuarlu paaqqinnittarfimmut nassiunneqannginnerani nakkutilliinermit nalunaarusiaq minnerpaamik ulluni 14-ini ulloq unnuarlu paaqqinnittarfimmut kiisalu oqartussaqarfimmut ulloq unnuarlu paaqqinniffimmik ingerlatsisumut tusarniaassutigineqassaaq.
  Imm. 2.  Nakkutilliinermit nalunaarusiaq naammassillugu kingusinnerpaamik ullormi nakkutilliiffiusimasumit qaammatit pingasut qaangiunnerisa kingornatigut suliarineqareersimassaaq.
  Imm. 3.  Immikkut ittumik pisoqartillugu imm. 1-imi aamma 2-mi piffissaliussat avaqqunneqarsinnaapput.
  Imm. 4.  Nakkutilliisimanermit nalunaarusiaq isumaginninnermut aqutsisoqarfimmut kiisalu kommunalbestyrelsinut meeqqanik ulloq unnuarlu paaqqinnittarfimmut inissiisimasunut ilisimatitsissutitut nassiunneqassaaq. 
  Imm. 5.  Nakkutilliinermit nalunaarusiaq Naalakkersuisut nittartagaatigut kiisalu ulloq unnuarlu paaqqinniffiup nittartagaatigut avammut nalunaarutigineqassaaq.

 

  § 37.  Nakkutilliinermik ingerlatsiviup § 35 malillugu nakkutilliinermit nalunaarusiami allassinnaavaa:
1)  paasisimasat ilisimatitsissutillu, aamma 
2)  pissutsit iluarsineqartariaqartut qisuariarfigineqartariaqartullu pillugit inassutigisat 
  Imm. 2.  Imm. 1 malillugu oqaaseqaatit imaluunniit inassutigisat ulloq unnuarlu paaqqinniffiup oqaloqatigineqareerneratigut suliarineqartassapput, aamma pissutsit oqaaseqaateqarnermut imaluunniit inassuteqarnermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

  § 38.  § 35 malillugu Nakkutilliinermik ingerlatsivik nakkutilliinermit nalunaarusiami ulloq unnuarlu paaqqinnittarfimmut inassutiginnissinnaavoq imaluunniit peqqusisinnaavoq pissutsit inassuteqarnermut imaluunniit peqqussuteqarnermut tunngaviusut qanoq aaqqiivigissallugit naatsorsuutigisat allaganngorlugit pilersaarummik suliaqarfigissagai, matumani piffissamik killiliussisassaaq.

 

Kapitali 6

Inunnut innarluutilinnut najugaqarfissatut neqeroorutini najugaqartunut inummut sammititamik nakkutilliineq

 

  § 39.  Inuup innarluutillip najugaqarfigisaani kommunimi angerlarsimaffigisami kommunalbestyrelse najugaqarfissatut neqeroorummi ukiumut marloriarluni inummut sammititamik nakkutilliisassaaq. 
  Imm. 2.  Inuk innarluutilik kommunimut allamut inissinneqarsimappat, kommunalbestyrelse inissiisoq sinnerlugu taanna nakkutilliinermik ingerlatsisarnissaa pillugu, kommunalbestyrelse inissiisuusoq kommunimilu inissiiffiusumi kommunalbestyrelse isumaqatigiissusiorfigisinnaavaa.
  Imm. 3.  Imm. 2 malillugu inummut sammititamik nakkutilliinissamik isumaqatigiissuteqartoqarsimappat nalunaarummi matumani aalajangersakkat malillugit nakkutilliinissaq kommunalbestyrelsip inissiisup suli akisussaaffigissavaa. 

 

  § 40.  § 39 malillugu inummut sammititamik nakkutilliineq inuk innarluutilik pillugu iliuusissanut pilersaarutaataa najugaqarfissatut neqeroorummit malinneqassasoq aamma tapersersuineq naammassasoq kiisalu inuup pisariaqartitai eqqarsaatigalugit naleqquttuussasoq pillugit ingerlaavartumik qulakkeerinnittoqassaaq, matumani makku ilanngullugit:
1)  inuup innarluutillip najugaqarfissatut neqeroorummi sumiginnarneqannginnissaa imaluunniit innarlerneqannginnissaa, 
2)  inuup taassumalu angajoqqaatut sinniisoqaruni sinniisorisaata imaluunniit angajoqqaatut oqartussaasuisa pisinnaatitaaffimminnik ilisimatinneqarsimanissaat,
3)  suliat pillugit naammagittaalliortoqarsimatillugu angusat, inuup peqataaffigisaani, inummut taassumalu angajoqqaatut sinniisoqaruni sinniisorisaata imaluunniit angajoqqaatut oqartussaasuisa kiisalu inuup sullissisuanut anngunneqarnissaat,
4)  iliuusissanut pilersaarummi anguniakkat najugaqarfissatut neqeroorummut innissinneqarnissami naammassineqarsinnaassasut,
5)  najugaqarfissatut neqeroorummi periaatsit inummut naleqquttuussasut aamma
6)  pissaanermik atuisimanerit malitseqartinneqartassasut pissaanermillu atuisimaneq pillugu nalunaarutit tunngavigalugit inuk innarluutilik ulloq unnuarlu paaqqinniffimmi eqqortumik tapersersorneqarnersoq naliliiffigineqartassasoq.
  Imm. 2.  Inuit innarluutillit tapersersorneqarnissaat pillugu Inatsisartut inatsisaanni § 48 malillugu inuk ulloq unnuarlu paaqqinniffimmi najugaqarpat, nakkutilliinerup makku aamma qulakkiissavai: 
1)  ulloq unnuarlu paaqqinniffimmit killiffimmik nalunaarutit aamma katsorsaanissamik pilersaarutinik nutarterinerit aqqutigalugit ingerlaavartumik nalunaaruteqartoqartassasoq, aamma 
2)  inuup inuttut ineriartornera, ilorrisimaarnera peqqissusialu iliuusissanut aamma ineriartortinneqarnissamik pilersaarutini suliarineqarsimasuni malinneqassasut.

 

  § 41.  § 39 malillugu inummut sammititamik nakkutilliinermut atatillugu inuk innarluutilik kommunalbestyrelsimit oqaloqatigineqartassaaq. 
  Imm. 2.  Imm. 1 malillugu kommunalbestyrelsip oqaloqatiginninnermini inuup innarluuteqarnera mianerissavaa aammalu oqaloqateqarneq inuup innarluutillip piumasai tunngavigalugit ingerlatissallugu.
  Imm. 3.  Imm. 1 malillugu Kommunalbestyrelse oqaloqatiginninnermini Inuit innarluutillit tapersersorneqarnissaat pillugu Inatsisartut inatsisaanni § 24 malillugu inuk isumaginninnermi sulianik ilisimasalimmik illersuisoqarnissaanik neqeroorfigissavaa.
  Imm. 4. Inuk innarluutilik 18-it inorlugit ukioqarpat imaluunniit nammineersinnaajunnaarsitaasimappat imm. 1 malillugu oqaloqatigineqarnera, inuk innarluutilik, taassumalu angajoqqaatut akisussaasui imaluunniit angajoqqaatut sinniisoqarsimaguni sinniisua, peqataatillugit ingerlanneqassaaq. Taamaattoq inummut innarluutilimmut mianerisassat tamanna pisariaqartippassuk, angajoqqaatut oqartussaasut imaluunniit angajoqqaatut sinniisuusoq akuersitinnagu imaluunniit najuutsinnagu oqaloqateqarneq ingerlanneqarsinnaavoq. Angajoqqaatut akisussaasut imaluunniit angajoqqaatut sinniisoq akuersiteqqaarnagit peqataatinnagilluunniit oqaloqateqarneq ingerlanneqassappat, taava § 24 malillugu illersuisumik toqqaasoqassaaq ilaasoqarlunilu.
  Imm. 5.  Inuup inerisimanera piginnaasaqarneralu imaluunniit suliap suussusaa eqqarsaatigalugit oqaloqateqarnerup ingerlanneqarnissaa aalajangiisuusumik naleqqutinngippat, imm. 1 malillugu oqaloqateqarneq ingerlanneqassanngitsoq kommunalbestyrelsip aalajangersinnaavaa. Oqaloqateqarneq ingerlanneqarsinnaanngippat, inuup innarluutillip aalajangiinissatut eqqarsaatigineqartumut isumaa allatut pissarsiariniarneqassaaq. Oqaloqateqarneq pisimanngippat, inuup iliuusissanut pilersaarutaani tamanna pissutaasorlu pillugit allattoqassaaq.

 

  § 42.  § 39 malillugu kommunalbestyrelse inummut sammititamik nakkutilliinerminut atatillugu najugaqarfissatut neqeroorummi pissutsinik ernumanartunik maluginiagaqarpat, inuillu innarluutillit najugaqarfissatut neqeroorummiittut pissutsinik ernumanartunik sunnerneqarsinnaappata, oqartussaasoqarfimmut ingerlatsineq pillugu nakkutilliisussaatitaasumut kiisalu kommunalbestyrelsinut inissiisimasunut kommunalbestyrelse nalunaaruteqassaaq.

 

  § 43.  § 39 malillugu kommunalbestyrelse ingerlatsinermut sammititamik nakkutilliinerit tamaasa naammassigaangamigit nakkutilliinermit nalunaarusiamik suliaqartassaaq.
  Imm. 2.  Nakkutilliisimanermit nalunaarusiami paasissutissat tulliuttut saqqummiunneqassapput: 
1)  Ulloq nakkutilliiffiusoq. 
2)  Kina nakkutilliinermik ingerlatsisimanersoq. 
3)  Nakkutilliiartortoqannginnerani kommunalbestyrelse paasissutissanik sunik piniarsimanersoq.
4)  Kommunalbestyrelsip nakkutilliinerminut atatillugu kikkunnik oqaloqateqarsimanersoq. 
5)  Nakkutilliinermi maluginiarneqartut.
6)  Najugaqarfissatut neqeroorummi inuup pisariaqartitaanik ineriartornissamullu periarfissaanik isumaginninnernik nalilersuinerit.
7)  Nakkutilliinerup malitsigisaanik qisuariaataasinnaasut, matumani kommunimut angerlarsimaffiusumut paasissutissanik ingerlatitseqqinnerit ilanngullugit. 
  Imm. 3.  § 41, imm. 5 malillugu kommunalbestyrelse inummik oqaloqateqarsimanngippat oqaloqatiginnissimannginnermut peqqutaasoq nakkutilliineq pillugu nalunaarusiami allanneqassaaq.

 

Kapitali 7

Najugaqaqatigiiffinnik najugaqarfinnillu illersugaasunik ingerlatsinermut sammititamik nakkutilliineq

 

  § 44.  Kommunalbestyrelse ukiumut ataasiarluni aamma pisariaqartitsineq naapertorlugu najugaqaqatigiiffinnik najugaqarfinnillu illersugaasunik kommunalbestyrelsimit pilersinneqarsimasunik ingerlanneqartunillu ingerlatsinermut sammititamik nakkutilliisassaaq. Nakkutilliinikkut najugaqarfissatut neqeroorut suli pisariaqartinneqartumik pitsaassuseqarnersut qulakkeerneqassaaq.
  Imm. 2.  Kommunalbestyrelsip nakkutilliinermut atatillugu najugaqarfissatut neqeroorummi pissutsit misissorlugillu najugaqarfissatut neqeroorut oqaloqatigissavaa.  
  Imm. 3.  Kommunalbestyrelsip nakkutilliinermini: 
1)  najugaqarfissatut neqeroorut nalunaaqqaarluni nakkutilliiartorfigisassavaa, 
2)  najugaqarfissatut neqeroorut paasissutissanik piniarfigisassavaa, aamm
3)  inunnit najugaqarfissatut neqeroorummi najugaqartunit paasissutissanik pissarsiniassaaq.
  Imm. 4.  Kommunalbestyrelsip imm. 3 nr. 1 malillugu nalunaaqqaarluni nakkutilliiartortarnermi saniatigut taamatuttaaq najugaqarfissatut neqeroorut nalunaaqqaarnani nakkutilliiartorfigisinnaavaa. 

 

  § 45.  § 44 malillugu ingerlatsinermut sammititamik nakkutilliineq ima ingerlanneqassaaq, taamaalilluni assigiissumik, ataqatigiissillugu aaqqissuussaasumik uppernarsaaserluakkamillu najugaqarfissatut neqeroorutip tunniussassaanik inissatigullu atugassarititaanik, kiisalu najugaqarfissatut neqeroorutip suliassaminik isumaginnittarneranik, nalilersuinissamut tunngavissiissalluni.
  Imm. 2.  Inunnit suliap, aaqqissussaanerup aningaasaqarnerullu ataqatigiinnissaannik paasinnissinnaasunit, taamalu najugaqarfissatut neqeroorutip unammillernartoqartitaanik ingerlariaqqinnissamullu periarfissaanik nalunaaruteqarsinnaasunit nakkutilliineq ingerlanneqassaaq. 
  Imm. 3.  Nakkutilliinermi kommunalbestyrelsip nakkutilliinerminut atatillugu oqaloqatiginninnermigut najugaqarfissatut neqeroorummi aqutsisut, sulisut inuillu najugaqartut peqataatissavai. Najugaqartut angajoqqaatut sinniisoqarpata, sinniisut aamma angajoqqaatut oqartussaasut, qanigisaasut allat imaluunniit suleqatigineqartut nakkutilliinermut atatillugu oqaloqatiginninnerni peqataatinneqarsinnaapput. 
  Imm. 4.  Siusinnerusukkut nakkutilliinermit nalunaarusiaasimasuni oqaaseqaatit, inassutigisimasat peqqussutillu aaqqissuussaasumik malitseqartinneqartarnissaat kommunalbestyrelsip nakkutilliinermut atatillugu qulakkiissavaa.

 

  § 46.  § 44 malillugu ingerlatsinermut sammititamik nakkutilliinerup makku imarissavai:
1)  Najugaqartut ilinniagaqarnissamik, sulilernissamik sammisassaqarnissamilluunniit periarfissaat.
2)  Najugaqartut ineriartornissaminnut, periarfissaminnik atorluaanissaminnut  tamatumuunakkullu sapinngisaq tamaat nammineersinnaanissaat periarfissinneqassalluni.
3)  Najugaqarfissatut neqeroorutip sullinniagai, matumani najugaqarfissatut neqeroorutip najugaqatigiiffimmi sullinniakkanut neqeroorutai aamma najugaqartut namminneq inuunermillu sunniuteqarsinnaanerat ilanngullugit.
najugaqartut namminneq inuunerminnut sunniuteqarsinnaanerat.
4)  Najugaqarfissatut neqeroorummi periaatsit angusallu, matumani perorsaanermi, tarnimut sunniisinnaasunut tunngasut pillugit imaluunniit tarnikkut napparsimanermi nakorsarneqarnermi sulisaatsit ilanngullugit. 
5)  Najugaqarfissatut neqeroorutimmi aaqqissuussaaneq aqutsinerlu.
6)  Najugaqarfissatut neqeroorummi sulisoqarnikkut piginnaasat.
7)  Najugaqarfissatut neqeroorummi init, matumani sullinniakkat pisariaqartitaannik tunngavissiinersut aamma najugaqarfissatut neqeroorummi periaatsit ilanngullugit
  Imm. 2.  Sammineqartut tamarmik arlalitsigut naapertuuttunik tunngavilersorlugit itisilerneqassapput, najugaqarfissatut neqeroorutip tamakkiisumik siumullu isigisumik aaqqissugaanik takutitsisumik.

 

  § 47.  Najugaqarfissatut neqeroorutip ileqqoreqqusamini piumasaqaatit naammassisimaneraa kommunalbestyrelsip misissussavai.

 

  § 48.  § 44 malillugu kommunalbestyrelsip ingerlatsinermut sammititamik nakkutilliinissaminut paasissutissat pisariaqartitai pillugit najugaqarfissatut neqeroorut qinnuigineqarunik, paasissutissat kommunalbestyrelsimut tunniutissavai.
  Imm. 2.  Najugaqarfissatut neqeroorummit paasissutissanik kommunalbestyrelsimut ingerlatitseqqinneq nakkutilliinissamut pisariaqartuusorineqarpat, najugaqartut imaluunniit taakku angajoqqaatut sinniisoqarsimagunik sinniisui imaluunniit angajoqqaatut oqartussaassuseqartut akuersisinngikkaluarlugit pisinnaavoq.

 

  § 49.  § 44 malillugu kommunalbestyrelse ingerlatsinermut sammititamik nakkutilliinerminut atatillugu najugaqarfissatut neqeroorummi ernumanartunik maluginiagaqaruni, najugaqartoq pissutsinik ernumanartunik sunnerneqarsinnaappat, kommunalbestyrelsimut inissiisuusimasumut kommunalbestyrelse nalunaaruteqassaaq.

 

Nakkutilliinermit nalunaarusiaq

 

  § 50.  § 44 malillugu ingerlatsinermut sammititamik nakkutilliinerit tamaasa kommunalbestyrelse nakkutilliinermit nalunaarusiamik suliaqartassaaq.
  Imm. 2.  Nakkutilliinermit nalunaarusiami paasissutissat tulliuttut saqqummiunneqassapput: 
1)  Ulloq nakkutilliiffiusoq. 
2)  Kina nakkutilliinermik ingerlatsisimanersoq. 
3)  Nakkutilliineq nalunaaqqaarluni nalunaaqqaarnaniluunniit ingerlaneqarsimanersoq. 
4)  Nakkutilliiartortoqannginnerani kommunalbestyrelse paasissutissanik sunik piniarsimanersoq.
5)  Kommunalbestyrelse nakkutilliinerminut atatillugu kikkunnik oqaloqateqarsimanersoq. 
6)  Atorfinnut akuerisaasunut naleqqiullugu najugaqarfissatut neqeroorummi najugaqartut amerlassusaat aamma najugaqartut tapersersorneqarnissamik pisariaqartitaat.
7)  Ukiumi kingullermi pissaanermik atuinerit qassiusimanersut.
8)  Nakkutilliinermi maluginiarneqartut. 
9)  Najugaqartut pisariaqartitaannik ineriartornissamullu periarfissaannik najugaqarfissatut neqeroorutip nalilersorneqarnera.
10)  Nakkutilliinerup malitsigisaanik qisuariaataasinnaasut, matumani kommunalbestyrelsimut imaluunniit kommunalbestyrelsinut inissiisimasunut paasissutissanik ingerlatitseqqinnerit ilanngullugit.
  Imm. 3.  Nakkutilliinermit nalunaarusiaq najugaqarfissatut neqeroorummut tusarniaassutigineqassaaq, tassani tusarniaanermut akissummik tunniussinissamut ullut 14-it piffissaritinneqarlutik. Naammassillugu nakkutilliinermit nalunaarusiap assilineqarnera najugaqarfissatut neqeroorummut nassiunneqassaaq.
  Imm. 4.  Immikkut ittumik pisoqartillugu imm. 3-mi piffissaliussaq avaqqunneqarsinnaavoq.

 

  § 51.  § 50 malillugu kommunalbestyrelsip nakkutilliinermit nalunaarusiami ilanngullugit taassavai:
1)  oqaaseqaatit paasisimasat ilisimatitsissutillu, aamma
2)  pissutsit iluarsineqartariaqartut iliuuseqarfigineqartariaqartullu pillugit innersuussutit.
  Imm. 2.  Imm. 1 malillugu oqaaseqaatit innersuussutilluunniit najugaqarfissatut neqeroorutip oqaloqatigineqareerneratigut suliarineqartassapput, aamma pissutsit oqaaseqaateqarnermut imaluunniit innersuussinermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

Kapitali 8

Inunnut innarluutilinnut ulloq unnuarlu neqeroorutinik ingerlatsinermut sammititamik nakkutilliineq

 

  § 52.  Inuit innarluutillit tapersersorneqarnissaannut Inatsisartut inatsisaanni § 18, imm. 1 malillugu nakkutilliinermik ingerlatsiviup ingerlatsinermut sammititamik inunnut innarluutilinnut ulloq unnuarlu paaqqinniffinnik nakkutilliissapput, matumani ulloq unnuarlu neqeroorutit matoqqasut ilanngullugit. Ulloq unnuarlu paaqqinniffimmi pitsaassutsit pisariaqartinneqartut suli pigineqarnersut aamma ulloq unnuarlu paaqqinniffiup aamma Naalakkersuisut akornanni ingerlatsinissamut isumaqatigiissut naammassineqarnera nakkutilliinerup qulakkiissavaa.
  Imm. 2.  Nakkutilliinermik ingerlatsivik ingerlatsinermut sammititamik nakkutilliinermut atatillugu ulloq unnuarlu paaqqinniffimmi pissutsit misissorlugillu ulloq unnuarlu paaqqinniffimmi sulisunik oqaloqateqartassaaq. 
  Imm. 3.  Nakkutilliinermik ingerlatsivik nakkutilliinermik suliassamik isumaginninnermini ulloq unnuarlu paaqqinnittarfimmut nalunaaqqaarluni nakkutilliiartortassaaq, paasissutissanillu ulloq unnuarlu paaqqinniffimmit pissarsisassalluni.
  Imm. 4.  Nakkutilliinermik ingerlatsivik imm. 3 malillugu nalunaaqqaarluni nakkutilliiartortarnerup saniatigut aamma nalunaaqqaarani ulloq unnuarlu paaqqinnittarfimmut nakkutilliiartorsinnaavoq.
  Imm. 5.  Imm. 1 malillugu nakkutilliineq toraagalimmik nakkutilliinertut ingerlanneqassaaq, tassani suliassaqarfiit toqqakkat taamaallaat ukkatarineqassallutik.

 

  § 53.  § 52 malillugu ingerlatsinermut sammititamik nakkutilliineq ingerlanneqassaaq assigiimmik, aaqqissuussaasumik uppernarsaaserluakkamillu ulloq unnuarlu paaqqinniffiup tunniussassaanik inissatigullu atugassarititaanik, kiisalu ulloq unnuarlu paaqqittarfiup suliassamik isumaginnittarneranik nalilersuinissamut tunngavissiisumik.
  Imm. 2.  Nakkutilliineq ingerlanneqassaaq inunnit suliap, aaqqissussaanerup aningaasaqarnerullu ataqatigiinnissaannik paasinnissinnaasunit taamalu ulloq unnuarlu paaqqinniffiup unammillernartoqartitaanik ingerlariaqqinnissamullu periarfissaanik nalunaaruteqarsinnaasunit. 
  Imm. 3.  Nakkutilliinermut atatillugu Nakkutilliinermik ingerlatsiviup ulloq unnuarlu paaqqinniffimmi aqutsisut, sulisut meeqqallu inissinneqarsimasut oqaloqatigalugit peqataatittassavai. Angajoqqaatut sinniisoqarsimappat sinniisut imaluunniit angajoqqaatut oqartussaasut, qanigisat allat imaluunniit suleqatigisat nakkutilliinermut atatillugu oqaloqatigiinnerni peqataatinneqarsinnaapput. 
  Imm. 4.  Nakkutilliinermut atatillugu siusinnerusukkut nakkutilliinermit nalunaarusiaasimasuni oqaaseqaatit, inassutigisimasat peqqussutillu aaqqissuussaasumik malitseqartinneqartarnissaat Nakkutilliinermik ingerlatsivimmit qulakkeerneqassaaq.

 

  § 54.  § 52 malillugu ingerlatsinermut sammititamik nakkutilliinerup makku imarissavai:
1)  Najugaqartut ineriartornissaminnut, periarfissaminnik atorluaanissaminnut  tamatumuunakkullu sapinngisaq tamaat nammineersinnaanissaat periarfissinneqassalluni.
2)  Najugaqartut ilinniagaqarnissamik, sulilernissamik sammisassaqarnissamilluunniit periarfissaat.
3)  Ulloq unnuarlu paaqqinniffiup sullinniagai, matumani najugaqarfissatut neqeroorutip najugaqatigiiffimmi sullinniakkanut neqeroorutai aamma najugaqartut namminneq inuunermillu sunniuteqarsinnaanerat ilanngullugit.
najugaqartut namminneq inuunerminnut sunniuteqarsinnaanerat.
4)  Ulloq unnuarlu paaqqinniffimmi periaatsit angusallu, matumani perorsaanermi, tarnimut sunniisinnaasunut tunngasut pillugit imaluunniit tarnikkut napparsimanermi nakorsarneqarnermi sulisaatsit ilanngullugit. 
5)  Ulloq unnuarlu paaqqinniffimmi aaqqissuussaaneq aqutsinerlu.
6)  Ulloq unnuarlu paaqqinniffimmi sulisoqarnikkut piginnaasat.
7)  Ulloq unnuarlu paaqqinniffimmi init, matumani sullinniakkat pisariaqartitaannik tunngavissiinersut aamma najugaqarfissatut neqeroorummi periaatsit ilanngullugit.
  Imm. 2.  Sammineqartut tamarmik arlalitsigut naapertuuttunik tunngavilersorlugit itisilerneqassapput, ulloq unnuarlu paaqqinniffiup tamakkiisumik siumullu isigisumik aaqqissugaanik takutitsisumik.

 

  § 55.  Ulloq unnuarlu paaqqinniffik ileqqoreqqusanik malinninnersoq Nakkutilliinermut ingerlatsiviup misissussavaa.

 

  § 56.  § 52 malillugu Nakkutilliinermut ingerlatsiviup ingerlatsinermut sammititamik nakkutilliinissaminut paasissutissat pisariaqartitai pillugit ulloq unnuarlu neqeroorut qinnuigineqaruni, paasissutissat kommunalbestyrelsimut tunniutissavai.
  Imm. 2.  Ulloq unnuarlu paaqqinniffimmit paasissutissanik ingerlatitseqqinneq nakkutilliinissamut pisariaqartuusorineqarpat, Nakkutilliinermik ingerlatsivimmut paasissutissanik ingerlatitseqqinneq, najugaqartut imaluunniit taakku angajoqqaatut sinniisoqarsimagunik sinniisut imaluunniit angajoqqaatut oqartussaassuseqartut akuersisinngikkaluarlugit pisinnaavoq.

 

  § 57.  Nakkutilliinermik ingerlatsivik ulloq unnuarlu paaqqinniffimmi pissutsinik ernumanartunik maluginiagaqarpat, najugaqartut pissutsinik ernumanartunik sunnerneqarsinnaappata, Nakkutilliinermik ingerlatsivik Isumaginninnermut Aqutsisoqarfimmut aamma kommunalbestyrelsinut inissiisimasunut nalunaaruteqartassaaq.

 

  § 58.  Najugaqartup ilorrisimaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat uku pissutigalugit Nakkutilliinermik ingerlatsivik kommunalbestyrelsimut inissiisuusimasumut erngerluni  nalunaaruteqassaaq:

1)  inummik amigartumik isumassuisoqarpat sullissisoqarpalluunniit,

2)  timikkut nakuuserfigineqarsimappat tarnikkulluunniit ikilerneqarsimappat, kinguaassiutitigulluunniit atornerlunneqarsimappat,

3)  inuup atornerluisuunermik ajornartorsiuteqarneranik, pinerluuteqarnermik pissusilersortarnernik imaluunniit inummi pissusilersortarnikkut- inoqatinulluunniit naleqqussarsinnaanermut allanik annertuunik ajornartorsiuteqarpat, naammanngitsunik katsorsaaneq.

  Imm. 2.  Nakkutilliinermik ingerlatsiviup nakkutilliinermini allatigulluunniit paasiguniuk najugaqartoq imm. 1-imi pissutsit pineqartut naammagittaalliuutigisimagai imaluunniit nalunaarutigisimagai, naammagittaalliuut imaluunniit nalunaarut malitseqartinneqarsimanersoq Nakkutilliinermik ingerlatsiviup misissussavaa.

 

Peqqussut

 

  § 59.  Nakkutilliinermik ingerlatsivik ulloq unnuarlu paaqqinnittarfimmut peqqussuteqarsinnaavoq. Peqqusinerup eqquutsinneqarnissaanut piffissaliussaq Nakkutilliinermik ingerlatsiviup aalajangersarsinnaavaa.
  Imm. 2.  Peqqussuteqartoqarnissaanik taamaallaat aalajangiisoqarsinnaavoq pissutsit peqqussuteqarnissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut. Pissutsilli immikkut ittut periarfissaqartinnerisigut peqqussuteqarnissaq erngerluni aalajangerneqarsinnaavoq.
  Imm. 3.  Peqqussuteqarnissamik taamaallaat aalajangiisoqarsinnaavoq ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanera aaqqeerusunnerallu ilimanaateqarsorineqarpat.

 

Annertusisamik nakkutilliineq

 

  § 60.  Immikkut nassuiakkamik annertusisamik nakkutilliisoqarnissaa pisariaqartinneqartoq Nakkutilliinermik ingerlatsivimmit nalilerneqarpat Nakkutilliinermik ingerlatsivik immikkut ittumik annertusisamik nakkutilliisoqarnissaanik aalajangiisinnaavoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattoq piffissami annerpaamik qaammatinik pingasukkaartunik sivisunerussanani. 
  Imm. 2.  Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.  
  Imm. 3.  Annertusisamik nakkutilliinissamut tunngaviusinnaapput:
1)  ulloq unnuarlu paaqqinnittarfiup ajornartorsiutaata immikkut ittup nalinginnaasulluunniit misissoqqinneqarnissaat pisariaqartoq nakkutilliinermit nalunaarusiaq inerniliippat, 
2)  ulloq unnuarlu paaqqinniffimmik naammagittaalliutiginninneq,
3)  ulloq unnuarlu paaqqinniffimmi Nakkutilliinermik ingerlatsivimmit maluginiakkat nalinginnaasut imaluunniit immikkut ittut, imaluunniit
4)  ataatsimut naliliineq malillugu ulloq unnuarlu paaqqinniffik pisariaqartinneqartumik pitsaassuseqarunnaarsimappat.  
  Imm. 4.  Pissutsit annertusisamik nakkutilliinissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut annertusisamik nakkutilliisoqarnissaanik taamaallaat aalajangiisoqarsinnaavoq. Pissutsilli immikkut ittut pisariaqartilerpassuk annertusisamik nakkutilliisoqarnissaa ingerlaannartumik aalajangerneqarsinnaavoq.
  Imm. 5.  Ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanera aaqqeerusunneralu ilimanaateqarsorineqarpat annertusisamik nakkutilliisoqarnissaanik taamaallaat aalajangiisoqarsinnaavoq.

 

Nakkutilliinermit nalunaarusiaq

 

  § 61.  §§ 52 aamma 60 naapertorlugit Nakkutilliinermik ingerlatsivik ulloq unnuarlu paaqqinniffimmi ingerlatsinermut sammititamik nakkutilliinernit tamanit nalunaarusiortassaaq.
  Imm. 2.  Nakkutilliisimanermit nalunaarusiami paasissutissat tulliuttut makku saqqummiunneqassapput: 
1)  Ulloq nakkutilliiffiusoq. 
2)  Kina nakkutilliinermik ingerlatsisimanersoq. 
3)  Nakkutilliineq nalunaaqqaarluni nalunaaqqaarnaniluunniit ingerlaneqarsimanersoq. 
4)  Nakkutilliineq nalinginnaasoq imaluunniit annertusisamik nakkutilliinerunersoq.
5)  Nakkutilliisoqartinnagu paasissutissat suut Nakkutilliinermik ingerlatsiviup pissarsiariniarsimanerai.
6)  Nakkutilliinermik ingerlatsiviup nakkutilliinerminut atatillugu kikkut oqaloqateqatigisimanerai. 
7)  Atorfinnut akuerisaasunut naleqqiullugu najugaqarfissatut neqeroorummi najugaqartut amerlassusaat aamma najugaqartut tapersersorneqarnissamik pisariaqartitaat.
8)  Ukiumi kingullermi pissaanermik atuinerit qassiusimanersut.
9)  Nakkutilliinermi maluginiarneqartut. 
10)  Najugaqartut pisariaqartitaannik ineriartornissamullu periarfissaannik najugaqarfissatut neqeroorutip nalilersorneqarnera.
11)  Nakkutilliinerup malitsigisaanik qisuariaataasinnaasut, matumani kommunalbestyrelsimut imaluunniit kommunalbestyrelsinut inissiisimasunut paasissutissanik ingerlatitseqqinnerit ilanngullugit.
  Imm. 3. § 52, imm. 5 malillugu toraagalimmik nakkutilliinermi nakkutilliinermit nalunaarusiaq suliassaqarfiit toqqakkat ukkatarineqartut pillugit paasissutissanik taamaallaat imaqassaaq.

 

  § 62.  § 61 malillugu inaarutaasumik nakkutilliinermit nalunaarusiap suliarineqariarluni ulloq unnuarlu paaqqinnittarfimmut nassiunneqannginnerani, nakkutilliinermit nalunaarusiaq  sivikinnerpaamik ulluni 14-ini ulloq unnuarlu paaqqinnittarfimmut kiisalu isumaginninnermut aqutsisoqarfimmut tusarniaassutigineqassaaq.
  Imm. 2  Nakkutilliinermit nalunaarusiaq kingusinnerpaamik ullormi nakkutilliiffiusimasumit qaammatit pingasut qaangiunneranni naammassillugu suliarineqareersimassaaq.
  Imm. 3. Immikkut ittumik pisoqartillugu imm. 1-imi 2-milu piffissaliussat avaqqunneqarsinnaapput.
  Imm. 4.  Nakkutilliinermit nalunaarusiaq isumaginninnermut aqutsisoqarfimmut kiisalu kommunalbestyrelsinut meeqqanik ulloq unnuarlu paaqqinnittarfimmut inissiisimasunut ilisimatitsissutitut nassiunneqassaaq. 
  Imm. 5.  Nakkutilliineq pillugu nalunaarusiaq Naalakkersuisut nittartagaanni aamma ulloq unnuarlu paaqqinniffiup nittartagaani tamanut saqqummiunneqassaaq.

 

  § 63.  § 61 malillugu Nakkutilliinermik ingerlatsiviup nakkutilliinermit nalunaarusiami taassavai:
1)  oqaaseqaatit paasisimasat ilisimatitsissutillu, imaluunniit
2)  pissutsit iluarsineqartariaqartut iliuuseqarfigineqartariaqartullu pillugit innersuussutit.
  Imm. 2.  Imm. 1 malillugu oqaaseqaatit innersuussutilluunniit ulloq unnuarlu paaqqinniffiup oqaloqatigineqareerneratigut suliarineqartassapput, aamma pissutsit oqaaseqaateqarnermut imaluunniit innersuussinermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

  § 64.  § 61 malillugu nalunaarusiami ulloq unnuarlu paaqqinniffik pissutsit inassuteqarnermut imaluunniit peqqussuteqarnermut tunngaviusut pillugit ulloq unnuarlu neqeroorummit qanoq ililluni aaqqiivigineqarnissaat naatsorsuuteqarnersut pillugu allakkatigut pilersaarusioqqullugu Nakkutilliinermik ingerlatsivik nakkutilliinermit nalunaarusiami innersuussisinnaavoq imaluunniit peqqussuteqarsinnaalluni.

 

Kapitali 9

Utoqqarnik paaqqinniffinnik ingerlatsinermut sammititamik nakkutilliineq

 

  § 65.  Utoqqarnut paaqqinniffinnik kommunalbestyrelsimit pilersinneqarsimasunik ingerlanneqartunillu ingerlatsinermut sammititamik kommunalbestyrelse ukiumut ataasiarluni aamma pisariaqartitsineq naapertorlugu nakkutilliisassaaq. Utoqqarnut paaqqiffimmi pitsaassuseq pisariaqartinneqartoq suli pigineqarnersoq nakkutilliinerup qulakkiissavaa.
  Imm. 2.  Kommunalbestyrelsip nakkutilliinerminut atatillugu utoqqarnut paaqqinniffinni pissutsit misissorlugillu utoqqarni paaqqinniffinni sulisut oqaloqatigissavai.  
  Imm. 3.  Kommunalbestyrelsip nakkutilliinermini: 
1)  utoqqarnik paaqqinniffik nalunaaqqaarluni nakkutilliiartorfigisassavai, 
2)  utoqqarnik paaqqinniffik paasissutissanik piniarfigisassavaa, aamma
3)  inunnit utoqqarnut paaqqinniffinniittunit paasissutissanik attuumassuteqartunik pissarsiniarnissaq.
  Imm. 4.  Kommunalbestyrelsip imm. 3 nr. 1 malillugu nalunaaqqaarluni nakkutilliiartortarnermi saniatigut utoqqarnik paaqqinniffiit nalunaarfigeqqaarnagit aamma nakkutilliiartorfigisinnaavai. 

 

  § 66.  § 65 malillugu ingerlatsinermut sammititamik nakkutilliineq ima ingerlanneqassaaq, taamaalilluni assigiissumik, ataqatigiissillugu aaqqissuussaasumik uppernarsaaserluakkamillu utoqqarnut paaqqinniffiup tunniussassaanik inissatigullu atugassarititaanik, kiisalu utoqqarnut paaqqinniffiup suliassaminik isumaginnittarneranik, nalilersuinissamut tunngavissiissalluni.
  Imm. 2.  Inunnit suliap, aaqqissussaanerup aningaasaqarnerullu ataqatigiinnissaannik paasinnissinnaasunit, taamalu najugaqarfissatut neqeroorutip unammillernartoqartitaanik ingerlariaqqinnissamullu periarfissaanik nalunaaruteqarsinnaasunit nakkutilliineq ingerlanneqassaaq. 
  Imm. 3.  Nakkutilliinermi kommunalbestyrelsip nakkutilliinerminut atatillugu oqaloqatiginninnermigut utoqqarnut paaqqinniffimmi aqutsisut, sulisut inuillu najugaqartut peqataatissavai. Najugaqartut angajoqqaatut sinniisoqarpata, sinniisut nakkutilliinermi peqataatinneqarsinnaapput. 
  Imm. 4.  Siusinnerusukkut nakkutilliinermit nalunaarusiaasimasuni oqaaseqaatit, inassutigisimasat peqqussutillu aaqqissuussaasumik malitseqartinneqartarnissaat kommunalbestyrelsip nakkutilliinermut atatillugu qulakkiissavaa.

 

  § 67.  § 65 malillugu ingerlatsinermut sammititamik nakkutilliinerup makku sammisarissavai:
1)  Najugaqartut namminneq periarfissaminnik atorluaanissaat tassuunakkullu sapinngisaq tamaat nammineersinnaanerminnik attassisinnaanissaat.
2)  Najugaqartut sammisassaqarnissamut periarfissaat.
3)  Utoqqarnut paaqqinniffiup sullinniagai, matumani ulloq utoqqarnut paaqqinniffiup sullinniakkaminut neqeroorutigisaata imarisai ilanngullugit, kiisalu najugaqartut nammineq inuunerminnut sunniuteqaqataanerat.
4)  Utoqqarnik paaqqinniffimmi periaatsit angusallu.
5)  Utoqqarnik paaqqinniffimmi aaqqissuussaaneq aqutsisullu.
6)  Utoqqarnik paaqqinniffimmi sulisoqarnikkut piginnaasat.
7)  Utoqqarnik paaqqinniffimmi illutatigut sinaakkutissat, matumani sullinniakkat pisariaqartitaannut aamma utoqqarnik paaqqinniffiup periaasaanut naapertuunnersut
  Imm. 2.  Sammineqartut tamarmik arlalitsigut naapertuuttunik tunngavilersorlugit itisilerneqassapput, utoqqarnik paaqqinniffiup tamakkiisumik siumullu isigisumik aaqqissugaanik takutitsisumik.

 

  § 68.  § 65 malillugu utoqqarnut paaqqinniffik kommunalbestyrelsimit nakkutilliisuusumit qinnuigineqarunik paasissutissat kommunalbestyrelsip ingerlatsinermut sammititamik nakkutilliinermini pisariaqartitai tunniutissavaat
  Imm. 2.  Utoqqarnut paaqqinniffimmit paasissutissanik kommunalbestyrelsimut ingerlatitseqqinneq, ingerlatitseqqinneq nakkutilliinissamut pisariaqartuusorineqarpat, najugaqartut imaluunniit taakku angajoqqaatut sinniisoqarsimagunik sinniisui akuersisinngikkaluarlugit pisinnaavoq.

 

  § 69.  § 65 malillugu kommunalbestyrelse ingerlatsinermut sammititamik nakkutilliinerminut atatillugu utoqqarnut paaqqinniffimmi pissutsinik ernumanartunik maluginiagaqarpat, kommunalbestyrelsimut inissiisuusimasumut kommunalbestyrelse nalunaaruteqassaaq, najugaqartut pissutsinik ernumanartunik sunnerneqarsinnaappat.

 

Nakkutilliinermit nalunaarusiaq

 

  § 70.  § 65 malillugu kommunalbestyrelse ingerlatsinermut sammititamik nakkutilliinerit tamaasa nakkutilliinermit nalunaarusiamik suliaqartassaaq.
  Imm. 2.  Nakkutilliisimanermit nalunaarusiami paasissutissat tulliuttut saqqummiunneqassapput: 
1)  Ulloq nakkutilliiffiusoq. 
2)  Kina nakkutilliinermik ingerlatsisimanersoq. 
3)  Nakkutilliineq nalunaaqqaarluni nalunaaqqaarnaniluunniit ingerlaneqarsimanersoq. 
4)  Nakkutilliisoqartinnagu paasissutissat suut kommunalbestyrelsip pissarsiariniarsimanerai.
5)  Kommunalbestyrelsip nakkutilliinerminut atatillugu kikkut oqaloqateqatigisimanerai. 
6)  Atorfinnut akuerisaasunut naleqqiullugu najugaqarfissatut neqeroorummi najugaqartut amerlassusaat aamma najugaqartut tapersersorneqarnissamik pisariaqartitaat.
7)  Ukiumi kingullermi pissaanermik atuinerit qassiusimanersut.
8)  Nakkutilliinermi maluginiarneqartut. 
9)  Najugaqartut pisariaqartitaannik ineriartornissamullu periarfissaannik najugaqarfissatut neqeroorutip nalilersorneqarnera.
10)  Nakkutilliinerup malitsigisaanik qisuariaataasinnaasut, matumani kommunalbestyrelsimut imaluunniit kommunalbestyrelsinut inissiisimasunut paasissutissanik ingerlatitseqqinnerit ilanngullugit.
  Imm. 3.  Nakkutilliinermit nalunaarusiaq utoqqarnut paaqqinniffimmut tusarniaassutigineqassaaq, tassani tusarniaanermut akissummik tunniussinissamut ullut 14-it piffissaritinneqarlutik. Naammassillugu nakkutilliinermit nalunaarusiap assilineqarnera utoqqarnik paaqqinniffimmut nassiunneqassaaq.

 

  § 71.  § 70 malillugu kommunalbestyrelsip nakkutilliinermit nalunaarusiamut ilanngullugit taassavai:
1)  oqaaseqaatit paasisimasat ilisimatitsissutillu, aamma
2)  pissutsit iluarsineqartariaqartut iliuuseqarfigineqartariaqartullu pillugit innersuussutit.
  Imm. 2.  Imm. 1 malillugu oqaaseqaatit innersuussutilluunniit utoqqarnut paaqqinniffiup oqaloqatigineqareerneratigut suliarineqartassapput, aamma pissutsit oqaaseqaateqarnermut imaluunniit innersuussinermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.

 

Kapitali 10

Naammagittaalliuuteqarsinnaatitaaneq

 

  § 72.  Kommunalbestyrelsip nalunaarut manna malillugu aalajangiineri Isumaginnittoqarfiup aqunneqarnera aaqqissugaaneralu pillugit Inatsisartut peqqussutaanni aalajangersakkat tunngavigalugit Isumaginninnermi Naammagittaalliuuteqartarfimmut naammagittaalliuutigineqarsinnaapput.
  Imm. 2.  Nalunaarut manna tunngavigalugu Nakkutilliinermik ingerlatsiviup aalajangiineri aqutsinermi oqartussaasunut allanut naammagittaalliuutigineqarsinnaanngillat.
  Imm. 3.  Nalunaarut manna malillugu, aalajangiinernut meeqqat suliat imminnut tunngassuteqartut pillugit naammagittaalliuuteqarnissaminnut pisinnaatitaapput.

 

Kapitali 11

Atortuulerfia

 

  § 73.  Nalunaarut ulloq 17. januaari 2020-mi atuutilissaaq.
  Imm. 2.  Peqatigisaanik Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. 30, 20. december 2019-imeersoq atorunnaarsinneqassaaq.

 

 

 

Kalaallit Nunaanni Namminersorlutik Oqartussat, ulloq 16. januaari 2020

 

 

 

Martha Abelsen

/

Julie Præst Wilche

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk