Nuummi il. il. killilersuinerit pillugit Namminersorlutik Oqartussat nalunaarutaat nr. 65, 20. november 2021-mersooq Atuussimasoq (Historisk)

Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi §§ 6, 6 a, 12 a, 12 b, § 21 b aamma § 29 imm. 2 aamma 3 naapertorlugit aalajangersarneqarput:

 

Atuuffia

 

  § 1.  Nalunaarut una illoqarfinni Nuuk aamma Upernavimmi kiisalu Avannaata Kommuniani nunaqarfinni ataani taaneqartuni atuutissaaq:
1)  Tasiusaq. 
2)  Upernavik Kujalleq.
3)  Nutaarmiut.
4)  Nuussuaq.
5)  Innaarsuit.
6)  Naajaat.
7)  Aappilattoq.
8)  Kangersuatsiaq.
9)  Kullorsuaq.  
Imm. 2.  Nalunaarutip atuuffissai pillugit imm. 1-imi aalajangersakkat Naalakkersuisut aalajangiineratigut annertusineqarsinnaapput. Taamatut aalajangiinerit inatsisitigut sunniuteqalersinniarlugit Naalakkersuisut qarasaasiakkut nalunaaruteqartarfiatigut saqqummiunneqassapput.  
  Imm. 3.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq. 
  Imm. 4. Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 5. Nalunaarut eqqartuussivinnut atuutinngilaq.
  Imm. 6.  Nalunaarut ulluunerani neqeroorutinut namminersortunut pisortaniillu pigineqartunut, atuarfinnut, ilinniarfeqarfinnut il.il. atuutinngilaq, nappaatit tunillaassortut akiorniarlugit iliuutsit pillugit Inatsisartut peqqussutaanni § 22 takuuk.  
  Imm. 7. Nalunaarut nammineq angerlarsimaffinni aaqqissuussinernut il.il. atuutinngilaq. 
  Imm. 8.  Nunatsinni Nakorsaaneqarfik nalunaarummit immikkut akuersissuteqarsinnaavoq.

 

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq. 
  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq. 
  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq. 
  Imm. 4.  Inunnut Peqqinnissaqarfimmi sulisunut Nunatta Nakorsaaneqarfia imm. 1 naapertorlugu aalajangiisassaaq.

 

Init ilaannut taakkununngalu attuumassutilinnut nunaminertanut, kikkunnilluunniit iserfigineqarsinnaasunut tunngatillugu piumasaqaatit

 

  § 3.  Inuit Covid-19-imut tamakkiisumik akiuussuserneqarsimanermut uppernarsaammik takutitsisinnaanngikkunik imm. 2-mi taaneqartuni inineeqqusaanatillu taakkununngalu attuumassutilinni nunaminertaneeqqusaanngillat.
  Imm. 2.  Init taakkununngalu attuumassuteqartut nunaminertat kikkunnilluunniit iserfigineqarsinnaasut aamma nalinginnaasumik inunnit sivikitsuinnaanngitsumik isersimaffigineqarsinnaasut imm. 1-imut ilaatinneqarput, assersuutigalugu:
1)  Sutorniartarfiit, cafiit, imerniartarfiit, diskotekit assigisaallu aamma tamakkununnga attuumassuteqartut silami nunaminertat.
2)  Kulturikkut suliffeqarfiit - tassunga ilanngullugit ilaatigut Kulturikkut Illorsuit, filmeriartarfiit, katersugaasiviit inersuillu saqqummersitsiviit.
3)  Innuttaasut Illui assigisaallu.
4)  Atuakkanik atorniartarfiit.
5)  Illut iluini silamilu timersornermut atorneqartartut - tassunga ilaatigut ilanngullugit init timersortarfiit aamma Illorsuit Timersortarfiit, naluttarfiit, timigissartarfiit isikkamillu arsaattarfiit. 
6)  Nujalerisut, tagiartuisartut, pinnersartittarfiit assigisaallu. 
  Imm. 3.  Init tamakkununngalu attuumassuteqartut nunaminertat tullinnguuttut makku imm. 1-imi piumasaqaatinut ilaatinneqanngillat:
1)  Init taakkununngalu attuumassutillit nunaminertat, ulluinnarni nioqqutissanik tuniniaanermut pingaarnertut atorneqartartut.
2)  Allakkeriviit.
3)  Mittarfiit.
4)  Pisortatut oqartussani pilersuiffiusunilu init sullissiviit, saaffiginnittarfiit il.il. 
5)  Pisortat angallassissutaannut tunngatillugit utaqqisarfiit.
  Imm. 4.  Inuit tullinnguuttumi allassimasut imm. 1-imi piumasaqaammut ilaatinneqanngillat, taamaattorli Covid-19-imut PCR atorlugu misissortinnikkut tunillanneqarsimannginnermik uppernarsaammik takutitsissapput sivisunerpaamik akunnernik 48-nik pisoqaassuseqartumik:
1)  Inuit Covid-19-imut akiuussuserneqarnissamik Nunatta Nakorsaaneqarfianit innersuunneqanngitsut matumunngalu uppernarsaammik takutitsisinnaasut. 
2)
Sulisut inini pineqartuni imaluunniit tamakkununnga attuumassuteqartuni nunaminertani suliallit.
  Imm. 5.  Inuit marluk inorlugit ukiullit imm. 1-mi piumasaqaammut ilaatinneqanngillat.

 

  § 4. Inuit inatsisitigullu pisussaatitaasut pisinnaatitaasullu, tassunga ilanngullugit pisortani oqartussat suliffeqarfiillu, ininik § 3, imm. 2-mi pineqartunik pigisallit akiuussuserneqarsimanermut uppernarsaammik qinnuiginnissinnaapput.
  Imm. 2.  Imm. 1 naapertorlugu Covid-19-imut tamakkiisumik akiuussuserneqarsimanermut uppernarsaammik takutitsisoqarsinnaanngippat anisitaasoqarsinnaavoq.

 

  § 5.  Inuit inatsisitigullu pisussaatitaasut pisinnaatitaasullu, ininik sumiiffinnillu § 3, imm. 2-mi ilaatinneqartunik pigisallit piumasaqaatinik makkuninnga naammassinnissimassapput:
1)  Pisisartut, pulaartut assigisaallu § 3 naapertorlugu taamaallaat iseqqusaapput. Nakutilliinerup qanoq pisassaneranik ilitsersuutit Naalakkersuisunit saqqummiunneqarumaarput.

 

  § 6.  Inuussutissarsiummik ingerlatalik politiit naliliinerat malillugu § 5-imik unioqqutitsisimappat, inuussutissarsiummillu ingerlatalik § 5-imik malinninnissaa ilimagineqanngippat, inuussutissarsiummik ingerlatalik inip piffissami aalajangersimasumi tamanut matoqqatinnissaanik politiinit peqquneqarsinnaavoq.

 

  § 7.  Inuk tamakkiisumik akiuussuserneqarnerata kingunitsianngua tamakkiisumillu akiuussuserneqarsimanermik uppernarsaasinnaappat inuk Covid-19-imut tamakkiisumik akiuussuserneqarsimasutut isigineqassaaq. 
  Imm. 2.  Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

 

Illoqarfinniit nunaqarfinniillu taaneqartunit angalanermi piumasaqaatit

 

  § 8.  Inuit § 1, imm. 1 naapertorlugu sumiiffinniit nunap killeqarfiata iluani sumiiffimmut allamut angalasut, Covid-19-imut tamakkiisumik akiuussuserneqarsimanermik uppernarsaammik takutitsissapputpput.    
  Imm. 2.  Inuit tullinnguuttumi allassimasut akiuussuserneqarsimanissamut imm. 1-imi piumasaqaammut ilaatinneqanngillat, taamaattorli  sumiiffinni misissortinnissamut neqeroorfiusuni aallartinnatik Covid-19-imut PCR atorlugu misissortinnikkut tunillanneqarsimannginnermik uppernarsaammik takutitsissapput: 
1)  Inuit angerlarsimaffimminnukarlutik angalasut. 
2)  Inuit inuiaqatigiinni suliassaqartitaallutik angalasariaqartut. 
3)  Inuit Covid-19-imut akiuussutissamik kapitinnissamut Nunatta Nakorsaaneqarfianit innersuunneqanngitsut. 
4)  Inuit § 1, imm. 1 naapertorlugu sumiiffinnit nuna qimallugu, nunatta killeqarfiata iluani pisariaqanngitsumik uninngaffiunngitsumik angalasut. 
5) Sulisut tamanut angallassissummi pineqartumi aallartussanik atorneqartussanik sulisut.
6)  Meeqqat marluniit aqqanilinnik ukiullit.
  Imm. 3.  Meeqqat marluk inorlugit ukiullit imm. 1-imi piumasaqaatinut ilaatinneqanngillat. 
  Imm. 4.  Imm. 1-ip aamma 2-p maleruarneqarnissaasa qulakkeernissaa angallassissummik piginnittup akisussaaffigaa. 
  Imm. 5.  Piffissami aallarfiusumi PCR atorlugu misissortinneq sivisunerpaamik akunnernik 48-nik pisoqaassuseqaqqusaavoq.

 

Pingaartumik inunnut Covid-19-imik siusinnerusukkut tunillatsinnikunut

 

  § 9.  Inunnut siusinnerusukkut Covid-19-imik tunillatsinnikuusimasunut PCR-ilu atorlugu misissortinnikkut Covid-19-imik tunillatsissimanerminnik uppernarsaasinnaasunut, piffissami uppernarsaatip atorneqarnerani minnerpaamik ullunik 14-inik annerpaamillu sapaatit akunnerinik aqqaneq-marlunnik pisoqaassusilimmik uppernarsaasinnaasunut tamakkiisumik akiuussuserneqarsimasunut malittarisassat atuuttut assingi atuutsinneqarput.
  Imm. 2.  Uppernarsaat suna uppernarsaatitut akuerisatut atorneqassanersoq Nunatta Nakorsaaneqarfiata aalajangissavaa.

 

Qanermut imaluunniit kiinnamut assiaquteqarnissamut piumasaqaat

 

  § 10.  Inuit aqqaneq-marlunnik sinnerlugillu ukiullit qanermut imaluunniit kiinnamut assiaquteqassapput: 
1)  inini kikkunnit tamanit iserfigineqarsinnaasuni isersimagunik. 
2)  pisiniarfinni kiffartuussinermillu ingerlatsivinni sulisut pisisartunik attaveqarnerminni. 
3)  assartuutini kikkunnit tamanit ilaaffigineqarsinnaasuni, tassunga ilanngullugit bussini taxanilu ilaagunik. 
  Imm. 2.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.   
 
Imm. 3.  Pisiniarfinni kiffartuussivinnilu sulisut qanermut kiinnamulluunniit assiaqutit atunngikkaluarlugit pisiniat sulisullu akornanni plastikimik assiaqutit atorsinnaavaat. 
  Imm. 4.  Qanorluunniit immikkoortumi 1-imi allaqqasoqaraluarpat, peqqutissaqarluarpat qanermut kiinnamulluunnniit assiaqutit ilaannakortumik tamakkiisumilluunniit peeqqaneqarallarsinnaapput, pisuni imaattuni: 
1)  Nerinermi imaluunniit imernermi.
2)  Nakorsaatitornermi. 
3)  Qarngit aalaneratigut atuaasartumik oqaloqateqarnermi. 
4)  Qanermut kiinnamulluunniit assiaqutit anersaartorniarnermut ajoqutaagunik ipianngulersitsippataluunniit. 
5)  Politiit kinaassutsimik uppernarsaaneranni

 

  § 11.  Qanermut assiaqutitut taaneqartut tassaapput qanermut qinngamullu assiaqutit ataasiartakkat imaluunniit annoraaminermit sanaat allunaasamillu tasisartumilluunniit siutinut ikkuttartut imaluunniit niaqqup tunuatungaani qilertartoq kiinnamullu attuumasoq. 
  Imm. 2.  Kiinnamut assiaqutitut tassaapput isinut, qanermut qingamullu assiaqutit plastikimik sanaat kiinnamut attuumanngitsut.

 

Inuit pillugit paasissutissanik suliarinninnerit

 

  § 12.  Nalunaarut una naapertorlugu inuup akiuussuserneqarsimaneranut inissisimaffia uppernarsarniarlugu inuit pillugit paasissutissanik suliarinnittoqarsinnaavoq.

 

Pineqaatissiissutit

  § 13.  § 3, imm. 1-imik aamma §§ 5, 6 imaluunniit 8, imm. 1-inik immaqaluuniit § 10, imm. 1 unioqqutitsisoq pinerluttulerinermik inatsit malillugu pineqaatissinneqarsinnaavoq. 
  Imm. 2. Ingerlatseqatigiiffiit il.il. (inatsisitigut pisussaatitaasut pisinnaatitaasullu) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

 

Atuutilersitsineq aamma atuunneranut piffissaliussaq

 

  § 14.  Nalunaarut ullormi 21. november 2021-mi atuutilissaaq nal. 08:00.
  Imm. 2.  Nalunaarut malillugu killilersuinerit, inerteqqutit, peqqusinerit il.il. 5. december 2021 tikillugu atuutissapput.

 

Inatsimmi allami allannguinerit

 

  § 15.  Nuummi Sisimiunilu killilersuinerit pillugit Namminersorlutik Oqartussat utaqqiisaagallartumik nalunaarutaanni nr. 60, 29. oktober 2021-mersumi tullinnguuttut allanngortinneqarput: 
1)  § 8, imm. 2-mi “30. november 2021" imatut allanngortinneqassaaq. ”21. november 2021 nal. 08:00”.

 

  § 16.  Piffissami 13. november 2021-miit 27. november 2021-p tungaanut Nuummi killilersuinerit pillugit Namminersorlutik Oqartussat nalunaarutaanni nr. 64, 12. november 2021-mersumi tullinnguuttut allanngortinneqarput: 
1) § 13, imm. 3-mi ”27. november 2021” imatut allanngortinneqarpoq:”21. november 2021 nal. 08:00”.                    

 

 

Namminersorlutik Oqartussat, ulloq 20. november 2021

 

 

Kirsten Fencker
Peqqinnissamut Naalakkersuisoq

 

 

/ Aka Olesen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk