Aalisarneq pillugu Inatsisartut inatsisaat nr. 18, 31. oktober 1996-imeersumi § 23, imm. 2 aamma § 33, imm. 3, aamma Sinerissap qanittuani qaleralinniarneq pillugu Namminersorlutik Oqartussat nalunaarutaat nr. 46, 14. september 2020-imeersumi § 8, imm. 2 malillugit aalajangiunneqarput:

 

Atuuffia

 

  § 1. Uummannaq aqutsiveqarfimmi, 70° 30’N -ip avannaani, aamma 71° 30’N-ip kujataani sineriammit sumiiffiusumi, aamma aalisartoqarfimmut tunngavigisatut killingisat avataanni sømilit pingasut tikillugit nassuiarneqartutut inuussutissarsiutigalugu aalisarnermut ileqqoreqqusaq atuuppoq.

 

Inuussutissarsiutigalugu qaleralinnut qassusersorluni aalisarneq

 

  § 2. Qaammatini januarimi, martsimi, apriilimi, maajimi, novemberimi aamma decemberimi ilanngussani sumiiffiit nalunaarsukkat avataanni inuussutissarsiutigisatut qassusersorluni qaleralinniartoqaqqusaavoq.

 

Ataatsimoorussatut aalajangersakkat

 

  § 3.  Ukiuunerani sikoqarnerata qassusersorluni aalisarneq ajornartorsiortissappagu najugarisami peqatigiiffinni tusarniaareernermigut qassusersorluni aalisarneq kommunalbestyrelsip matusiffigisinnaavaa

 

Pineqaatissiissutit

 

  § 4.  §§ 2 aamma 3-mik unioqqutitsinerit akiligassinneqarnermik arsaarinnissuteqarnermillu malitseqarsinnaapput.
  Imm. 2.  Imm. 1 malillugu akiligassiissutit pinerluttulerinermut inatsimmi kapitali 5 malillugu inatsisitigut inuttut naatsorsuussanut akileeqqusaasinnaapput.

 

Atuutilernera

 

  § 5.  Ileqqoreqqusaq nalunaarutigineqarnerata tassanngaanniillu ullup tulliani atuulissooq.
  Imm. 2. Taamaalinerani Uummannaq aqutsiveqarfimmut Qassusersorluni qaleralinniarneq pillugu Qaasuitsup Kommunianut ileqqoreqqusaq 6. september 2011-meersoq atorunnaarsinneqarpoq.

 

Taamatut ulloq 21. december 2021-mi Avannaata Kommuniani Kommunalbestyrelsimit akuersissutigineqarpoq.

 

 

Palle Jerimiassen
Borgmesteri

 

 

Tamatumuuna aqutsiveqarfimmi Uummannaqmi inuussutissarsiutigalungu qassuserluni aalisarneq Avannaata Kommuniani ileqqoreqqusaq akuerineqarpoq.

 

 

 

 

Namminersorlutik Oqartussat, 1. januar 2022

 

 

 

Aqqaluaq B. Egede
Aalisarnermut, Piniarnermullu Naalakkersuisoq