Suliassaqartitsinermik inunnillu isumaginninnermik Kalaallit Nunaanni inatsit nr. 580 29. november 1978-imeersoq, takuuk Nalunaarut nr. 417 27. september 1979-imeersoq, tunngavigalugit makku aalajangersarneqarput:

 

Kapitali 1.
Siunertaa.

§ 1. Isumaginninnermi Naalakkersuisup isumagissavaa paaqqinniffinni immikkut inersimasunut siunertalinnut inissat pisariaqartinneqartut pigineqarnissaat, Inatsisartut peqqussutaasigut allatigut taamaaliornissaq periarfissinneqarsimanngikkaangat.

 

Kapitali 2.
Pilersitsineq ingerlatsinerlu.

§ 2. Inatsisartut peqqussutaat manna malillugu nuna tamakkerlugu paaqqinniffiit Isumaginninnermi Naalakkersuisoqarfimmit pilersinneqarsinnaaílutillu ingerlanneqarsinnaapput Isumaginninnermi Pisortaqarfik aqqutigalugu.
Imm. 2. Inatsisartut peqqussutaat manna malillugu kommunini ataasiakkaani paaqqinniffiit kommuninit pilersinneqarsinnaallutillu ingerlanneqarsinnaapput, ilaatigut kommunit arlariit ikioqatigiinnerisigut.

§ 3. Inatsisartut peqqussutaat manna malillugu paaqqinniffiit imminut pigisut pilersinneqarsinnaapput, Isumaginninnermi Naalakkersuisoq kommunalbestyrelsiluunniit attavigineqartoq ingerlatsinissamut isumaqatigiissuteqarfigisimagaanni.

§ 4. Isumaginninnermi Naalakkersuisup pisariaqartitsineq naapertorlugu paaqqinniffiup pilersinneqarnissaanut, atorneqarnissaanut, aqqissuunneqarnissaanut, aqunneqarneranut ingerlanneqarneranullu malittarisassat aalajangersartassavai, matumani ilanngullugit akiliuteqartarnissamut aalajangersakkat kiisalu paaqqinniffimmi perorsaanikkut malittarisassat.
Imm. 2. Taamaaliornissaq naleqquttuutinneqarpat inuusuttut 18-it inorlugit ukiullit Inatsisartut peqqussutaat manna malillugu paaqqinniffinni taamaattuni inissinneqarsinnaapput.
Imm. 3. Isumaginninnermi Naalakkersuisoq Isumaginninnermi Pisortaqarfik aqqutigalugu perorsaanikkut siunnersuisuullunilu paaqqinniffinnik nakkutilliisuussaaq.

§ 5. Isumaginninnermi Naalakkersuisup piffissami misiliiffiugallartumi suliniutit peqqussummi matumani taaneqarsimanngikkaluartut pilersinneqarnissaat akuersissutigisinnaavaa.

 

Kapitali 3.
Aningaasalersuineq.

§ 6. Nuna tamakkerlugu paaqqinniffiit pilersinneqarnissaannut aningaasartuutit tamakkiisut ilaannakortulluunniit landskarsimit akilerneqarsinnaapput.
Imm. 2. Isumaginninnermi Naalakkersuisup aalajangersagai erseqqinnerusut ntalillugit paaqqinniffiit nuna tamakkerlugu paaqqinniffiunngikkaluartut landskarsimut tapiiffigineqarsinnaapput, takuuk § 4, imm. 1.
Imm. 3. Nuna tamakkerlugu paaqqinniffiit ingerlanneqarnerannut aningaasartuutit paaqqinniffiit atorneqarnerat pillugu qanoq annertutigisumik akiliisarnissaannut aalajangersakkat malillugit kommuninit akilerneqartassapput, takuut § 4, imm.l.

 

Kapitali 4.
Atuutilerfia.

§ 7. Inatsisartut peqqussutaat manna atuutilerpoq 1. maj aallarnerfigalugu. Tamatumunnga peqatigitillugu landsrådit kommunini ungdomspensionit pillugit ileqqoreqqusaat 18. november 1977-imeersoq atorunnaarsinneqarpoq.

Namminersornerullutik Oqartussat, ulloq 28. april 1988

Jonathan Motzfeldt

/

Aqqaluk Lynge