Nipisanniarneq pillugu Namminersorlutik Oqartussat nalunaarutaat nr. 22, 22. juni 2021-mersooq

Aalisarneq pillugu Inatsisartut inatsisaanni 31. oktober 1996-imeersumi Inatsisartut inatsisaatigut nr. 28, 28. November 2016-imeersukkut kingullermik allanngortinneqartumi § 10a, § 10b, § 13, imm. 2, § 23, imm. 1, § 33, imm. 2, aamma § 34, imm. 3 naapertorlugit aalajangersarneqarpoq:

 

Atuuffia

 

  § 1.  Nalunaarut tunngaviusumik killeqarfiup avataani 3 sømilimiittup sineriaallu akornanni Kalaallit Nunaata aalisarnikkut oqartussaaffigisaani nipisanniarnermut atuuppoq.

 

Aqutsiveqarfiit

 

  § 2.  Nipisanniarnermi aqutsiveqarfiit ilanngussaq 1-imi aalajangersarneqarput.

 

Nassuiaatit

 

  § 3.  Nalunaarummi uani imatut paasineqassaaq: 
1)  ”Piffissaq aalisarfiusoq” ullut aalisarfiusut 60-it ataannartut.
2)  ”Usinik nuussineq” pisanik taakkuninngaluunniit tunisassianik angallammiittunik umiatsiaaqqamiittunillunniit angallammut umiatsiaaqqamulluunniit allamut nuunneqartut tamarmik, nuunneqartut usit tamarmiunersut usilluunniit ilaannarineraat apeqqutaatinnagu.
3)  ”Aalisalersut nutaat” aalisartut ukiup pisassiiffiusup siuliani nipisanniarsinnaanermut qinnuteqaateqarfiusumut assinganik nipisanniarsinnaanermut akuersissuteqarnikuunngitsut.

 

Akuersissut

  § 4.  Inussutissarsiutigalugu nipisanniarnermi aalisarsinnaanermut akuersissut qinnuteqartoqarnera malillugu Aalisarnermut Piniarnermullu Naalakkersuisoqarfimmit tunniunneqartartoq piumasaqaataavoq.
  Imm. 2.  Ukiumi pisassiiffiusumi ataatsimi aqutsiveqarfinnut marlunut aalisarsinnaanermut akuersissummik qinnuteqartoqarsinnaavoq. Pineqartut tassaapput aqutsiveqarfik qinnuteqaateqartup najugaqarfia kiisalu aqutsiveqarfik sanilerisaq. 
  Imm. 3.   Aalisarsinnaanermut akuersissutit piffissamut killiligaapput pisarisinnaasatullu akuerineqartut annertunerpaaffeqaratik.
  Imm. 4.  Taamaallaat angallammut qinnuteqartumit aalisarnermi atorneqartussamik pigineqartumut inuussutissarsiutigalugu nipisanniarsinnaanermut akuersiissummik tunniussisoqarsinnaavoq.

 

Pisassiissutit piffissarlu aalisarfiusoq

 

  § 5. Naalakkersuisut aqutsiveqarfiit ilanngussaq 1-imi aalajangersarneqartut naapertorlugit nipisannik pisassiissutinik ukiut tamaasa aalajangiisarput.

 

  § 6.  Piffissami 16. Juli - 1. april inuussutissarsiutigalugu arnarlunnik nipisanniarnissaq inerteqqutaavoq.
  Imm. 2.  Inuussutissarsiutigalugu arnarlunnik nipisanniarneq piffissap aalisarfiusup § 8, imm. 1 naapertorlugu aalajangerneqartup avataani inerteqqutaavoq. 


  § 7.  Inuussutissarsiutigalugu angusallunnik nipisanniarneq piffissami 16. juli - 31. januar inerteqqutaavoq.


  § 8.  Najukkani tunitsiviit aalisartullu kattuffiisa sinniisuisa ilanngussaq 1 naapertorlugu aqutsiveqarfinni ataasiakkaani inuussutissarsiutigalugu arnarlunnik nipisanniarnermi piffissaq aalisarfissaq qaqugu aallartinneqassanersoq isumaqatigiissutigisassavaat.
 Imm. 2. 
Imm. 1 naapertorlugu piffissat aalisarfiusussat isumaqatigiissutigineqartut nipisanniarnerup aqutsiveqarfimmi pineqartumi aallartinnginnerani kingusinnerpaamik sapaatip akunnera sioqqullugu Aalisarnermut Piniarnermullu Naalakkersuisoqarfimmut nalunaarutigissavaat.

 

  § 9.  Aqutsiveqarfinni ataasiakkaani piffissat aalisarfiusut pisassiissutillu pillugit nalunaarutit tusagassiuutitigut aamma Naalakkersuisut nittartagaatigut nalunaarutigineqartassapput. Aamma pisassiissutit tamarmiusut nunguppata nalunaaruteqartoqassaaq.
  Imm. 2.  Aalisarnermut Piniarnermullu Naalakkersuisoqarfiup aqutsiveqarfimmi ataatsimi piffissap aalisarfiusup naanerata kingorna pisassiissutit pisarineqanngitsut aqutsiveqarfimmut allamut nuussinnaavai.

 

Usinik nuussineq

 

  § 10.  Aalisarsinnaanermut akuersissuteqartup nammineq umiatsiaaraata aamma nammineq angallataata akornanni usinik nuussisinnaanermut akuersissut aalisarsinnaanermut akuersissuteqartup angallataa inuussutissarsiutigalugu aalisariutaappat Aalisarnermut, Piniarnermullu Naalakkersuisoqarfimmit tunniunneqassaaq. Usinik nuussisinnaanermut akuersissut aalisarsinnaanermut akuersissummi tunniunneqartumi allassimassaaq. Usinik nuussineq nalunaaruteqartussaatitaanermut ilaanngilaq.

 

Inussutissarsiutiginagu nipisanniarneq

 

  § 11. Nammineq atugassatut nipisanniarneq danskit naalagaaffianni innuttaassusilinnut Kalaallit Nunaanni najugaqavissunut tamanut akuerisaavoq. 
  Imm. 2.  Nunani allani innuttaassuseqartut Danmarkimeersuunngitsut Kalaallit Nunaanni najugaqavissut aammalu ukiuni marlunni ataannartumik nalunaarutip uuma atuutinngilernerani najugaqareersut danskit naalagaaffianni innuttaassuseqartunut naligitinneqassapput.
  Imm. 3. Inuussutissarsiutiginagu nipisanniarnermut atatillugu amerlanerpaamik qassutit marluk atorneqassapput.

 

  § 12.  Piffissap aalisarfiup arnarlunnik inuussutissarsiutigalugu nipisanniarfiusutut aalajangerneqartup assingani arnarlunnik inuussutissarsiutiginagu nipisanniartoqassaaq, tak. § 8, imm. 1.

 

Aalisarnermi atortut aamma qassutinik qimaannakkanik qaqitsineq

 

  § 13.  Aalisarneq unitsinneqarpat aalisarnermi nammineq atortorisat pissutissaqanngitsumik uninngatitsinani ingerlaannaq qaqinneqassapput.
  Imm. 2.  Aalisarnermi atortut qaqinneqanngitsut piginnittoq kinaassusersineqarsinnaappat piginnittup akiligassaanik qaqinneqassapput.

 

  § 14.  Qassutit aalisarnerup unitsinneqarnerata kingorna ullut 7-it kingorna qaqinneqarnikuunngitsut qassutinik uninngatitsiinnartoq kinaassusersineqarsinnaanngippat qaqinneqarsinnaapput tigummiinnarneqarlutillu.

 

Pineqaatissiinerit

 

  § 15. § 4, stk. 1, §§ 6, 7, aamma 10, § 11, imm. 2, kiisalu §§ 12, 13 aamma 14-imik, unioqqutitsineq pinerluttulerineq pillugu inatsimmi malittarisassat malillugit akiliisitsinikkut arsaarinninnikkullu pineqaatissiinermik kinguneqarsinnaavoq.
  Imm. 2. 
Ingerlatseqatigiiffiit (inatsisit tunngavigalugit inuttut isigineqartut) pinerluttulerineq pillugu inatsimmi malittarisassat malillugit pillaammik imaluunniit arsaarinninnermik akiliisinneqarsinnaapput.
  Imm. 3.  Pillaammik akiliutit Nunap Karsianut akilerneqassapput.

 

Atuutilersitsineq aammalu ikaarsaariarnermi malittarisassat

 

  § 16.  Nalunaarut ulloq 1. august 2021 atuutilersinneqarpoq.
  Imm. 2.  Peqatigitillugu Nipisanniarneq pillugu Namminersorlutik Oqartussat nalunaarutaat nr. 2, 2. februar 2016-imeersoq atorunnaarsinneqarpoq.

 

  § 17.  Aalisarnermut Piniarnermullu Naalakkersuisoqarfik piffissami ukiuni marlunni ulloq 1. august 2021-miit 28. februar 2022 tikillugu aalisalersunut nutaanut inuussutissarsiutigalugu nipisanniarsinnaanermut akuersissutinik tunniussissanngilaq.

 

 

 

Namminersorlutik Oqartussat, ulloq 22. juni 2021

 

 

 

Aqqaluaq B. Egede
Aalisarnermut Piniarnermullu Naalakkersuisoq

 

 

/ Jørgen Isak Olsen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk