Kviksølvi pillugu Namminersorlutik Oqartussat nalunaarutaat nr. 55, 7. september 2021-mersooq

Avatangiisit innarlitsaaliorneqarnissaanik Inatsisartut inatsisaanni nr. 9-mi, 22. november 2011-meersumi § 10, imm. 1, nr. 1, 2, 7 aamma 20, aamma § 66, imm. 3 naapertorlugit aalajangersarneqarpoq:

 

Atuuffia

 

  § 1.  Nalunaarummi kviksølvinik tuniniaaneq aniatitsinerlu, kviksølvit ataqatigiiffii aamma tunisassiat kviksølvinik akullit pineqarput.

 

  § 2.  Nalunaarummi kviksølvinik atuinerit, aatsitassaqarnermut inatsimmut ilaatinneqartut, taakkununnga kuultisiorfeeqqanik ingerlatsinerit aammalu pingaarnertut kviksølvinik piiaanerit ilanngullugit pineqanngillat.
  Imm. 2.  Nalunaarummi kviksølvinik, kviksølvit ataqatigiiffiinik imaluunniit tunisassianik kviksølvinik akulinnik, avatangiisinut inatsimmi kapitali 7-imi aamma taanna naapertorlugu maleruagassiani malittarisassiuunneqartunik eqqaanerit pineqanngillat.

 

Taaguutit

 

  § 3.  Nalunaarummi uku imatut paasineqassapput:
1)  Kviksølvi: Kviksølvip akuutissartaanut tunngaviusoq, saffiugassiatut isikkulik aammalu kemiimut tunngasunik ataqatigiiffiusoq.
2)  Kviksølvit ataqatigiiffii: Akuutissat kviksølvit atom-iinik aamma akuutissat kemiimut tunngasortaanut atom-imik ataatsimik amerlanerusunilluunniit akullit, taamaallaat kemii ikiorsiullugu immikkoortunut assigiinngitsunut immikkoortiterneqarsinnaasut.
3)  Tunisassiat kviksølvinik akullit: Tunisassiat imaluunniit tunisassiat immikkoortui, ilanngussaq 1-imi allassimasut, nammineerluni kviksølvinik imaluunniit kviksølvit ataqatigiinnerinik akusaasut.
4)  Amalgami: Amalgami kigutinut ilaartuutissiaq, kviksølvinik imaluunniit kviksølvit ataqatigiiffiinik akulik.

 

Kviksølvit, kviksølvit ataqatigiiffii aamma tunisassiat kviksølvinik akullit pillugit piumasaqaatit

 

  § 4.  Kviksølvinik, kviksølvit ataqatigiiffiinik aamma tunisassianik kviksølvinik akulinnik eqqussinissaq, avammut nassiussinissaq tuniniaanissarlu inerteqqutaavoq. 
  Imm. 2.  Tunisassianik kviksølvinik akulinnik sanaartornissaq inerteqqutaavoq.
  Imm. 3.  Sanaartornerni kviksølvinik imaluunniit kviksølvit ataqatigiinnerinik atuinissaq inerteqqutaavoq.

 

  § 5. Tunisassiat imaattut kviksølvimik akullit § 4-mi inerteqquteqarnermut ilaatinneqanngillat:
1)  Tunisassiat inuinnaat illersorneqarnerinut sakkutuunilu atortut pingaarutillit.
2)  Tunisassiat ilisimatusarnermut, atortut nalimmassarnerinut aamma innersuussivissatut malitassanut atorneqartut.
3)  Katinnerit innaallagissallu kaaviiaarnerani qamittaatit, qulliit koldkatodelysstofrørit (CCFL) aamma qulliit lystrofrørit silatimikkut skærminut elektroniskiusunik elektrodillit (EEFL), kiisalu uuttortaatit, kviksølvitaqanngitsunik taarsiissutaasinnaasunik peqanngitsut.
4) Kapuutit, aanaveersaatitut Thiomersal-inik akullit.

 

  § 6.  Amalgaminik atuineq inerteqqutaavoq.

 

  § 7.  Kviksølvit, kviksølvit ataqatigiinneri imaluunniit tunisassiat kviksølvinik akusat avatangiisinut kuugutsinneqaqqusaanngillat.

 

Nakkutilliineq

 

  § 8.  Nalunaarummi matumani maleruagassat malinneqarnissaannut kommunalbestyrelsi nakkutilliisussaavoq, aammalu maleruagassat malitsinniarneqarnerini peqqussutinik inerteqqutinillu pisariaqartunik nalunaaruteqartartussaalluni.
  Imm. 2.  Aamma nakkutilliinermi atuutsitsiniarnermilu avatangiisit innarlitsaaliorneqarnissaannik Inatsisartut inatsisaanni kapitali 12-imi maleruagassat atuutsinneqartussaapput.

 

Maalaaruteqaatit

 

  § 9.  Nalunaarut manna naapertorlugu aalajangiinernut maalaarutit avatangiisit innarlitsaaliorneqarnissaannik Inatsisartut inatsisaanni kapitali 14-imi maleruagassat naapertorlugit suliarineqassapput.

 

Pineqaatissiisarnermut aalajangersakkat

 

  § 10.  Akiligassiilluni pineqaatissiissoqarsinnaavoq:
1)  § 4, imm. 1 unioqqutillugu kviksølvinik, kviksølvit ataqatigiinnerinik imaluunniit tunisassianik kviksølvinik akulinnik eqqussisunut, tuniniaasunut avammulluunniit nassiussisunut.
2)  § 4, imm. 2 unioqqutillugu tunisassianik sanaartortunut.
3)  § 4, imm. 3 unioqqutillugu sanaartornermi kviksølvinik imaluunniit kviksølvit ataqatigiinnerinik atuisunut.
4)  Taartissanik kviksølvitaqanngitsunik peqaraluartoq tunisassianik § 5, imm. 3-mi taaneqartunik atuisunut
5)  § 6 unioqqutillugu amalgaminik atuisunut.
6)  § 7 unioqqutillugu kuugutsitsisunut.
7)  § 8, imm. 1 naapertorlugu nakkutilliinermut, peqqussutinut inerteqqutinulluunniit akerliusunut.

 

Atuuttussanngortitsineq

 

  § 11.  Nalunaarut 7. september 2021-imi atuutilerpoq.

 

 

 

Namminersorlutik Oqartussat, ulloq 6. september 2021

 

 

 

Kalistat Lund
Nunalerinermut, Imminut Pilersornermut, Nukissiutinut Avatangiisinullu Naalakkersuisoq

 

 

/ Mette Skarregaard Pedersen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk