Suliassaqarfiit agguataarnerat pillugu kaajallaasitaq nr. 3, 1. juni 2022-mersooq (Suliassaqarfiit agguataarnerat)

Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersumi § 23, imm. 1 naapertorlugu, uku aalajangersarneqarput:

 

Kapitali 1

Suliassaqarfiit agguataarnerat

 

  § 1.  Naalakkersuisut Siulittaasuata Naalakkersuisunut ilaasortat akornanni suliassaqarfiit, kaajallaasitami matumani aalajangersarneqartutut agguataarpai.
  Imm. 2.  Naalakkersuisunit Naalakkersuisumut piginnaatitsineq kaajallaasitap matuma atulersinnissaa sioqqullugu Naalakkersuisunit aalajangiiffigineqartoq tamatuminnga sunnerneqanngilaq. Piginnaatitsissutit Naalakkersuisut allamik aalajangiinissaasa tungaannut atuutissapput.

 

Pingaarnertut agguataarineq

 

  § 2.  Naalakkersuisut Siulittaasuata pingaarnertigut suliassaqarfiit imatut agguataarpai:
  Imm. 2.  Naalakkersuisut Siulittaasuat: Múte Bourup Egede, Inuit Ataqatigiit.
1)  Naalakkersuisut Siulittaasuata Naalakkersuisoqarfia.
  Imm. 3.  Aningaasaqarnermut Naligiisitaaanermullu Naalakkersuisoq: Naaja H. Nathanielsen, Inuit Ataqatigiit.
1)  Aningaasaqarnermut Naligiissitaanermullu Naalakkersuisoqarfik
  Imm. 4.  Nunanut Allanut Inuussutissarsiornermut Niuernermullu Naalakkersuisoq: Vivian Motzfeldt, Siumut.
1)  Nunanut Allanut Inuussutissarsiornermut Niuernermullu Naalakkersuisoqarfik.
  Imm. 5.  Aalisarnermut Piniarnermullu Naalakkersuisoq: Karl Tobiassen, Siumut.
1)  Aalisarnermut Piniarnermullu Naalakkersuisoqarfik.
  Imm. 6. Isumaginninnermut, Suliffeqarnermut Nunamullu Namminermut Naalakkersuisoq: Jess Svane, Siumut.
1)  Isumaginninnermut, Suliffeqarnermut Naalakkersuisoqarfik.
  Imm. 7.  Ilinniartitaanermut, Kultureqarnermut, Timersornermut Ilageeqarnermullu Naalakkersuisoq: Peter Olsen, Inuit Ataqatigiit.
1)  Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik.
  Imm. 8.  Aatsitassaanut Inatsisillu Atuutsinneqarnerannut Naalakkersuisoq: Aqqaluaq B. Egede, Inuit Ataqatigiit.
1)  Aatsitassanut Inatsisillu Atuutsinneqarnerannut Naalakkersuisoqarfik.
  Imm. 9.  Nunalerinermut, Imminut Pilersornermut, Nukissiutinut Avatangiisinullu Naalakkersuisoq: Kalistat Lund, Inuit Ataqatigiit.
1)  Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisoqarfik.
  Imm. 10.  Ineqarnermut Attaveqaqatigiinnermullu Naalakkersuisoq: Erik Jensen, Siumut.
1)  Naalakkersuisut Siulittaasuatut sinniisussaq siulleq.
2)  Ineqarnermut Attaveqaqatigiinnermullu Naalakkersuisoqarfik.
  Imm. 11.  Meeqqanut, Inuusuttunut Ilaqutariinnut Peqqissutsimullu Naalakkersuisoq: Mimi Karlsen, Inuit Ataqatigiit.
1)  Meeqqanut, Inuusuttunut Ilaqutariinnullu Naalakkersuisoqarfik.
2)  Peqqinnissamut Naalakkersuisoqarfik.

 

Naalakkersuinikkut allaffissornikkullu agguataarineq

 

  § 3.  Suliassaqarfinnik naalakkersuinikkut agguataarineq kapitali 2-miit 11-mut takuneqarsinnaavoq. Allaffissornikkut agguataarineq ilanngussaq 1-imi takuneqarsinnaavoq.

 

Kapitali 2

Naalakkersuisut Siulittaasuat

 

  § 4.  Naalakkersuisut Siulittaasuata Naalakkersuisoqarfia ukuninnga immikkoortortaqarlunilu suliassaqarfeqarpoq:
1
)  Aqutsisunut Allattoqarfik.
2)  Inatsiseqarnermut immikkoortortaq.
3)  Ingerlatseqatigiiffinnut Allattoqarfik.
4)  Aqutsinermut immikkoortortaq Ineriartortitsinermut aamma qitiusumik sulisoqarnermut allaffeqarfik.
5)  Tunngaviusumik inatsiseqalernissamut immikkoortortaq.
6)  Kalaallit Nunaanni pisortatigoortumik tikeraarneq.
7)  Danmark-imi Namminersorlutik Oqartussat sinniisoqarfia.
8)  Politikkikkut atteqatigiinnermullu allattoqarfik.
9)  IT-systemit ataatsimoorussat.

 

Immikkoortortat attuumassutillit

 

  § 5.  Naalakkersuisut Siulittaasuata Naalakkersuisoqarfianut immikkoortortat uku attuumassuteqarput; naalakkersuisoqarfimmut oqartussaanerusumut aalaaruteqarfiusinnaasoq, inatsisitigut allatut aalajangersarneqarsimanngippat:
1)  Digitaliseriinermut Aqutsisoqarfik.

 

Kapitali 3

Aningaasaqarnermut Naligiisitaaanermullu Naalakkersuisoq

 

  § 6.  Aningaasaqarnermut Naligiissitaanermullu Naalakkersuisoqarfik ukuninnga immikkoortortaqarluni suliassaqarfeqarpoq:
1)  Aningaasarsiornikkut naalakkersuineq Aningaasaqarnermullu naalakkersuineq.
2)  Akileraartarnermut akitsuusiisarnermullu naalakkersuineq.
3)  Nuna tamakkerlugu pilersaarusiorneq.
4)  Naligiissitaaneq.

 

Immikkoortortat attuumassutillit

 

  § 7.  Aningaasaqarnermut Naligiissitaanermullu Naalakkersuisoqarfik ukuninnga immikkoortortaqarpoq; naalakkersuisoqarfimmut oqartussaanerusumut maalaaruteqarfiusinnaasut, allamik inatsisitigut aalajangersaasoqarsimanngippat:
1)  Akileraartarnermut Aqutsisoqarfik (AKA).
2)  Aningaasaqarnermut Sulisoqarnermullu Aqutsisoqarfik (ASA).
3)  Kalaallit Nunaanni Naatsorsueqqissaartarfik.

 

Kapitali 4

Nunanut Allanut Inuussutissarsiornermut Niuernermullu Naalakkersuisoq

 

  § 8. Nunanut Allanut Inuussutissarsiornermut Niuernermullu Naalakkersuisoqarfik ukuninnga immikkoortortaqarlunilu suliassaqarfeqarpoq:
1)  Kalaallit Nunaata nunani allani sinniisoqarfii.
2)  Kalaallit Nunaata nunanut allanut politikkianut atatillugu soqutigisai.
3)  Issittumi suleqatigiinnermik ataatsimut isigalugu ataqatigiissaarineq.
4)  Nunanik allanik niueqateqarnermi naalakkersuineq.
5)  Inuussutissarsiutinik inuussutissanillu ingerlataqarneq pillugit inatsiseqarneq.
6)  Inuussutissarsiornermik naalakkersuineq – ataatsimut isigalugu inuussutissarsiutinik siuarsaanermi, takornariaqarnermi, siku aamma imeq pillugit.
7)  Nuna tamakkerlugu takornariaqarnermut periusissaq.
8)  Sikumik aamma imermik nunanut allanut nioqquteqarneq kiisalu siku imerlu pillugit inatsit malillugu allaffissornikkut aqutsineq.
9)  Kalaallit Nunaanni inuussutissarsiutinik ineriartortitsinermut ilusilersuineq.
10)  Nunaqarfinni isorliunerusuni aningaaseriveqarnikkut pilersorneqarneq.
11)  Suliniutinut annertuunut sinaakkutissatut atugassarititaasut.
12)  Annertuunik ingerlataqarnermut tunngatillugu inuiaqatigiinni piujuartitsineq.
13)  Unammilleqatigiinnermut inatsit neqeroortitsisarnermilu ataatsimut isigalugu inatsiseqarneq.
14)  Atuisoqarnermik naalakkersuinikkut tunngassutillit.
15)  Nunanut allanut tuniniaanissamut akuersissutit (aatsitassanut inatsit malillugu akuersissutit ilanngunnagit).

 

Immikkoortortat attuumassutillit

 

  § 9.  Nunanut Allanut Inuussutissarsiornermut Niuernermullu Naalakkersuisoqarfik ukuninnga immikkoortortaqarpoq; naalakkersuisoqarfimmut oqartussaanerusumut maalaaruteqarfiusinnaasoq, inatsisitigut allamik aalajangersaasoqarsimanngippat:
1)  Atuisoqarnermut Unammilleqatigiinnermullu Aqutsisoqarfik.

 

Kapitali 5

Aalisarnermut Piniarnermullu Naalakkersuisoq

 

  § 10.  Aalisarnermut Piniarnermullu Naalakkersuisoqarfik ukuninnga immikkoortortaqarlunilu suliassaqarfeqarpoq:
1)  Nunami namminermi nunanilu tamalaani aalisarneq pillugu inatsisit, aalisakkanit isumalluutit qaleruallit ilanngullugit illersorneqarnissaannut atorneqartarnerinullu naalakkersuinikkut ingerlatsineq ilanngullugu.
2)  Nunami namminermi nunanilu tamalaani aalisarnermik naalakkersuinermut tunngasunik pingaarnertigut suliassanik naalakkersuinikkut ingerlatsineq.
3)  TAC pisassiissutillu.
4)  Aalisarnermut piniarnermullu tunngasuni nunarsuup immikkoortuini, illugiillunilu nunat akornanni aammalu nunat tamalaat akornanni isumaqatigiissutit.
5)  Nunami namminermi nunanilu tamalaani piniarneq aallaaniarnerlu pillugit inatsisit, tassungalu ilanngullugit immami miluumasunik illersuineq atuinerlu matumanilu immami miluumasunik illersuineq atuinerlu ilanngullugit.
6)  Nunami namminermi nunallu tamalaat akornanni piniarnermut aallaaniarnermillu naalakkersuinermi suliassat pingaarnerit.
7)  Akiliisitsilluni piniartitsisarneq aalisartitsisarnerlu.
8)  Nunarsuup immikkoortuini, illugiillunilu nunat akornanni aammalu nunat tamalaat akornanni isumaqatigiissutit.
9)  Kalaallit Nunaanni Uumasunut Nakorsaqarnermut Inuussutissalerinermilu Oqartussaqarfik (UNIO).
10)  Kalaallit Nunaanni Uumasunut Nakorsaqarnermut Inuussutissalerinermilu Oqartussaqarfimmut akisussaaffik Namminersorlutik Oqartussat aamma Danmarkimi uumasunut nakorsaqarnermut inuussutissalerinermilu oqartussaqarfiup akornanni avinneqarnikuuvoq. Danmarkimi Fødevarestyrelsen (Inuussutissalerinermut Aqutsisoqarfik) qullersatut oqartussaavoq, suliffeqarfinnik neqilerisunut aalisakkerisunullu akuersissuteqartarneq nakkutilliinerlu eqqarsaatigalugit, tassungalu ilanngullugit nunanut allanut niuernissaq siunertaralugu akuerineqarsimasut umiarsuit suliffissuaatigisut.

 

Immikkoortortat attuumassutillit

 

  § 11.  Aalisarnermut Piniarnermullu Naalakkersuisoqarfik uuminnga immikkoortortaqarpoq; naalakkersuisoqarfimmut oqartussaanerusumut maalaaruteqarfiusinnaasoq, inatsisitigut allamik aalajangersaasoqarsimanngippat:
1)  Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA).

 

Kapitali 6

Isumaginninnermut, Suliffeqarnermut Nunamullu Namminermut Naalakkersuisoq

 

  § 12.  Isumaginninnermut, Suliffeqarnermut Nunamullu Namminermut Naalakkersuisoqarfik ukuninnga immikkoortortaqarlunilu suliassaqarfeqarpoq:
1)  Inersimasut ajornartorsiutillit.
2)  Utoqqaat.
3)  Inersimasunik isumaginnittoqarneq.
4)  Suliffeqarnermut inatsiseqarneq. 
5)  Suliffeqarnermik naalakkersuinikkut ingerlatsineq.
6)  Nunatsinni Suliffeqarnermut Siunnersuisoqatigiinnik allatseqarfittut sullissineq.
7)  Suliffeqarneq pillugu pilersaarusiorneq.
8)  Nunani allamiunut tunngasut, najugaqarnissamut sulisinnaanissamullu akuersissutit.
9)  Nunamut Namminermut immikkoortortaqarfik.
10)  Kommuninik nakkutilliineq.
11)  Nordisk Pension pillugu suliaqarneq.

 

Immikkoortortat nammineertitat

 

  § 13.  Isumaginninnermut, Suliffeqarnermut Nunamullu Namminermut Naalakkersuisoqarfimmut atasuupput immikkoortut nammineertitat uku, oqartussaanerusumut maalaaruteqarfiusinnaanngitsut:
1)  Utoqqaat Oqaaseqartartuat.
2)  Isumaginninnermik Nakkutilliisut sumulluunniit attuumassuteqanngitsut.
3)  Kommunit Nakkutilliisoqarfiat.

 

Kapitali 7

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

 

  § 14.  Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik ukuninnga immikkoortortaqarlunilu suliassaqarfeqarpoq:
1)  Meeqqat atuarfiat.
2)  Atuarfiit namminersortut.
3)  Efterskolit.
4)  Atuarfiit immikkut ittut.
5)  Folkehøjskolit.
6)  Ilinniarnertuunngorniarfiit.
7)  Ingerlaqqiffiusumik ilinniarfiit ilisimatusartutullu ilinniarfiit.
8)  Inuussutissarsiutinut ilinniarfiit.
9)  Nuna Tamakkerlugu qitiusumik Ilitsersuisarfik.
10)  Danmarkimi Kalaallit Illui.
11)  Ilinniartitaaneq pillugu EU-lu peqatigiinnissamik isumaqatigiissut.
12)  Kulturimut tunngasut, eqqumiitsuliortutut ingerlatsisut ilanngullugit.
13)  Sunngiffimmi sammisassaqartitsineq.
14)  Nunatta Atuagaateqarfia.
15)  Timersorneq.
16)  Oqaatsit pillugit naalakkersuinikkut ingerlatsineq.
17)  Radio aamma TV.
18)  Katersugaasiveqarneq Toqqorsiveqarnerlu.
19)  Kulturikkut kingorngussat illersornissaat aamma UNESCO.
20)  Ilagiit.
21)  Ilisinernut iliveqarfeqarnermullu inatsiseqarneq.
2
2)  Inuit aqqi pillugit inatsit.
23)  Ilisimatusarneq.

 

Immikkoortortat attuumassutillit

 

  § 15.  Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik uuminnga immikkoortortaqarpoq; naalakkersuisoqarfimmut oqartussaanerusumut maalaaruteqarfiusinnaasoq, inatsisitigut allamik aalajangersaasoqarsimanngippat:
1)  Ilinniartitaanermut Aqutsisoqarfik.

 

Kapitali 8

Aatsitassaanut Inatsisillu Atuutsinneqarnerannut Naalakkersuisoq

 

  § 16.  Aatsitassanut Inatsisillu Atuutsinneqarnerannut Naalakkersuisoqarfik ukuninnga immikkoortortaqarlunilu suliassaqarfeqarpoq: 1)  Aatsitassanik suliassaqarfimmi pingaarnerusutigut pilersaarusiorneq ataqatigiissaarinerlu.
2)  Aatsitassat pillugit naalakkersuineq aammalu atortussianut tunngasunik periusissat.
3)  Atortussianut tunngasuni inuiaqatigiinni piujuartitsineq, tassunga ilanngullugit IIPN-nassuiaatit, IBA-mik isumaqatigiissutit innuttaasunillu peqataatitsineq.
4)  Atortussianut tunngatillugu malittarisassanik aalajangersaaneq.
5)  Kalaallit Nunaanni aatsitassarsiorfiusinnaasut pillugit nunani tamalaanni saqqummiussisarneq/nittarsaassisarneq.
6)  Aatsitassarsiornermut tunngatillugu nunap sannai pillugit oqartussatut suliaqartarnerit.
7)  Aatsitassarsiornermut tunngatillugu nunap sannai pillugit paasisat toqqortertarneri.
8)  Ujarassiorit.
9)  Ikummatissanik nunap iluaneersunit suliassanut, tassunga ilanngullugit ingerlatseqatigiiffinnut ikummatissanik imerpalasunik gassinillu ingerlatseqatigiiffinnut kiisalu ingerlatseqatigiiffinnut nunap pissusiinik misissuisartunut soqutigisaqaqatigiinnullu allanut oqartussaaneq.
10)  Kalaallit Nunaanni ikummatissanik nunap iluaneersunik periusissanik ineriartortitsineq, nunanilu tamalaanni periarfissat pillugit nittarsaassisarneq.
11)  Ikummatissanik nunap iluaneersunik atuinermut tunngatillugu inatsisinik maleruagassanillu ineriartortitsineq.
12)  Ikummatissanik nunap iluaneersunik atuinissamik akuersissutinut tunngatillugu nakkutilliisarneq oqartussatullu suliaqartarneq.
13)  Ikummatissanut nunap iluaneersunut tunngatillugu nunap sananeqatai pillugit paasisatut toqqortaatit.
14)  Inatsisinik atuutsitsinermut tunngasut.

 

Immikkoortortat attuumassutillit

 

  § 17.  Aatsitassanut Inatsisillu Atuutsinneqarnerannut Naalakkersuisoqarfik ukuninnga immikkoortortaqarpoq, naalakkersuisoqarfimmut oqartussaanerusumut maalaaruteqarfiusinnaasoq, allamik inatsisitigut aalajangersaasoqarsimanngippat:
1)  Aatsitassanut Ikummatissanullu Aqutsisoqarfik (MLSA)

 

Kapitali 9

Nunalerinermut, Imminut Pilersornermut, Nukissiutinut Avatangiisinullu Naalakkersuisoq

 

  § 18.  Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik ukuninnga immikkoortortaqarluni suliassaqarfeqarpoq:
1)  Nunalerineq, savaateqarneq, nersutaateqarneq tuttuuteqarnerlu pillugit inatsiseqarneq.
2)  Nunalerinermi naalakkersuinikkut ingerlatsineq.
3)  Nunalerinermut sammisunik inuussutissarsiutinik siuarsaaneq.
4)  Imminut pilersorneq.
5)  Nukissiuuteqarnermi immikkoortumut pilersaarut.
6)  Nukissiutinik ataavartunik ineriartortitsineq.
7)  Nukimmik, imermik kiassarnermillu pilersuineq.
8)  Pilersuinermik naalakkersuinikkut ingerlatsineq.
9)  Nunami namminermi nunanilu tamalaani pinngortitaq pillugu illersuinermik inatsiseqarneq.
10)  Avatangiisit aamma Upalungaarsimaneq.
11)  Aalisakkanik piniakkanillu tunisassianut tunitsiveqarneq pillugu ingerlatseqatigiiffinnut assigiinngitsunut kiffartuussinissamik isumaqatigiissutit.
12)  Silap pissusaanut naleqqussarneq aamma nunami namminermi silap pissusaatigut anguniakkanik naalakkersuinikkut ingerlatsineq.

 

Immikkoortortat attuumassutillit

 

  § 19.  Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik ukuninnga immikkoortortaqarpoq; naalakkersuisoqarfimmut oqartussaanerusumut maalaaruteqarfiusinnaasut, allamik inatsisitigut aalajangersaasoqarsimanngippat:
1)  Nukissiorfiit.
2)  Aatsitassarsiornermi Avatangiisinut Aqutsisoqarfik.
3)  Asiaq, Kalaallit Nunaanni misissueqqaarnerit.

 

Immikkoortortat nammineertitat

 

  § 20. Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup atasuupput immikkoortut nammineertitat uku, oqartussaanerusumut maalaaruteqarfigineqarfiusinnaanngitsut:
1)  Pinngortitaleriffik.

 

Kapitali 10

Ineqarnermut Attaveqaqatigiinnermullu Naalakkersuisoq

 

  § 21.  Ineqarnermut, Attaveqatigiinnermut, Aatsitassanut Naligiissitaanermullu Naalakkersuisoqarfik ukuninnga immikkoortortaqarlunilu suliassaqarfeqarpoq:
1)  Ineqarneq Illuuteqarnerlu.
2)  Sanaartorneq.
3)  Sanaartornermut oqartussaaneq.
4)  Attaveqarneq.
5)  Angallanneq.

 

Immikkoortortat attuumassutillit

 

  § 22. Ineqarnermut Attaveqaasersuutinullu Naalakkersuisoqarfik uuminnga immikkoortortaqarpoq; naalakkersuisoqarfimmut oqartussaanerusumut maalaaruteqarfiusinnaasoq, inatsisitigut allamik aalajangersaasoqarsimanngippat:
1)  Mittarfeqarfiit.
2)  Nalunaarasuartaateqarnermi Aqutsisut.

 

Kapitali 11

Meeqqanut, Inuusuttunut Ilaqutariinnut Peqqissutsimullu Naalakkersuisoq

 

  § 23.  Meeqqanut, Inuusuttunut Ilaqutariinnullu Naalakkersuisoqarfik ukuninnga immikkoortortaqarlunilu suliassaqarfeqarpoq:
1)  Atualersussat.
2)  Meeqqat inuusuttullu ajornartorsiutillit
3)  Ilaqutariit meeqqallu.
4)  Pinaveersaartitsineq.
5)  Meeqqanut inuusuttunullu isumaginninneq.
6)  Meeqqat illersuisuat meeqqallu pillugit siunnersuisoqatigiit.
7)  Innarluutillit.
8)  Innarluutillit illersuisuat.
9)  Inuit pisinnaatitaaffii.

 

  § 24.  Peqqinnissamut Naalakkersuisoqarfik ukuninnga immikkoortortaqarlunilu suliassaqarfeqarpoq:
1)  Peqqissuseq pillugu inatsiseqarneq.
2)  Peqqinnissaqarfiup aqunneqarnera aaqqissugaaneralu.
3)  Peqqinnissakkut sullissineq.
4)  Kigutilerineq.
5)  Imigassat aalakoornartullit, tupa pujortartarnerlu pillugit inatsiseqarneq.
6)  Pinngitsuuisinnaajunnaarsimasunik katsorsaasarneq pillugu inatsiseqarneq.

 

Immikkoortortat ataaniittut

 

  § 25.  Meeqqanut, Inuusuttunut Ilaqutariinnullu Naalakkersuisoqarfik uuminnga immikkoortortaqarpoq, naalakkersuisoqarfimmut oqartussaanerusumut maalaaruteqarfiusinnaasoq, inatsisitigut allamik aalajangersaasoqarsimanngippat:
1)  Isumaginninnermut Aqutsisoqarfik.

 

  § 26.  Peqqinnissamut Naalakkersuisoqarfik ukuninnga immikkoortortaqarpoq; naalakkersuisoqarfimmut oqartussaanerusumut maalaaruteqarfiusinnaasut, inatsisitigut allamik aalajangersaasoqarsimanngippat:
1)  Peqqinnissamut Aqutsisoqarfik.
2)  Allorfik - Pinngitsuuisinnaajunnaarsimasunik katsorsaasarneq.

 

Immikkoortortat nammineertitat

 

  § 27.  Meeqqanut, Inuusuttunut Ilaqutariinnullu Naalakkersuisoqarfik ukuninnga nammineertitanik immikkoortortaqarpoq; oqartussaanerusumut aalaaruteqarfiusinnaanngitsut:
1)  MIO, Meeqqat illersuisuat.
2)  TILIOQ, Innarluutillit illersuisuat.
3)  Nunatta Nakorsaaneqarfia (NUN).

 

Kapitali 12

Atuutilerfia

 

  § 28.  Kaajallaasitaq una ulloq 1. juni 2022-imi atuutilersinneqarpoq.
  Imm. 2.  Peqatigisaanik suliassaqarfiit agguataarnerat pillugu kaajallaasitaq nr. 1, 20. april 2022-imeersoq (Suliassaqarfiit agguataarnerat) atorunnaarsinneqarpoq.

 

 

 

Naalakkersuisut Siulittaasuata Naalakkersuisoqarfia, ulloq 25. maj 2022

 

 

 

Múte Bourup Egede
Naalakkersuisut Siulittaasuat

 

 

 

/ Hans-Peder Barlach Christensen

 

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk