Atuarfik pillugu Inatsisartut peqqussutaat nr. 8, 21. maj 2002-meersumi § 7, imm. 4 naapertorlugu aalajangersarneqarput:

 

Atuanngiffeqarnissamik pilersaarut

§ 1. Atuartut aasaanerani atuanngiffeqarnerat minnerpaamik sapaatip-akunnerinik arfineq-marlunnik sivisussuseqassaaq, inissinneqassallunilu juunip aallaqqaataata aggustillu 31-ata akornannut.
Imm. 2. Ilinniartitaanermut Pisortaqarfiup inaarutaasumik misilitsittarnerit ingerlanneqarnissaat tunngavigalugu ulloq aasaanerani atuanngiffiup aallartiffissaa aalajangersinnaavaa.
Imm. 3. Sapaatit saniasigut ullut uku pinngitsoorani atuanngiffiussapput:
Juulliaraq
Juullerujussuaq
Juullip ulluata aappaa
Ukiutoqaq
Ukiortaaq
Sisamanngorneq Illernartoq
Tallimanngorneq Tannaartoq
Poorskip-aappaa
Tussiarfissuaq
Qilaliarfik
Piinsip-aappaa
Kalaallit inuiattut ulluat, 21. juni
Imm. 4. Kunngit pingasut ulluanni, januaarip ulluisa arfernanni aamma Namminersornerulernerup ulluanni, maajip aallaqqaataani, atuarfiit matusinnaapput nal. 12, ullorlu ullortut atuarfiusutut naatsorsuunneqartassaaq.
Imm. 5. Najukkami pissutsit aallaavigalugit atuanngiffiup ullullu atuanngiffissarititaasut qanoq inissinneqartarnissaannut tunngasut pisariaqartitsineq naapertorlugu isummerfiginiartariaqartassapput.
Imm. 6. Najukkami ullut atuanngiffissat aalajangersarneqarneranni ullut naggataarutaasumik misiliiffissat nalerornaveersaarneqartassapput.
Imm. 7. Atuarfiit ullut atuanngiffissat pillugit pilersaarusiatik ukiut tamaasa Ilinniartitaanermut Pisortaqarfimmut ilisimatitsissutitut nassiuttassavaat.

 

Atortuulersitsinermik aalajangersakkat

§ 2. Nalunaarut manna 1. august 2003 aallarnerfigalugu atortuulersinneqarpoq.
Imm. 2. Peqatigitillugu atuarfinni atuanngiffeqarnissat pillugit Namminersornerullutik Oqartussat nalunaarutaat nr. 15, 3. juli 2000-imeersoq atorunnaarpoq.

Namminersornerullutik Oqartussat 5. marts 2003

Arkalo Abelsen

/

Lise Lennert Olsen