Kalaallit Nunaat tamakkerlugu piffissami 13.-16. juli 2021 killilersuigallarnerit pillugit Namminersorlutik Oqartussat nalunaarutaat nr. 27, 13. juli 2021 Atuussimasoq (Historisk)

Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi §§ 6, 6 a aamma 12 a, 12 b kiisalu § 29, imm. 2 aamma 3 naapertorlugit uku aalajangersarneqarput:

 

Atuuffia

 

  § 1.  Nalunaarut Kalaallit Nunaat tamakkerlugu atuuppoq.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaanermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4.  Nalunaarut eqqartuussivinnut atuutinngilaq.
  Imm. 5.  Nalunaarut mittarfinnut, tikittarfinnut/aallartarfinnut assigisaannullu atuutinngilaq.
  Imm. 6.  Nalunaarut ulluunerani neqeroorutinut namminersortunut pisortaniillu pigineqartunut, atuarfinnut, ilinniarfeqarfinnut il.il. atuutinngilaq, nappaatit tunillaassortut akiorniarlugit iliuutsit pillugit Inatsisartut peqqussutaanni § 22 takuuk.
  Imm. 7.  Nalunaarummi §§ 2-4 aamma § 6, imm. 1, nr. 1 suliffeqarfimmi sulisunut atuutinngillat.
  Imm. 8.  Nalunaarut angerlarsimaffimmi aaqqissuussanut assigisaannullu atuutinngilaq.
  Imm. 9.  Nunatta nakorsaaneqarfia nalunaarummit immikkut ittumik akuersissuteqarsinnaavoq.

 

Illup iluani aaqqissuussani il.il. peqataasinnaasut amerlassusaannik killilersuinerit

 

  § 2.  Aaqqissuussat, nalliuttorsiornerit, sammisaqartitsinerit assigisaalluunniit illup iluani ingerlanneqartussat amerlanerpaamik 20-nik peqataasoqaqqusaapput.

 

Aaqqissuussani il.il. silami ingerlanneqartussani peqataasinnaasut amerlassusaannik killilersuinerit

 

  § 3.  Aaqqissuussat, nalliuttorsiornerit, sammisaqartitsinerit assigisaalluunniit silami ingerlanneqartussat amerlanerpaamik 20-nik peqataasoqaqqusaapput.

 

Ininut kikkunnilluunniit iserfigineqarsinnaasunut piumasaqaatit

 

  § 4.  Inuussutissarsiummik ingerlatallit aamma suliffeqarfiit pisortanit pigineqartut ininik kikkunnit tamanit iserfigineqarsinnaasunik pigisallit piumasaqaatit tullinnguuttut maleruassavaat:
1)  Inuit ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat isersimaqqusaapput, taamaattorli § 2 takuuk.
2)  Inini qatserisartoqarfinni oqartussaasunit akuersissutitaqartinneqanngitsuni, natermi 4 m2-iusumi amerlanerpaamik inuk ataasiinnaaqqusaavoq. Nateq 4 m2-imik mikineruppat oqaaseqatigiit siulliit apeqqutaatinnagit inuup ataatsip isersimanissaa akuerineqarpoq. Nateq qanoq pequteqartiginera apeqqutaatinnagu iikkamiit iikkamut naatsorsorneqassaaq.

 

Pisortat angallassissutaanni amerlassutsinik killilersuineq

 

  § 5.  Pisortat angallassissutaat, tassunga ilanngullugit bussit aamma taxat, issiaffiusinnaasut sinnerlugit ilaasoqaqqusaanngillat.
  Imm. 2.  Imm. 1-ip maleruarneqarnissaata qulakkeernissaa assartuummik piginnittup akisussaaffigaa.

 

Qanermut imaluunnit kiinnamut assiaquteqarnissamut piumasaqaat

 

  § 6.  Inuit aqqaneq-marlunnik sinnerlugillu ukiullit kiinnamut assiaquteqassapput:
1)  inini kikkunnit tamanit iserfigineqarsinnaasuni isersimagunik, takuulli nr. 2. 
2)  niuertarfinni – aamma kiffartuussivinni sulisut, pisinianik attaveqaraangata, takuulli imm. 3.
3)  assartuutini kikkunnit tamanit ilaaffigineqarsinnaasuni, tassunga ilanngullugit bussini taxanilu ilaagunik.
Imm. 2.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
  Imm. 3.  Niuertarfinni – aamma kiffartuussivinni sulisut qanermut imaluunniiit kiinnamut assiaqutinut taarsiullugu, sulisup pisiniallu akornanni plastikkimik assiaqusersinnaapput.

 

  § 7.  Qanermut assiaqutit tassaapput qanermut qinngamullu assiaqutit ataasiartakkat imaluunniit annoraaminermik sanaat allunaasamik, tasisartumik assigisaanilluunniit siutinut imaluunniit niaqqup tunuatungaanut sukarutillit kiinnamullu attuumasut.
  Imm. 2.  Kiinnamut assiaqutitut tassaapput isinut, qinngamut qanermullu imaluunniit qinngamut qanermullu assiaqutit plastikimik sanaat kiinnamut attuumanngitsut.

 

Pineqaatissiissuteqartarneq

 

  § 8.  §§ 2-4, aamma § 5, imm. 1-imik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.
  Imm. 3.  Akiliisitaanerit Nunatta Karsianut tutsinneqassapput.

 

Atuutilersitsineq aamma atuunneranut piffissaliussaq

 

  § 9.  Nalunaarut ulloq 13. juli 2021-mi nal. 19:00 atuutilissaaq. 
  Imm. 2.  Nalunaarut malillugu killilersuinerit, inerteqqutit, peqqussutit il.il. 16. juli 2021 ilanngullugu atuutissapput.

 

 

Namminersorlutik Oqartussat, ulloq 13. juli 2021

 

 

Kirsten Fencker
Peqqinnissamut Naalakkersuisoq

 

 

/ Aka Olesen

Ujaasineq
Sammisamut ujaarliineq

Nassiuguk ikinngutinnut

Uunga e-mail

Atit

Ilisimatitsissut

Luk